16
1 ዔያታ ዒማና ጫኣቁሞ ሳኣፂኖ ዳውቴ ጊኢጊሼ፥ ዓፒሎና ማዢንቴ ማኣራ ጌሤኔ፤ ዬካፓ ሚቺ ዒንጎ ዒንጊፆንታ ፔቱሞና ዒንጎ ዒንጊፆዋ ዔያታ ፆኦሲም ሺኢሼኔ፤ 2 ዳውቴ ዬያ ባኮ ዒንጌስካፓ ናንጊና ናንጋ ጎዳ ሱንፆና ዴሮ ዓንጄኔ፤ 3 ዬካፓ ዒስራዔኤሌ ዓሶኮ ዓቲንቆንታ ላኣሎንታም፥ ፔቴ ፔቴ ዓሶም ቢያ ፔቴ ፔቴ ሙሊሢ ላኣዳ ቲቂሢ ዓሽኪንታ ዎይኔ ዺንቆናያይዳፓኣ ዻካ ዒንጌኔ።
4 ፆኦሲኮ ጫኣቁሞ ሳኣፂኖኮ ቤርታ ማዒ ማዻንዳጉዲና ናንጊና ናንጋ ጎዳ ማዔ ዒስራዔኤሌ ፆኦዛሢም ጋላታንታ ሄርሺሢንታ ቦንቾዋ ዒንጊ ዒንጊ ፆኦዛሢ ካኣሽኮ ካኣዦ ዳምቦ ማዺሻንዳጉዲ ሌዊ ዓሶይዳፓ ዳውቴ ዶኦሬኔ። 5 ዒማና ዓሳኣፔ ሱኡጋሢኬ፤ ዛካሪያሴ ዒዛኮ ዴማ ማኣዲ ማዻሢ ማዒ ዶኦሪንቴኔ፤ ዬካፓ ዪዒዔኤሌ፥ ሼሚራሞቴ፥ ዪሂዔኤሌ፥ ማቲትያ፥ ዔሊዓቤ፥ ቤናያ፥ ዖቤድዔዶኦሜንታ ዪዒዔኤሌንታ ጎኦሎ ዋርቃንዳጉዲ፤ ዓሳኣፔ ሃሣ ዑኡቱቡላሢ ዎቻንዳጉዲ ጌይንቴኔ፤ 6 ቤናያና ያሃዚዔኤሌና ጌይንታ ላምዖ ቄኤሶንሢ ጫኣቁሞ ሳኣፂኖኮ ቢያ ዎዴ ቤርቶ ዛሎና ዛዬ ዋርቃንዳጉዲ ጌይንቴኔ፤ 7 ዓሳኣፔንታ ሃንጎ ዒዛኮ ዒጊኖ ሌዊ ዓሶንታ ናንጊና ናንጋ ጎዳም ማዓ ጋላታ ዓይኑሞ ሺኢሻንዳጉዲ ዳውቴ ሱኡጌ ማሂ ዔያቶ ዶኦሬሢ ዒማናኬ።
ዳውቴኮ ፆኦሲ ጋላቶ ዓይኑሞ
(ዓይኑ. 105፡1-15፤ 96፡1-13፤ 106፡1፤47-48)
8 ናንጊና ናንጋ ጎዳ ጋላቱዋቴ፤
ዒዛ ሱንፆ ዔኤሊ ሺኢቁዋቴ፤
ዒ ማዼ ባኮ ዴሮ ቢያሢም ኬኤዙዋቴ።
9 ናንጊና ናንጋ ጎዳም ጋላታ ዓይኑሞ ዓይናዹዋቴ፤
ዒ ማዼ ዲቃሢ ሄርሺሳ ማዾ ቢያ ኬኤዙዋቴ፤
10 ዒዛኮ ዱማዼ ሱንፆና ዎዛዹዋቴ!
ናንጊና ናንጋ ጎዳ ኮዓዞንሢ ቢያ ዎዛዾንጎ!
11 ዒዛኮ ማኣዳሢ ዴንቃኒ
ናንጊና ናንጋ ጎዳ ኮዑዋቴ፤
ቢያ ዎዴ ዒዛም ዚጊ ካኣሽኩዋቴ፤
12-13 ዒዛም ማዻያ ማዔ፥ ዒስራዔኤሌ ናኣቶንሢዮ!
ፆኦሲ ዶኦሬያ ማዔ ያይቆኦቤ ናኣቶንሦ!
ፆኦሲ ማዼ ዲቃሢ ሄርሺሳ ባኮ
ዒዚ ዎጌ ዎጊፆንታ
ዒ ፔ ዎልቆና ማዼ ማዾ ጶቂሡዋቴ።
14 ናንጊና ናንጋ ጎዳ ኑኡኮ ፆኦዛሢኬ፤
ዒዚ ዓጮ ቢያይዳ ፒዜ ዎጌ ዎጋኔ።
15 ዒዛኮ ጫኣቁሞ ዋሊፖቴ፤
ዒ ዓይሤ ባኮ ዴንዲ ሺያ ሾይንቲ ሄላንዳኣና
ፆኦሲ ኬኤዜ ሃጊ ማዓንዳ ዎዞ ቃኣሎ ናንጊና ዶዲሺ ካፓኔ።
16 ዒ ዓብራሃሜና ዎላ ጫኣቄ ጫኣቁሞ ካፓኔ፤
ዪሳኣቄም ኬኤዜ ሃጊ ማዓንዳ ዎዞ ቃኣሎዋ ዶዲሻኔ፤ ማዢ. ማፃ 12፡7፤ 26፡3።
17 ያይቆኦቤም ዳምቤ ማሂ ዶዲሼኔ፤
ዒስራዔኤሌማኣ ጋፒንሢባኣ ጫኣቁሞ ጫኣቄኔ።
18 ዬይ ጫኣቁማ፦
«ካኣናኔ ዓጮ ታ ኔኤም ዒንጋንዳኔ፤
ኔኤም ዒንጊንቴ ቤሲ ማዓንዳኔ» ጋዓያኬ። ማዢ. ማፃ 18፡13።
19 ያዺ ጌይንቴሢ ፆኦሲኮ ዓሳ ፓይዶና ዻካ ዓኣንቴ
ካኣናኔ ዓጮይዳ ዔያታ ሾኦቺ ማዒ ዓኣንቴኬ።
20 ፔቴ ዴሮ ኮራፓ ሜሌ ዴሮ ባንሢ
ፔቴ ዓጮይዳፓ ሜሌ ዓጪ ባንሢ
ሃንቲ ሃንቲ ዔያታ ሜታዼኔ።
21 ፆኦሲ ጋዓንቴ ዖኦኒያ ዔያቶ ሄርቂ ዎይሦም ጌይባኣሴ፤
ዔያቶሮ ጌይ ካኣቶ ጎሬኔ።
22 «ታ ዶኦሚ ቲሽኬዞንሢ ካኣሚፖቴ፤
ታ ማሊፆ ኬኤዛዞንሢዳ ፑርታ ማዺፖቴ» ጌይ ዔያቶም ላቴኔ። ማዢ. ማፃ 20፡3-7።
23 ሳዖይዳ ናንጋ ዴራ ቢያ ናንጊና ናንጋ ጎዳ ጋላቱዋቴ!
ዓውሲፆ ዒዛኮ ኬላ ኬላ ኬኤዙዋቴ፤
24 ካኣቶም ቢያ ዒዛኮ ቦንቾ ዔርዙዋቴ፤
ሜሌ ዴሮም ቢያ ዒዛኮ ዼኤፖ ማዾ ኬኤዙዋቴ።
25 ናንጊና ናንጋ ጎዳ ዼኤፒኬ፤
ፑኡፒ ጋላታ ዒዛም ኮይሳኔ፤
ሜሌ ካኣሽኮ ፆኦዛፓ ቢያ ባሼ ዒጊጪንታንዳያ ኮይሳኔ፤
26 ሃንጎ ዴራ ዚጊ ካኣሽካሢ ሜሌ ፆኦዞኬ፤
ናንጊና ናንጋ ጎዳ ጋዓንቴ ጫሪንጮ ማዤ ፆኦሲኬ።
27 ዒዛኮ ኮይሎይዳ ዓኣ ባካ ቦንቾና ዼኤፑሞናኬ፤
ዒዛም ዱማዼ ማኣሮዋ ዎልቄና፥ ሃሣ ዎዛና ዒ ኩንሤኔ።
28 ዒንሢ ሳዖይዳ ናንጋ ዴራ ቢያ!
ዒዛኮ ቦንቾንታ ዎልቆንታሮ ናንጊና ናንጋ ጎዳ ጋላቱዋቴ።
29 ዒዛ ሱንፆም ኮይሳ ቦንቾ ሺኢሹዋቴ፤
ዒዛኮ ጌኤዦ ማኣሮ ዒንጎ ባኣዚ ዔኪ ዬዑዋቴ፤
ዱማዼያ ማዔ ፆኦዛሢ ፔጋዺ ጴዻኣና ዒዛም ዚጊ ካኣሽኩዋቴ።
30 ሳዖ ዴራ ቢያ ዒዛ ቤርታ ጎጋይቁዋቴ!
ሳዓ ዶዲሺ ማዢንቴሢሮ ዓጊፂንዱዋሴ።
31 ሳዖንታ ጫሪንጮንታ ዎዛዹዋቴ!
ሜሌ ዴሮም ቢያ ናንጊና ናንጋ ጎዳ ካኣቲታሢ ዔርዙዋቴ።
32 ባዞንታ ዒኢካ ዓኣ ባካ ቢያ ዒላሹዋቴ!
ጎዦንታ ዬያይዳ ዓኣ ባካ ቢያ ዎዛዹዋቴ!
33 ናንጊና ናንጋ ጎዳ ሳዖይዳ ዎጋኒ ሙካንዳሢሮ
ዴኤሎይዳ ዓኣ ሚፃ ዒዛም ዒላሾንጎ!
34 ዒዚ ኮሺታሢሮ ናሹማ ዒዛኮ ናንጊና ባይቁዋኣሢሮ
ናንጊና ናንጋ ጎዳ ጋላቱዋቴ! 2ፆኦሲ. ዓሃኬ 5፡13፤ 7፡3፤ ዒዝ. 3፡11፤ ዓይኑ. 100፡5፤ 106፡1፤ 107፡1፤ 118፡1፤ 136፡1፤ ዔር. 33፡11።
35 ናንጊና ናንጋ ጎዳ፦
«ኑና ዓውሳ ፆኦዛሢዮ!
ሜሌ ዴሮ ባኣካፓ ማሂ ዔኪ ኑ ዓጮ ኑና ጌልዜ፤
ያኣዼ ማዔም ኔና ኑ ጋላታንዳጉዲ፥
ኔኤኮ ዱማዼ ሱንፆ ኑ ቦንቻንዳጉዲ
ሃዳራ ኑና ዓውሴ!» ጎዑዋቴ።
36 ናንጊና ናንጋ ጎዳ ማዔ ዒስራዔኤሌ ፆኦዛሢ
ናንጊና ጋላቲንቴያ ማዖም!
ዴራ ዒማና «ዓኣሜን» ጌዔኔ፤ ናንጊና ናንጋ ጎዳኣ ጋላቴኔ።
ዬሩሳላሜና ጌባዖኦኔናይዳ ካኣሽኪንቴ ካኣዦ
37 ካኣቲ፥ ዳውቴ ዓሳኣፔና ዒዛኮ ዒጊኖ ማዔ ሌዊ ዓሶ ናንጊና ናንጋ ጎዳኮ ጫኣቁሞ ሳኣፂና ዓኣ ቤዛ ካኣሽኪንታ ካኣዦ ዳምቦ ኩንሢሲ ኩንሢሲ ናንጋንዳጉዲ ሱኡጌ ማሂ ጌሤኔ፤ ዬያሮ ዔያታ ዬያ ማዾ ቢያ ኬሊ ማዻኔ፤ 38 ዔያቶ ማኣዳንዳጉዲ ዪዱቱ ናኣዚ ዖቤድዔዶኦሜና ዒዛ ቶኦኪ ማዔያ ሜሌ ላሂታሚ ሳሊ ዓሲያ ዓይሢንቴኔ፤ ዒማና ዪዱቱ ናኣዚ፥ ዖቤድዔዶኦሜና ሆላና ጌሎ ካሮ ካፒሳ ሱኡጎ ማዔኔ።
39 ቄኤሳሢ፥ ሳዶቄና ዒዛ ዒጊኖ ማዔ ሜሌ ቄኤሳ ጌባዖኦኔይዳ ዓኣ፥ ዓፒሎና ማዢንቴ ፆኦሲ ካኣሽኪንታ ማኣሮይዳ ካኣዦ ካኣሽኪሳ ሱኡጌ ማሂ ዳውቴ ዔያቶ ዶኦሬኔ። 40 ዬያ ዒ ማዼሢ ናንጊና ናንጋ ጎዳ ዒስራዔኤሌ ዓሶም ዓይሤ ዎጎ ጎይፆና ቢያ ኬሊ ጉቴና ዋንቴና ሚቺ ዒንጎ ዒንጊፆ ሚቺ ፆኦሲም ሺኢሻንዳጉዲኬ። 41 ዒኢካ ዔያቶና ዎላ ሄማኔንታ ዪዱቱንታ፤ ዬያጉዲ ሃሣ ፆኦሲኮ ናንጊና ናንጋ ናሹሞ ማሊ ማሊ ቢያ ኬሊ ጋላታ ዓይኑሞ ዓይናዻንዳጉዲ ዶኦሪንቴ ሜሌ ዓሲያ ዓኣኔ፤ 42 ሄማኔና ዪዱቱና ሹሉንጋ፥ ዑኡቱቡላሢ፤ ዬያጉዲ ጋላቶ ዓይኑሞ ዓይናዾዋኣና ዋርቆ ዓንጋሞ ሱኡጌ ማዒ ዓርቃያ ማዔኔ፤ ዪዱቱ ቶኦኪ ማዔ ዓሳ ጌሎ ካሮ ካፓ ዓሶኮ ሱኡጌ ማዔኔ።
43 ዬካፓ ዓሳ ቢያ ፔ ማኣሪ ማኣሪ ዴንዴኔ፤ ዳውቴያ ፔ ማኣሮ ዓሶ ዓንጃኒ ፔ ማኣሪ ዴንዴኔ። 2ሳሙ. 6፡19-20።