16
ፆኦሲኮ ዻጋ'' ኩሜ ላንካዎ ዑዦ ዓንጎ
1 ዬካፓ ላንካዎ ኪኢታንቾንሢም ዼኤፒ ዑኡሲና፦ «ዓኣዹዋቴ! ፆኦሲኮ ዻጋ'' ኩሜ፥ ዑዦ ዓንጎይዳ ዓኣ ዑዦ ሳዖይዳ ላኣሉዋቴ» ጌኤዦ ማኣራፓ ጋዓንቴ ታ ዋይዜኔ።
2 ዒማ''ና ቤርታሳ ኪኢታንቻሢ ዴንዳዖ፥ ዑዦ ዓንጎይዳ ዓኣ ዑዦ ሳዖይዳ ላኣላዛ ቦዓሢኮ ማላቶ ዔኪ ዓኣ ዓሶና ዬያ ማላቶም ዚጊ ካኣሽካ ዓሶናይዳ ፑርታ ሜታሳ ኪሢ ኬዴ''ኔ። ኬሲ. ማፃ 9፥10።
3 ላምዓሳ ኪኢታንቻሢ ዑዦ ዓንጎይዳ ዓኣ ዑዦ ባዞ'' ዋኣፆይዳ ላኣላዛ፥ ዋኣፃ ሓይቄ ዓሲ ሱጉሢጉዲ ካርቴ ሱጉሢ ማዔኔ፤ ባዞ''ይዳ ዓኣ፥ ሼምፔና ናንጋ ባካ ቢያ ሓይቄኔ።
4 ሓይሣሳ ኪኢታንቻሢ ዑዦ ዓንጎይዳ ዓኣ ዑዦ ዎሮ ዋኣፆንታ ዓልቃ ዋኣፆንታይዳ ላኣላዛ፥ ዬይያ ሱጉሢ ማዔኔ፤ 5 ዬካፓ ዋኣፆ ዑፃ ቢታንታ ዓኣ፥ ኪኢታንቻሢ፦
«ሓሢያ ዓኣያ ሚናፓ ናንጋ ዱማዼ ጎዳሢዮ!
ሓያይዲ ኔ ዎጌሢሮ
ኔኤኒ ፂሎ''ኬ፤
6 ዓሳ ኔኤም ዱማዼዞንሢንታ ኔ ማሊፆ ኬኤዛዞንሢያ
ዎዺ ሱጉፆ ላኣሌሢሮ
ኔኤኒ ዔያቶ ሱጉሢ ዑሼ''ኔ፤
ዬይ ዔያቶም ኮይሳያኬ»
ጋዓንቴ ታ ዋይዜኔ።
7 ዬያጉዲ ሃሣ ፆኦሲም ዒንጊ ካኣሽኮ ቤዞይዳፓ፦
«ሂዮ፤ ቢያ ባኣዚ'' ዳንዳዓ ጎዳ ማዔ ፆኦዛሢዮ!
ኔኤኮ ዎጊፃ ጎኔ፥ ሃሣ ፒዜኬ» ጋዓ ዑኡሲ ታ ዋይዜኔ።
8 ዖይዳሳ ኪኢታንቻሢ ዑዦ ዓንጎይዳ ዓኣ ዑዦ ዓባ'' ላኣላዛ፥ ዓቦ''ም ዓሶ ዓዳ'' ታሚጉዲ ሚቻንዳ ዎልቄ ዒንጊንቴኔ፤ 9 ዬያሮ ዓሳ ዼኤፒ ሩኡጲና ሚቺንቴኔ፤ ዬንሢ ባይዛ ባኮንሢ ዑፃ ቢታንቶ ዓኣ፥ ፆኦዛሢኮ ሱ'ንፆ ዔያታ ጫሽኬኔ፤ ጎሞ ፔኤኮ ቡኡፂ፥ ዒዛ ቦንቺፆዋ ዔያታ ዒፄኔ።
10 ዶንጋሳ ኪኢታንቻሢ ዑዦ ዓንጎይዳ ዓኣ ዑዦ ቦዓሢኮ ካኣቱሞ ዖይቶይዳ ላኣላዛ፥ ቦዓሢኮ ካኣቱማ ዹሚ ማዔኔ፤ ዓሳ ኮሺ'' ሜታዺ ሜታሢዳፓ ዔቄያና ዒንዲርዞ ፔኤኮ ዻዓኔ፤ 11 ሓሣ ዔያቶኮ ሜታዺፆና ኪፃዺፆናይዳፓ ዔቄያና ጫሪንጮ ፆኦዛሢ ዔያታ ጫሽኬኔ፤ ዔያታ ማዼ፥ ዻቢንቶ ቡኡፂባኣሴ።
12 ላሃ''ሳ ኪኢታንቻሢ ዑዦ ዓንጎይዳ ዓኣ ዑዦ ዼኤፖ ዎሮ፥ ዔፕራፂሴይዳ ላኣላዛ ዓባ'' ኬስካ ዛላ''ፓ ሙካ ካኣቶ''ም ጎይሢ ማዓንዳጉዲ ዎሮ ዋኣፃ ሚጬኔ። 13 ዼኤፖ ሾኦዣሢ ዻንጎና ቦዓሢ ዻንጎና ሃሣ ሉኡዙሞና ፆኦሲ ማሊፆ ኬኤዛያ ማሊሳሢ ዻንጋፓ ፓንቆ ማላ፥ ሓይሦ ፑርታ ዓያና ኬስካንቴ ታ ዛጌኔ። 14 ዔያታ ዱማ ዓኪ ባኣዚ'' ማዻ ፃላሄ ዓያናኬ፤ ዬንሢ ሓይሦ ዓያኖንሢ ቢያ ባኮ ዳንዳዓ ፆኦዛሢኮ ዼኤፖ ኬሎ''ና ኬስካንዳ ዖሎም ዓሶ ቡኩሳኒ ዓጮ'' ካኣቶ'' ቢያሢ ባንሢ ዓኣዻኔ።
15 «ታኣኒ ዉሲጉዲ ዔሩዋንቴ ዬዓንዳኔ፤ ካሎ'' ማዑዋጉዲና ካሉ''ሞዋ ዓሲ ዛጉዋጉዲ ጴጪ ፔኤኮ ማኣዓሢ ካፓሢ ዓንጆ ዎዛ ዴንቃንዳኔ» ማቲ. 24፥43-44፤ ሉቃ. 12፥30-40፤ ዮሓ. ፆፔዻ 3፥3።
16 ዬንሢ ዓያኖንሢ ዓጮ'' ካኣቶ'' ቢያ ዔብሬ ዓሶ ሙኡቺና ዓርማጌዶኔ ጌይንታ ቤዞይዳ ቡኩሲ ዖሎም ጊኢጊሼኔ። 2ፆኦሲ. ዓሃኬ 23፥29፤ ዛካ. 12፥11።
17 ላንካሳ ኪኢታንቻሢ ዑዦ ዓንጎይዳ ዓኣ ዑዦ ዢባሮይዳ ላኣላዛ፥ ጌኤዦ ማኣራ ዓኣ ካኣቱሞ ቤዛፓ፦ «ዓካሪ ቢያ ባካ ማዺንቲ ኩሜኔ!» ጋዓ ዼኤፒ ዑኡሲ ዋይዚንቴኔ። 18 ዒማ''ና ዜኤሊንሢ ዜኤሊንሤኔ፥ ዼኤፒ ዑኡሲያ ዋይዚንቴኔ፥ ጉጉንሢ ጉጉንሤኔ ሃሣ ሳዓኣ ሚርጌና ዓጊፄኔ፤ ዬያጉዴ ሳዓ ዓጊፂሢ ዓሲ ማዢንቴማፓ ዓርቃዖ ዓጊፂ ቤቂባኣሴ። ዮሓ. ፆፔዻ 8፥5፤ 11፥13፤ 19። 19 ዼኤፖ ካታሜላ ሃይሦ ቤሲ ዱጲ ዱጲ ፓቂንቴኔ፤ ሜሌ'' ዓጮ'' ዓሶ ካታማኣ ቢያ ዶዔኔ፤ ፆኦሲ ዼኤፖ፥ ባብሎኔ ካታሜሎ ጶቂሢ ዒዛኮ ዼኤፖ ዻጎ ዑዦ ኩንሦና ዑዦ ዑሽካንዳጉዲ ዒዞም ዒንጌኔ። ዒሲ. 51፥17። 20 ዋኣፆ ሳዛ'' ዓኣ ዓጫ'' ዓኣዺ ባይቄኔ፤ ሃሣ ዹካ''ኣ ቢያ ዓኣ ቤዛፓ ባይቄኔ። ዮሓ. ፆፔዻ 6፥14። 21 ዴኤሡማ ፔቴ'' ዼኤፒ ዎንሢ ሹቺጉዴ ሻቺ ጫሪንጫፓ ዓሶይዳ ኬዴ''ኔ፤ ዬይ ባይዞም ዳኪንቴ ባካ ሚርጌ ካራ ባይዚ ሜታሴያ ማዔሢሮ ዓሳ ፆኦሲ ጫሽኬኔ። ኬሲ. ማፃ 9፥23፤ ዮሓ. ፆፔዻ 11፥19።