18
Diosin oinmatinin afu nai muran ica yoia isca huaquin, —Natian Babilonia anoafo nai futsucani, —ishon yoia
1 Ascatan Diosin oinmati futsan nai murannoashu mai ano fotoaiton un oian. Upa Diosin yonoa niaifo patashari nanton ahuamamishti atiro. Ahuunshon maifoti chashacoian. 2-3 Oi ashcafinin cunaquin isca huaa,
“Babilonia ano icafoan fasi chaca huamisifo. Chaca fustisi shinanmisifo. Nocofunufoan aton ahuinma chotamisifo ainfofoan aton funumari chotamamisifo. Man amisifo cuscan caifo futsanfori atohuun caoafo. Ato chaca huamamisi Upa Dios tanatamarocon chaca fustisi tananonfo. Man chaca huamisifo cuscan caifo futsafori aton niaifofoan nanscarin huaquin chaca huamisifo. Nan Babilonia ano icafoan fasi mafo ichapaya. Ascan ahua yopacaquima mai futsa anoafo aton mafo inan ahuun rafanan pui fiishcaquin. Ascano futsafoanri mafo inanmitsacashon ahuun rafanan pui finonfo. Asca huacanashu Babiloniahuunoashu afori mafo ichapaya icafo. Asca huacaquin Upa Dios shinanmisifoma.”
“Ascacufin Upa Diosin nan Babilonia anoafo fasi onaintimai afanan tsoan ano inonma. Ato namaquin cuyoshquin. Afanan ano yora itamarocon yoshin chaca futsan futsantapafo tsain mutsama yoifafainaifo ano icaforan,”
ishon Upa Diosin oinmatinin nan afu nai muran icaton ua yoia.
4-8 Yoiquin asca huatanaino nai murannoashu un oi futsan nica isca huaquin,
“Babilonia ano icafoan fasi chaca huamisi finacoianfo. Nan chaca huamisifo cuscan Upa Diosin ato oinshon ointiaquimanama. Ascashon ato onaintimacoinshquin, Upa Diosin, nan Babilonia anoafo futsafo chaca huamisifo cuscan mimacoin huaquin ato onaintimahuu omitsiscanonfo. Man yoiafo isca huaquin, ‘Noncai Dios yopaima. Non ahuashta yopatiroma. Nonfin isharamisiquin. Nonfin ainfon niaifocoin isharamisi cuscara. Noncai man funu amaqui naa ainfo funuoma cuscarama. Nanscara ainfo manoi omitsiscatiro. Noncai manotamarocon non isharapacunacaran,’ ishon cacapaimisifoan yoiafo.”
“Ascan, Upa Diosin, ato fasi onaintimahuu omitsiscai tununonfoma. Icoinra huafoan ua nicasharacahuun. Upa Diosin ato samamashta onaintimacoinshquin afanan isharatamarocon atirifi namafain omitsiscamafain aton tushu cuyomashquin fonainquin naanonfo. Tsoan atiroma cuscan Upa Diosin ahuamamishti huatiro. Nanton ato onaintimai ato cooai cooi futsunonfo. Ascano Upa Diosin mato yoi isca huaquin, ‘Uhuun yoramishtichin, Babilonia anoafo cuscara iyamacahuun. Ato fu rafuyamacahuun. Ato futan chaca huayamacahuun un ato onaintimai cuscan un matori onaintimanonma,’ ”
ishon Upa Diosin mato yoi.
9 Ascan Babilonia coaino mai futsafoti aton niaifofoan oincani uaicaquin manoshcani. Nanfoan Babiloniafo futan Upa Dios potacani chaca huanonfo. Babilonia anoafohuunshon mafo ichapa fiafo. 10 Nanfo coaino oincani niaifofo fasi ratushquicani.
“¡Ohuashta! Babiloniafoan rato caifo futsancai mato cuscarama. Man tapicoinsharafiacun samamashta Upa Diosin mato onaintimai man coi futsunon. ¡Ai timafin!”
ishon ratucoincaquin niaifofoan yoishquicani.
11 Nanscarifiai manifoti aton inanmitsamisifo uaishcani. —¡Ohuashta! Babilonia man coi cuyoa. Natian tsoan futsacai nocon mafo non nocon ahuara futsafo fitiroma. 12 Nocon oro sharashtacoin fianmafain nocon torofo oshoshtacoin fianmafain nocon toquirifo faca facaitsa chicoin fianmafain nocon toquiri futsan ahuun anu perla fianmafain nocon pano futsa futsatapafo fianmafain nocon ihui inin sharashtacoin futsa futsatapafo fianmafain toquiri curushcoin oshopa sharashtacoin ahuun anu marfilhuunshon ahuarafo onihuafain ihui chicoinhuunshon ahuarafo onihuafain cuno ahuun anu broncehuunshon ahuarafo onihuafain cuno futsan ahuun anu fierohuunshon ahuarafo onihuafain toquiri ahuun anu marmolhuunshon ahuarafo onihua nanfo afanan fianmafain.
13 Nocon pitiri ahuun anu canela non yochi non nan fimi ahuun anu uva ahuun unu non shuni non harina roroshta non trigori fianmafain inin shara aton anu incienso yafi futsan ahuun anu mirra non inin futsafori fianmafain nocon inafo nan moifo non chashoanfo non caballofo fianmafain taramutiya fianmafain nocon oinmatifori noco afanan fiantirofoma.
14 “¡Ohuashta! Babiloniafoan nan ahuarashta sharashtacoin futsa futsatapafo man fasi fuchipaimisifo afanan man fitiroma. Nantifi man aya cuscan man funocoian afanan man fipanacama. Man ahuara yopapaonima. Man acai afanan ascanacama. Nantifi matona man funoi cuyocoianran,”
ishon nan inanmitsamisifoan yoishquicani. 15 Babiloniafo fasi omitsiscai nan Babilonia anoafo yamafiashon aton mafo fimisifo atohuunshon mai futsa inanmitsashon pui ichapa fimisifo fasi ratucoincani. Fasi uaishcani manocaquin yoiquin isca huashcani,
16 “¡Ohuashta! Rato futsafocai Babiloniafo cuscarama. Ahuun yorafo sahuuti sharashtacoin sahuumisifo. Sahuuti shonan shara non oshin shara non oro toquiri faca facaitsa chicoin non toquiri futsa ahuun anu perla sahuutihuun nua nanscara sahuuafo. 17-19 Fasi isharafiamisishacaquin samamashtacoin nantifi man funoafo. Afanan aton pushurasi yamai. Man coi cuyoi futsua. ¡Ohuashta!”
ishon nan inanmitsamisifoan yoishquicani. Nanscarifiai nan shashohuan ifofo non amuran fomisifo non shashohuanun camisifo pui fiishquin afoanri fasi shinain. Babilonia coaiton chaicushon oincani manocani fasi uaicani.
“¡Ohuashta! Rato pushurasi futsancai Babilonia cuscarama. Nanno fustishon shashoan ifofoan pui ichapa fiafo. Ascanfiacanashu samamashtacoin nantifi man aya cuscan man funoaforan,”
ishon shashoan yonomisifoan yoishquicani.
20 “Ascafiaifoanno nantifi Upa Dios fu icanoafoan unimacahuun. Babiloniafoan Jesús icoinra huafo man omitsiscamamisifo. Ascancufin Upa Diosin ato fasi onannitimana omitsiscapanacafo. Nantifi Jesús icoinra huafoan non Jesús fu rafumisifoan non Diosin tsain inon pacoai yoimisifoanri unimacahuun,”
—ishon yoia. 21 Ascatan Upa Diosin ahuun oinmati afu nai muran icaton futsan mutsisipacoin toquiri uhuapacoin finifoantan unuhuan muran potaquin yoia isca huaquin,
“Un na toquiri curushcai pota cuscan nanscarifiai Upa Diosin nan pushurasi anoafo Babilonia curushcai ato onaintimashqui coi munononfo. Cuyoriscatashquin afanan tsoan oinnacama. 22 Ascan afanan Babilonia ano manutifo nan shainti non manuti futsafori pusicanima. Tsoancai afanan ato nicanacama. Yonomisi afanan ano iyamacain afanan naniainfo nicayamafain 23 afanan lamparina ano otapacunacafoma. Nocofunun ainfo fiaino unimaifoan man nicamisi.”
“Ascan afanan tsoan ascaran nicapacunacama. Babilonia anoa inanmitsamisifoan fasi tapicoincani. Nanfoan fasi ichapa fiafo. Aton shointihuunshon manifoti paramisifoquin. 24 Babiloniafoan Diosin tsain yoimisifo non Jesús icoinra huafo futsafori rutumamisifo. Manifoti anoa ato rutunifo,”
ishon Diospan nai oinmatinin yoia.