1 Pabado nebi. Nuquin Papan tantiacpadomboen Esuquidistun: —Ëbi chuibeneta —caidquio nebi. —Ambi chiampicpadomboen aton Mado Esuquidistu tantiaquid unësacsho Nuquin Papan abëdi tabadmendac —quequin Esus chuibenequidquio nebi. 2 Con mado icbobimboecquid mibi neque. Mibi chuiquin nëid dada uanu, Timoteyo. —Nuquin Papan aton Mado Nuquin Icbo Esuquidistubëdtan bëdamboen isquin bëdambo icmepashun —quequin mibi tantiembi.

3 Con tsusedpabon nacpadomboen Nuquin Papauidi tantiaquin ambi chiacpadomboen natiadquio iquebi. Adquid icquin Nuquin Papa mibi chianembi. —Mibi tantiaquid Timoteyo bëdambo iquec, Papa. Adquio icmec mibi bëdamboshë iquec. Adquiouidi icmeta, Papa —quequin Nuquin Papa chianembi. 4 —Ëbi nidnu —quesho tantiash mibi shubiondaid tantiec mibi iste bunquiebi, mado. Ambo nidash mibi isec cuishonquetsiabi. 5 Naden mibi tantiembi. —Aton chichi Doida caidën ani Eunisebëdtan aid daëdshumba Esus tantiabenquiacpadomboen Timoteyontsen nëbi Esus tantiaquiec —quequin mibi tantiembi. 6 Adquid icsho mimbi tantiondaid padpiden mibi chuinu. —Min Mayan nëidbëd tabadmequin cuesambo icmequin Esus chuibame, Papa —quequin mibi mamishquin Nuquin Papa chiondambi. Adoac aton Mayan mibëd tabadmiac. Adoaid icquin dacuëdenquio icquin Esus chuibanta, mado. 7 ¿Nuquin Papan aton Mayan nuquibëd icmiacta nuqui natia dacuëdpe? Padenquio. Comapenen tantiaquid yec nuquibëd icquin nuqui cuesambo icmec. Adembidi Nuquin Papan Mayanën tantiamiac nuqui matses bëdamboen tantiec. Adembidi nuqui icsate bunaid namenquio icquin mëmunquidquio icnuc nuqui bëdambo icmec.

8 —Adoaid nebi —queshun dacuëdenquio icquin Nuquin Icbo Esus chuibanta. Adembidi dacuëdenquio icquin: —Pabado tantiaquiembi —cata. —Quënën nauedtsaid Pabado tantiatiapi —quenda. Utsibon cuestiadquio icquin chieshënaqui Nuquin Papan namiacpadec chieshtoenquio icquin Esus chuibanuna. 9 Nuquin Papan: —Bëdamboec tabadquid icmequin con Mado Esus tantiamembi —caido icquin adonona. ¿Nuqui bëdamboecuidi tabadshoda Nuquin Papan nuqui bëdamboen isbempondash? Padenquio. Ëndenquimboshë nidaidbëdta matses uabi Nuquin Papan: —Ëmbi chiaid niac-niaquec icsambo icboedëmbi con Mado Esus tantiasho cuidenquio iquendambi —quequin ambi chuipampicpadomboen nuqui Esus tantiamiac. 10 Aden ambi chuipampid tantiamiabi icshumbic nëbi Esuquidistu matsesmeshun matses tantiamiac. Adoac: —Abi tantiaquid unësacsho icsaido cuidacno nidmenquio icquin unëstiapimbo icquid icmequin Nuquin Papa yacno abëdi Esuquidistun tabadmendac —quequin nuqui tantiec. 11 Aden tantiaquin Esus chuibenequidquio nebi. —Ëbi chuibeneta —Esusën caondaid yec Nuquin Papabëdta Esus tantiamequidquio nebi. 12 Aden chuibeneshobini chieshënquin quënën nauedondash. Adoaqui chieshtotiapimbo icquin Esus tantiembi. —Ëmbi tantiaidquio comapenen tantiaquin nabanquidquio Esus nec. Adquid icquin: “Ëbi tantienquio yanushe,” queshun abi tantiamequin ëbi chieshtomenquio iquendac. Nidaidën choabi icquin Esusën ëbi chieshtoenquio icquid icmendac —quec dacuëdenquio iquebi. 13 Tantia, mado. Mibi chuinu. Ëmbi abimbo chiondaidquio chuiban: —Nuquin Papan chiaidquio nec —queshun. Esuquidistu tantiaquinc matses tantiaquinc caquin adenuidi chuibanta, mado. 14 Nuquin Papan Mayan nuquibëd iqueque. Aidën namiac ëmbi chiondacpadomboen Nuquin Papan chiaidquio chuiquin Esus chuibanta, mado.

15 Ëmbi: —Cho —cac choenquio icboed mimbi tantiac, mado. Nidaid utsi Asia caid yacnocquido dadpen adec choenquio iccosh. Edemoquenes caid choenquio iccosh. Adecbidi Piquedo caid chedo. 16 Onesipodo caidën nëbi bëdamboen isposhi. Ëbi quënën nauedacsho dacuëdenquio icquin isuan-isuanquin bëdambo icmioshi. Adsho isun: —Aton shubun icquidobëdta aid bëdamboen ista, Papa —quequin Nuquin Papa chianembi. 17 Aidëmbi nëmbo shubu dadpen icquid Doma caid yacno choboshon: —¿Mitsimbo Pabado icpec? —quequin yuen nibëmbenequin istuidpondashi. 18 Mimbi isnubi Epeso yacnoshon aidëmbidi baded-badedquien nashundeniondashi. Adsho tantiashun: —Nidaidën padpidec choshon Nuquin Icbon Onesipodo bëdamboen ispashun —caimbi.