Balʉa gba Polo
pɨ omabhuka na gʉdhʉ na
pɨ omabhuka na gʉdhʉ na
Galate
Eli na kalanʉ
Lɨ okpála ɨnde ne omaYuda ade aholo azɨba Bádha Ngali lɨe-e, abhomʉ-o, u atsia ayi ngʉ́ nambɨla me: ngʉ́ nakolo makilisito na kʉkʉlʉ-o, a ayo bha me kpála mene lɨ́lɨ gba Moidje-e ? Polo atsia apa me a mo-o ade. Padhá de, anga engʉ́ na ngbéngbé ɨnde bhʉ́ mʉkobho gba makilisito, a ko nabhuka ɨnde lɨ ndʉ okpála hana akolo ngbingbili kala Ebhe ka e-o. La-a, okpála koko adʉ agʉ Polo, u atsia adʉ apa me, a ayo me u mene di lɨ́lɨ gba Moidje ngʉbula me u kolo ngbingbili kala Ebhe. Balʉa ɨnde lɨ Polo aye e pɨ okpála na Galate-e, anɨ aye nanɨ ngʉbula me okpála ɨnde ambu lɨ kpadjɨ ka omʉsuno na eu bhomʉ-o, u sia nabhuka na kʉkʉlʉ, amba u kolo la di lɨ bádha kpadjɨ. Polo aholo nakpokpo lele maka a ayo lɨe me u ꞌɨ anɨ me bhʉlʉ titima gba YesuKilisito . Anɨ atsia agama ’ngʉ́ pɨndjɨ ngʉ́ napa me eꞌɨ ango-o ngʉ́ napa me nɨ kolo bhʉlʉ titima gba Yesu-o, ayie ka Ebhe, ayie ka angu gba kpála na doto belegʉ de bini. Anɨ atsia apa me kulu gba nɨ-e atsia naali okpála ɨnde ne omaYuda ade-o. Bhʉ́ oalo na soso-o, Polo ngasuno me nabhuka bhʉ́ Kilisito ngaha mʉkʉnda, mʉkʉnda ngaha la di nadholo ndjɨndjɨ bhʉ́ mʉkobho gba makilisito.
Ongbengbe ongʉ́ ɨnde bhʉ́ bhuku ɨnde-e ngae ɨnde:
Eli na kalanʉ 1:1-10
Angu gba Polo maka bhʉlʉ titima gba Yesu 1:11 – 2:21
Bádha Ngali na bádha bhʉ́ ’bu gba Ebhe 3:1 – 4:31
Nadʉ bhʉ́ ngʉ e gba makilisito a la di-e kulu gba anɨ 5:1 – 6:10
Eli na soso 6:11-18
1
Polo yi omabhuka na ndu doto na Galatia mayi
1 Ma aye balʉa ɨnde-e ngama Polo, ma ne bhʉlʉ titima gba YesuKilisito . Ma ne bhʉlʉ titima gba kpála koko ade. Yesu Kilisito atima ma ngae, a la di-e ’Dyɨ anɨ ɨnde azuku anɨ bhʉ́ ká okpála ɨnde amu-o. 2 Ngama bhʉ́ dabɨlɨ bini ne ndʉ ondaise nɨ́ hana ɨnde ei-e, ya aye balʉa ɨnde-e pɨ omabhuka na oDadjua gba Ebhe ɨnde bhʉ́ ndu doto na Galatia. 3 A ayo me ’Dyɨ nɨ́ Ebhe bhʉ́ dabɨlɨ bini ne Ngámá gba nɨ́ Yesu Kilisito suno bádha bhʉ́ ’bu gba o-o pɨ yi, amba u ha di guo ’ngʉ́ pɨ yi. 4 Yesu Kilisito andala ’kpa lɨe ngae makpe, ngʉbula nagbegbe nɨ́ bhʉ́ siti ’ngʉ́ gba nɨ́, amba osisiti ’ngʉ́ na doto améne matá ehe bini ngʉ́ nɨ́ de. Anɨ amene mo-o nakpata lele maka lɨ Ebhe ’Dyɨ nɨ́ akʉnda lɨe-o. 5 A ayo me okpála dhɵgɵ Ebhe dʉdʉma ne dʉdʉma. A adʉ moko!
Koli Bádha Ngali gba Yesu Kilisito-o bha bini
6 Ma ngangamba ka yi naali! Ebhe abhʉ yi me yi dʉ ne okpála gba nɨ-e lɨ kpadjɨ gba Yesu Kilisito, anɨ atsia asuno bádha bhʉ́ ’bu gba e pɨ yi. La-a, belegʉ mo-o, yi akolo adji ’ngbʉ yi lɨ anɨ má gala, yi atsia aholo nadje Bádha Ngali koko. 7 A la na paká me Bádha Ngali koko matá ade. Engʉ́ bini, okpála koko ngangbɨngɨ ’ndjɨ yi. U ngakʉnda nasiti Bádha Ngali gba Kilisito-o. 8 Ɨ dʉ me kpála koko, ɨ dʉ di-e ya, ɨ dʉ di-e sʉka andjelu bini ayie abhʉ́lá nde akpokpo Bádha Ngali koko kpí ne bhende ya akpokpo e pɨ yi-e, Ebhe de tʉ pɵdjɵ lɨ anɨ. 9 Ya apa, ma la matá mbɨa ɨnde-e ngapapa me, ɨ dʉ me kpála koko nde akpokpo Bádha Ngali kpí ne bhende yi asia e-e, Ebhe de tʉ pɵdjɵ lɨ anɨ.
10 La-a, yi abhundja naayi me ma ngagɨlɨ me okpála zɨba ma? A mo-o ade, ma akʉnda mangbo me Ebhe zɨba ma ngae. Yi abhundja naayi me ma akʉnda nanga lɨ okpála? A mo-o ade. Ɨ dʉ́ me ma kʉnda matá nanga lɨ okpála-a, ma de ne bali gba Kilisito ade.
Polo akpokpo lele maka anɨ akolo lɨe bhʉlʉ titima gba Kilisito-o
11 Ondaise ma, ma akʉnda me yi mbɨla me Bádha Ngali ɨnde ma ngakpokpo e, yie ka kpála-kʉtɨ de. 12 Ma sia ka kpála-kʉtɨ de, kpála bini suno la di mʉma ngae de. Engʉ́ bini, Yesu Kilisito ambamba ta ’ngʉ́ ɨnde awo lɨe mawo-o mʉma ngae. 13 Yi mbɨla lele nadholo gba ma nanɨ na kalanʉ-o, nedhɨnga ma adʉ nakpata dasʉndʉ na Ebhe gba omaYuda lɨe hana. Lɨ nedhɨnga bhomʉ-o, ma adʉ nato mbolo lɨ omabhuka na Dadjua gba Ebhe-e nane dada mane. Ma adʉ nakʉnda nabhɵbhɵlɵ mabhɵlɵ. 14 Ma ane nanɨ omaYuda bhelé, ɨnde adʉ ne kalanga maka ma bhʉ́ lele nakpata dasʉndʉ gba omaYuda-o. Ma aha nanɨ lɨma libhomu ngʉbula dasʉndʉ gba onguo ogbi nɨ́-o.
15-16 Belegʉ ɨnde lɨe mo-o, Ebhe abhʉ nanɨ ma. Anɨ abhʉ nanɨ ma me ma nde ngabha bhʉ́ ’bu ’hi ma. Anɨ asuno nanɨ bádha bhʉ́ ’bu gba e mʉma, anɨ atsia aꞌɨ ma me ma mene kulu gba nɨ-o. Lɨ nedhɨnga anɨ aꞌo nanɨ e akolo lɨe, anɨ atsia amene me ma mbɨla Ndɨlɨ gba nɨ-e, ngʉbula me ma kpokpo Bádha Ngali gba anɨ-e pɨ okpála ɨnde ne omaYuda ade-o. Lɨ nedhɨnga bhomʉ-o, ma nʉ bhaka kpála bini de. 17 Ma nʉ la di bhʉ́ Yelusalema ngʉ́ nabhaka okpála ɨnde adʉ nanɨ obhʉlʉ titima gba Yesu Kilisito mʉma kalanʉ-o de. Engʉ́ bini, ma anʉ bha kolo má gala bhʉ́ Alabia, pɨpɨta-a, ma agie lɨma bhʉ́ Damasɨ. 18 Pɨta kalanga bata-a, ma atsia anʉ bhʉ́ Yelusalema ngʉbula me ya u lɨ ya ne Piele*1:18 Bhʉ́ eli na giliki-e, Sefasɨ-e: A ko ꞌɨlɨ koko gba Piele. bhʉtsibhʉtsi na bini. Ma adʉ agba anɨ ngʉbula ’kpɨ́ ndjɨkpa ne ká bhuluvue. 19 Ma u bhʉlʉ titima koko bini de, ma au bha bini Djakɨ, ndai Ngámá. 20 Engʉ́ ɨnde ma aye e ɨnde-e, a ko kʉkʉlʉ ’ngʉ́, kala Ebhe-e, ma apa eu de.
21 Pɨpɨta-a, ma atsia anʉ bhʉ́ ndu doto na Silia di ne ndu doto na Silisia. 22 Omabhuka na oDadjua gba Kilisito na ndu doto na Yudaya u nga nanɨ ma ne djila o de. 23 U adʉ bha nadje ongʉ́ ɨnde lɨ okpála koko adʉ napa e lɨ ’ngʉ́ gba ma-o. U adʉ napa me: «Kpála ɨnde adʉ nako nato mbolo lɨ ya kalanʉ-o ayipa, anɨ ɨbili mbɨa ɨnde-e ngakpokpo pɨ okpála Bádha Ngali ɨnde anɨ adʉ nako nakʉnda nabhɵlɵ e-o.» 24 Abhomʉ-o, u atsia adʉ nadhɵgɵ Ebhe kabula ma.