1 Vwehu nune veje ja ea mapoka najahiꞌina pareꞌavara. Ja nihena kavujaꞌinaꞌe nú ea kaꞌene ijaꞌinijija niꞌimaꞌuraꞌe eha sisea apehuna. 2 Ijihunaꞌe nú ea mahoꞌo ꞌunama ani aniꞌini tachinamie arihura. ꞌEnavo ea pina hura ira kaꞌene ꞌwaramujino paasusamujaho hu ea arira. ꞌEnaꞌomo hu huni haha oriꞌini ꞌajoarahuna arerina. 3 ꞌEnaꞌomo nú iviamaa hosia puni iri vaji ꞌauria irechamiakame vuꞌataa hejura reꞌavajaho nú puni hahiji ꞌuꞌo mahoꞌo ꞌeke ura arini irechamihuna. 4 Heha! Sisima ijija ꞌuꞌo mamaꞌina kaivo hwasisia mamaꞌinapo ꞌaniꞌejuꞌe vaꞌura. Ijaꞌinaꞌe sisima ꞌajohiꞌinijara unenu pina maꞌuꞌui vejuꞌe sisima icháꞌina hu ura renujaꞌinaꞌe vaꞌuna. 5 ꞌEne ꞌuꞌo mitarijaho haha pwinanaꞌa maꞌuꞌua kaivo uneunecha mamaꞌina kehi kehi ꞌwaramuna. Heha! Nechiꞌa niꞌimaꞌura kaivo vena maꞌuꞌui ꞌejanavuꞌe rena vaꞌuna. 6 ꞌEne mitariji ꞌuꞌo vene ꞌee sisea huni tinia. ꞌEne mitarijara haha pwinanaꞌa mahoꞌo ruarahuna. ꞌEne mitari jihuni harura sisea kajaho veni renuni kwaa ijino rena rouꞌe ꞌwaramuna. 7 Ijihunaꞌe hanuha ani aniꞌina uka tapara ꞌee uneunecha kaꞌene mweꞌi tiroha ojiꞌina sohanuha ijija emaapo ꞌuninamie ꞌajohaura. 8 ꞌEnakaivo ei pini huni mitara hami ꞌajohe sonama nahuna areri pana. Ijaho nihoꞌo sisea kaꞌene siheria paꞌana kaꞌene maka punaꞌi ꞌaninamiu jaꞌina ituꞌona namu. 9 Ijí mitara nikwisu kajino nú núni Natohwa ꞌee Oma taꞌarohura. ꞌEne ijí mitara nikwisu kajino nú ea kaꞌene Godi vareꞌinaꞌe venajija siripavura. 10 ꞌEne ira nikwisuꞌina kajino merajihujaho ꞌwarame ꞌee siripavujaho ꞌwaravura. Vwehu nune ike uneunechakija ꞌunama ijaꞌina paveꞌavara. 11 ꞌÚ toa úja mamaijaho toa siseijiꞌi ahume rouna raka? 12 Vwehu nune matakapo tavoꞌa rejura raka? ꞌEne aja ꞌahi mataka ꞌina irima navura raka? ꞌEne soha areri toa maa reꞌena raka?

13 ꞌÚ ea irara joni vajakaho vwiha hami vwihajiꞌine ꞌee hena kama parajiꞌine? Makaꞌeje hu huni kara mamaijino vene masuani vwiha mamaijino najahama. 14 ꞌEnakaivo ja nihoꞌo senama parane ꞌee joni ojijihuni ura ijiru vwihajiꞌinaꞌe reꞌavajaho pakehi kehi veꞌavara. Kehi kehi vejujaho sisea niꞌimaꞌura kaꞌene nimaijiꞌi ninakaraviꞌinijina. 15 Vwiha ijá kajaho ichutoi rena rohuna pana kaivo ijaho mweꞌa kehuna ꞌee haha huni ꞌunama ꞌee ꞌavena sisea punaꞌi rena roura. 16 Ijihunaꞌe ichihichakaro oja sisesa vwihane ꞌee ajiname ꞌee puni ura ijino pupusu vwihajujipo navujaho sisea ani aniꞌina kihune ꞌee uneunecha ura arini panahuna. 17 ꞌEnakaivo mamaa kaꞌene ichutoi rena roujija ikehina. Amurijaho ariramaaꞌe matauviꞌine masuani ajuaraviꞌine hami vwihajiꞌine numisarai rarena parajiꞌine kara mamaaꞌe ꞌee karokaha pavejiꞌina. ꞌEnakúne paꞌaroꞌaroti namine choichoi pamejiꞌinaꞌe reꞌavara. 18 ꞌEne matauma hihuna ꞌwaraviꞌinijipo matauma hihuna ꞌwaravuꞌe roe ariramaaꞌe rejura.