1 ዬሱሴ ታጶ ላምዖ ዳኪንቴዞንሢ ዒዛ ባንሢ ዔኤላ''ዖ ፑርቶ ዓያኖ ቢያ ኬሳ''ንዳያ ሓሣ ዱማ ዱማ ዶርዖዋ ፖዒሳንዳ ዎልቄና ቢታንቶና ዔያቶም ዒንጌኔ። 2 ፆኦሲ ካኣቱሞ ዛሎ'' ዓሶም ቢያ ኬኤዛንዳጉዲ፥ ሃርጊንቴ ዓሶዋ ፖዒሳንዳጉዲ ዔያቶ ዳካዖ፦ 3 «ዒንሢኮ ጎይፆም ማዓ ባኣዚ'' ዓይጎዋ ዔኪፖቴ፤ ኮኦሎ'' ማዔቶዋ፥ ጋላታቶዋ፥ ጋላ ዓርቆ ሉካ''ታቶዋ፥ ሚኢሼታቶዋ፥ ዒንሢ ማኣዔ ዓፒላፓ ሜሌ'' ማኣዖዋ ዔኪፖቴ። ሉቃ. 10፥4-11፤ ዳኪ. ማዾ'' 13፥51። 4 ሾኦቹሞና ዒንሢ ጌላ ማኣሮይዳ ዬኖ ጉርዴሎይዳፓ ኬስኪ ዓኣዻንዳያ ሄላ''ንዳኣና ዒኢካ ዴዑዋቴ። 5 ዓሳ ዒንሢ ሾኦቺንሢ ዔኩዋያ ማዔቶ ጋዓንቴ ዬኖ ጉርዴሎ ሃሺ'' ኬስካዖ፥ ቶካ''ፓ ዒንሢኮ ሲላሎ ፒፂ''*ቶካ''ፓ ሲላሎ ፒፂ''፦ ጋዓዛ ዓይሁዶ ዓሶኮ ማኣሌ ዳምቤና «ዒንሢ ዴኤፆም» ጎዖሢ ጎይፆ ማዾያኬ። ዓኣዹዋቴ፤ ዬይ ዔያቶም ‹ዒንሢና ዔሩዋቴ› ጋዓ ማርካቶ ማዓንዳኔ» ጌዔኔ።

6 ዬያሮ ዳኪንቴዞንሢ ዬካፓ ኬስኪ ኮዦ ሃይሶ ዔርዚ ዔርዚ፥ ሃርጊንቴ ዓሶዋ ፖዒሲ ፖዒሲ ጉርዶ ቢያይዴና ዓኣዼኔ።

7 ጌሊላ ዓጮ'' ዎይሣ፥ ሄሮዲሴ ዬሱሴ ማዼ ባኮ ቢያ ዋይዜሢሮ ጎዖንዶ ጎይሢ ባይዜኔ፤ ዓይጎሮ ጌዔቶ ፔቴ'' ፔቴ'' ዓሳ፦ «ማስካ ዮሓኒሴ ሃይቦ''ይዳፓ ዔቄኔ» ጌዒ ጌዒ ጌስታሢሮኬ። 8 ዬያጉዲ ሃሣ ፔቴ'' ፔቴ'' ዓሳ፦ «ፆኦሲ ማሊፆ ኬኤዛ ዔኤሊያሴ ማዒ ሙኬኔ» ጋዓዛ፥ ዓቴ'' ዓሳ ሃሣ፦ «ሚና ፆኦሲ ማሊፆ ኬኤዛዞንሢዳፓ ፔቴ'' ሃይባ''ፓ ዔቄኔ» ጋዓኔ። ማቲ. 16፥14፤ ማር. 8፥28፤ ሉቃ. 9፥19። 9 ሄሮዲሴ ፔ ዛሎ''ና፦ «ታኣኒ ዮሓኒሴኮ ቶኦኮ'' ቲቂሴንቴ፥ ሂዳዖ ሃያ ቢያ ባኮ ማዻኔ ጌይንቲ ኬኤዚንታሢ ዒ ዖናዳይ?» ጌዒ ዛጋኒ ኮዓኔ። ማቲ. 14፥1-2፤ ማር. 6፥14-15፤ ሉቃ. 9፥7-8።

10 ዳኪንቴዞንሢ ዳኪንቴ ቤዛፓ ማዒ ሙካዖ ማዼ ባኮ ቢያ ዬሱሴም ኬኤዜኔ። ዒማ''ና ዒዚ ዔያቶ ዱማሲ ዔኪ ቤቴሳይዳ ጌይንታ ካታሞ ዓኣዼኔ። 11 ዓሳ ዬሱሴ ዓንካ ዓኣቶዋ ዔራዖ ዒዛ ጊንፆ ሙካዛ፥ ዒዚ ዔያቶ ዔኪ ፆኦሲ ካኣቱሞ ዛሎ'' ዔርዜኔ። ዶርዓሢዳፓኣ ፖዓኒ ኮዔ ሃርጊንቴ ዓሶዋ ፖዒሴኔ።

12 ሳዓ ዓማ''ኒ ጋዓኣና ታጶ ላምዖንሢ ዬሱሴ ኮራ ሙካዖ፦ «ኑኡኒ ዓኣ ቤዛ ዓሲ ናንጉዋ ዳውሎ''ይዳኬ፤ ዬያሮ ዓሳ ሃካ ኮይሎ''ይዳ ዓኣ ካታሞና ካታሞ ዙላ'' ዓኣ ጉርዶ ዴንዲ ሙዖ ባኣዚ''ና ዎርቆ ቤሲና ኮይ ዴንቃንዳጉዲ ዓሶ ዳኬ» ጌዔኔ።

13 ዬሱሴ ጋዓንቴ፦ «ዒንሢ፥ ዔያታ ሙዓንዳ ባኣዚ'' ዒንጉዋቴ» ጋዓዛ፥ ዔያታ ማሃዖ፦ «ኑኡኮ ዓኣዞንሢ ዶንጎ ካሣና ላምዖ ሞሎና ሌሊኬ፤ ዬያሮ ኑ ዓኣዺ ካሣ ሻንቂባኣያታቶ ሃያ ዴሮ''ም ቢያ ጊዳዓኬ» ዒዛም ጌዔኔ። 14 ዒማ''ና ዓቲንቆኮ ሚርጉማ ዶንጎ ሺያ ማዓያኬ።

ዬካፓ ዬሱሴ ጊንፆ ሃንታዞንሢም፦ «ዓሶ ዶንጊታሚ'' ዶንጊታሚ'' ማሂ ፓቂ ዴይሡዋቴ» ጌዔኔ።

15 ጊንፆ ሃንታ ናኣታ'' ዒዚ ዔያቶ ዓይሤሢጉዲ ዓሶ ዴይሤኔ። 16 ዬካፓ ዬሱሴ ዶንጎ ካሦንሢና ላምዖ ሞሎንሢና ዔኪ ሌካ ጫሪንጮ ዼ'ጊ ጌዒ ዛጋዖ ፆኦሲ ጋላቲ፥ ቡንፄስካፓ ዓሶም ዔያታ ዒንጋንዳጉዲ ዒዛኮ ጊንፆ ሃንታዞንሢም ዒንጌኔ፤ 17 ቢያሢ ሙይ ሚሽካዛ፥ ዒዛኮ ጊንፆ ሃንታዞንሢ ዓቴ'' ዶንቦ ታጶ ላምዖ ዳልጊ ሌማቴ ኩሙሢ ዔኬኔ።

18 ፔቴ'' ኬሊ'' ዬሱሴ ፔኤሮ ሌሊ ሺኢቂቤቃ ዒዛኮ ጊንፆ ሃንታዞንሢ ዒዛ ኮራ ዓኣሢሮ፦ «ዓሳ ታና ዖናኬ ጋዓይ?» ጌይ ዔያቶ ኮራ ዖኦጬኔ።

19 ዔያታ ማሃዖ፦ «ፔቴ'' ፔቴ'' ዓሳ፥ ‹ማስካ ዮሓኒሴኬ› ዛላ'' ሃሣ ‹ዔኤሊያሴኬ› ኔና ጋዓኔ፤ ዓቴ'' ዓሳ ሃሣ ‹ሚና ቤርታ ፆኦሲ ማሊፆ ኬኤዛዞንሢዳፓ ፔቴ'' ሃይባ''ፓ ዔቄኔ› ጋዓሢያ ዓኣኔ» ጌዔኔ።

20 ዒንሢ፦ «ታና ዖናኬ ጋዓይ?» ጌይ ዔያቶ ዖኦጫዛ፥ ጴፂሮሴ ማሃዖ፦ «ኔኤኒ ፆኦሲ ኔና ዳኬ፥ ሜሲሔኬ» ጌዔኔ። ዮሓ. 6፥68-69። 21 ዬሱሴያ ዬያ ዔያታ ዖኦማኣ ኬኤዙዋጉዲ ላቲ ዔያቶም ኬኤዜኔ።

22 ዬካፓ ሃሣ ዬሱሴ ፔኤኮ ጊንፆ ሃንታ ናኣቶ''ም፦ «ዓሲኮ ናዓሢ ሚርጌ ሜቶ ዔካንዳያ ኮይሳኔ፤ ጪሞና ቄኤሶኮ ሱኡጎና ሃሣ ሙሴ ዔርዜ ዎጎ ዔርዛ ዓሳኣ ዒዛ ቦሂ ሃሻ''ንዳኔ፤ ሃሣ ዎዺያ ዎዻንዳኔ፤ ማዔቶዋ ሃይሣሳ ኬሎ''ና ሃይባ''ፓ ዔቃንዳኔ» ጌዔኔ።

23 ቢያሢም ሃሣ፦ «ታ ጊንፆ ሙካኒ ናሽካያ ዓኣቶ ፔና ሃሾ''ንጎ፤ ቢያ ኬሊ'' ሃይቢ ሄላ''ንዳኣና ጊኢጌያ ማዒ ታ ጊንፆ ሃንቶንጎ፤ ማቲ. 10፥38፤ ሉቃ. 14፥27። 24 ፔ ናንጎ ዓይሳኒ ኮዓሢ ቢያ ፔ ናንጎ ባይዛንዳኔ፤ ታ ጋይቴ ጌዒ ፔ ናንጎ ዓኣሢ ዒንጋሢ ጋዓንቴ ፔ ናንጎ ዓይሳንዳኔ። ማቲ. 10፥39፤ ሉቃ. 17፥33፤ ዮሓ. 12፥25። 25 ዓሲ ዓጮ''ይዳ ዓኣ ቆሎ ቢያ ዴንቃዖ ናንጎ ፔኤኮ ባይዚ ሓሣ ጉሪ ዓታያ ማዔቶ ዓይጎ ፓሣንዳይ? 26 ታኣና ታ ቃኣሎ''ና ዛሎ'' ኬኤዛኒ ቦርሲንታሢዳ ቢያ ዓሲኮ ናዓሢ ፔ ቦንቾና ሃሣ ፔ ዓዶ ቦንቾና ዬያጉዲ ጌኤዦ ኪኢታንቾ ቦንቾና ሙካ ዎዶ''ና ዒዛይዳ ቦርሲንታንዳኔ። 27 ጎኔ ታ ዒንሢም ጋዓኔ፤ ሃሢ ሃይካ ዒንሢ ባኣካ''ፓ ፆኦሲ ካኣቱሞ ዛጋንዳያ ሄላ''ንዳኣና ሃይቂንዱዋ ፔቴ'' ፔቴ'' ዓሲ ዓኣኔ» ጌዔኔ።

28 ዬሱሴ ዬያ ባኮ ኬኤዜሢኮ ሳሊ'' ኬሊ''ኮ ጊንፃ ጲፂሮሴና ዮሓኒሴና ያይቆኦቤና ዔኪ ሺኢቃኒ ፔቴ'' ዹካ'' ኬስኬኔ። 29 ዒዚ ሺኢቃንቴ ዓውካራ ዒዛኮ ላኣሚንቲ ዓፒላ''ኣ ዒዛኮ ቦኦሪ፥ ዓኣፓ ዱካያ ማዔኔ፤ 30 ዬማና ዔርቲባኣንቴ ላምዖ ዓሲ ሙኪ ዒዛና ዎላ'' ጌስታኔ። ዬንሢያ ሙሴና ዔኤሊያሴናኬ። 31 ቦንቾና ጴዺ ዒዛና ዔያታ ጌስታሢ' ዬሱሴ ዬሩሳላሜይዳ ሃይቂ ፆኦሲ ማሊፆ ኩንሣንዳሢ ዛሎ''ኬ። 32 ዬማና ጴፂሮሴና ዒዛኮ ላጎንሢና ጊንዓ ባሼም ላሂ ዓኣኔ። ጋዓንቴ ዔያታ ጴጪ ዬሱሴ ፔ ቦንቾና ፖዒ ዓኣንቴ ዴንቄኔ፤ ሃሣ ዬያጉዲ ዒዛና ዎላ'' ዓኣ ላምዖ ዓሶንሢያ ዴንቄኔ። 33 ላምዖ ዓሶንሢ ዬሱሴ ኮራፓ ዱማዺ ዓኣዻዛ ጴፂሮሴ ዬሱሴ ኮራ፦ «ዔርዛሢዮ! ኑም ሃይካ ዴዒፃ ኮሺኬ፤ ዬያሮ ፔቴ'' ኔኤም፥ ፔቴ'' ሙሴም፥ ፔቴ'' ሃሣ ዔኤሊያሴም ማዓያ ሃይሦ ዉዲ ኑኡኒ ማዦም» ጌዔኔ። ጴፂሮሴ ዬያ ጋዓኣና ዒ ጋዓ ባኮ ዔሩዋያኬ።

34 ጴፂሮሴ ዬያ ኬኤዜ ጎይሣ ዓኣንቴ ሻኣሬ ሙኪ ዔያቶ ባይዜኔ፤ ዬይ ሻኣራ ዔያቶ ባይዛዛ ዔያታ ዒጊጬኔ። 35 ሻኣሮ ባኣኮ''ይዳፓ፦ «ታኣኒ ዶኦሬ፥ ታ ናዓሢ ሃያኬ፤ ዒዚ ጋዓሢ ዋይዙዋቴ» ጋዓ ዑኡሲ ዋይዚንቴኔ። ዒሲ. 42፥1፤ ማቲ. 3፥17፤ 12፥18፤ ማር. 1፥11፤ ሉቃ. 3፥22።

36 ዑኡዛ ዋይዚንቴሢኮ ጊንፃ ዬሱሴ ፔኤሮ ሌሊ ዓቲ'' ጴዼኔ፤ ዬንሢ ዒዛና ዓኣ ጊንፆ ሃንታዞንሢ ዔያታ ዛጌ ባኮ ቢያ ዒማ''ና ዖኦማኣ ኬኤዙዋዖ ዚቲዮ ጌዔኔ።

37 ዚሮ ጉቴ''ሎ ዬሱሴና ሃይሦ ዒዛኮ ጊንፆ ሃንታዞንሢና ዎላ'' ዹካ''ፓ ኬዳ''ዛ ሚርጌ ዓሲ ዬሱሴና ካኣሜኔ። 38 ዓሶ ባኣኮ''ይዳፓ ፔቴ'' ዓሲስኬይ፦ «ዔርዛሢዮ! ሓይ ናዓሢ ታኣኮ ፔቴ'' ሌሊኬ፤ ሃዳራ ታኣም ዛጌ፤ 39 ሃኣዛጌ፥ ዒዛ ፑርታ ዓያና ዓርቂ ዔሩዋንቴ ዒላሣኔ፤ ሳዖይዳኣ ሎንሢ ዻንጎና ዱባሲ ዱባሲ ባርዲሳኔ፤ ዑፆዋ ዒዛኮ ኪፃሲ ኮሺ'' ሜታሴስካፓ ሓሻ''ኔ። 40 ዬያ ፑርቶ ዓያናሢ ኬሳ''ንዳጉዲ ኔኤኮ ጊንፆ ሃንታዞንሢ ታ ዖኦጬንቴ ዔያታ ኬሳ''ኒ ዳንዳዒባኣሴ» ጌዒ ዒላቴኔ።

41 ዬሱሴ ማሃዖ፦ «ዒንሢ ጉሙርቁዋ፥ ሃይ ዎቦ ሾይንታ! ታ ዒንሢና ዎላ'' ዓይዲ ሄላ''ንዳኣና ናንጋንዳይ? ሃሣ ዓይዲ ሄላ''ንዳኣና ታ ዒንሢ ጊቢ'' ዳንዳዓንዳይ? ሂንዳ ኔኤኮ ናዓሢ ሃኒ ዔኪ ባዔ» ጌዔኔ።

42 ናዓሢ ዬሱሴ ባንሢ ዑኬ ዎዶ''ና ፑርቶ ዓያናሢ ናዖ ሳዓ ሎንሢ ባርዲሳኣና ዬሱሴ ፑርቶ ዓያናሢ ጎሪ''፥ ናዓሢያ ዻቂሺ ዓዳሢም ዒንጌኔ። 43 ዴራ'' ቢያ ፆኦሲኮ ዼኤፖ ዎልቆ ዛጌሢሮ ዲቃቲ ሄርሼኔ፤

ዓሳ ቢያ ማዺንቴ ባኮና ዲቃቲ ሄርሺፆይዳ ዓኣንቴ ዬሱሴ ዒዛኮ ጊንፆ ሃንታ ናኣቶ''ም፦ 44 «ሓያ ታ ዒንሢም ኬኤዛ ቃኣሎ'' ዒና ዔኪ ማሉዋቴ፤ ሓይሾ ዓካሪ ዓሲኮ ናዓሢ ዓሶ ኩጫ ዓኣሢ ዒንጊንታንዳኔ» ጌዔኔ። 45 ዔያታ ጋዓንቴ ዬያ ዒ ጌዔ ባኮ ዔሪባኣሴ፤ ፆኦሲ ዔያቶም ዒ ጌዔ ባካ ዎዚ ጌይሢታቴያ ዓኣቼሢሮ ዒ ጌዔ ባካ ዔያቶም ጌሊባኣሴ፤ ጋዓንቴ ዒዛ ዖኦጫኒ ዔያታ ዒጊጬኔ።

46 ዒዛኮ ጊንፆ ሃንታ ናኣታ''፦ «ኑጊዳፓ ቢያ ባሼሢ ዖናዳይ?» ጌዒ ዎላ'' ማርሜኔ። ሉቃ. 22፥24። 47 ዬሱሴ ጋዓንቴ ዔያቶኮ ዒኖ'' ማሊፆ ዔራዖ ፔቴ'' ናይ ዔኪ ሙኪ ፔ ኮይላ'' ዔቂሲ፦ 48 «ሓያ ናዖ ታ ሱንፆና ቦንቺ ዔካሢ ቢያ ታና ዔካኔ፤ ታና ቦንቺ ዔካሢያ ቢያ ታና ዳኬሢያ ዔካኔ። ዒንሢ ባኣካ''ፓ ቢያ ባሼ ሂርኬ ማዓ ዓሢ ዒዚ ቢያይዳፓ ባሼ ማዓንዳኔ» ዔያቶም ጌዔኔ። ማቲ. 10፥40፤ ሉቃ. 10፥16፤ ዮሓ. 13፥20።

49 ዬካፓ ዮሓኒሴ ዬሱሴ ኮራ፦ «ዔርዛሢዮ! ፔቴ'' ዓሲ ኔ ሱንፆና ፑርታ ዓያና ኬሳ''ንቴ ኑ ዛጌኔ፤ ጋዓንቴ ዒ ኑኡና ዎላ'' ኔ ዓሲ ማዒባኣሢሮ ዒዚ ኬሱ''ዋጉዲ ኑ ላኣጌኔ» ጌዔኔ።

50 ዬሱሴ ማሃዖ፦ «ዒንሢ ማኪ፥ ዒፁዋኣሢ ቢያ ዒንሢና ዎላ''ታሢሮ ሃሹ''ዋቴ፥ ላኣጊፖቴ» ጌዔኔ።

51 ዬሱሴ ሌካ ጫሪንጮ ዔውታ ኬላ'' ዑኬ ዎዶ''ና ዬሩሳላሜ ባንሢ ዓኣዻኒ ማሊ ዔቄኔ። 52 ዒዛኮ ቤርታ ቢሪ ዓኣዻንዳ ኪኢታ ዓሲያ ዳኬኔ፤ ዔያታ ቢያ ባኣዚ'' ጊኢጊሻኒ ሳማሪያይዳ ዓኣ ፔቴ'' ጉርዳ ዓኣዼኔ። 53 ጋዓንቴ ዬኖ ጉርዴሎ ዓሳ ዒዛ ሾኦቺንሢ ዔካኒ ኮዒባኣሴ፤ ዓይጎሮ ጌዔቶ ዒዚ ዬኖ ዓጮ''ና ጌዒ ዬሩሳላሜ ዓኣዻንዳሢ ዔያታ ዔሬሢሮኬ። 54 ዒዛኮ ጊንፆ ሃንታ፥ ያይቆኦቤና ዮሓኒሴና ዬያ ዛጌ ዎዶ''ና፦ «ጎዳሢዮ!† ፔቴ'' ፔቴ'' ሚናኣ ማፃኣፓ «ዔኤሊያሴ ማዼሢጉዲ» ጋዓ ቃኣላ ቃሳ''ኔ። ጫሪንቺዳፓ ታሚ ኬዲ'' ሃንሢ ዓሶንሢ ሙዓንዳጉዲ ኑ ዓይሦም?» ጌዔኔ። 2ካኣቶ''. ማ 1፥9-16።

55 ዬሱሴ ጋዓንቴ ዔያቶ ባንሢ ሺሪጋፓ፦ [«ዒንሢም ዎዚጉዴ ዓያና ዒንጊንቴቶዋ ዒንሢ ዔሩዋሴ፤ ዓሲኮ ናዓሢ ሙኬሢ ዓሲ ዓዓይሳኒ ማዓንዳኣፓዓቴም ባይዛኒቱዋሴ»] ጌይ ጎሬኔ። 56 ዬካፓ ዔያታ ዔቂ ሜሌ'' ጉርዳ ዓኣዼኔ።

57 ዬሱሴና ዒዛኮ ጊንፆ ሃንታዞንሢና ጎይፆ ዓኣዺፆይዳ ዓኣንቴ ፔቴ'' ዓሲ ዬሱሴ ኮራ፦ «ታኣኒ ኔ ዓኣዻ ቤዞ ቢያ ኔኤና ዎላ'' ዓኣዻኒ ኮዓኔ» ጌዔኔ።

58 ዬሱሴ ዒዛም ማሃዖ፦ «ዉኡካሢኮ ዔቴ ዓኣኔ፤ ካፖኮ ሃሣ ዎርቆ ማኣሪ ዓኣኔ፤ ዓሲ ናዓሢ ጋዓንቴ ላሂ ሃውሻንዳ ቤሲታዖ ባኣሴ» ጌዔኔ።

59 ባጋሢም ሃሣ፦ «ታ ጊንፆ ሙኬ» ጋዓዛ፥ ዓሢ ጋዓንቴ «ጎዳሢዮ! ቤርታዺ ታ ዴንዲ ዓዶ ዱኡኪ ሙኮም» ጌዔኔ።

60 ዬሱሴ ማሃዖ፦ «ሓይቄ ዓሳ ሃይቄ ዓሶ ዱኡካንዳጉዲ ሃሼ''፤ ኔኤኒ ጋዓንቴ ዓኣዺጋፓ ፆኦሲ ካኣቱሞ ዛሎ'' ዔርዜ» ጌዔኔ።

61 ሃሣ ፔቴ'' ሜሌ'' ዓሲስኬይ፦ «ታ ጎዳሢዮ! ታ ኔ ጊንፆ ሙካኒ ኮዓኔ፤ ጋዓንቴ ቤርታዺ ታ ማኣሮ ዓሶ ሳራሢ ታ ዬዓንዳኔ» ጌዔኔ። 1ፆኦሲ. ዓሃኬ 19፥20።

62 ዬሱሴ፦ «ጌማይ ጎሽካኣና ዙርጎ ዓርቃዖ ጊንሢም ዛጋ ዓሲ ፆኦሲ ካኣቱሞም ማዓ ዓሲቱዋሴ» ጌይ ዒዛም ማሄኔ።