7
Ɓakuli nǝ tsǝk ntongŋo
amur aɓwana male
amur aɓwana male
1 Anzǝm mǝno ka ǝn sǝn amǝturonjar mala Ɓakuli ine aban came arǝ abumban ine mala ɓanza. À kùr agúng mǝnana à kǝ lo ɓua nǝ abuban ine mala ɓaɓanza ka, ace mǝnana gung ɓǝ̀ kǝa ɓua amur nzali ko nggeamùr, ko anggun raka.*7:1 Ɓalli gbal aɓa: Zak 6:5. 2 Pǝlǝa ǝn sǝn ɓè mǝturonjar aban eauwe a kùli nǝ njar-takuli, nǝ gbǝlman-parbu mala Ɓakuli mǝyilǝmuì a buì. Loasǝ gi bàng-bàng nacau nǝ amǝturonjar mǝno ine ka, yia mǝnana Ɓakuli pania wia rǝcandǝa ɓǝà kiɗiki nzali andǝ nggeamùr ka, ama, 3 <<Wu came! Wu kǝa na ama wun nǝ̀ je nzali, ko nggeamùr ko anggun ama wun nǝ̀ kiɗikia ka ɗàng, she ɓǝ̀ sǝm tsǝ̀ngŋǝ́nì aguro mala Ɓakuli ma'sǝm nyoulǝa mala parbu a kundǝmbǝia ka.>>†7:3 Ɓalli gbal aɓa: Ezǝk 9:4.
4 Pǝlǝa ǝn oe à na làkkì mala aɓwana mǝnana à tsǝkia wia nyoulǝa mala parbu a kún dǝmbia ka; aɓwana á-gbǝman-mwashat nǝ á-lumi-ine-nong-ine [144,000], aɓalǝ atau mala amǝ Isǝrayila.
5 Aɓa tàu mala Yahuda ka, aɓwana á-lum-nong-ɓari nda à tsǝkia wia nyoulǝa mala parbu ka.
Aɓa tàu mala Ruben ngga aɓwana á-lum-nong-ɓari na.
Aɓa tàu mala Gad ka aɓwana á-lum-nong-ɓari na.
6 Aɓa tàu mala Asha ka aɓwana á-lum-nong-ɓari na.
Aɓa tàu mala Naftali ka aɓwana á-lum-nong-ɓari na.
Aɓa tàu mala Manasa ka aɓwana á-lum-nong-ɓari na.
7 Aɓa tàu mala Shimiyon ngga aɓwana á-lum-nong-ɓari na.
Aɓa tàu mala Lawi ka aɓwana á-lum-nong-ɓari na.
Aɓa tàu mala Isaka ka aɓwana á-lum-nong-ɓari na.
8 Aɓa tàu mala Zebulu ngga aɓwana á-lum-nong-ɓari na.
Aɓa tàu mala Yisǝfu ka aɓwana á-lum-nong-ɓari na,
sǝ aɓa tàu mala Benjami ngga aɓwana á-lum-nong-ɓari na à tsǝkia wia nyoulǝa mala parbu ka.
Nggea làkkì mala ɓwabundǝa
ɓwangsǝ Ɓakuli
ɓwangsǝ Ɓakuli
9 Anzǝm mǝnia ka ǝn sǝn nggea ramba mala ɓwabundǝa kǝ̀rkǝ́r, mǝnana kǝɓwa pà nǝ̀ gandǝ ɓallia raka. À pur arǝa koya nzali, andǝ akûn, andǝ aɓwana mala atau ɗàngɗáng, andǝ alasǝu, sǝ à came a ɓadǝm buno-murǝm andǝ ɓadǝm Mǝgam. À oasǝ anggea-daura pwasǝa a rǝia sǝ à bwal ambú nkangga a buia. 10 À loasǝ già kpǝm à kǝ na ama,
<<Amsǝban ngga kǝ yiu
nǝban Ɓakuli ma'sǝm,
mǝnana do amur
buno-murǝm ngga,
sǝ nǝban Mǝgam!>>
11 Sǝ amǝturonjar mala Ɓakuli kat ka, à nda à came, à kàrì buno-murǝm andǝ aɓwana-mǝgule andǝ agiryilǝmu ine aɓalǝu ka. À sarǝa a ɓadǝm buno-murǝm nǝ ɓamǝsǝia a nzali sǝ à peri aban Ɓakuli, 12 à kǝ na ama,
<<Ɓǝ̀ do anggo! Ɓwangsǝban
andǝ ɓoarɓwa,
andǝ sǝlǝe, andǝ yàwá,
andǝ gulo,
andǝ gara-murǝm,
andǝ rǝcandǝa ka,
a mala Ɓakuli ma'sǝm na,
mǝnana mala male
pà kàm raka. Ɓǝ̀ do anggo!>>
13 Pǝlǝa mwashat atà aɓwana-mǝgule ɗiem ama, <<Ayana à nda ka aɓwana mǝnia aɓalǝ adaura pwasǝa ka, sǝ aya ban sǝ à puro?>>
14 Sǝ ǝn eari wi nǝma, <<Ɓwamǝgule, a nda mana a sǝlǝ ka.>>
Pǝlǝa nam ama, <<Amǝnia ka, à nda ka ɓwana mǝnana à purî ɓá nggea tanni mǝgule ka. À lákkína adaura malea sǝ à tsǝ̀ngŋǝ̀nia à pǝlǝna amǝpwasǝe aɓa nkila mala Mǝgam.‡7:14 Ɓalli gbal aɓa: Dan 12:1; Tite 49:11.
15 <<Nda tsǝa sǝ à came
a ɓadǝm buno-murǝm
mala Ɓakuli
sǝ à kǝ pakki wi túróperi,
du andǝ pwari,
aɓa Ndàmǝgule male ka;
sǝ Yì ɓwa mǝnana do
amur buno-murǝm ngga,
nǝ̀ dupia wia tara amúrià.
16 À pà nǝ̀ ok nzala
ɗǝm ɗàng ko bǝti,
sǝ mǝsamur pà nǝ̀
nyare nǝ̀ walia ɗǝm
ɗàng ko bǝti.
Pwari pà nǝ̀ walia ɗǝm
ɗàng ko bǝti,
sǝ ɓekǝ tosǝkiban mala
banpina pà nǝ̀
yiu amúrià ɗǝm
ɗàng ko bǝti.§7:16 Ɓalli gbal aɓa: Isha 49:10; Ang 121:6.
17 Acemǝnana Mǝgam
mana nda a ɓaɓalǝu
aban buno-murǝm ngga,
nǝ̀ dupia wia yálgír amúrià;
nǝ̀ kánǝia aban amgbeɗe
mǝnana à pākiyi
mùr yilǝmu ka.
Sǝ Ɓakuli ka nǝ̀
esǝkia wia mǝrǝm
kat a mǝsǝia.>>*7:17 Ɓalli gbal aɓa: Ezǝk 34:23; Ang 23:2; Isha 25:8; 49:10.