1 ፂኢሮሴ ካታሞ ዛሎ ኬኤዚንቴ ሎንሣ ያዺኬ፤ ፂኢሮሴ ዶዒ ባይቄሢሮ፥ ማኣሪንታ ዋኣፆ ካኣሚላ ዔቃ ቤሲያ ባኣያ ማዔሢሮ ዒንሢ ቴርሴሴ ዓጮ ዋኣፆ ካኣሚላ ዒላቱዋቴ፤ ቆጲሮሴ ዓጫፓ ኬኤዚንቴ ሃይሳ ዬያኬ። 2 ዒንሢ ዋኣፆ ዑፃ ሃንታ ዓሳ ዖርጎቼ ዓሳ! ዋኣፆ ሳዞ ዓጮይዳ ናንጋ ዓሳ፥ ሲኢዶና ዓጮ ኮርሞ ዓሳ ዚቲ ጎዑዋቴ! 3 ጊብፄ ዓጮይዳ ጎሽኪንታ ሃኣካ ዼኤፖ ባዞ ባንፆና ሙኪ ፂኢሮሴ ካታሞም ሚርጌ ሚኢሼ ጴዺሳያኬ፤ ዬያሮ ፂኢሮሴ ሚርጌ ዓጪኮ ቦኦካ ቤሲ ማዔኔ። 4 ባዛ፦ «ታኣኒ ኔና ባኒ ሾይባኣሴ፤ ዓቲንቄንታ ዉዱሮ ናይንታኣ ታኣኒ ዲቺባኣሴ» ጌዔሢሮ ኔኤኒ ሲኢዶና ካታሜሌ! ኔኤኒ ባዞ ዓጫ ማዢንቴ ዋርዲዬሌ ቦርሲንቴ።

5 ፂኢሮሴ ዶዒ ባይቄሢ ጊብፄ ዓሳ ዋይዜ ዎዶና ዲቃቲ ካራ ባይቃንዳኔ።

6 ዒንሢ ባዞ ዓጫ ናንጋ ዴራ! ዒላቲ ዬኤኪ ዬኤኪ ቴርሴሴ ፒንቁዋቴ። 7 ሚርጌ ዎዴኮ ቤርታ ማዢንቴ ካታሜላ፥ ዴራ ዒዞኮ ሃኬ ዓጪ ዓኣዺ ማዢ ናንጋኒ ዳንዳዔ፥ ዎዛንታ ኮሹሞንታ ዓኣ ካታማ ማዒ ናንጌዛ ሃማይዲ ዓቲያ? 8 ቦንቾሮ ቶኦካ ዓጎ ባኮ ዓጊሳ ካታሜሎ፥ ዔቦ ሻንቻ ዓሶና ሻንቃ ኮርሞ ዓሳ ዒዞኮ ሱኡጎ ማዔ ፂኢሮሴይዳ ሃይ ቢያ ማዓንዳጉዲ ማሊ ቱኬሢ ዖናዳይ? 9 ሃያ ማሊ ቱኬሢ ቢያ ባኮ ዎይሣ ጎዳኬ፤ ዒዚ ሃያ ማሊ ቱኬሢ ዔያታ ማዼ ባኮና ዖቶርሙሞ ሃሻንዳጉዲ ማሃኒና ቦንቺንቴ ዓሶዋ ዻውሲሳኒ ጌዒኬ።

10 ዒንሢ ቴርሴሴ ዴራ! ሃካፓ ሴካ ዒንሢ ቃዛ ባኣዚ ባኣሢሮ ዓባዬ ዎሮጉዲ ሳዖ ኔኤኮ ቢያ ባይዚ ዴዔ። 11 ናንጊና ናንጋ ጎዳኮ ዎልቃ ካኣቶ ዲቃሢ ዲቃሢ ዴንዲ ባዞኮ ሱኮ ሄሌኔ፤ ካኣናኔ ዓጮይዳ ዓኣ ዋርዲዮ ቤዛ ሻሂንታንዳጉዲ ዒ ዓይሤኔ። 12 «ኔኤኒ ሃና ሲዶና ካታሜሌ! ኔኤኮ ዎዞ ሌዓ ጋፔኔ፤ ዴራ ኔኤኮ ሄርቂንቲ ዎርቃኔ፤ ቆጲሮሴ ዓጮ ፑኒ ቶሌታቶዋ ዒኢካ ኮሺ ኔ ናንጋዓኬ» ጌዔኔ።

13 ባብሎኔ ዓሶ ሳዖ ዛጉዋቴ፤ ዴራ ቢያ ፓሡዋያ ማዒ ዓቴኔ፤ ዓሶኦሬ ዓሳ ሳዔሎ ካይዚ ቦዖ ፂካ ቤሲ ማሄኔ፤ ዒዞኮ ዋርዲያሢ ዶይሲ ሳዔሎ ዶዔ ቦኪ ኩሊንቴያ ማሂ፥ ፔኤኮ ዋርዲዮ ዒኢካ ኮሼኔ።

14 ዒንሢ ባዞ ዑፃ ሃንታ ቴርሴሴ ዓጮ ዋኣፆ ካኣሚላ! ዒንሢኮ ዋርዲዮ ቤዛ ሻሂንቴሢሮ ዒላቲ ዬኤኩዋቴ!

15 ፂኢሮሴ ዓጫ ላንካይታሚ ሌዔጉዴያ ዋሊንቲ ናንጋንዳ ዎዴ ሙካንዳኔ፤ ዬይያ ፔቴ ካኣታ ዎይሣ ሌዔኬ፤ ዬንሢ ሌዓ ዓኣዼስካፓ ፂኢሮሴ ዓጫ ዞኦስካ ኮኦማ ላኣሊጉዲ ቶሴና ሂዚ ጌይ ጌስቲንታያ ማዓንዳኔ፤

17 ላንካይታሚ ሌዔኮ ጊንፃፓ ፆኦሲ ፂኢሮሴ ዓጮ ሚና ቤርታኣ ማዾ ባንሢ ማሃንዳኔ፤ ሳዖይዳ ዓኣ ካኣቶና ቢያ ዒዛ ዞኦዛ ኮኦማያ ማዓንዳኔ። 18 ዒዛ ኮርሞና ዴንቃ ሚኢሻ ቢያ ፆኦሲም ዱማዼያ ማዓንዳኔ፤ ፔኤም ዒዛ ጌሡዋዖ ፆኦሲኮ ማዾ ዓሶም ኮይሳ ሙኡዚና ኮሺ ማኣዖዋ ሻንቆያ ማሃንዳኔ። ሂዚ. 26፡1—28፡19፤ ዒዮ. 3፡4-8፤ ዓሞ. 1፡9-10፤ ዛካ. 9፡1-4፤ ማቲ. 11፡21-22፤ ሉቃ. 10፡13-14።