Ɓalban
MƏNCAU
Malǝmce mala Ɓalban ngga kǝ bang cau mala amǝ Isǝrayila tite a bàkú mǝnana à nying Nkono Saina bà yiu malea a njar-takuli mala nzong-nzali mala nzali mǝnana Ɓakuli akdǝmba pàcau ama nǝ̀ pea wia ka. Lullǝu mǝnia à pè mǝnia yì malǝmce ka, nda amur mugula gir mǝnana a ɓalǝi ka, yì ɓalban mǝnana Musa ɓal làkkì mala amǝ Isǝrayila a Nkono Saina sǝ à lo aban o ka; andǝ ɓalban mǝnana à ɓallia a Mowap, a njar-takuli mala Jodan, anzǝm nza mwashat mana yi kútí ka. Aɓa bákú mǝnana a nre ka amǝnia yì aɓalban ɓari ka, amǝ Isǝrayila wari a Kadesh Baniya, a njar-nzali mala nzong-nzali Kan'ana, sǝama à gandǝ kúti aɓa nzali pacauni ɗàng. Anzǝm mǝnana à malna apǝlǝkia pas a ban mǝno ka, à wari a bu-nzali mǝnana a njartakuli mala Nggeasala Jodan ngga, a ban mǝnana bare aɓwana malea duk kam, sǝ cilia gilǝrǝia ace yàl-nkaring nggeasala ace kutio aɓa Kan'ana ka.
Malǝmce mala Ɓalban ngga bǝlɓacau na amur aɓwana mǝnana à kum ɓabum-ɓungya kusǝ pas sǝ à lǝmdǝ ɓangciu lang à kùtí aɓa mǝkwane ka, sǝ à mgbicau arǝ Ɓakuli, sǝ arǝ Musa, yì ɓwa mǝnana Ɓakuli twali ɓǝ̀ gingnǝia ka. Kǝɓicau na amur domǝsǝcau mala Ɓakuli andǝ ɗenyinǝban male mǝnana camarǝ lǝmdǝi aɓwana male, kat andǝ rǝɓungya andǝ mgbikiru malea ka. Ɗǝm ngga nda amur paɓamuru mala Musa aban Ɓakuli andǝ aɓwana male, andǝ ɗwanyi dǝurǝo male arǝ acau, kat andǝ amani ama ɓè fara ka ndanǝ ɗwanyi munyi ka.
Agir mǝnana a ɓalǝi ka
Amǝ'Isǝrayila gilǝrǝia ace nying Nkono Saina 1:1--9:23
1. Ɓalban mǝdǝmbe 1:1--4:49
2. Anggurcau andǝ anzongcau ɗàngɗáng 5:1--8:26
3. Ɓaria Lamsan Yàlîmurû 9:1-23
Lo a Nkono Saina aban ká Mowap 10:1--21:35
Agir mǝnana à kumban a Mowap ka 22:1--32:42
Kàrkún acau mala gya, twal a Masar aban ká Mowap 33:1-49
Akwarkiru ace yàl-nkaring Nggeasala Jodan 33:50--36:13
1
À ɓal amǝ'lwa mala amǝ Isǝrayila
1 Yahweh nacau nǝ Musa aɓa Tara Ban-peri,*1:1 Ɓalli aɓa: Pur 27:21; 40:2,6-7. a ɓabondo Saina,†1:1 Ɓalli aɓa: Pur 19:1; Ɓal 33:16. a pwari mǝdǝmbe mala ɓaria zongŋo, a ɓaria pǝlǝa, anzǝm mana amǝ Isǝrayila purni ɓá nzali Masar ka, ama, 2 <<Ɓal ɓinala amǝ Isǝrayila kat; ɓallia arǝ atau, arǝ aɓala-kàu malea; gilǝ lullǝ koya mwashat aɓalǝ aburana, 3 twal a pǝlǝa lumi-ɓari aban ká dǝmba, mala koya ɓwabura mǝnana nǝ̀ gandǝ ká lwa a Isǝrayila ka; we wunǝ Haruna ka wun nǝ̀ gilǝ làkkì mala amǝ'lwa malea. 4 Wu twal ɓwa mwashat a koya tàu, mǝnana ɓwamǝgule na a ɓala-kàu male ka, atà wun, ɓǝ̀ dupa wun gbasha. 5 Amǝnia ka à nda ka alullǝ aburana mǝnana à nǝ̀ dupa wun gbasha ka:
Elizur muna-ɓwabura mala Shedeur a tàu mala Ruben;
6 Shelumiyel muna-ɓwabura mala Zurishaddai a tàu mala Shimiyon;
7 Nashon muna-ɓwabura mala Aminadap a tàu mala Yahuda;
8 Netanel muna-ɓwabura mala Zuar a tàu mala Isaka;
9 Eliyap muna-ɓwabura mala Helon a tàu mala Zebulu;
10 atà amǝkà Yisǝfu ka:
Elishama muna-ɓwabura mala Ammihud a tàu mala Ifǝrem, sǝ
Gamaliyel muna-ɓwabura mala Pedazur a tàu mala Manasa;
11 Abidan muna-ɓwabura mala Gidiyoni a tàu mala Benjami;
12 Ahieza muna-ɓwabura mala Amishaddai a tàu mala Dan;
13 Pagiyel muna-ɓwabura mala Okran a tàu mala Asha;
14 Eliyasaf muna-ɓwabura mala Dewel a tàu mala Gad;
15 sǝ Ahira muna-ɓwabura mala Enan a tàu mala Naftali.
16 Amǝnia ka à nda ka aburana mǝnana à tària aɓa ɓwabundǝa ace túró ka; à nda ka amúrû amur atau mala akeâ; à nda ka aɓwana-mǝgule amur aɓala mala amǝ Isǝrayila.>>
17 Nda Musa andǝ Haruna twal aburana mǝnia à tunǝ alullǝia ka, 18 sǝ à tunǝ ramba mala ɓwabundǝa kat a banɓwáná, a pwari mǝdǝmbe mala ɓaria zongŋo. Pǝlǝa à gilǝ làkkì mala aɓwana kat arǝ atau sǝ arǝ aɓala-kàu malea, koya ɓwabura mǝnana pǝlǝa male bingŋǝna lumi-ɓari aban ká dǝmba ka à gilǝ lullǝi, 19 kǝla mana Yahweh banggi Musa ka. Anggo sǝ gilǝ làkkì malea a ɓabondo Saina.
20 Tite nǝ amǝkà Ruben, muna-dǝmba mala Isǝrayila, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 21 à kum làkkì mala aburana a tàu mala Ruben ɓwa á-lumi-ine-bwamdǝ-tongno-nong-mwashat nǝ gbǝman-tongno (46,500).
22 Atà amǝkà Shimiyon ngga, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 23 à kum làkkì mala aburana a tàu mala Shimiyon, ɓwa á-lumi-tongno-bwamdǝ-tongno-nong-ine nǝ gbǝman-tàrú (59,300).
24 Atà amǝkà Gad ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 25 à kum làkkì mala aburana a tàu mala Gad ɓwa á-lumi-ine-bwamdǝ-tongno nǝ gbǝman-tongno-nong-mwashat nǝ lumi-tongno (45,650).
26 Atà amǝkà Yahuda ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 27 à kum làkkì mala aburana a tàu mala Yahuda ɓwa á-lumi-tongno-nong-ɓari-bwamdǝ-ine nǝ gbǝman-tongno-nong-mwashat (74,600).
28 Atà amǝkà Isaka ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 29 à kum làkkì mala aburana a tàu mala Isaka ɓwa á-lumi-tongno-bwamdǝ-ine nǝ gbǝman-ine (54,400).
30 Atà amǝkà Zebulu ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 31 à kum làkkì mala aburana a tàu mala Zebulu ɓwa á-lumi-tongno-bwamdǝ-tongno-nong-ɓari nǝ gbǝman-ine (57,400).
32 Atà amǝkà Yisǝfu, nǝban muna-ɓwabura male Ifǝrem ngga, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 33 à kum làkkì mala aburana a tàu mala Ifǝrem ɓwa á-lumi-ine nǝ gbǝman-tongno (40,500). 34 Sǝ nǝban muna-ɓwabura male Manasa ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 35 à kum làkkì mala aburana a tàu mala Manasa ɓwa á-lumi-tàrú-nong-ɓari nǝ gbǝman-ɓari (32,200).
36 Atà amǝkà Benjami ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 37 à kum làkkì mala aburana a tàu mala Benjami ɓwa á-lumi-tàrú-bwamdǝ-tongno nǝ gbǝman-ine (35,400).
38 Atà amǝkà Dan ngga, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 39 à kum làkkì mala aburana a tàu mala Dan ɓwa á-lumi-tongno-nong-mwashat-nong-ɓari nǝ gbǝman-tongno-nong-ɓari (62,700).
40 Atà amǝkà Asha ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 41 à kum làkkì mala aburana a tàu mala Asha ɓwa á-lumi-ine-nong-mwashat nǝ gbǝman-tongno (41,500).
42 Atà amǝkà Naftali ka, à gilǝ lullǝ koya mwashat atà aburana arǝ atau, arǝ aɓala-kàu malea, kǝla mǝnana làkkì mala alullǝia pàk ka mwashat-mwashat, koya ɓwabura mǝnana pǝlǝa male bingŋǝna lumi-ɓari aban ká dǝmba, mǝnana nǝ̀ gandǝ ká lwa ka; 43 à kum làkkì mala aburana a tàu mala Naftali ɓwa á-lumi-tongno-bwamdǝ-á-tàrú nǝ gbǝman-ine (53,400).
44 Mǝnia ka nda làkkì mala aburana mǝnana Musa andǝ Haruna ɓallia ka, atārǝia andǝ aburana lum-nong-ɓari, aɓwana-mǝgule amur amǝ Isǝrayila mǝnana koyan ngga nda ace ɓala-kàu male ka. 45 Amǝ Isǝrayila mǝnana kat pǝlǝa malea bingŋǝna lumi-ɓari aban ká dǝmba, mǝnana à nǝ̀ gandǝ ká lwa a Isǝrayila ka, à ɓallia kǝla mana à pa arǝ aɓala-kàu malea ka. 46 Làkkì malea kat-kat ka nda á-gbǝman-tongno-nong-mwashat-bwamdǝ-tàrú nǝ gbǝman-tongno nǝ lumi-tongno (603,550).
47 Sǝama Amǝ'Lawi‡1:47 Ɓalli aɓa: Tite 34:25,30; 49:5-7; Pur 32:26-29; Ɓal 3:6,12-13,40-43; 8:16-19; 18:1; Nggur 10:8-9; 18:1-2; 21:5; Jes 13:14,33. a tàu mala akeâ ka, à ɓallia atà aɓwana ɗàng. 48 Nda acemǝnana Yahweh bangŋǝ́nì Musa cau ama, 49 <<She kǝ tàu mala Lawi nda mǝnana a pà nǝ ɓalli raka, sǝ a pà nǝ gilǝ làkkì malea atà amǝ Isǝrayila ɗàng. 50 A kún mani ka awu nǝ twal Amǝ'Lawi ɓǝà duk amǝ'tsǝkir Taragula mala Acau-nakûn, andǝ agirtúró male kat, andǝ agir mǝnana kat à nda ace ka. À nda à nǝ̀ nggǝ twal Taragula andǝ agirtúró male kat ka; à nda à nǝ̀ ɗenyinǝi sǝ à nǝ̀ tsǝki agumli malea ɓǝà kàrì a tsùrú mala kàttì ka. 51 A pwari mǝnana kat à nǝ̀ panzǝ Taragula ace tùr là-gumli ka, Amǝ'Lawi na à nǝ̀ panzǝki ka, sǝ a ban mǝnana kat à nǝ̀ kwaki Taragula kàm ngga, Amǝ'Lawi na à nǝ̀ pàk túrè ka. Ɓǝ̀ ɓwa-ɗàng§1:51 ɓwa-ɗàng ko ɓwa mǝnana ɓwa-Lawi na raka gbashi banì ka ɓǝà wal-luí. 52 Amǝ Isǝrayila nǝ̀ tsǝk agumli malea, koya tàu ka a kàttì male, sǝ koya ɓwa ka a ban tútà mala tàu male, arǝ anggǝsan mala amǝ'lwa malea. 53 Sǝ Amǝ'Lawi ka, à nǝ̀ tsǝki agumli malea ɓǝà kàrì Taragula mala Acau-nakûn a tsùrú, ace mǝnana bumlulla mem ɓǝkǝa sulǝo amur ɓinado mala amǝ Isǝrayila raka. Amǝ'Lawi ka à nda mǝnana túró yál Taragula mala Acau-nakûn na amúrià ka.>>
54 Amǝ Isǝrayila pàk koya gìr kǝla mana Yahweh banggi Musa ka.