20
Kanicau arǝ amǝtúró ɓaban
1 Yesu lidǝmba nǝ kanigir male ama:
À nǝ̀ kànì Domurǝm mala kùli arǝ ɓè mǝtala ɓaban mǝnana pur nǝ dǝmbari ɗiɗyal ace alta amǝtúró ɓǝa kya pakki wi túró a ɓaban male ka. 2 Yì ka, eare nǝ̀ pea wia dinari mwashat ace túró pwari mwashat. Pǝlǝa tasǝia a ɓaban male.
3 A bu-pwari tongno-nong-ine nǝ dǝmbari ka, yi kum aɓea aɓwana aban came ɓà a kún limo. 4 Pǝlǝa nea wia ama, <<Wun gbal ka wu kya túró a ɓaban mem, mǝ nǝ mbwe wun gìr mǝnana kat nda ɓoaro ɓǝà pa wun ngga.>> 5 Pǝlǝa à bwal njar à wario.
Nyare pur ɗǝm nǝ pwarizǝkya andǝ wulio mala pwari kya pwan aɓea amǝ'túrô. 6 A bu-pwari tongno mala pwarikpǝra ka, nyare puro kya kum aɓea aɓwana ɗǝm aban came à kǝ pak kǝgìr ɗang. Sǝ ɗia ama, <<Mana tsǝa sǝ pwari kpa wun kani aban came ɓà wu kǝ pak kǝgìr ɗang?>>
7 À eari wi ama, <<Kǝ ɓwa pà sǝm túró mǝnana sǝm nǝ̀ pak ka ɗàng.>>
Pǝlǝa nea wia ama, <<Wu kyan gbal a túró a ɓaban mem.>>
8 Lang pwari kpana ka, mǝtala ɓaban ne ɓwa mǝnana tsǝi ɓǝ̀ kǝ sǝnbi wi ɓaban ngga ama, <<Tunǝ amǝtúró, mbwea tangnakusǝia. Tite amur amǝ'nzǝ́mò sǝ wu kya mur amǝdǝmba.>>*20:8 Ɓalli gbal aɓa: Pǝris 19:13; Nggur 24:15.
9 Aɓwana mana à twalia a bu-pwari tongno mala pwarikpǝra ka, ko yana ka à mbwe dinari mwashat. 10 Amana à twalia nǝ dǝmbari ka à yiu nǝ tsǝkɓalǝu ama malea nǝ̀ kútì mala aɓwana mǝno ka. Sǝ kǝ boalo mǝ'mwashati na à pea wia ka. 11 Lang à angŋǝna boalo ka, à tita nggwani arǝ mǝtala ɓaban. 12 À bang ama, <<Aɓwana mǝnana à twalia túró nǝnzǝ́mò ka, à pak túró bu-pwari mwashat, kǝ ndo ka, sǝ à mbwe sǝm, sǝm karǝ sǝnǝia, sǝm mǝnana pwari wal sǝm málá amur sǝm aban túró ka.>>
13 Pǝlǝa eari ɓeɓwa mwashat ateà ama, <<Ɓiam, ǝn lio ɗang. A ear amur dinari mwashat re? 14 Twal gìr mǝnana à mbweo ka o. Nǝ eare mem sǝ ǝn mbweo kǝla mana ǝn mbwe ka amǝ'nzǝ́mò ka. 15 Pa mǝ nǝ gandǝ pak gìr mana ǝn earce ka nǝ boalo mem re? A kǝ pak mɓali ace ɓoaro mem le?>>
16 Anggo sǝ amǝ'nzǝ́mò à nǝ̀ pǝlǝ amǝdǝmba, sǝ amǝdǝmba nǝ̀ pǝlǝ amǝ'nzǝ́mò.†20:16 Ɓalli gbal aɓa: Mat 19:30; Mar 10:31; Luk 13:30.
Yesu bang cau ɗǝm amur lú male
(Markus 10:32-34; Luka 18:31-34)
17 Lang Yesu nda aban o a Urǝshalima ka, tunǝ alaggana male lum-nong-ɓari a giriban, sǝ nea wia ama:
18 Sǝm ndo sǝm nggǝ eauwe aban ká a Urǝshalima ka, sǝ Muna mala Ɓwa ka à nǝ̀ nggá me a ban agbani pǝris andǝ amǝkani Nggurcau. À nǝ̀ pakki wi ɓashi mǝnana nǝ̀ ká nǝi a lú ka. 19 À nǝ̀ tasǝì a bu aɓwana mǝnana amǝ Yahudi na raka‡20:19 aɓwana mǝnana amǝ Yahudi na raka: A mǝnia ka à nda ka amǝ Roma mana a bàkú mǝno ka amǝ Isǝrayila na aɓata nggwamnati malea ka.mǝnana à nǝ̀ ɓǝsǝki, à nǝ̀ koè, sǝ à nǝ̀ gbàllì a nggun-gangndǝi ka. A tàruià nongŋo ka nǝ̀ lo nǝ yilǝmu!
Zǝmba mala nggea ka
Yohana andǝ Jemis
Yohana andǝ Jemis
(Markus 10:35-45)
20 Nggea ka muna mala Zabadi yiu a ban Yesu nǝ amuni Yohana andǝ Jemis, sǝ yi kū`ndǝó a nzali sǝ zǝm ɓwamuru.
21 Yesu ɗì ama, <<Mana a earkiyice?>>
Pǝlǝa na ama, <<Mǝ nda aban zǝmba ama alaggalem mǝnia ɓari ka, wu tsǝk mwashat ɓǝ̀ do a buo mǝlì, sǝ ɓè mǝnia ka a buo mǝ'nggare a Domurǝm mò.>>
22 Yesu nyesǝia wia ama, <<Wu súrǝ̀ gir mǝnana wu zǝmgi ka ɗang. Wu nǝ̀ gandǝ nu tanni mǝnana ado mǝ nǝ nu ka le?>>
À ear ama, <<E, sǝm nǝ̀ gandǝi.>>
23 Yesu nea wia ama, <<Ɓafo, wu nǝ̀ gandǝ nu tanni mǝnana mǝ nǝ nu ka, sǝama pa ban-do a buam-mǝlì ko mǝ'nggare ka pà aɓa rǝcandǝa mem ɗang. Amǝnia yì aban ngga, à nda ace aɓwana mǝnana Tárrám gilǝkia wia ka.>>
24 Lang acili alaggana mala Yesu mǝnia lum ok ce ka, bumia lúllô arǝ amǝ'eambu mǝnia ɓari ka. 25 Yesu pǝlǝa tunǝia abanarǝia sǝ na ama, <<Wu sǝlǝa ama amurǝma mala mǝnia yì ɓanza ka à kǝ lǝmdǝ gulo amur aɓwana malea, sǝ aɓwana-mǝgule malea kǝ lǝmdǝia wia rǝcandǝa. 26 Sǝ ma'wun ngga, anggo sǝ nǝ̀ pak ɗang. Ɓǝ̀ ya ɓwa na earce nǝ̀ duk ɓwamǝgule atà wun ngga, dumǝna púp nǝ̀ nyesǝ ɓamúrì nda muna-ɓala a ban wun.§20:26 Ɓalli gbal aɓa: Mat 23:11; Mar 9:35; Luk 22:26. 27 Sǝ ɓwa mǝnana earce nǝ̀ duk murǝm ngga, dumǝna púp nǝ̀ duk guro ma'wun. 28 Nda kǝla Muna mala Ɓwa, mǝnana yiu ace dumsǝ aɓwana aguro raka. Yiu ace duk guro sǝ nǝ̀ pa yilǝmi ace amsǝ*20:28 amsǝ: Ko <<akmúr>>aɓwana pas.>>
Ante ɓari kum sǝnban
(Markus 10:46-52; Luka 18:35-43)
29 Lang Yesu andǝ alaggana male na rǝ purrì ɓá là Jeriko ka, aɓwana pas kana ateà. 30 Ante ɓari na ban do a girǝi njargula. Lang à ok ama Yesu na kǝ kútí ka, à loasǝ già ama, <<Mǝtalabangŋo, Muna mala Dauda,†20:30 Muna mala Dauda: Ko <<Mǝkà Dauda.>> sǝn mǝsǝswatǝr ma'sǝm!>>
31 Ɓwabunda sà arǝia ama ɓǝà duk kunia più. Sǝ à ɓinǝe, à loasǝ già bàng-bàng ama, <<Mǝtalabangŋo, Muna mala Dauda, sǝn mǝsǝswatǝr ma'sǝm!>>
32 Yesu pǝlǝa came sǝ ɗia ama, <<Mana wu earkiyice ɓǝ̀n pakka wun?>>
33 À banggi wi ama, <<Ɓwamǝgule, sǝm nggǝ earce ɓǝ̀ mǝsǝ sǝm sǝnban.>>
34 Yesu sǝn mǝsǝswatǝr malea sǝ tsǝk buì a mǝsǝia. Kara mǝsǝia mǝnna àkǝ̀ banì, pǝlǝa a o atè.
*20:8 20:8 Ɓalli gbal aɓa: Pǝris 19:13; Nggur 24:15.
†20:16 20:16 Ɓalli gbal aɓa: Mat 19:30; Mar 10:31; Luk 13:30.
‡20:19 20:19 aɓwana mǝnana amǝ Yahudi na raka: A mǝnia ka à nda ka amǝ Roma mana a bàkú mǝno ka amǝ Isǝrayila na aɓata nggwamnati malea ka.
§20:26 20:26 Ɓalli gbal aɓa: Mat 23:11; Mar 9:35; Luk 22:26.
*20:28 20:28 amsǝ: Ko <<akmúr>>
†20:30 20:30 Muna mala Dauda: Ko <<Mǝkà Dauda.>>