2 ፆኦሲ ዓሶ ሃይሶ ኬኤዛ ማፃኣፖ
ዓይፆ ካሮ
ፆኦሲ ዓሶ ሃይሶ ኬኤዛ ማፃኣፖኮ ላምዓሳ ዓርቃሢ ቤርታሳ ማፃኣፓ ሃይሶ ኬኤዚ ዔቂሴ ካራፓኬ። ዬይያ፦ ካኣቲ፥ ሴሎሞኔ ካኣታዼስካፓ ዴንዲ ሃይቃንዳያ ሄላንዳኣና ዓኣ ሃይሴኬ፤ ዒዮርቢዓሜ ሱኡጌ ማዔም ኬዶ ዛላ ዓኣ ዒስራዔኤሌ ፃጳ ዒዛኮ ዓዶ ሴሎሞኔ ቤዛ ጌሊ ካኣታዼ፥ ዪሁዳ ካኣቲ፥ ሮቢዓሜም ዋይዞ ዒፄሢ ኬኤዜስካፓ ዴንዲ ዬሩሳላሜ ካታማ ዶዔ ዎዶ ጌይፃ ኪሪስቶሴ ሾይንቶኮ ቤርታ ዶንጎ ፄኤታና ሳሊታሚ ላሃሳ ሌዖ ሄላንዳኣና ዓኣ ዾኦሎ ዛሎ ዪሁዳ ካኣቶ ሃይሶ ፓይዲ ፓይዲ ኬኤዛኔ።
ማፃኣፔላ ዱማ ዱማ ዓርቄ ባኮ
ሴሎሞኔ ካኣታዺ ዎይሤ ዎዶ (1፡1—9፡31)
1. ሃጊ ዓይፆ ሌዖይዳ ማዺንቴ ባኮ (1፡1-17)
2. ጌኤዦ ማኣራ ማዢንቴሢ (2፡1—7፡10)
3. ጊንፃሳ ሌዖይዳ ማዺንቴ ባኮ (7፡11—9፡31)
ኬዶ ዛላ ዓኣ ዒስራዔኤሌ ፃጶኮ ዋይዞ ዒፂፆ (10፡1-19)
ዪሁዳ ዓጮ ካኣቶ (11፡1—36፡12)
ዬሩሳላሜኮ ዶዒፆ (36፡13-23)
1
ማሊ ጶቂሥሢ ዔራቶ ዴንቃኒ ሴሎሞኔኮ ሺኢጲፆ
(1ካኣቶ. ማ 3፡1-15)
ናንጊና ናንጋ ጎዳ ማዔ ዒዛኮ ፆኦዛሢ ዒዛና ዎላ ዓኣያ ማዒ ኮሺ ዒዛ ዔርቴያ ማሄሢሮ ዳውቴ ናኣዚ፥ ሴሎሞኔ ካኣቱሞይዳ ጊኢጊንቲ ዴዔኔ።
ዬካፓ ሴሎሞኔ ዒስራዔኤሌ ዓሶ፥ ሺዮና ፄኤቶ ፖኦሊሶ ዓይሣ ዓሶ፥ ዎጎ ዎጋ ዓሶ፥ ዒስራዔኤሌ ዓሶ ጉቤሢንታ ዱማ ዱማ ማኣሮ ዓሶናኮ ሱኡጎ፥ ጌባዖኦኔይዳ ፆኦሲ ካኣሽኪንታ ባኣኮ ዒዛና ዎላ ዓኣዻንዳጉዲ ዓይሤኔ፤ ዒኢካ ዔያታ ዓኣዻሢ ናንጊና ናንጋ ጎዳኮ ዓይላሢ፥ ሙሴ ዓሳ ናንጉዋ ዳውሎይዳ ማዤ ናንጊና ናንጋ ጎዳ ዴሮና ካኣማ ዓፒሎ ማኣራ ጌባዖኦኔይዳ ዓኣሢሮኬ። ጫኣቁሞ ሳኣፂና ጋዓንቴ ካኣቲ ዳውቴ ቂርያትይዓሪሜ ካታሞይዳፓ ዔኪ ሙኬ ዎዶና ዬሩሳላሜይዳ ዬያም ጊኢጊሼ ዓፒሎ ማኣሮይዳ ዓኣኔ። 1፡4 2ሳሙ. 6፡1-17፤ 1ፆኦሲ. ዓሃኬ 13፡5-14፤ 15፡25—16፡1። ሆሬ ናኣዚኮ ናኣዚ ዑሬ ናይ ባስሊዔኤሌ ጎዖሢ ሞኦኖ ዓንጎይዳፓ ኮሼ ሚቺ ዒንጎ ቤዛ ዒኢካ ጌባዖኦኔይዳ ዓፒሎና ማዢንቴ ፆኦሲ ዴሮና ካኣማ ማኣሮኮ ቤርቶ ዛላ ዓኣኔ፤ ዒኢካ ካኣቲ ሴሎሞኔንታ ዴራኣ ቢያ ናንጊና ናንጋ ጎዳና ካኣማኒ ኮዔኔ፤ 1፡5 ኬሲ. ማፃ 38፡1-7። ካኣቲያ ዓፒሎና ማዢንቴ፥ ፆኦሲ ዴሮና ካኣማ ማኣሬሎኮ ቤርቶ ዛላ ዓኣ ሞኦኖ ዓንጎና ኮሾና ሚቺ ዒንጎ ቤዞ ዑፃ ሚቺ ዒንጎ ባኮ ሺኢሼኔ፤ ዒማና ፔቴ ሺያ ቆልሞ ሹኪሲ ዒንጎ ቤዞይዳ ጉቤና ሚቺንታንዳጉዲ ዒ ማሄኔ።
ዬኖ ዋንቴሎ ፆኦሲ ሴሎሜኔም ፔጋዺ ጴዻዖ፦ «ታ ኔኤም ዓይጎ ዒንጋንዳጉዲ ኔ ኮዓይ?» ጌይ ዖኦጬኔ።
ዒማና ሴሎሞኔ ማሃዖ፦ «ታ ዓዶ ዳውቴም ኔ ዼኤፒ ኮሺ ባኣዚ ማዼኔ፤ ታና ዒዛ ቤዛ ሃሢ ኔ ካኣታሤኔ። ናንጊና ናንጋ ጎዳ ማዔ ፆኦሲዮ! ታ ዓዶም ኔ ጉሙርሲ ኬኤዜ ቃኣሎ ኩንሤ፤ ሃያ ሚርጉማ ዓጪጉዲ ማዔ ዴሮይዳ ኔ ታና ካኣታሤኔ፤ 1፡9 ማዢ. ማፃ 13፡16፤ 28፡14። 10 ዬያሮ ኔኤኮ ዴሮ ፒዜ ዔኪ ዓኣዻኒ ታና ዳንዳዒሳ ማሊ ጶቂሥሢና ዔራቶና ታኣም ዒንጌ፤ ያዺ ማዒባኣያታቶ ጋዓንቴ ሃያ ኔኤኮ ዼኤፖ ዴሮ ዎዲ ታ ዔኪ ዓኣዻንዳይ?» ጌዔኔ።
11 ዬካፓ ፆኦሲ ሴሎሞኔም፦ «ኔ ኔ ቶኦኪም ዖርጎቹሞ፥ ቆሎ፥ ኔኤኮ ሞርካ ሃይቃንዳንጉዲ፤ ሃሣ ሚርጌ ሌዔ ናንጋኒቱዋንቴ ኔኤኒ ዔያቶይዳ ካኣታዻንዳጉዲ ታ ማሄ፥ ታኣኮ ዴሮ ፒዙሞና ዔኪ ዓኣዻኒ ኔና ዳንዳዒሳ ማሊ ጶቂሥሢና ዔራቶና ኔ ዖኦጬሢሮ፥ 12 ሃይሾ ኔ ታና ዖኦጬ ጶቂሢፆና ዔራቶና ታ ኔኤም ዒንጋንዳኔ፤ ቃሲ ሃሣ ሃያኮ ቤርታ ዎያ ካኣቲ ማዔቴያ ዴንቄያና ሴካ ቤርቲማኣ ዴንቃኒ ዳንዳዓያይዳፓ ባሼ ዖርጎቹሞ፥ ቆሎና ዼኤፒ ሱንሢያ ታ ኔኤም ዒንጋንዳኔ» ጌዔኔ።
ካኣቲ ሴሎሞኔኮ ቢታንቶንታ ቆሎንታ
(1ካኣቶ. ማ 10፡26-29)
13 ሴሎሞኔ ጌባዖኦኔይዳ ፆኦሲ ዴሮና ካኣማ፥ ዓፒሎና ማዢንቴ ማኣራ ዓኣ ባኣካፓ ዬሩሳላሜ ዓኣዼኔ፤ ዒዚ ፔኤኮ ናንጎ ቤዞ ዒኢካ ማሂ ዒስራዔኤሌይዳ ካኣታዼኔ።
14 ሴሎሞኔ ዒማና ፔቴ ሺያና ዖይዶ ፄኤታ ሳርጌላ ዖይታና ታጶ ላምዖ ሺያ ፓሮና ዶዲ ዖላ ዓሲ ጊኢጊሻዖ ዔያቶይዳፓ ዛሎ ዬሩሳላሜይዳ፥ ዓቴ ዓሶ ሃሣ ሃንጎ ዱማ ዱማ ካታማ ናንጋንዳጉዲ ፓቂ ፓቂ ጌሤኔ። 1፡14 1ካኣቶ. ማ 4፡26።
15 ሴሎሞኔ ካኣታዺ ዓኣ ዎዶና ዬሩሳላሜይዳ ዎርቆና ቢሮናኮ ሚርጉማፓ ዔቄያና ዓዳ ቃንፆ ማዔኔ፤ ሃሣ ዴኤሎ ዚቢቆ ሚርጉማኣ ዪሁዳይዳ ጌሜሮ ዴማ ጉቤ ቤዛ ባቃላ ቦኦቦጉዲ ፓይዲንቴኔ። 16 ካኣቲኮ ፓራሢ ሙካሢ ጊብፄና ቄዌ ዓጮናፓኬ፤ ካኣቲኮ ኮርሞ ኮርማ ዓሳ ዬያ ፓራሢ ቄዌይዳፓ ሻንቃኔ። 17 ጊብፄይዳፓ ዔያታ ጌልዛሢ ፔቴ ሳርጌሎ ላንካይ ኪሎ ጊራኣሜ ማዓ ቢራና፤ ሃሣ ፔቴ ፓሮዋ ፔቴና ዛላና ኪሎ ጊራኣሜ ማዓ ቢራና ሻንቂኬ፤ ዬያ ባኮ ጊንሣ ዔያታ ሂኢታ ዓሶንታ ሶኦሪ ዓሶ ካኣቶም ሻንቻኔ። 1፡17 ላሚ. ዎማ 17፡16።

1:4 1፡4 2ሳሙ. 6፡1-17፤ 1ፆኦሲ. ዓሃኬ 13፡5-14፤ 15፡25—16፡1።

1:5 1፡5 ኬሲ. ማፃ 38፡1-7።

1:9 1፡9 ማዢ. ማፃ 13፡16፤ 28፡14።

1:14 1፡14 1ካኣቶ. ማ 4፡26።

1:17 1፡17 ላሚ. ዎማ 17፡16።