1 Uhuun yoramishtichin unquian Judas un mato cunu fomai. Unfin Jesucristo ahuun yonomatiquin. Un Santiago ahuun ushto. Nocon Upa Diosin matohuun noiquin mato catonni. Ascan nocon Ifo Jesucristo mato cushufafaini. 2 Nocon Ifoan matohuun ramapaicain maton nomuran unimamanon. Ascatari matohuun noicoinnon. Mato mima huaquin asca huanon.

3 Uhuun yoramishtichin nocon Ifoan noco nashoni cuscan yafi nantianri noco imapaiyai cuscan non chipo afu ishquiai cuscahuunoari fasi nanfohuunoa mato cunushopaifiai mun nica man tsain futsa yopacoin. Ascacun un mato cunushoni man Jesucristo icoinra huai cuscan man shinanfafainon. Nannori Upa Diosin Furuhuunshon noco tapimani. Furunhuunoa noco tapimani cuscan nan fusti non yopai tanasharashquin. Ascan tsain futsa mato amaquiri yosipaiyaifoan aton tsain nicatamarocon nan mato tapimamisi cuscan nan fusti icoinra huacahuun.

4 Futsafoan mato muran nocoi tau cashon man tapicuma mato fomanfo chaca huamisifiacashon. Ascashu nanfocai Diospan yorama. A furicai imisifoma non chaca huamisi cuscan non yoiaiton Upa Diosin Furunhuunshon noco soashona non afu ipanon. Nan fusti non yopai isharashquin. Ascafia nanfoan fasi amaquiri chacacoin mato tapimapaicani. Isca huaquin mato yoipai, —Man Jesús icoinra huashon man apaiyai cuscan man atiroqui. Maton ahuinma fu icain ainfofori aton funuma fu itirofo. Ascashon ahuara chaca futsafo man huapaiyai cuscan man atiro. Non asca huaitocai Dios noco onaintimaimaran, —ishon fasi amaquiri mato yosipaicani. Nocon Ifo Jesucristo fusti nicacasmacani. Nan cuscarafohuunoa Diospan tsain cunuyoni. Ato onaintimaicoinshquin.

5 Un natian mato cunushoni cuscan man man tapiyofianicun un afanan mato yoi futsai nan chacafohuunoa man tapinon. Nocon Ifoan nantifi nocon shunifo Egipto anoshon caimafianicun atirifiton icoinra huayamaifoan nan icoinra huafomati chipo namaqui cuyoi. 6 Ointiaquimayamacahuun Diospan oinmati afu nai muran icafori tau cani isharacoinyopaonifo. Ascashu Diosin ato yonoai cuscan acoinyopaonifo. Ascafiashon chipo Diosimaqui ipanifo. Ascacun Upa Diosin ato faquishihuan muran munushushon ato manamayoi. Ascashon chipo nantifi icoinra huafoma onaintimaitian ichanan huashon omitsiscapanacafo muran ato potashquin. 7 Diospan oinmati a fu nai muran icafoan chaca huapaonifo cuscari Sodoma yafi Gomorra chaimashon nanscara chaca huapaonifo. Nocofunufoan aton ahuinma chotaifoanno. Ainfofoanri aton funumafo chotamapaonifo. Nocofunufori afi ranan chotananpaiyaifoanno ainfon tanatama. Ascacani chacanisi tapipaonifo. Ascacun atohuunshon non tapitiro nan chaca huamisifo omitsiscapanacafo muran focani. Nanhuunoari ointiaquimayamacahuun.

8 Nanscarifiai nan chanimisifoan chaca fustisi huafafaincani. Ascacanashu futsafo fu chaca huatananmisi icain niaifofori nicacasmafain. Diospan nai oinmatifori roamisifo. 9 Ascashon nai muran icafo Diospan oinmati niaifo patashari ahuun anu Miguel nantocai chaca huaifo cuscan asca huamisima. Ascashu Satanás fu fochishmanantananni Moisés naitian Satanás Miguel nitun huapaini Moisés ahuun caya mai huanonma. Ascafiacai Miguelcai nan Satanás roanima. Roatamarocon yoini isca huaquin, —Nocon Ifoan mia asca huairan, —ishon yoini. 10 Ascafia nan chanimisifoan ahuarafo tapiyamacun nanfohuunoa atoqui tsain chaca huamisifo. Ascatari afi apaiyai cuscan fusti huafafainmisifo. Yoinaton shinansharatiroma cuscan. Ascacanashu afiri chaca huamuafoquin omitsiscapashcaquin.

11 ¡Ai timafin! Fasi omitsiscapashcaquin. Caín chipocu rutuni. Nanfori nanscarafo. Balaam cuscarafori. Nan Balaam pui fusti shinanquin chaca huani. Nanfoanri nansca huamisifo. Coré cuscarari. Nan Coré ahuun niaifo Moisés nicacasmapaoni. Ascacufin Diosin nan namaniquin arifi nicacasmacanashu nai omitsiscapashcaquin.

12 Ascan manfin noinanshu ichananmisiquin nocon Ifohuunoa shinanfain pishcaquin. Nanfori ranotama matofu ichananfiacashon nocon Ifohuunoacai shinancanima. Futsafohuunoaricai shinantama aficairocon shinanmufustiafo, —Non mato yosiquin mato cushusharatiroran, —ifiacaquin tsoa ahua yosisharamisifoma.

Nan coin oi maisinincai mai muto muchana huatiroma fanafo foaisharanon. Mai mutoano coin choshtacuashu oi fuaino fanafo foaimasharatiro. Nanscarifiai nanfo coin oi maisi cuscarafo. Nan cushumisi ointsafiacashocai nocon Ifohuunoa tsoacai tapiafoma. Fana ahuun tapofo ya tsucucain tsasiashu fimioma itiro. Man nai rafua cuscara. Nanscarifiai nan chanimisifoancai tsoan Jesús icoinra huamatiroma nipanonfo.

13 Ascashu unuhuan fuchomanhuan cuscarafo ahuara sharacai mainfin ano potatiroma. Fuchoquin facosh cusumun cutsispotiro. Ascashu chipo fuarasiqui futsutiro. Nanscarifiai nan chanimisifoancai ahua shara huashotiroma. Fishi pacui chashapacucahuatan faquish acuncahuatiro. Ascaitocai non afanan oinshtatiroma. Nanscarifiai nan chanimisifoan Dios cachiquiri huacanashu faquishihuan muran focani. Diosin nanscarafo chipo onaintimacoinshquin omitsiscapanonfo.

14 Ascan Adán nan Diosin onihuaquin tau huani. Anoashu siete facu pacuafo. Ascano ahuun unutani ahuun anu Enoc ini. Nan Enoc nan chanimisifohuunoa inonpacoai cuscan yoiquin isca huani, —¡Oincapon! Nocon Ifo oi. Nan afu nai muran icasharafori ichapacoin afu fucani. Tsoancai ato tanan huatiroma. Nantian nantifi yorafo yoipacushquin niyoshon man amisi cuscan. 15 Nantifi manifoti anoafoan noco Ifoqui fucani. Ratofomain ahuun yorafo afu ipanacafo iyamarai ratofomain icoinra huayamashu omitsiscapanacafo muran focaniquin. Nan afu rafumisifomacai ahuun yorafoma. Ascan nan chaca huafoti ato yoifain niyoano Dios maisi ipaoni cuscan yoifain nantifi nan tsain chaca aqui huamisifori ato yoishquin.

16 Nanfoanri tsain chipumisifo icain futsahuun ahuara chaca nuutapaimisifo. Nan chaca huapaiyai cuscan fusti tanafafainmisi icain afiri yoimusharamisifo. Ascacanashu cacapaimisifo icain futsahuunoa tsain shara yoiamafiaquin futsa cuncun huapaimisifo, “Ua shara huanon,” ato huamapairan, —ishon Enoc huani.

17 Asca huafiaifoan nocon Ifo Jesucristo fu rafumisifoan mato yoinifo cuscan ointaquimayamacahuun. 18 Ascan mato yoini isca huaquin, —Jesús oti chaima icoinra huamafoan mato cashu mutsama huapaicani. Nanfoan tanatama afi chaca huapaiyaifo cuscan fusti tanafafaincaniran, —ishon yoinifo. 19 Nan cuscara nocofunufoan mato pashcanan huapaimisifo. Ahuara chacafo fusti fuchipaicaquin. Ascarafo fucai Diospan Yoshin Shara icama.

20 Asca chaca huafiacanashu. Uhuun yoramishtichin man Jesús icoinra huaa cuscan Upa Diosin mato shinanmana. Ascacun ahuunshon finacaiquin tapicahuun man icoinra huahuunoashu nan cuscara shara ishcaquin. Diospan Yoshin Sharahuunshon Upa Dios cuficahuun mato imapaiyai cuscan tapishcaquin. 21 Jesús tanasharacahuun Upa Diosin mato noicoiain cuscan man mufafaintiro. Nocon Ifo Jesucristo nocohuun ramapaiquin non naafiacun noco nimapacuaino non afu ipanon. Ascacun funaquima manasharacahuun afu ipashcaquin.

22 Futsafoan isca huaquin shinantirofo, —Jesús ua nimapacutiro icon iyamarai iconmaran, —ishon. Nanscarafohuun ramapaicahuun. 23 Ascan futsafohuunoa un mato yoinon isca huaquin. Ahuara non coapaiyamafiaino chi muran pacuaiton non nushfiriscatiro cononma. Nanscarifi aqui futsan chaca huafafainmisi cuscan shatuataicuma numariscahuun. Ascashon ato yoicahuun aton chaca arifi shatuyamashu chi muran iquinonfoma. Ascan futsafoanri fasi chacacoin huamisifo. Nanscarafohuunri ramapaicahuun. Ascafia oinfain marifi man ato cuscara chaca huamisi iishcaquima. Atohuun ramapaitan nan ahuarashta chaca huaifo cuscan noicasmacoincahuun.

24 Ascan uhuun tsain unutaqui nocon Dioshuunoa un mato yoisharapai. Nanton mato cushusharatiro man chaca huanonma. Unimacoincain ahuun ointaifi mato imasharatiro. Nannoshocai tsoan matohuun ahua chaca nuutatiroma. Ascashu unimacoin man aqui nocoshquin. Nantofin mato nansca shara huashotiroquin. 25 Nan fusti noco Dios. Nantonrifi nocon Ifo Jesucristohuunshon noco numani. Ascashon nantifi finoncoian tsoa futsacai a cuscarama. Arusu fusti niaifocoincain manifoti iquina. Ascashon ahuamamishti huatiroquin. Ahuashta oni huataima nanscaracoin iyopaoni. Natian ishquiai cuscari. Nansca huapanaca. Nanscasi ipanon. Amen. Nanti.