18
Kpa mala Babila
1 Anzǝm mǝno ka, ǝn sǝn ɓè mǝturonjar pur a kùli sǝ sulǝo aban yiu a ɓanza. Yì ka, ndanǝ rǝcandǝa kǝ̀rkǝ́r, sǝ tǎ mala ɓoarɓwa male tǎ aki ɓanza. 2 Loasǝ gì bàng-bàng nacau ama:
<<Babila kpana!
Mǝno yì nggea-là
mǝgule ka, kpana!
Pǝlǝna ban-do
mala akukwar.
Pǝlǝna mpù mala
koya bangŋo mǝɓane,
andǝ ndá mala
koya nyal mǝɓane,
andǝ ban sǝmbǝrǝa mala
koya nyama mǝɓane,
andǝ mǝnana à ɓinǝce ka.*18:2 Ɓalli gbal aɓa: Isha 21:9; Ir 50:39.
3 Aɓwana arǝ anzali kat,
à nùnà mùr-anap
mala nshawari,
andǝ kìɗìkì mala
nonggi nǝ rǝarǝu male,
sǝ walǝnia.
Amurǝma mala ɓanza
nonggina nǝi.
Ace ɓiki earce do male
aɓa banɓoarnado
mala kume ka,
tsǝ̀ngŋǝ̀nà amǝ nggāliki
mala ɓanza à pǝlǝna
amǝ gǝna.>>†18:3 Ɓalli gbal aɓa: Ir 25:15,27.
4 Pǝlǝa ǝn ok ɓè giu pur nǝ kuli kǝ na ama:
<<Wu purî ɓālǝi,
wun aɓwana mem.
Wu kǝa oasǝ bu wun aɓalǝ
acauɓikea male ɗàng,
ɓǝ̀ ana raka,
wun nǝ̀ nutanni atè
arǝ agirtanni mǝnana
à nǝ̀ sulǝo amurí ka.‡18:4 Ɓalli gbal aɓa: Isha 48:20; Ir 50:8.
5 Acauɓikea male ka,
à gwalikina amur rǝarǝia,
à bingŋǝna kùli.
Ɓakuli ɗenyina nǝ atúró
ɓealɓikea male
mǝnana pakkia ka.§18:5 Ɓalli gbal aɓa: Ir 51:9.
6 Ɓǝà mbweki wi a kúnì,
kǝla mǝnana pàkkî
aɓea ɓwana ka.
Ɓǝà tsǝì ɓǝ̀ mbwe kusǝ ɓari
arǝ agir mǝnana pea ka.
Ɓǝà mbwe ɓǝ̀ nu
nggea mǝɓane mana
lúllô male ka kar mǝnana
pea aɓea ɓwana sǝ à nu ka,
kusǝ ɓari.*18:6 Ɓalli gbal aɓa: Ang 137:8.
7 Sokkite ɓǝ̀ tāpì aɓa
tanni andǝ bumkiɗikea
kǝla mǝnana pè ɓamúrì
gulo andǝ do mǝɓoarne
aɓa rǝpwala ka.
Kǝ jali a ɓabumi ama,
<Mǝ nda mā-murǝm;
mǝ nda mā-lú ɗàng.
Kǝ gìr pà kàm
nǝ̀ ciem mǝ nǝ pak
bumkiɗikea ɗang.†18:7 Ɓalli gbal aɓa: Isha 47:8-9.>
8 Ace mani ka,
agirpatanni mǝnana
à nǝ̀ yinǝi wi nǝ bumkiɗikea,
andǝ nzala,
andǝ lú ka,
à nǝ̀ yiu amurí
aɓa pwari mwashat.
Nǝ̀ yia pi aɓa bǝsa kǝring,
acemǝnana Mǝtalabangŋo
Ɓakuli mǝnana pakkiyi wi
ɓashi ka,
mǝ rǝcandǝa na.>>
9 Amurǝma mala ɓanza mǝnana à kutio aɓa kìɗìkì mala nonggi nǝ rǝarǝu andǝ yi, sǝ à do aɓa banɓoarnado andǝ li mǝɓoarne atè ka, à nǝ̀ ɓua, sǝ à nǝ̀ keban amurí, ɓǝà sǝnǝna yele mala bǝsa mǝnana kǝ pisǝì ka.‡18:9 Ɓalli gbal aɓa: Ezǝk 26:16-17. 10 Nggea tanni male mǝgule nǝ̀ pea wia ɓangciu kǝ̀rkǝ́r. À nǝ̀ cam kuko, sǝ à nǝ̀ keban amurí ama:
<<Caukwanban!
Caukwanban nǝ we Babila,
nggea-là mǝgule,
la murǝm!
Aɓa bu-pwari mwashat
ɓashi mala Ɓakuli
yi sulǝna a muro!>>
11 Amǝ nggāliki aɓa ɓanza nǝ̀ ɓua, sǝ à nǝ̀ pak bumkiɗikea ace, acemǝnana kǝɓwa ueo kam nǝ̀ kúr agirmâ malea ɗǝm ɗàng.§18:11 Ɓalli gbal aɓa: Ezǝk 27:36. 12 Agir-mâ mǝnana kúria nǝ boalo kǝ̀rkǝ́r sǝ à ram ngga, à nda ka zǝnariya andǝ azǝrfa, andǝ atali gǝna, andǝ sala-ɓá-nkombo. Aɓea ka à nda ka nggubyau-linǝn, amǝ rǝɓǝlke, andǝa mǝnana amurǝma makkiyi arǝia ka, andǝa mǝnana kúria pa bǝti raka. Aɓea ɗǝm ngga à nda ka agir mǝnana à shària nǝ nggun mǝɓoarne sǝ à hasǝkia wia amuru-mǝrǝmɓoarne ka, andǝ agir mǝnana à tùllia nǝ bolo-bángŋá, andǝ bolo-candǝa ka, andǝ agir mǝnana à ɓakkia nǝ tali mabǝl ka.*18:12 Ɓalli gbal aɓa: Ezǝk 27:12-13,21. 13 Aɓea gir ɗǝm mana kúria ka, à nda ka amuku nggwato-nggun mǝɓoarne mala amǝ Asiya, andǝ amuku agir mǝɓoarne mǝnana à kunǝkiyia amur girlina. Myang-loasǝ-yele mǝ'rǝmɓoarne, andǝ myang pak ɓuri wal rǝkwangya, andǝ myang pak muru-mǝrǝmɓoarne na aɓalǝia. Acilia ka à nda ka mùr-ɓǝlanggun anap, andǝ mùrú nggun-olif, andǝ muku pak bǝredi mǝɓǝlke, andǝ mǝsǝ mǝssa-alkama, andǝ andá, andǝ anzur, andǝ apǝ́r, andǝ awaru-pǝr, andǝ aguro, andǝ ayilǝmi ɓwapǝndǝa. 14 Amǝ nggāliki nǝ̀ bang ama,
<<Agir mǝɓoarne mǝnana
bumo earkiyicea,
sǝ rǝo kǝ ɓǝla arǝia ka,
à umna arǝò kat.
Agirkuma mò kat,
andǝ agir gilǝki rǝǔ mô ka,
à ndǝrmina arǝò kat.
A pa wu nǝ nyare awu nǝ
kumia ɗǝm ɗàng.>>
15 Amǝ nggāliki mǝnana à kurkiyi wi kúró nǝ agir mǝnia, sǝ à kum gǝna malea arǝì ka, à nǝ̀ cam kuko, aɓa ɓangciu arǝ tanni mǝgule mǝnana sulǝo amurí ka. À nǝ̀ ɓua sǝ à nǝ̀ nggǝ keban amurí ama,†18:15 Ɓalli gbal aɓa: Ezǝk 27:31,36.
16 <<Cau kwanban,
cau kwanban nǝ Babila,
nggea-là mǝgule!
Ɗiɗyal ka, kǝ oasǝ
anggubyau mā-murǝma
mǝnana à teǎ nǝ
nggubyau-linǝn mǝɓoarne ka.
Kǝ oasǝ agir gilǝki rǝǔ
mǝnana à peǎ nǝ bolo-njengǝlan,
andǝ atali-gǝna,
andǝ agir tà'nzama
mǝɓoarne ka.
17 Ndo ka, aɓa bu-pwari
mwashat,
à kiɗikina nggea kume
mǝgule male kat.>>
Koya mǝkwak waru-bǝsa andǝ aɓwana mǝnana kat à kǝ twal gya aɓa waru a nggeamùr, andǝ amǝtúró ɓá waru, andǝ aɓwana mǝnana kat túróbù ace kum gìr do la malea ka, nda a nggeamùr ka, à cam kuko.‡18:17 Ɓalli gbal aɓa: Isha 23:14; Ezǝk 27:26-30. 18 Lang à sǝn yele mala pi mala mǝnia yì nggea-là ka, à loasǝ già à na ama,
<<Ɓè kǝ nggea-là kàm
kǝla mǝnia yì nggea-là
mǝgule ka le?>>
19 À pwan tú sǝ à soe amúrià, sǝ à mak'zwalo aban ɓua andǝ keban ama:
<<Cau kwanban!
Cau kwanban nǝ
nggea-là mǝgule,
ban mǝnana amǝtala
awaru-bǝsa mǝnana
à kǝ gya a nggeamùr,
pǝlǝ amǝkume kàm ngga.
Aɓa bu-pwari mwashat,
kara à kiɗikini.§18:19 Ɓalli gbal aɓa: Ezǝk 27:30-34.
20 Wun mǝnana wu
do a kùli ka,
wu pak banɓoarnado amurí!
Wun aɓwana mala Ɓakuli,
andǝ amǝ'mishan,
andǝ amǝ'ɓangnǝa mala Ɓakuli,
wu pak banɓoarnado.
Acemǝnana Ɓakuli
pangŋǝni wi ɓashi
ace kǝ wun.>>*18:20 Ɓalli gbal aɓa: Isha 44:23; Ir 51:48.
21 Pǝlǝa ɓè mǝturonjar mǝ'rǝcandǝe imsǝ nggea tali mǝnana gulo male nda kǝla nggea taligo mǝgule ka. Yi túrí aɓa nggeamùr sǝ na ama,
<<Kǝla mǝno ka,
sǝ à nǝ̀ túr nggea-là
Babila aɓa nggeamùr tsulǝm!
Sǝ à pà nǝ̀ nyare
à nǝ̀ sǝni ɗǝm ɗàng.†18:21 Ɓalli gbal aɓa: Ir 51:63; Ezǝk 26:21.
22 Agí ka zangŋan
andǝ amǝ'nggyal,
andǝ agí ka ntetu,
andǝ anjawe ka,
à pà nǝ̀ nyare
à nǝ̀ oea ɗǝm
a ɓālǝo ɗàng.
À pà nǝ̀ kum amǝ'túróbù
andǝ koya ulang túróbù
a ɓālǝo ɗǝm ɗàng.
À pà nǝ̀ nyare
à nǝ̀ ok gi gogô
nǝ taligo ɗǝm
a ɓālǝo ɗàng.‡18:22 Ɓalli gbal aɓa: Isha 24:8; Ezǝk 26:13.
23 Tǎ mala pitǝla pà nǝ̀
nyare nǝ̀ tà ɗǝm
a ɓālǝo ɗàng.
À pà nǝ̀ nyare à nǝ̀ ok
giu banɓoarnado mala
amāfela andǝ abura-māfela
ɗǝm a ɓālǝo ɗàng.
Mǝnia ka pàk anggo
acemana amǝ nggāliki mò,
mǝnana à nda à kútìban kat
ɗiɗyal nǝ rǝcandǝa aɓa
kúrkúró andǝ ram gǝna
a ɓanza ka,
a ciá púp, nǝ́ agir
monzǝo§18:23 Agir monzǝo ka, kpapi pyauta aɓwana andǝ ɗikalú andǝ pakki aɓuri mala kiɗiki ɓwa ko wal-lú. mô,
à swarkia aɓwana
arǝ anzali kat.*18:23 Ɓalli gbal aɓa: Ir 25:10.
24 Aɓa nggea-là Babila ka,
à kum nkila mala
amǝ'ɓangnǝa mala Ɓakuli,
andǝ mala aɓwana
mala Ɓakuli,
andǝ aɓwana mǝnana kat
à wal-luia a ɓanza ka.>>†18:24 Ɓalli gbal aɓa: Ir 51:49.
*18:2 18:2 Ɓalli gbal aɓa: Isha 21:9; Ir 50:39.
†18:3 18:3 Ɓalli gbal aɓa: Ir 25:15,27.
‡18:4 18:4 Ɓalli gbal aɓa: Isha 48:20; Ir 50:8.
§18:5 18:5 Ɓalli gbal aɓa: Ir 51:9.
*18:6 18:6 Ɓalli gbal aɓa: Ang 137:8.
†18:7 18:7 Ɓalli gbal aɓa: Isha 47:8-9.
‡18:9 18:9 Ɓalli gbal aɓa: Ezǝk 26:16-17.
§18:11 18:11 Ɓalli gbal aɓa: Ezǝk 27:36.
*18:12 18:12 Ɓalli gbal aɓa: Ezǝk 27:12-13,21.
†18:15 18:15 Ɓalli gbal aɓa: Ezǝk 27:31,36.
‡18:17 18:17 Ɓalli gbal aɓa: Isha 23:14; Ezǝk 27:26-30.
§18:19 18:19 Ɓalli gbal aɓa: Ezǝk 27:30-34.
*18:20 18:20 Ɓalli gbal aɓa: Isha 44:23; Ir 51:48.
†18:21 18:21 Ɓalli gbal aɓa: Ir 51:63; Ezǝk 26:21.
‡18:22 18:22 Ɓalli gbal aɓa: Isha 24:8; Ezǝk 26:13.
§18:23 18:23 Agir monzǝo ka, kpapi pyauta aɓwana andǝ ɗikalú andǝ pakki aɓuri mala kiɗiki ɓwa ko wal-lú.
*18:23 18:23 Ɓalli gbal aɓa: Ir 25:10.
†18:24 18:24 Ɓalli gbal aɓa: Ir 51:49.