21
À gandǝ murǝm Arat a lwa
1 Lang ɓwa Kan'ana, murǝm Arat, mana ndanǝdo a Negev, ok ama, amǝ Isǝrayila na aban yiu nǝ njargula Atarim ngga, kara yinǝ munǝo arǝia, bwalki aɓea ɓwana atà amǝ Isǝrayila. 2 Pǝlǝa amǝ Isǝrayila pàcau nǝ-shambum aban Yahweh, ama, <<Ɓǝ̀ mbak-kàngkàng awu nǝ tsǝk aɓwana mǝnia ɓǝà kpa aɓa bù sǝm ngga, sǝm nǝ̀ tària aban Yahweh ace twalta alá malea kat-kat.>>
3 Yahweh ok zǝmba mala amǝ Isǝrayila, pǝlǝa pà amǝ'Kan'ana aɓata rǝcandǝa malea, sǝ à twaltea kat, à kiɗiki alá malea. À tunǝ lullǝ banì ama, Horma.*21:3 Horma ka ɓalǝi nda <<mǝnana à kiɗiki ka.>>
N'yau mana à pè nǝ bolo-bángŋá ka
4 Pǝlǝa à lo gya, twal a Nkono Hor, nǝ njargula mala Nggeamùr Nzuno, à kàrìban arǝ nzong-nzali mala amǝ'Edom. Sǝama, aɓwe gandǝ twalgàndǝá nǝ gyê ɗàng. 5 À na mǝɓane arǝ Ɓakuli andǝ Musa, ama, <<Palang sǝ a pusǝ sǝm a nzali Masar, ace mǝnana ɓǝ̀ sǝm yi wukio a ɓabondo ka? Girlina pa kàm ɗàng! Mùr pà kàm ɗàng! Sǝ sǝm aulǝna nǝ girlina mǝɓike man!>>
6 Pǝlǝa Yahweh tasǝ an'yau barya aɓalǝ aɓwe; an'yau kwarkia, gandǝa pas atà amǝ Isǝrayila wukio. 7 Nda aɓwe yiu aban Musa, sǝ à bang ama, <<Sǝm pangŋa cauɓikea, mǝnana sǝm na mǝɓane amur Yahweh, sǝ sǝm na mǝɓane amuro ka. Pàk hiwi aban Yahweh ama ɓǝ̀ pǝr an'yau mǝnia ka, ɓǝà upiban sǝm.>> Anggo, sǝ Musa pàk hiwi ace aɓwe.
8 Yahweh pǝlǝa banggi Musa, ama, <<Pàk ɓǝ̀nzál mala n'yau barya, sǝ wu loasǝi a kuli, amur tondong. Ɓwa mǝnana kat n'yau kwarí, sǝ loasǝ mǝsǝi, sǝni ka, nǝ̀ auwa.>>†21:8 Ɓalli gbal aɓa: 2Amur 18:4; Yoh 3:14-15. 9 Anggo sǝ Musa pàk n'yau nǝ bolo-bángŋá, pǝlǝa tsǝì amur tondong, sǝ loasǝi tamsǝi. Ɓǝ̀ n'yau kwarna kǝɓwa, sǝ lang loasǝ mǝsǝi sǝn n'yau mala bolo-bángŋá man ngga, ɓwê nǝ̀ auwa.
Gya mala amǝ Isǝrayila aban ká a Mowap
10 Amǝ Isǝrayila lo gya à yi tsǝk kàttì a Obot. 11 À loapi Obot ka, à kya tsǝk kàttì a Iye-abarim, a ɓabondo mana kǝ sǝn ɓamǝsǝarǝia andǝ Mowap, nǝ njartakuli ka. 12 À loapi ban mǝno ka, à yi tsǝk kàttì a Ɓangŋaban Zeret. 13 À loapi ban mǝno ka, à lo gya à kya tsǝk kàttì a ɓè nkaring mala Nggeasala Arnon, mana nda a ɓabondo mǝnana pur nǝ nzong-nzali mala amǝ'Amor ka. Nggeasala Arnon ngga nda a nzong-nzali mala Mowap, a nre Mowap andǝ nzali Amor. 14 Nda gìr mǝnana tsǝa sǝ Malǝmce mala A'lwa mala Yahweh, bang ama,
<<Wahep aɓa Sufa, andǝ amuna-mùr mala Nggeasala Arnon,
15 andǝ bum aɓangŋaban mǝnana sárǝ́ aban ká a là Ar,
sǝ eangnǝ arǝ nzong-nzali Mowap ka.>>
16 Twal a ban mǝno ka, à lidǝmba, aban ká Biya,‡21:16 Biya ka ɓalǝi nda <<tūli-mùr.>> yì tūli-mùr mǝnana Yahweh banggi Musa cau amurí, ama, <<Ramba aɓwana abanɓwáná, ace mǝnana ɓǝn pea wia mùr ka.>>
17 Pǝlǝa amǝ Isǝrayila tù mǝnia yì nggyal ka, ama:
<<Tù mùr, we tūli-mùr!
Tùkî wi nggyal,
18 yì tūli-mùr mǝnana amǝgulo tǝmi ka;
mǝnana aɓwana-mǝgule mala aɓwana busǝlǝi
nǝ gara-gulo andǝ agara-gya malea ka.>>
Pǝlǝa à nying ɓabondo mǝno à o a Matana. 19 À nying Matana ka, à o a Nahaliyel. À nying Nahaliyel ka, à o a Bamot. 20 À nying Bamot ka, à o a ɓangŋaban mǝnana nda aɓa nzali Mowap, tù a ban amgbangban Pisga, mǝnana à cam ɓong-ɓong amur pǝɗanban ngga.
Limurǝm amur Sihon andǝ Og
21 Isǝrayila tasǝ amǝ'na-túrbân ɓǝà kya ne Sihon, murǝm mala amǝ'Amor,§21:21 Sihon, murǝm mala amǝ'Amor: Ɓalli gbal aɓa: Ɓal 32:33; Nggur 1:4; 2:24--4:46. ama, 22 <<Eara sǝm ɓǝ̀ sǝm kùtí nǝɓa nzali mô. Pà sǝm nǝ̀ kùtí a ɓaban-mǝssa ko ɓaban-anap ɗàng. Pà sǝm nǝ̀ nu mùr a kǝ tūli-mùr ɗàng. Sǝm nǝ̀ ging cat, amur njar-mǝgule mala murǝm, ba purî ɓá nzali mô.>>
23 Sǝama, Sihon eare ɓǝ̀ Isǝrayila kùtí aɓa nzali male ɗàng. A kún mani ka, ramba amǝ'lwa male puppup, sǝ à puro à nǝ̀ ká nǝ munǝo arǝ Isǝrayila aɓa pǝɗanban. Lang à yina a Jahaz ka, à soa munǝo arǝ amǝ Isǝrayila. 24 Amǝ Isǝrayila gandǝia nǝ kún nggeabyau, sǝ à ak nzali malea arǝia, twal a ban Nggeasala Arnon kya bik Nggeasala Jabok, sǝama à kya go a nzong-nzali mala amǝ'Amon; acemǝnana nzong-nzali mala amǝ'Amon ngga mǝcandǝe na. 25 Isǝrayila ak alá mala amǝ'Amor kat, sǝ duk kam aɓalǝia, kat andǝ nggea-là Heshbon, andǝ amuna-là mǝnana à nda aɓate ka.
26 Heshbon ngga, nda nggea-là mala Sihon, murǝm mala amǝ'Amor, mana ɗiɗyal munǝo andǝ murǝm Mowap, sǝ ak nzali male arǝì kat, kya bwal ban Nggeasala Arnon ngga.
27 Nda gìr mǝnana tsǝa, sǝ amǝ'nggyal bang ama,
<<Yiu a Heshbon, ace mǝnana ɓǝà ɓè ka;
nggea-là mala Sihon ngga ɓǝà ɓè, kusǝì ɓǝ̀ cam kàngkàng.
28 Bǝsa pur aɓa Heshbon,
lasǝ-bǝsa pur a nggea-là mala Sihon.
Bǝshe yi li Ar, là mala nzali Mowap,
yi twalta amǝtala amgbangban ndàka-lú a kún nggeasala Arnon.
29 Caukwanban nǝ we Mowap!
Ma'wun malna, wun aɓwana mala Kemosh!
Kemosh pànà amuna-burana male ɓǝà umnǝia a bǝri-nzali,
sǝ amuna-mamǝna male ka à umna nǝia a guro
aban murǝm Sihon ɓwa Amor.
30 Sǝm gandǝna Mowap kat-kat;
Heshbon ngga, à kiɗikini yi pur a Dibon.
Sǝm yinǝ kiɗikiban arǝì yi pur a Nofa,
mǝnana kya go a Medeba ka.>>
31 Nda Isǝrayila do a nzali mala amǝ'Amor ka. 32 Anzǝm mana Musa tasǝna amǝ'shenzǝban a Jaza ka, amǝ Isǝrayila kya aki amuna-là mǝnana à kàrìbanì ka, sǝ à pǝr amǝ'Amor mana à duk kam ngga.
33 Pǝlǝa amǝ Isǝrayila wulio, à um nǝ njargula ká Bashan, sǝ Og, murǝm Bashan, andǝ amǝ'lwa male puppup, wari nǝ munǝo arǝia a Edǝri.
34 Yahweh banggi Musa ama, <<Kǝa ɓanggi wi ɗàng, acemana ǝn pano wi, yì andǝ aɓwana male kat, andǝ nzali male. Pàkki wi kǝla mana a pakkì Sihon, murǝm mala amǝ'Amor ka, mana do a Heshbon ngga.>>
35 Anggo sǝ à wal-luí, yì andǝ amuna-burana male, andǝ aɓwana male kat, yale kǝɓwa au ateà ɗàng, sǝ amǝ Isǝrayila ak nzali male pǝlǝ malea.