14
ዬሱሴ ሃሣ ፔቴ'' ሃርጌ ዓሲ ሃውሾ ኬሎ''ና ፓሤሢ
1 ዬሱሴ ዓይሁዶ ዓሶኮ ሃውሾ ኬሎ''ና ፔርሴ ዓሶኮ ሱኡጎይዳፓ ፔቴ''ስኬያ ማኣሪ ሙኡዚ'' ሙዓኒ ጌላዛ፥ ፔርሴ ዓሳ ዒዚ ማዻ ባኮ ዛጋኒ ኮሺ'' ዒዛ ሙራኔ። 2 ሃርጊንቲ፥ ዑፃ ጉቤ ኪፄ ፔቴ'' ዓሲ ዒማ''ና ዬሱሴኮ ቤርታ ዓኣኔ። 3 ዬሱሴ ሙሴ ዔርዜ ዎጎ ዔርዛ ዓሶና ፔርሴ ዓሶና ኮራ፦ «ዓይሁዶ ዓሶኮ ሃውሾ ኬሎ''ና ዓሲ ፓሥሢ ዎጋ'' ዓይሣሞ ዓይሡዋይ?» ጌይ ዖኦጬኔ።
4 ዔያታ ጋዓንቴ ዚቲዮ ጌዔኔ፤ ዬሱሴ ዒማ''ና ሃርጊንቴ ዓሢ ፓሢ ዳኬኔ። 5 ዬካፓ ሃሣ ዬሱሴ፦ «ዒንሢዳፓ ሃውሾ ኬሎ''ና ናዓ ሃሣ ጌማይ ዔቴይዳ ሎኦሜም ቤዞማና ኬሱ''ዋኣሢ ዖናዳይ?» ጌዒ ዔያቶ ዖኦጬኔ። ማቲ. 12፥11።
6 ዔያታ ጋዓንቴ ማሂ ኬኤዛኒ ዳንዳዒባኣሴ።
ኮሹሞና ዓሲ ሾኦቺንሢና ዛላ
7 ዬሱሴ ሙዖም ዔኤሊ''ንቴ ዓሳ ቦንቺንቴ ቤዛ ዴዓኒ ኮዓሢ ዛጋዖ ሂዚ ጋዓ ኮኦኪንሢ ዔያቶም ኬኤዜኔ፦ 8 «ፔቴ'' ዓሲ ዔፒ ቤሲ ሙኡዚ''ም ኔና ዔኤሌ''ቴ፥ ቦንቾ ቤዛ ሩኡሪ ዴዒፖ፤ ጎዖንቴ ኔ ጊዳ''ፓ ባሼ ቦንቺንቴ ዓሲ ዔኤሊ''ንቴያናንዳኔ፤ 9 ዒንሢ ላምዓሢ ዔኤሌ'' ዓሢ ኔ ኮይላ'' ሙኪጋፓ ‹ሃኖ' ቤዜሎ ሃያ ዓሢም ሃሼ''› ኔና ጌዔቴ፥ ዒማ''ና ዼኤፒ ቦርሲንቲና ሂርኬ ቤዛ ኬዲ'' ኔ ዴዓንዳኔ። 10 ጋዓንቴ ሙኡዚ'' ቤሲ ኔ ዔኤሊ''ንታኣና ዴንዲ ሂርኬ ቤሲዳ ዴዔ፤ ዬካፓ ኔና ዔኤሌ'' ዓሢ ኔ ኮራ ሙኪ ‹ታ ዒጊናሢዮ! ሃይካ ዼ'ጌ ቤዛ ኬስኪ ዴዔ› ኔና ጋዓዛ፥ ሜሌ'' ኔኤና ዔኤሊ''ንቴዞንሢ ቤርታ ቢያ ቦንቾ ኔኤም ማዓንዳኔ። 11 ዓይጎሮ ጌዔቶ ፔ ቶኦኮ'' ዼ'ጊዳሢ ቢያ ሂርኪ ጋዓንዳኔ፤ ፔ ቶኦኮ'' ሂርኪዳሢ ጋዓንቴ ዼ'ግ ጋዓንዳኔ» ጌዔኔ። ማቲ. 23፥12፤ ሉቃ. 18፥14።
12 ዬሱሴ ሃሣ ሙዖ ሙኡዛኒ ዔኤሌ'' ዓሢም፦ «ካሣ ኔ ሙኡዛኒ ሮኦሪያ ማዖም ዋንታ ዔኤላ'' ዎዶ''ና ‹ዔያታ ሙዔሢ ዛሎ'' ማሂ ታና ዔኤሊ'' ሙኡዛንዳኔ› ጌዒ ማሊሢና ኔኤኮ ላጎ፥ ኔኤኮ ጌርሲንሢ፥ ኔኤኮ ዒጊኖና ሃሣ ዖርጎጮ ማዔ ኔኤኮ ዓሺኖ ዔኤሊ''ፖ፤ 13 ጋዓንቴ ኔ ካሣ ሙኡዛኒ ዔኤላ'' ዎዶ''ና ዔኤቢባኣ ዓሶ፥ ኩቺና ቶኪና ዱጴ ዓሶ፥ ዎቦ ዓሶ፤ ሃሣ ዓኣፖ ባይቄ ዓሶ ዔኤሌ''። 14 ያዺ ኔ ማዼቶ ዔያታ ኔ ማዼሢ ዛሎ'' ኔኤም ጪጋኒ ዳንዳዑዋኣሢሮ ኔ ዓንጂንታንዳኔ፤ ጋፒንፃ ጌኤዦ ዓሳ ሃይባ''ፓ ዔቃ ዎዶ''ና ፆኦሲ ኔኤም ጪጋንዳኔ» ጌዔኔ።
ዼኤፖ ሙዖ ጊኢጊሾና ኮኦኪንሦ
(ማቲ. 22፥1-10)
15 ሙዖ ሙዓኒ ዴዔ ዓሶይዳፓ ፔቴ''ስኬይ ዬሱሴ ኬኤዜሢ ዋይዛዖ፦ «ፆኦሲ ካኣቱሞይዳ ሙኡዚሮ ዴዒሢ ዎዚጉዲ ዓንጂንቲሢዳይ!» ጌዔኔ።
16 ዬሱሴ ጋዓንቴ ማሃዖ፦ «ፔቴ'' ዓሲ ዼኤፒ ሙኡዚ'' ጊኢጊሺ ሚርጌ ዓሲ ዔኤሌ''ኔ፤ 17 ሙዖ ሙዖንዶ ኬላ'' ሄላ''ዛ ‹ሃይሾ ዓካሪ ቢያ ባካ ጊኢጊንቴሢሮ ታኣኮ ሙዖ ሙዓኒ ሙኩዋቴ!› ጌዒ ዔኤላ''ንዳጉዲ ሙዖ ጊኢጊሼሢ ዒዛኮ ዓይሢንቲ ማዻሢ ዔኤሊ''ንቴ ዓሶ ኮራ ዳኬኔ። 18 ጋዓንቴ ፔቴ'' ፔቴ'' ዔኤሊ''ንቴ ዓሳ ሙዖይዳፓ ዓቶንዶ ጎይሢ ኮዒሢ ዓርቃዖ፥ ፔቴ''ሢ ‹ቤሲ ታ ሻንቄሢሮ ዴንዲ ታ ዛጋንዳኔ፤ ዬያሮ ታ ሙካኒ ዳንዳዒባኣሴ፤ ታና ቆፂፖ› ጌዔኔ። 19 ባጋሢ ሃሣ ‹ዶንጎ ዋኣፃ ጌማይ ታ ሻንቄሢሮ ዔያቶ ታ ዓኣሢ ዛጋንዳኔ፥ ታና ሄሊ''ሲንዱዋሴ፤ ቆፂፖ› ጌዔኔ። 20 ዓቴ''ሢ ሃሣ ‹ላኣሊ ታ ዔኪ ዑኡቱሞይዳ ዓኣሢሮ ሙካኒ ታ ዳንዳዑዋሴ› ጌዔኔ።
21 «ዔኤሊፆ ዳኮና ማዻሢ ማኣሪ ሙካዖ ዬያ ቢያ ባኮ ጎዳሢም ኬኤዜኔ፤ ዬያሮ ማኣሮ ዓዳሢ ዻጋዻዖ፥ ዓይሢንቲ ማዻሢም ‹ዑኬና ካታሞኮ ዳልጎ ጎይፆና ጊዴ''ና ቲቂ ዓኣዻ ጎይፆና ዴንዲጋፓ ማንቆ ዓሶ፥ ኩቺና ቶኪና ዱጴ ዓሶ፥ ዓኣፓ ባይቄ ዓሶና ሃሣ ዎቦ ዓሶዋ ዔኤሊ'' ሃኒ ዔኪ ሙኬ› ጌዔኔ። 22 ዓይሢንቲ ማዻሢያ ሙካዖ ጎዳሢ ኮራ ‹ታ ጎዳሢዮ! ኔኤኒ ታና ዓይሤ ባኮ ቢያ ታ ማዼንቴ፥ ሃጊ ቤዛ ኩሚባኣሴ› ጌዔኔ። 23 ዬያሮ ማኣሮ ዓዴ ማዻሢም ‹ማኣራ ታኣኮ ኩማንዳጉዲ ካታሞኮ ዙሎ'' ዔኪ ዓኣዻ ዳልጎ ጎይፆና ቲቂ ዓኣዻ ጎይፆና ዴንዲ ዓቴ''ያ ሜሌ'' ዓሲያ ሃሣ ሙካንዳጉዲ ዔኤሌ''፤ 24 ዬንሢ ቤርታ ዔኤሊ''ንቴዞንሢፓ ፔቴ'' ዓሲታዖ ታኣኮ ሙዖ ሙዓዓኬ› ጌዔኔ፤ ታ ዒንሢም ጋዓኔ።»
ዬሱሴ ጊንሢ ሃንቲሢ ዔኪሳ ሜቶ
(ማቲ. 10፥37-38)
25 ሚርጌ ዓሲ ዬሱሴና ዎላ'' ዓኣዻንቴ ዒዚ ዔያቶ ባንሢ ሺሪጋፓ፦ 26 «ታ ባንሢ ሙካሢ ቢያ ፔኤኮ ዓዶና ዒንዶና ማቾና ናኣቶ''ና ጌርሲንሢና ጌሮንሢና ሓሣ ፔ ሼምፓሢያ ታ ጊዳ''ፓ ባሼ ናሽካያ ማዔቶ፥ ታ ዓሲ ማዓኒ ዳንዳዑዋሴ። ማቲ. 10፥37። 27 ሓሣ ሃይቢ ሄላ''ንዳኣና ጊኢጌያ ማዒባኣሢ ታኣኮ ጊንፆ ሃንታ ናይ ማዓኒ ዳንዳዑዋሴ። ማቲ. 10፥38፤ 16፥24፤ ማር. 8፥34፤ ሉቃ. 9፥23።
28 «ዒንሢዳፓ ፔቴ'' ዓሲ ሹቺና ማዦ ማኣሪ ማዣኒ ኮዔቶ ማዾ'' ማዺ ጋፒሳኒ ዋኣዺ ሚኢሼ ኮይሳያታቶዋ ቤርታዺ ዴዒ ማላኔ። 29 ጋዓንቴ ሹጮና ማዦ ማኣሮ ማዢፆ ዓርቃዖ ጋፒሳኒ ዳንዳዒባኣያታቴ ዓይፆይዳ ዓቴ'' ማኣሬሎ ዛጋ ዓሳ ቢያ ዒዛ ቦሃንዳኔ፤ 30 ‹ሃኣዛጉዋቴ፤ ሃይ ዓሢ፥ ማኣሪ ማዣኒ ዓርቄዖ ጋፒሳኒ ዳንዳዒባኣሴ› ጌዒ ጌዒ ሃሣ ዒዛ ፓሳንዳኔ።
31 «ሃሣ ጊንሣ ታጶ ሺያ ፖኦሊሴ ዓኣ፥ ፔቴ'' ዓጪኮ ካኣቲ ሜሌ'' ላማታሚ'' ሺያ ፖኦሊሴ ዔኪ ዖላኒ ሙካ ካኣቲና ዎላ'' ዖልታኒ ኮዔቶ ቤርታዺ ፔኤኮ ሞርኮ ባሻኒ ዳንዳዓያ ማዔቶ ዔራኒ ዴዒ ዞርታኔ። 32 ዳንዳዑዋያ ማዔቶ ጋዓንቴ ዒዛ ዖላኒ ሙካ ካኣታ''ሢ ሃጊ ሃኬ ዓኣንቴ፥ ዬይ ካኣታሢ ጪማቶ ዓሲ ዳካኔ። 33 ዬያጉዲ ዒንሢዳፓ ፔኤኮ ዓኣ ባኮ ቢያ ሃሺ''ባኣ፥ ዓይጎ ዓሲታቶዋ ታ ዓሲ ማዓኒ ዳንዳዒንዱዋሴ» ጌዔኔ።
ማኣዱዋ ሶኦጌ
(ማቲ. 5፥13፤ ማር. 9፥50)
34 ዬካፓ ሃሣ ዬሱሴ፦ «ሶኦጌ ኮሺኬ፤ ሶኦጌ ሶኦጌ ማዒባኣያታቶ ዓይጎና ጊንሣ ሶኦጌ ማሂንታንዳይ? 35 ዬኖጉዴ ሶኦጌላ ጎሽኪንታ ዓጮ''ም ማዔቶዋ ሃሣ ጎሺ ማሊ''ሳኒያ ላኣሊንቱዋ ቡኡራጉዲ ማዔሢሮ ጉሪ ኬኬኤሪንታንዳኔ፤ ዓካሪ ዋይዛ ዋይዚ ዓኣሢ ዋይዞንጎ!» ጌዔኔ።