1 ዬካፓ ካኣቲ ዓርፄክሲሴ ሃሜዳታ ናኣዚ ዓጋጌ ዓሲ *ዓጋጌ ዓሲ፦ ዬይ ዓጋጌ ጎዖሢ ዓማሌቄ ዓሶ ካኣቲኬ፤ ዬያ ዓሢ ፃጳ ሚናንካፓ ዒስራዔኤሌ ዓሶና ዎላ ሞርኬ ማዒ ናንጋያኬ፤ ፆኦሲ ማሊፆ ኬኤዛ ሳሙዔኤሌ ዬያ ካኣታሢ ዎዼያ ማዔሢሮ ሞርኮ ማዒፃ ዜርሢ ዛላና ማዓንዳኣፓዓቴም ሜርዴኪዮሴ ዒፂ ሌሊ ማዾናያቱዋሴ (1ሳሙ. 15፡33።) ማዔሢ፥ ሃማ ሃንጎ ቢታንታ ዓኣ ዓሶይዳፓ ቢያ ዑሣ ቢያሢ ዓይሣያ ማሂ ዶኦሬኔ። 2 ካኣቲ ፔ ዓጮይዳ ቢታንታ ዓኣ ዓሳ ቢያ ጉምዓቲ ሃማም ዚጊ ቦንቾ ዔኤሊሢ ዔኤላንዳጉዲ ዓይሤኔ፤ ዬያሮ ቢታንታ ዓኣ ዓሳ ቢያ ዓይሢንቴ ጎይፆ ማዼኔ፤ ዬያይዳኒ ሜርዴኪዮሴ ሌሊ ዒፄኔ። 3 ካኣቱሞ ማኣራ ማዻ ቢታንቶና ዓኣ ዓሳ ሜርዴኪዮሴ ኮይላ፦ «ካኣቲ ዓይሤ ዓይሢፆ ኔኤኒ ዓይጎሮ ዒፃይ?» ጌዒ ጌዒ፥ 4 ቢያ ኬሊ ዒዚ ፔ ማሊፆ ላኣማንዳጉዲ ዒዛ ዞራኔ፤ ዒዚ ጋዓንቴ ዔያቶም ዋይዞ ዒፄኔ፤ ዬያ ሌሊቱዋንቴ ዒዚ፦ «ታኣኒ ዓይሁዴ ዓሲ ማዔሢሮ ሃማም ታ ዚጋንዳያ ኮይሱዋሴ» ጌዒ ጋፒ ኬኤዜሢሮ ዬና ዞራ ዓሳ፦ «ሜርዴኪዮሴኮ ሃያ ዖቶርሙሞ ዎዲ ዛጊ ጊቦንዶይ?» ጌይ ሃይሶ ዼኤፒሲ ሃማም ኬኤዜኔ። 5 ሜርዴኪዮሴ ዒዛም ጉምዓቲ ዚጊባኣሢ ሃማ ዋይዛዖ ዒናፓ ዻጋዼኔ። 6 ሃሣ ሜርዴኪዮሴ ዓይሁዴ ዓሲ ማዔሢያ ዔሪ «ዎዎዻንዳኔ» ጌይ ማላዖ ሜርዴኪዮሴ ሌሊ ዎዺፃ ዔኤቢ ማይንዱዋኣሢ ማሊ ዔኬኔ፤ ዬያሮ ጉቤና ፓርሴ ካኣቱሞ ዓጮይዳ ዓኣ ሜርዴኪዮሴ ዒጊኖ፥ ዓይሁዶ ዓሶ ቢያ ዎዾንዶ ካራ ኮዔኔ።

7 ዓርፄክሲሴ ካኣታዼንቴ ታጶ ላምዓሳ ሌዖኮ ኒሳኔ ጌይንታ ቤርታሳ ዓጊኖና «ፑሪሜ» ጎዖያ ዱማሲ ዔራኒ ዓጎ ባካ ዓጊንቶ ዓርቃንዳጉዲ፤ ሃሣ ዓይሁዶ ዓሶ ባይዛኒ ማሎና ማሊፆ ኩንሦንዶሢ ዎማ ዓጊኖና ኬሎና ጊኢጋንዳቴያ ዓሳ ዒፃ ዓጋንዳጉዲ ሃማ ዓይሤኔ፤ ዬና ዒፄላ ዓዳሬ ጌይንታ ታጶ ላምዓሳ ዓጊኖኮ ታጶ ሃይሣሳ ኬሎና ማዓሢ ዔርዜም ዒማና ማዓንዳጉዲ ጌስቲ ዔቂሲንቴኔ።

8 ዬያሮ ሃማ ካኣቲ ዓርፄክሲሴም፦ «ኔኤኒ ካኣታዺ ዎይሣ ዓጮይዳ ዱማ ዱማ ዓጫ ዜርቂንቲ ናንጋ ፔቴ ፃጲ ዴሬ ዓኣኔ፤ ዬኖ ዴሮኮ ሜሌ ዓሶፓ ዱማ ዎጌ ዓኣያኬ፤ ዬያ ሌሊቱዋንቴ ኔና ካኣታሢኮ ዎጎም ዔያታ ዓይሢንቱዋያ ማዔኔ፤ ዬያሮ ዬያጉዴ ዴሮ ዚቲ ጌይ ኔኤኒ ዛጌቴ ኔኤም ፑርታንዳኔ፥ ጊኢጋዓኬ፤ 9 ካኣቲዮ! ኔኤኒ ዔኤዓቴ ዬና ዴራ ሃይቃንዳጉዲ ዎጊሳንዳ ዓይሥሢ ኪኢታ ኬስኮንጎ፤ ኔኤኒ ዬያይዴቴ ታኣኒ ኔ ካኣታዺ ዎይሣ ዓጮይዳ ማዺንታ ባኮ ማዺሻንዳ ሃይሦ ፄኤታና ዖይዲታሚ ሺያ ኪሎ ማዓ ሹቺ ቢራ ጊኢሪሺ ጌልዛኒ ጫኣቃኔ» ጌዔኔ።

10 ዬያሮ ካኣቲ ዒዚ ዓይሢፆ ኬሴያ ማዒፆ ዔርዛ ዒዛኮ ኬኤሎ ዢራሢ ማላታ ማዒ ኬሶና ዓይሢፆይዳ ጳርቂንታንዳጉዲ ዓጋጌ ዓሢ፥ ሃሜዳታ ናኣዚ፥ ዓይሁዶ ሞርካሢ፥ ሃማም ዒንጌኔ። 11 ካኣቲ ዒማና፦ «ሚኢሾ ታ ኮዑዋሴ፤ ጋዓንቴ ዴሮ ናሽኬ ባኣዚ ማማዼ» ጌይ ዓይሤኔ።

12 ዬያሮ ቤርታሳ ዓጊኖኮ ታጶ ሃይሣሳ ኬሎና ካኣቲኮ ፃኣፖ ባኮ ፃኣፓ ዓሶ ሃማ ዔኤሊ ዔኪ ሙኬኔ፤ ዬካፓ ዬያታ ዓሳ ሃማኮ ዓይሢፆ ቢያ ዱማ ዱማ ፓቂንቴ ዓጮይዳ ፃኣፖ ፒዳሎና ዱማ ዱማ ዴሮ ሙኡጮና ዓጮ ዎይሣ ዎይሣ ዓሶም፤ ሃሣ ቢታንታ ዓኣ ሱኡጎም ሱኡጎም ፃኣፔኔ። ዬይ ፃኣፒንቴ ዓይሢፃ ካኣቲ ዓርፄክሲሴ ሱንፆና ፃኣፒንቲ ዒዛኮ ዢኢራሢ ማላታ ማሂ ጊዳ ጳርቂንቴም ዳኪንቴኔ። 13 ዬያ ፃኣፒንቴ ኪኢቶ ጳሺ ሩኡሪና ጳሽካ ዓሳ ካኣቲ ዎይሣ ዓጮ ጉቤሢ ሄሊሳንዳጉዲ ዓይሢንቴም ዔኪ ዴንዴኔ፤ ዬኖ ዓይሢፆ ኪኢቴሎይዳ፦ «ዓዳሬ ጌይንታ ታጶ ላምዓሳ ዓጊኖኮ ታጶ ሃይሣሳ ኬሎና ዓይሁዴ ዓሲ ጌይንታያ ቢያ፤ ዼጌ፥ ጋርቺ፥ ላኣሊንታ ናይንታ ዓይሱዋዖ ዎዺ ጋፒሲ ባይዙዋቴ!» ጋዓያ ዓኣኔ፤ ሃሣ፦ «ዔያቶኮ ዓኣ ባካኣ ቢያ ቡሪንቶንጎ!» ጋዓ ዓይሥሢያ ዓኣኔ። 14 ዬና ጌይንቴ ኬሌላ ሄላዛ ዓሲ ቢያ ጊኢጊንቲ ካፓኒ ፃኣፒ ዳኮና ኪኢቶ ዛጎም ጶኦኮይዳ ጌሢንታንዳጉዲ ካኣቲ ዎይሣ ዓጮ ቢያ ዓይሤኔ።

15 ካኣቲ ዓይሤም ዬና ኪኢቴላ ካኣቲ ካኣታዺ ዴዒ ዓኣ ካታሞ ሱኡሳይዳ ዓሲ ቢያ ዛጋንዳጉዲ ጌሢንቴኔ፤ ጳዦ ጳሽካ ሩኡሮ ዓሳኣ ካኣቲ ዓጮ ቢያ ዬያ ኪኢቶ ሄሊሴኔ፤ ዬያሮ ካኣቲ ካኣታዺ ዓኣ ሱኡሳ ካታማ ጎይሢ ባይዚ ዓኣንቴ ካኣቲና ሃማና ፔቴ ቤስካ ዴዒ ዎይኔ ዑሺ ዑሽካኔ።