Jesushuunoa Futsan Hebreofo Cunushoni
1
Diosin Furunhuunoashu no fu tsainni
Uhuun yoramishtichin un mato cunu fomai man tapinon. Upa Diosin noco shunifo yoipaiyai cuscan ahuun tsain yoishomisifo yoiyopaoni ato tapimanonfo. Namapahuunshon ato yoifain namapan cuscarahuunshon ato yoifain ahuun nai oinmatihuunshon ato yoifain ahuun oicoinin ato yoipaoni. Asca huapaonifiashu natian noco yoipaiyai cuscan Furunhuunshon noco yoia. Furunhuunshon nantifi nai murannoafo yafi mai anoafori onihuani. Furun catonni nantifi nai murannoafo yafi mai anoafoti ahuuna inon.
Nanton Apa Diosin cuscaracoin. Noco ismacoin ahuu cuscaramain Apa Diosiquin. Apa shara imisi cuscan arifi nanscaracoin. Furunmun ahuun tsainmansi ahuamamishti huatiroquin. Ascan ahuun curushhuunshon ahuun tsainmansi onihuafoti yonotiro afin apaiyai cuscan anonfo. Ahuun tsainmansi nantifi onihuafoti cushusharafafainmisi. Nanfin nocohuunoashu nani nocon chaca noco soashoshquin non a cuscara shara inon. Ascashu Apa ari cani a futan nantifi iquifafainshquin.
Upan Diosin Furumun ahuun oinmati afu nai muran icafo finoncoian
Afin Apa Dios ahuun Furuncoinquin. Oinmati afu nai muran icafocai Upa Diosin furuncoinfoma. Furun Apa Dios fu niaifocoin. Oinmatifocai ascarafoma. Ascan ato finoncoian. Upa Diosin ahuun oinmati afu nai muran icafocai yoiqui,
“Man uhuun facunatoncoinforan,”
ato huamisima. Furun fusti yoiqui isca huani,
“Unfin min upaquin. Minfin uhuun facucoinquin,”
ishon Furun yoini. Ahuun oinmati afu nai muran icafohuunoacai anori yoimisima. Ascashon Furun mai ano nichini yoracoin inon ahuun oinmati nan afu nai muran icafo yoini isca huaquin,
“Nantifi uhuun oinmati ufu nai muran icafoan, uhuun facu Jesús noicoincahuun. ‘Min uhuun Iforan,’ yoicahuun,”
ishon anori ato yoini. Ascatan ahuun oinmati afu nai muran icafohuunoa yoiquin isca huani,
“Fuu foanriscatiro. Nanscarifiai uhuun oinmati ufu nai muran icafo un ato yoiai cuscan ua ashoriscatirofo. Nanfori chi urumanhuan cuscarafo. Un ato yonoa cuscan yorafo onaintimariscatiroran,”
ishon Upa Diosin yoini. Ascashon Furu yoiquin isca huani,
“Minfin uhuunfin cacoinnaquin. Mirififin min Diosiquin. Min yorafo iquipacunaca. Min ato niaifocoin icainocai min unupacunacama. Min ato iconcoin yonosharapacunaca. Min icanori shara fusti ipanaca. Ascashon minfin ahuara shara fustisi noicoinquin. Ahuara chaca min noicasmai. Ascacufin Diosin, nanrifi min Diosin, nanton mia catonni. Mia unimama cuscacai tsoa futsan ascara mumisima. Mirus fustiton min nantifi finoncoian. Min ato Niaifocoinran,”
ishon un mia yoini. Uncai mifu rafuafo anori yoimisima. 10 Afanan Upa Diosin Furun yoini,
“Minfin uhuunfin cacoinnaquin. Mirifi min nantififain ato Ifo. Ahuashta oniataima nan maitio yafi nai murannoafoti min onihuaquin tau huani. 11 Sahuuti chocanashucai afanan shara itiroma cuyotiro. Nanscarifiai nantifi maitio yafi nai murannoafori cuyoshcani. Ascafia mincai ascarama. Minfin ipanacaquin. 12 Sahuuti chocanacun potatirofo futsa funa fiishcaquin. Nanscarifiai maitio yafi nantifi nai murannoa afanan sharafocuma min ato cuyomatiro, afanan mai yafi nai fiananan huashquin afanan funa shara inonfo. Ascan mincai mai yafi nai cuscarama. Mincai fianananpacunacama. Nanscasi min apanacaran,”
ishon Upan Diosin Furun yoini. 13 Afanan Upan Diosin Furun yoiquin isca huani,
“Min ufu niaifoaitiancai nan mia noicasmafoan afanan mia ahuusca huatirofoma. Minfin nantifi ato iquiniran,”
ishon yoini. Asca anoricai ahuun oinmati afu nai muran icafo yoimisima. Ascashon Furun fusti catonni nantifiton aton Ifo inon. 14 Ascano Upa Diosin nan ahuun oinmati afu nai muran icafo yononi noco cushusharanonfo. Ratoranfoan Jesús ifoancanashu afu ipatirofo. Diosin yononi nanfo ahuun oinmati afu nai muran icafoan ato cushusharanonfo.