Cauterǝa mala Bulǝs aban ká a ban
FILIMON
Mǝncau
Cauterǝa mǝnia ka Bulǝs nǝ̀ gìlǝì lang nda aɓa ndàkurban a ɓè ban mǝnana à bangga sǝm lullǝi raka. Gilǝ cautera mǝnia ka aban ká aban Filimon, ɓè mǝkwaɗi mǝnana à súrǝì pepè, sǝ ɗǝm ngga nda mǝtala-ɓala mala ɓè guro mǝnana à tunǝki ama Onisǝmu ka. Onisǝmu ka ɓangŋa nying mǝtala-ɓala male, sǝ lang ngga, à yì je andǝ Bulǝs, mǝnana a bàkú mǝno ka nda a ndàkurban ngga. Onisǝmu yi pǝlǝ mǝkwaɗi nǝ bu Bulǝs. Cautera mala Bulǝs aban ka aban Filimon ngga zǝmba na aban Filimon ɓǝ̀ eare ɓǝa gilǝki nrea andǝ guro male, mǝnana Bulǝs na arǝ tasǝte ɓǝ̀ nyare a baní, sǝ ɗǝm ngga ɓǝ̀ kǝa gingsǝi kǝla guro mǝnana twalǝni wi banì nǝmurǝì ka ɗang, ɓǝ̀ gingsǝi gbal kǝla mǝ'eamrǝarǝu mǝkwaɗi. Sǝm súrǝ̀ ya gir nani Onisǝmu pa sǝ Filimon ɓinǝce ka ɗang, sǝama Bulǝs ka earǝna nǝ̀ mbweki Filimon gìr mǝnana kat gyajam male Onisǝmu kiɗiki wi ka. Kat andǝ amani ama Bulǝs nǝ̀ gandǝ paktúró nǝ rǝcandǝa male kǝla mǝ'mishan nǝ̀ tsǝk Filimon ɓǝ̀ pàk gìr mǝnana banggi wi ka, pè anggo ɗàng. A kun mani ka, earce nǝ̀ ɓuakiarǝi ɓǝ̀ pè aɓa earcearǝu.
Agir mǝnana aɓalǝi ka
Mǝn cau1:1-3
Ɓwangsǝban ace Filimon1:4-7
Zǝmbǝa ace Onisǝmu1:8-22
Masǝlǝata cau1:23-25
1
Makkun nǝ ban Bulǝs
1 Cauterǝa mǝnia ka pùr nǝban Bulǝs, ɓwa mǝnana ndǎ a ndàkurban ace hamnǝ Cau Amsǝban mala Kǝrǝsti Yesu ka, andǝ mǝ'eam sǝm Timoti.
Mǝ nda ban gilǝì Filimon, gyajam ma'sǝm andǝ ɓi sǝm mǝtúró, 2 andǝ mǝ'nggaula sǝm Afiya, andǝ Arkipus ɓi sǝm soje, andǝ ikǝlisiya mǝnana kǝ kpapi a ɓala mò ka.*1:2 Ɓalli gbal aɓa: Kol 4:17.
3 Ɓǝ̀ Ɓakuli Tár sǝm andǝ Mǝtalabangŋo Yesu Kǝrǝsti pa wun ɓwamuru andǝ dorǝpwala.
Yàwá andǝ hiwi mala Bulǝs
4 Ɓǝ̀ aya pwari mǝ nǝ pak hiwi ka, ǝn nggǝ pakki Ɓakuli mem yàwá aceo. 5 Acemǝnana ǝn nggǝ ok ce paɓamuru mo arǝ Mǝtalabangŋo Yesu andǝ earcearǝu mo arǝ aɓwana mala Ɓakuli kat. 6 Hiwi mem ngga nda mǝnana ama dotarǝu ma'sǝm sǝnǝ we kǝla amǝkwaɗi ka nǝ̀ yinǝ bwaltagìr mǝlime mala koya gìr mǝɓoarne mǝnana sǝm ndanǝi a do ma'sǝm aɓa kpapi ma'sǝm sǝnǝa Kǝrǝsti ka. 7 Earcearǝu mo panam banɓoarnado kǝ̀rkǝ́r andǝ girikiban, mǝ'eambam, acemǝnana pe mǝɓoarne mo yina nǝ bumpwasǝa a ban aɓwana mala Ɓakuli.
Bulǝs zǝmba amur Onisǝmu
8 Nda gìr mǝnana tsǝa sǝ mǝ ndanǝ ɓabumcandǝa, kǝla mǝ'eambo aɓa Kǝrǝsti, mǝnana mǝ nǝ cio wu pak gìr mǝnana ɓoaro wu pe ka. 9 Kat andǝ amani ka, mǝ nda rǝ zǝmbo ace earcearǝu, mim Bulǝs, mǝnana ǝn enà, sǝ ɗǝm adyan ngga mǝ nda aɓa kùrban ace Kǝrǝsti Yesu ka.†1:9 mǝnana ǝn enà, sǝ ɗǝm adyan ngga mǝ nda aɓa kùrban ace Kǝrǝsti Yesu ka: Ko <<mǝnana mǝ nda mǝ'pwantu mala Kǝrǝsti Yesu, sǝ ɗǝm adyan ngga mǝ nda kùró ace ka.>> 10 Mǝ ndarǝ zǝmbo, wu sǝn mǝsǝswatǝr mala munem Onisǝmu. Ən duk tárrí aɓa bangŋo akani aɓa ndàkurban. 11 Ɗiɗyal ka, ɓwa mǝɓane na a bano, sǝ adyan ngga, dumǝna ɓwa mǝɓoarne a ban sǝm kǝm.
12 Mǝ nda aban tasǝ te, ɓǝ̀ nyare a bano adyan. Ká male ka, ɓabumam nda atè. 13 A eare mem ngga, mǝ nǝ bwali akani a banam ɓǝ̀ dupam gbasha a kuniò, aɓa kùrban mǝnia mǝ ndakam ace hamnǝ Cau Amsǝban ngga. 14 Sǝ ǝn earce pàk kǝgìr mǝnana pa atārǝia andǝ eare mo raka ɗàng, ace mǝnana pe mǝɓoarne mo, ɓǝ̀ pur nǝ ɓabumo, ɓǝ̀ kǝa do ama à cio púp ɗang. 15 Pa kǝla Onisǝmu ka, a ɗwanyibanì aɓalǝ anonggio bǝti, ace mǝnana a nǝ nggá kumi ɗǝm gauwa pa kàm raka. 16 A dyan ngga, yì ka, pa kǝla guro ɗǝm ɗàng. Kutini bancame mala guro. A banam ngga, mǝ'eamrǝarǝu na mǝnana ǝn earkiyi ace raka, sǝ a bano ado ka nǝ̀ kútì mǝno, dumǝna kǝla ɓwa sǝ kǝla mǝ'eamrǝarǝu aɓa dotarǝu sǝnǝa Mǝtalabangŋo.
17 Ace mani ka, ɓǝ̀ a twalam kǝla ɓio mǝtúró ka, é, kǝla mǝnana a nǝ em ngga. 18 Ɓǝ̀ pangŋǝno mǝɓane aɓa kǝ njar, ko a kǝ kpate tangna ka, ɗì ce a buam. 19 Mim Bulǝs ka, mǝ nǝ̀ gilǝkiyi mǝnia yì cau ka nǝ buam. Mǝ nǝ mbweo, yàle ɓǝà kǝa bang cau mala yilǝmo mǝnana ǝn nggǝ kpato tangnè ka ɗàng. 20 È, mǝ'eambam, ǝn nggǝ zǝmbo, lǝmdǝàm mǝnia yì earmúrú ka, ace Mǝtalabangŋo; kǝla mǝ'eambu aɓa Kǝrǝsti ka, ciem ɓabumam ɓǝ̀ nongŋo. 21 Acemǝnana ǝn earǝna nǝ okiru mo ka, ǝn nggǝ gilǝo, nǝ sǝlǝe ama gìr mǝnana ǝn ɗikiyice a bano ka, a nǝ pak mǝnana kútì ka.
22 Cau mwashat ɗǝm ngga, ida, gilǝki ban-sulǝo acem, acemǝnana mǝ ndanǝ tsǝkɓalǝu ama Ɓakuli nǝ̀ ak ahiwi ma'wun, sǝ à nǝ̀ panzǝam mǝ nyare a ban wun.
Masǝlǝata makkun mala Bulǝs
23 Abafǝras, ɓiam pursǝna ace Kǝrǝsti Yesu, kǝ túrban nǝ makkun male.‡1:23 Ɓalli gbal aɓa: Kol 1:7; 4:12. 24 Sǝ anggo gbal, sǝ Markus, andǝ Aristakus, andǝ Dimas andǝ Luka, aɓiam amǝ'túrô.§1:24 Ɓalli gbal aɓa: Atúró 12:12,25; 13:13; 15:37-39; 19:29; 27:2; Kol 4:10,14; 2Tim 4:10,11. 25 Ɓǝ̀ ɓwamuru mala Mǝtalabangŋo Yesu Kǝrǝsti do atà bangŋo ma'wun.*1:25 Ɓalli gbal aɓa: Ang 51:12 .
*1:2 1:2 Ɓalli gbal aɓa: Kol 4:17.
†1:9 1:9 mǝnana ǝn enà, sǝ ɗǝm adyan ngga mǝ nda aɓa kùrban ace Kǝrǝsti Yesu ka: Ko <<mǝnana mǝ nda mǝ'pwantu mala Kǝrǝsti Yesu, sǝ ɗǝm adyan ngga mǝ nda kùró ace ka.>>
‡1:23 1:23 Ɓalli gbal aɓa: Kol 1:7; 4:12.
§1:24 1:24 Ɓalli gbal aɓa: Atúró 12:12,25; 13:13; 15:37-39; 19:29; 27:2; Kol 4:10,14; 2Tim 4:10,11.
*1:25 1:25 Ɓalli gbal aɓa: Ang 51:12 .