9
1 Yesu lidǝmba nǝ nacau ama:
Ɓafo, ǝn nggǝ bangga wun, aɓalǝ wun mǝnia wu cam ngga, aɓea aɓwana nakam mǝnana à pà nǝ̀ wu raka, she ɓǝa sǝna Domurǝm mala Ɓakuli yina nǝ rǝcandǝa ka.
Nggurǝ Yesu nggaɗi
(Matiu 17:1-13; Luka 9:28-36)
2 Anzǝm nongŋo tongno-nong-mwashat ka, Yesu tunǝ Bitǝrus, sǝ Jemis, sǝ Yohana. Pǝlǝa um nǝia amur nkono mǝ'dāhre, nǝmurǝia. Akanó ka rǝ Yesu twalo nggaɗi àkǝ̀ ɓamǝsǝia.*9:2 Ɓalli gbal aɓa: 2Bit 1:17,18. 3 Anggubyau rǝì pwasǝ tyal-tyal mǝnana kǝɓwa pà kàm a ɓanza mǝnia ka nǝ̀ gandǝ lak gìr nǝ̀ fa anggo raka. 4 Kara Iliya, andǝ Musa, à pusǝrǝia à kǝ nacau nǝ Yesu.
5 Bitǝrus ne Yesu ama, <<Malǝm, yàwá, mǝnana ado sǝm ndakani ka. Sǝm nǝ̀ kar gumli tàrú, mwashat ka nda aceo, mwashat ka nda ace Musa, sǝ man mwashat ka nda ace Iliya.>> 6 Yì andǝ aɓi ka ɓangciu bwalia kǝ̀rkǝ́r, yàle súrǝ̀ gir mǝnana nakiyi cau amurí ka ɗang.
7 Pǝlǝa pǝrɓang puro yi gir múrià. Gi Ɓakuli pur nǝ ɓá pǝrɓang ama, <<Mǝnia ka nda Munem mǝnana ǝn earkiyi ace raka. Wu oki wi.>>†9:7 Ɓalli gbal aɓa: Mat 3:17; Mar 1:11; Luk 3:22. 8 À nǝ̀ loasǝ mǝsǝia ka, ko à sǝn kǝɓwa ɗang, kǝ Yesu na nǝmurǝì.
9 À nda aban sùlǝî mur nkono ka, Yesu nunkiria nea wia ama, <<Wu kǝa ne kǝɓwa ce gìr mǝnana wu sǝn ngga ɗang, she ɓǝ̀ Muna mala Ɓwa longŋǝni ɓembe ka.>> 10 Pǝlǝa à bwal ce gbal àkǝ̀ rǝarǝia, à kutio amur naki acau amur, <<Loapi ɓembe ka ɓālǝi nda mana?>>
11 Pǝlǝa à ɗì Yesu ama, <<Palang sǝ amalǝm Nggurcau mala Musa bang ama, Iliya nǝ̀ aki Kǝrǝsti dǝmba yiu?>>‡9:11 Ɓalli gbal aɓa: Mal 4:5; Mat 11:14.
12 Yesu earia wia ama, <<E, Iliya nǝ̀ yiu a dǝmba, nǝ̀ yia gilǝki agir kat ɓǝà duk pepè. Sǝ Malǝmce ka, na gbal mbo ama, Muna mala Ɓwa ka nǝ̀ tanni kǝ̀rkǝ́r sǝ à nǝ̀ ɓinǝi? 13 Sǝa ma ǝn nggǝ bangga wun, Iliya angŋǝna dǝmba yina, sǝ à pangŋǝni koya gìr mǝnana yia ka à earce ka, kǝla mǝnana à gilǝì amurí ka.>>
Yesu pusǝ kukwar arǝ muna
(Matiu 17:14-21; Luka 9:37-49)
14 Lang à nyarǝna aban acili alaggana ka, à sǝn ɓwapǝndǝa kǝ̀rkǝ́r rambǝa a rǝia, sǝ aɓea amalǝm Nggurcau mala Musa na aban makgìr andǝia. 15 Lang ɓwabundǝa nǝ̀ sǝn Yesu ka, à ndali kǝ̀rkǝ́r, sǝ à swár a mire à yì makki wi kun. 16 Yesu ɗì ka laggana male ama, <<Mana gir ni wu makkiyigìr wunǝia amurí?>>
17 Ɓè ɓwa aɓa ɓwabundǝa kasǝa ama, <<Malǝm, ǝn yiu nǝ munem a bano ace mǝnana wu twali ban rǝkwana ka. Ndanǝ kukwar arǝì, mǝnana kǝ eari wi nacau raka. 18 Ɓǝ̀ loarǝi ka, nǝ̀ me a nzali, ntāra nǝ̀ gupi a kúni, nǝ̀ nggǝ go minǝì, sǝ nǝ̀ shiuri kwanggong. Nda ǝn ne alaggana mo nǝma ɓǝa pusǝì sǝ à gandǝi ɗang.>>
19 Yesu nea wia ama, <<Wun amǝ ɗwanyi earnǝ Ɓakuli! Banem nǝ̀ sau lang atà wun sǝ wu nǝ̀ kani earnǝ cau? Banem nǝ̀ sau lang aban twal gandǝa nǝ wun? Wu yinǝàm nǝ munê!>>
20 À pǝlǝa à yiu nǝ muna. Lang kukwar nǝ̀ sǝn Yesu ka, kara kàr muna dǝkǝrǝki kǝ̀rkǝ́r, túrí a nzali. Muna camarǝ ɗǝnggǝliki, ntāra kǝ gupi a kúni.
21 Yesu ɗì tár muna ama, <<Aya pwari sǝ mǝnia yì gìr ka tikì tè?>>
Pǝlǝa eare ama, <<Tikì tè a muntulo. 22 A ɓè pwari ka kǝ me a bǝsa ko a mùr, ama nǝ̀ wal-luí. Sǝa ma ɓǝ̀ a nǝ gandǝi ka, sǝn mǝsǝswatǝr ma'sǝm, bwala sǝm nggam!>>
23 Yesu ɗì ama, <<Ace mana sǝ a na ama, <ɓǝ̀ a nǝ gandǝi ka?> Ko man ngga nǝ̀ gandǝ pa a ban ɓwa mǝnana earnǝ cau mala Ɓakuli nǝ ɓabumi kat ka.>>
24 Tár muna ear nǝ rǝɓǝla ama, <<Ən earǝna ǝn pana ɓamúràm, bwalàm nggàm ɓǝ̀ ǝn limurǝm amur ɗwanyi paɓamuru mem!>>
25 Lang Yesu sǝn ɓwapǝndǝa nǝ̀ nggǝ kana aban yiu ka, kara sà arǝ kukwar ama, <<We kukwar mala kir ara andǝ mala talasǝɓunna, ǝn nggǝ banggo nǝma, purrì rǝì, cea nyare a kútí kam ɗǝm ɗàng!>>
26 Kukwar mak'zwalo, pūrǝki muna wak, sǝ purî nyami. Muna nong kpoklyak, kǝla wu nǝ wú, gandǝa aɓea aɓwana bang ama, <<Wuna!>> 27 Yesu bwali a garabui, loasǝi amur akusǝi, pǝlǝa lo came.
28 Anzǝm mana Yesu nyarǝna a ɓala ka, alaggana male ɗiì a sǝmbǝrǝa, ama, <<Palang sǝ sǝm gandǝ pusǝ mǝno yì kukwar ka ɗàng?>>
29 Yesu nea wia ama, <<Ulang mǝnia yì kukwar ka, kǝ hiwi andǝ gilmùr nda nǝ̀ pusǝì ka.>>
Yesu bangce lú male
(Matiu 17:22-23; Luka 9:43-45)
30 À ɗeki ban mǝno à ara aɓa bu-nzali Galili. Yesu ear ama ɓǝ̀ kǝɓwa súrǝ̀ ban mǝnana à ndakam ngga ɗàng, 31 acemǝnana nda aban kani alaggana male gìr. Nea wia ama, <<Muna mala Ɓwa ka, à nǝ̀ kurakuro nǝi a ban aɓwana. À nǝ̀ wal-luí, sǝ a tàruià nongŋo ka nǝ̀ lo nǝ yilǝmu.>> 32 Sǝ ko à bwalta gìr mǝnana banggiyi ka ɗàng, sǝ ɓangciu pakkia wia ɓǝà ɗì amurí.
Yana gulo kútìban kat?
(Matiu 18:1-5; Luka 9:40-48)
33 Pǝlǝa à yiu a Kapanahum. Yi dumǝna a ɓala ka, Yesu ɗì ka laggana male ama, <<Mana wu makkiyigìr amurí a tanjar aban yiu?>> 34 Pǝlǝa à do kunia ɗǝong, acemǝnana a njargula ka, à makgìr amur ko yana aɓalǝia nda ɓwamǝgule kat.§9:34 Ɓalli gbal aɓa: Luk 22:24. 35 Lang Yesu dumǝna nǝ do ka, pǝlǝa tunǝ alaggana male lum nong-ɓari, nea wia ama, <<Ɓǝ̀ ɓwa earce duk mǝdǝmba ka, dumǝna púp ɓwe nǝ̀ duk mǝ'nzǝ́mò, sǝ nǝ̀ duk guro mala aɓi kat.>>*9:35 Ɓalli gbal aɓa: Mat 20:26,27; 23:11; Mar 10:43,44; Luk 22:26. 36 Pǝlǝa loasǝ muna mǝkyauwe tamsǝi a ɓadǝmbia. Núnní a nkanggari rǝi, sǝ nea wia ama, 37 <<Ɓwa mǝnana ak muna kǝla mǝnia aɓa lullǝam ngga, Mǝ nda akiyiam ngga. Sǝ ɓwa mǝnana em ngga, Mǝ nda akiyiam nǝmurǝam ngga ɗàng, nda ban ak Tárrám mǝnana tasǝam ngga.>>
Ɓwa mǝnana ɓinǝ sǝm raka
nda atà sǝm
nda atà sǝm
(Luka 9:49-50)
38 Yohana ne wi ama, <<Malǝm, sǝm sǝn ɓè ɓwabura aban pusǝki akukwar aɓa lùllǝò, sǝ sǝm pǝrki, acemǝnana yì ka, pa aɓalǝ sǝm ɗang.>>
39 Yesu ne wi ama:
Ce wu pǝrki ɗàng. Kǝɓwa pà kàm nǝ̀ pak gìr'ndali aɓa lullǝam, sǝ nyar tù nǝ̀ bang mǝɓane a muram ɗàng. 40 Ɓwa mǝnana kat ɓinǝ ce sǝm raka, nda atà sǝm.†9:40 Ɓalli gbal aɓa: Mat 12:30; Luk 11:23. 41 Ɓafo ǝn nggǝ bangga wun, ɓǝ̀ koyana sǝ pà wun mùr-nùná aɓa lullǝam, acemǝnana wu nda ka mala Kǝrǝsti ka, pà nǝ̀ ɗwanyi tangnakusǝi ɗàng.‡9:41 Ɓalli gbal aɓa: Mat 10:42.
Tsǝk ɓwa ɓǝ̀ pak cauɓikea
(Matiu 18:9-10; Luka 19:1-2)
42 Ɓǝ̀ koyana sǝ tsǝk mwashat aɓalǝ amuna mǝnana à earnǝ mim, sǝ pàk cauɓikea ka, nǝ̀ ɓoaribani ɓǝà ɗurri wi nggea taligo a meali, sǝ ɓǝà túrí aɓa nggeamùr. 43-44 §9:43-44 Ɓalli gbal aɓa: Mat 5:30.Ace mani ka, ɓǝ̀ buo kǝ cio a kǝ pak cauɓikea ka, kasǝi kpat. Nǝ̀ ɓoaribani wu kutio a yilǝmu mana málá male pà kàm raka nǝ bu mwashat, amur mana a nǝ dum nǝ abuo ɓari sǝ à nǝ̀ túrǒ aɓa lú-bǝsa, aban mǝnana bǝsa male kǝ limgi raka.*9:43-44 aban mǝnana bǝsa male kǝ limgi raka: Aɓea malǝmce mǝnana à gilǝì nǝ bu ka à tsǝa amurí ama, <<Aban mǝnana anggwaso male kǝ wu ɗang, sǝ bǝsa male kǝ limgi gbal raka.>> 45-46 Ɓǝ̀ kusǝo nda kǝ cio a kǝ pak cauɓikea ka, kasǝi kpat. Nǝ̀ ɓoaribani wu kutio a yilǝmu mana málá male pà kàm raka nǝ kusǝu-kasǝa, amur mana a nǝ dum nǝ akusǝu ɓari sǝ à nǝ̀ túrǒ aɓa lú-bǝsa ka.†9:45-46 Aɓea malǝmce mǝnana à gilǝia nǝ bu ka à tsǝa amurí ama, <<Aban mǝnana nggwaso male pà nǝ̀ wu ɗang, sǝ bǝsa male pà nǝ̀ limgi gbal raka.>>
47 Sǝ ɓǝ̀ mǝsǝo nda kǝ cio a kǝ pak cauɓikea, pusǝì túrí! Nǝ̀ ɓoaribani wu kutio a domurǝm mala Ɓakuli nǝ mǝsǝu mwashat, amur mana a nǝ dum nǝ amǝsǝu ɓari sǝ à nǝ̀ túrǒ aɓa lú-bǝsa ka.‡9:47 Ɓalli gbal aɓa: Mat 5:29. 48 Akanó ka <<nggwaso mana nǝ̀ nggǝ lia ka, pà nǝ̀ wu ɗàng, sǝ bǝsa mana nǝ̀ nggǝ pisǝkia ka, pà nǝ̀ limgi ɗang.>>§9:48 Ɓalli gbal aɓa: Isha 66:24.
49 Koyan ngga nǝ bǝsa sǝ à nǝ̀ tsǝì nǝ̀ ɓoarnsari.
50 Tuɓamur ka ɓoaro, sǝ ɓǝ̀ cyauwe male purrínì wi ka, nǝ mana sǝ à nǝ̀ tsǝì nǝ̀ cyàu ɗǝm? Wu dum nǝ ɓealu kǝla tuɓamur arǝarǝ wun, wu dum nǝ dorǝpwala arǝarǝ wun.*9:50 Ɓalli gbal aɓa: Mat 5:13; Luk 14:34,35.
*9:2 9:2 Ɓalli gbal aɓa: 2Bit 1:17,18.
†9:7 9:7 Ɓalli gbal aɓa: Mat 3:17; Mar 1:11; Luk 3:22.
‡9:11 9:11 Ɓalli gbal aɓa: Mal 4:5; Mat 11:14.
§9:34 9:34 Ɓalli gbal aɓa: Luk 22:24.
*9:35 9:35 Ɓalli gbal aɓa: Mat 20:26,27; 23:11; Mar 10:43,44; Luk 22:26.
†9:40 9:40 Ɓalli gbal aɓa: Mat 12:30; Luk 11:23.
‡9:41 9:41 Ɓalli gbal aɓa: Mat 10:42.
§9:43-44 9:43-44 Ɓalli gbal aɓa: Mat 5:30.
*9:43-44 9:43-44 aban mǝnana bǝsa male kǝ limgi raka: Aɓea malǝmce mǝnana à gilǝì nǝ bu ka à tsǝa amurí ama, <<Aban mǝnana anggwaso male kǝ wu ɗang, sǝ bǝsa male kǝ limgi gbal raka.>>
†9:45-46 9:45-46 Aɓea malǝmce mǝnana à gilǝia nǝ bu ka à tsǝa amurí ama, <<Aban mǝnana nggwaso male pà nǝ̀ wu ɗang, sǝ bǝsa male pà nǝ̀ limgi gbal raka.>>
‡9:47 9:47 Ɓalli gbal aɓa: Mat 5:29.
§9:48 9:48 Ɓalli gbal aɓa: Isha 66:24.
*9:50 9:50 Ɓalli gbal aɓa: Mat 5:13; Luk 14:34,35.