22
Kanicau arǝ Pakkiɗire Isǝ ɓwama
(Luka 14:15-24)
1 Yesu ne aɓwana cau ɗǝm nǝ akanicau ama:
2 Domurǝm mala Ɓakuli ka à nǝ̀ kànì arǝ pakkiɗire mana ɓè murǝm tunǝo ace isǝ mālá muni ka. 3 Túr amuna-ɓala male ɓǝà kya ne aɓwana mǝnana à tunǝia ka ɓǝà yiua pakkiɗire isǝban. À ginǝ yiu.
4 Nyare túr aɓea amuna-ɓala male ɓǝà kya ne aɓwana mǝnana à tunǝia ka ama, <<Ən malǝna pak girlina kat. Ən walǝna ajamnda andǝ alo-nda amǝ'nyange mem. Girbunda kat ka à malǝna pe. Wu yiua pakkiɗire isǝban!>>
5 Amǝnia yì aɓwana à tunǝia ka à tsǝk kiria ɗàng, à kùtí a pakkia agir malea mana ɓoaria wia ka. Ɓè ɓwa ka o a ɓaban male, sǝ ɓeɓwa ka o a ban kúrkúró male. 6 Acilia man ngga à bwal amuna-ɓala male à pakkia wia mǝɓane sǝ à wal-luia.
7 Bum murǝm man lul kǝ̀rkǝ́r; tasǝ asoje male à yì wal amǝwalkialu man, sǝ à pisǝ la malea.
8 Pǝlǝa tunǝ amuna-ɓala male sǝ nea wia ama, <<Girbunda kat mala pakkiɗire isǝban ngga à malǝna pe. Sǝ aɓwana mǝnana ǝn tunǝia ka à kārǝa à nǝ̀ yiu a ban isǝban ɗang. 9 Ado ka wu kyane amur agauwata anjarɓala sǝ wu tunǝ aɓwana mǝnana kat wu kumia a kàm ngga, ɓǝà yiua pakkiɗire.>> 10 Nda amuna-ɓala man puro à o arǝ agauwata anjarɓala sǝ à tunǝki aɓwana mǝnana kat à kum ngga, amǝɓane andǝ amǝɓoarne. À yì lumsǝ ɓala isǝban.
11 Lang murǝm kutio nǝ̀ sǝn abǝri ka, mǝsǝì kpa arǝ ɓeɓwa na kam mana túr daura isǝban arǝì raka. 12 Pǝlǝa murǝm ɗì ama, <<Ɓiam, a kar lang sǝ a yiu kani daura isǝban pa a rǝo ɗàng?>> Yì ka, kum cau mǝnana nǝ̀ na ka ɗàng.
13 Murǝm ne amuna-ɓala ama, <<Wu taka bui andǝ akusǝi, wu túrí a nza aɓa pǝndǝa. Akanó sǝ nǝ̀ ɓua nǝ̀ nggǝ nǝmnggi munabuì.>>*22:13 Ɓalli gbal aɓa: Mat 8:12; 25:30; Luk 13:28.
14 Ɓakuli tunǝ aɓwana pas sǝ bǝti na à dum nǝ mǝsǝcau ɓǝ̀ Ɓakuli tària ka.
Amǝ Farisi ɗì Yesu
amur mbwe boalo-cemi
amur mbwe boalo-cemi
(Markus 12:13-17; Luka 20:20-26)
15 Amǝ Farisi o à kya kurkunarǝia amur njargula mǝnana à nǝ̀ bwali nǝi kàm aɓa nacau ka. 16 Pǝlǝa à túr amuna-ɓala malea andǝ aɓea ɓwana mala Hirǝdus a baní. À na ama, <<Malǝm, sǝm sǝlǝna ama we ka a nda ɓwa mǝɓafoe, ɗǝm ngga a kǝ kani tanjar mala Ɓakuli nǝ mǝsǝcau. A kǝ tàr ɓwa ɗang, acemǝnana aɓwana kat a bano ka à nda mwashat. 17 Bangga sǝm, a sǝne mo ka, ɓoaro ɓǝ̀ sǝm pè Kaisar, Murǝm mala amǝ Roma boalo-cemi le ko ɓoar ɗang?>>
18 Yesu súrǝ́nà rǝ ɗenyicau malea mǝɓane kat pǝlǝa ɗia ama, <<Wun amǝ'kúnɓárína, ace mana sǝ wu kǝ earce tambam? 19 Wu lǝmdǝam mǝsǝboalo mana à mbwekina boalo cemi nǝi ka!>>
À pǝlǝa à pè wi mǝsǝboale. 20 Sǝ ɗia ma, <<Lullǝ yana andǝ foto mala yana arǝ mǝsǝboalo mǝnia ka?>>
21 À eari wi ama, <<Mala Kaisar na.>>
Pǝlǝa nea wia ama, <<Gìr mǝnana mala Kaisar na ka wu pè Kaisar, sǝ mǝnana mala Ɓakuli na ka wu pè Ɓakuli.>> 22 Lang à oè anggo ka, à ndali; kara à ɗeki à bwal njar malea à o.
Amǝ Saduki ɗì Yesu
amur loapi ɓembe
amur loapi ɓembe
(Markus 12:18-27; Luka 20:27-40)
23 Àkǝ̀ pwari mǝno ka amǝ Saduki mǝnana à nakiyi ama loapi ɓembe pà kàm raka à yiu a ban Yesu à yì ɗì ama,†22:23 Ɓalli gbal aɓa: Atúró 23:8. 24 <<Malǝm, Musa bang ama ɓǝ̀ ɓwa wu pànǝ muna raka mǝ'eambi ɓǝ̀ al māmí ɓǝ̀ ɓǝli lú amuna. 25 A ban sǝm ɗiɗyal ka aɓea aɓwana tongno-nong-ɓari à nda amǝ'eambu. Mǝdǝmba malea al ɓwama sǝ wu ko kum muna andǝi ɗàng. Ɓwa mǝnana kpa a nzǝmi ka pǝlǝa twal ɓwame. 26 Anggo gbal sǝ kum ɓaria andǝ tàruià, kya bwal bu tongno-nong-ɓaria. 27 A nzǝm lú malea kat ka, pǝlǝa ɓwame wu. 28 Sǝ ado ka, a pwari loapi ɓembe ka, yana aɓalǝia nda bura ɓwama, yì mana yia kat ka à dumǝna nǝi ka?>>
29 Yesu pǝlǝa earia wia ama, <<Wu ɓwarkio ace ɗwanyi súrǝ̀ Malǝmce andǝ rǝcandǝa mala Ɓakuli. 30 A pwari loapi ɓembe ka alban pà kàm ɗǝm ɗàng. Ko yana le ka nǝ̀ do kǝla amǝturonjar mana a kùli ka. 31 Sǝ amur loapi ɓembe ka, wu ɓal cau mana Ɓakuli bangga wun ngga re? Na ama, 32 <Mǝ nda Ɓakuli mala Ibǝrayim, mala Ishaku, andǝ mala Yakupu.> Ɓakuli ka mala alú na ɗang, mala aɓwana mana nǝyilǝmu ka nda.>>‡22:32 Ɓalli gbal aɓa: Pur 3:6.
33 Lang aɓwabundǝa ok mani ka, à ndali nǝ kanigir male.
Nzongcau mana kàrmúr aɓi ka
(Markus 12:28-34; Luka 10:25-28)
34 Lang amǝ Farisi ongŋǝna ama Yesu gandǝna amǝ Saduki ka, à ram rǝia à yiu. 35 Ɓè ɓwa aɓalǝia mǝnana súrǝ̀ Malǝmce mala Musa pepè ka, ɗì ama, 36 <<Malǝm, atà anzongcau mǝnana aɓa Nggurcau mala Musa ka, mǝ yani na kútì aɓea?>> 37 Yesu ne wi ama:
<<Earce Mǝtalabangŋo, Ɓakuli mô nǝ ɓabumo mwashat, nǝ yilǝmo kat andǝ ɗenyicau mò kat.>>§22:37 Ɓalli gbal aɓa: Nggur 6:5.
38 Mǝnia ka nda nzongcau mǝdǝmbe andǝ mǝgule mǝnana kútì aɓea kat ka. 39 Mǝnana kpate ka nda kǝla yì, ama: <<Earce ɓio mǝkunɓala kǝla mǝnana a earce ɓamúrò ka.>>*22:39 Ɓalli gbal aɓa: Pǝris 19:18.
40 Nggurcau kat andǝ Akanìgìr mala amǝ'ɓangnǝa mala Ɓakuli ka, à gyare arǝ anzongcau mǝnia ɓari ka.
Yesu ɗì amǝ Farisi amur Mezaya
(Markus 12:35-37; Luka 20:41-45)
41 Lang amǝ Farisi ramǝna a banɓwáná ka, Yesu ɗia ama, 42 <<Mana nda ɗenyicau ma'wun amur Mezaya?†22:42 Mezaya: Ko <<Kǝrǝsti>>Muna mala yana?>>
À eare ama, <<Muna mala Dauda‡22:42 Muna mala Dauda: Ko <<Mǝkà Dauda.>> na.>>
43 Yesu nea wia ama, <<Ɓǝ̀ muna mala Dauda na ka, palang sǝ Dauda, nǝ́ kanì mala Bangŋo mala Ɓakuli a bumi ka, tunǝi ama <Mǝtalem?> Acemǝnana yì Dauda ka bang ama,
44 << <Mǝtalabangŋo ne
Mǝtalem ama:
Do a buam mǝlì,
she ɓǝ̀ ǝn tsǝ́ngŋǝ̀nà
aɓio-amǝbura aɓata
kusǝo ka.>§22:44 Ɓalli gbal aɓa: Ang 110:1.
45 Sǝ ɓǝ̀ Dauda tunǝ Mezaya ama <Mǝtalem> ngga, palang sǝ Mezaya nǝ̀ pǝlǝ muni?>>
46 Kǝɓwa gandǝ nyesǝi wi cau ɗàng, sǝ àkǝ̀ pwarinì ka, kǝɓwa nyare ɗì ɗǝm ɗàng.
*22:13 22:13 Ɓalli gbal aɓa: Mat 8:12; 25:30; Luk 13:28.
†22:23 22:23 Ɓalli gbal aɓa: Atúró 23:8.
‡22:32 22:32 Ɓalli gbal aɓa: Pur 3:6.
§22:37 22:37 Ɓalli gbal aɓa: Nggur 6:5.
*22:39 22:39 Ɓalli gbal aɓa: Pǝris 19:18.
†22:42 22:42 Mezaya: Ko <<Kǝrǝsti>>
‡22:42 22:42 Muna mala Dauda: Ko <<Mǝkà Dauda.>>
§22:44 22:44 Ɓalli gbal aɓa: Ang 110:1.