Cauterǝa mala Bulǝs aban ká a ban
TITUS
Mǝncau
Titus ka ɓwa Yahudi na ɗang sǝ pǝlǝ mǝkpata Yesu, yi duk ɓimǝturo andǝ mǝkwaɗita Bulǝs aɓa túró mishan male. Cauterǝa mala Bulǝs aban ka a ban Titus ka, Bulǝs nǝ̀ gilǝì aban ká a ban lagga mǝ'bwali wi túró a Kǝreti. Yì Titus ka à nyi a Kǝreti ace sǝn túró mala ikǝlisiya mǝnana a banì ka. Mǝnia yì Cautera ka bangcau amur amu'gulacau tàrú.
Mwashatia ka, à nda rǝ kasǝɓalǝ Titus amur ulang ɓealu mǝnana ɓoaro aɓwana amǝgule amur ikǝlisiya ɓǝà dum nǝi ka, nggeamurǝmi ka, nǝ sǝlǝe mala ɓealɓikea mana aɓwana pas atà amǝ Kǝreti kǝ lǝmdǝí ka. Ɓaria ka, à nda rǝ kwarkir Titus amur lang sǝ nǝ̀ pà kanigir a ban aɓwana ɗàngɗáng a ɓinalea mana aɓa ikǝlisiya, kǝla aburala, andǝ amā-ɓala (yià mǝnana gbal à nǝ̀ ngga kània alo-amamǝna ka), andǝ alaggana, andǝ aguro. A masǝlǝate ka, Bulǝs kwarkir Titus amur do mala amǝkpata Yesu, nggeamurǝmi ka amur dorǝpwala andǝ dotarǝu, mana à nǝ̀ earcea kǝ̀rkǝ́r ka, kpapi andǝ vwaki bu arǝ ɓinǝmǝsǝu, andǝ makgìr, andǝ gakya aɓa ikǝlisiya.
Agir mǝnana aɓalǝi ka
Mǝncau1:1-4
Aɓwana-mǝgule amur ikǝlisiya1:5-16
Túró mala aɓwana ɗàngɗáng aɓa ikǝlisiya ka2:1-15
Ɓakɓabum andǝ nunkiru3:1-11
Masǝlǝata cau3:12-15
1
Makkun mǝnana pur nǝban Bulǝs ka
1 Cauterǝa mǝnia ka pur nǝ banam Bulǝs, guro mala Ɓakuli andǝ mǝ'mishan mala Yesu Kǝrǝsti.
À túrǎm a ban aɓwana mala Ɓakuli mana tària ka ace ɓak paɓamuru malea a baní, sǝ mǝ kania wia ɓǝà súrǝ̀ mǝsǝcau mǝnana kǝ lǝmdǝì aɓwana njar mala dokpata Ɓakuli ka. 2 Mǝno yì paɓamuru andǝ sǝlǝe ka, nda mǝnana kǝ pea wia tsǝkɓalǝu ama à nǝ̀ kum yilǝmu mǝnana málá male pà kàm raka, yì yilǝmu mǝnana Ɓakuli mana kǝ na nyir raka, bang a shareta ɓanza ama nǝ̀ pea wia ka. 3 Anggo lang pwari male mǝnana tsǝk ka yi kārǝ́na ka, Ɓakuli yi lǝmdǝí a banfana aɓa cau male. Mǝnia yì cau ka, à pam sǝ ǝn yi hamnǝi kǝla mǝnana Ɓakuli Mǝ'amsǝ sǝm tasǝam ngga.
4 Ən nggǝ gilǝì Titus, munem mǝ'mǝsǝcau nì aɓa paɓamuru mǝnana sǝm kat sǝm nda aɓalǝi ka. Ɓǝ̀ Tár sǝm Ɓakuli andǝ Kǝrǝsti Yesu Mǝ'amsǝ sǝm, bwalo kàm nǝ ɓwamuru andǝ dorǝpwala!*1:4 Ɓalli gbal aɓa: 2Kor 8:23; Gal 2:3; 2Tim 4:10.
Túró mala Titus a ban amǝ Kǝreti
5 Gìr mǝnana tsǝa sǝ ǝn nyio a luran Kǝreti ka, nda mǝnana ama wu masǝlǝata pakki atúró mǝnana ɓoaro ɓǝà pea ka, sǝ wu twal aɓwana aɓa koya là, wu cia ɓǝà duk aɓwana-mǝgule mala túró mala Ɓakuli. Kǝla mǝnana ǝn banggo ka, 6 ɓwamǝgule aɓa túró mala Ɓakuli ka, dumǝna púp ama nǝ̀ duk ɓwa mǝ'ɗwanyi cau a rǝǔ. Yì ka, nǝ̀ duk bura ɓwama mwashat, sǝ amuna male gbal ka, amǝkpata Ɓakuli na, mǝnana à súrǝ̀ia nǝ ɓealu mala mgbikiru andǝ gandǝban raka.†1:6 Ɓalli gbal aɓa: 1Tim 3:2-7. 7 Sǝ acemǝnana ɓwamǝgule amur ikǝlisiya ka, Ɓakuli panì wi túró ɗenyi nǝ aɓwana male yì Ɓakuli ka, dumǝna púp ama nǝ̀ dukdo ɗwanyicau-arǝǔ. Pà nǝ̀ gusǝlǝ-múrû andǝ kaurǝ pak bumlulla ɗang. Pà nǝ̀ duk mǝ'nu'mba andǝ mǝ'munǝki amunǝo ɗang, sǝ pà nǝ̀ duk mǝ rufi atà kume ɗàng. 8 A kun mani ka, dumǝna púp ama nǝ̀ duk mǝ'ak aɓwana, andǝ mǝ'earce gìr mǝnana mǝɓoarne na ka. Yì ka, nǝ̀ dum nǝ bwalɓamuru, andǝ came amur mǝsǝcau, andǝ do tàr ɓamuru ace Ɓakuli, andǝ hamírǝu. 9 Dumǝna púp ama nǝ̀ bwal kàngkàng arǝ kanigir mana à nǝ̀ earnǝi, kǝla mǝnana à kàni wi ka. Anggo sǝ nǝ̀ kùmô nǝ̀ bwalì aɓwana kàm nǝ kanigir mǝɓoarne, sǝ nǝ̀ lǝmdǝì aɓwana mǝnana à kǝ ɓinǝ mǝnia yì kànìgìr ka, ɓwarkio malea.
10 Aɓwana nda kana pas mǝnana amǝ'mgbikiru na, sǝ amǝ'fekicau na andǝ amǝ swarkiban. Bangulea ka à nda ka amǝ Yahudi mǝnana à pǝlǝ amǝkwaɗi sǝ à ɓinǝ kingging nǝ kània aɓwana gìr ama, ɓǝà kàsǝô ɓato raka, we ka a malaká kum amsǝban ɗang. 11 Amǝnia yì aɓwana ka, ɓǝà tamsǝia arǝ kani amǝkwaɗi gìr, acemǝnana nǝ akanìgìr mǝɓane malea ka, à nda ban tsǝk amǝɓala kat ɓǝà nying kpata kànìgìr mǝnana nda pepè ka. Tǝ́r kànìgìr mala amǝnia yì aɓwana ka, nda ace alta boalo mǝnana à nǝ̀ kùmô aɓalǝi a njar mala ɓosǝkiban ka. 12 Nggearǝ ɓe mǝɓangnǝa aɓalǝia ka bang ama,
<<Amǝ Kǝreti ka amǝ'nyir na
ko a ya pwari,
aɓwana na nǝ ɓealu
mala anyamɓikea,
amǝ'lǐgula amǝnkundǝr ni.>>
13 Cau mǝnia ka mǝsǝcau na. Ace mani ka, gimbia nǝ rǝcandǝa, ace mǝnana ɓǝ̀ paɓamuru malea ɓǝ̀ duk mǝɓoarne. 14 Anggo ka, à pà nǝ̀ tsǝk kiria ɗǝm arǝ anjarnzǝne mala amǝ Yahudi andǝ anzongcau mala aɓwana mǝnana à ɓinǝ mǝsǝcau ka ɗàng. 15 A ban aɓwana mǝnana bumia pwatpwat ka, ko man ngga mǝ pwatpwat ni na. Sǝ a ban aɓwana mǝnana amǝ bumpǝndǝkya na sǝ amǝ ɓinǝ ak cau na ka, kǝgìr pà kàm mǝɓoarne na ɗang. Yàle ɗenyicau malea andǝ ɓabumia ka à pǝndǝkina. 16 Amǝnia yì aɓwana ka, à kǝ bang nǝ mburkunia ama à súrǝ̀ Ɓakuli, sǝ pàkkiagir malea ka lǝmdǝ ama à súrǝ̀ Ɓakuli ɗang. Aɓwana na à nǝ̀ ɓinǝia, amǝ ɗwanyi okiru na, à kārǝa à nǝ̀ pak kǝgìr mǝɓoarne ɗàng.