61
ዻቂንታ ዛላ ኬኤዛ ኮሺ ሃይሴ
1 ናንጊና ናንጋ ጎዳኮ ዓያና ታኣና ዓኣኔ፤
ማንቆ ዓሶም ኮዦ ሃይሶ ታ ኬኤዛንዳጉዲ
ዒዚ ታና ዶኦሚ ቲሽኬኔ፤
ዒና ሜቄዞሢ ታ ኮኦላንዳጉዲ
ዲዒንቲ ዔውቴ ዓሶም ዓይላታፓ ኬስኪሢ
ቱኡቲ ዓኣ ዓሶም ቡሊንቲሢ
ሃይሴ ታ ኬኤዛንዳጉዲ ዒ ታና ዳኬኔ። ማቲ. 11፡5፤ ሉቃ. 7፡22።
2 ናንጊና ናንጋ ጎዳኮ ማኣሪፆ ሌዖና
ኑ ፆኦዛሢ ኮሞ ኮፃንዳ ኬሎ ዛሎዋ ታ ኬኤዛንዳጉዲ
ዬኤካ ዓሶ ቢያ ታ ዶዲሻንዳጉዲ ሉቃ. 4፡18-19።
3 ፂዮኔይዳ ዖያ ዓሶም ኮይሳ ባኮ ዒንጋንዳጉዲ
ዲቢንፆ ቤዛ ሚዛጶ ቶኦካ ዓጎ ባኮ ታ ዔያቶም ዓጋንዳጉዲ
ዬኤፖ ቤዛ ዎዛሳ ዛይቶ ቲዦ ዔያቶ ቶኦካ ታ ዋሃንዳጉዲ
ዖያ ዓያኖ ቤዛ ጋላታ ዓይኑሞ ታ ዒንጋንዳጉዲ ዒዚ ታና ዳኬኔ።
ዔያታ ዒዛኮ ቦንቾ ፔጋሳያ ማዓንዳጉዲ
«ናንጊና ናንጋ ጎዳ ቱኬ ፂሎ ሻኣቢ» ዔያታ ጌይንታንዳኔ።
4 ዔያታ ሚና ዶዒ ሻሂንቴ ካታሞ ማሂ ማዣንዳኔ፤
ቤርታዺ ጋፒ ባይቄ ባኮ ጊንሣ ዔያታ ኮሻንዳኔ፤
ኬስኬ ኬስኬ ሾይንቶና ሻሂንቴ ካታሞ ዔያታ ዓካሳንዳኔ።
5 ሜሌ ዓጫፓ ሙኬ ዴራ ዒንሢኮ ቆልሞ ሄንቃንዳኔ፤
ጎዦዋ ዒንሢኮ ዔያታ ጎሽካንዳኔ፤
ዎይኖዋ ዔያታ ኮሺ ኮሺ ካፓንዳኔ።
6 ዒንሢ ጋዓንቴ «ናንጊና ናንጋ ጎዳኮ ቄኤሶ» ጌይንታንዳኔ፤
ዓሳኣ ዒንሢ «ፆኦሲም ማዻዞንሢ» ጋዓንዳኔ፤
ዴሮኮ ቆሎ ዔኪ ዒንሢ ዎዛዻንዳኔ፤
ዔያቶ ዖርጎቼ ባኮ ዒንሢሮ ማሂጋፓ ዒንሢ ቦንቺንታንዳኔ።
7 ታ ዴራ ቦርሲንቴ ቤዞ ጳንጬ ቦንቾ ዴንቃንዳኔ፤
ዻውሲንቴ ቤዞዋ ዔያቶም ዒንጊቴ ባኮና ዎዛዻንዳኔ፤
ዔያቶኮ ቤርታኣ ሳዖፓ ጳንጬ ማዔ ሳዓ ዔካንዳኔ፤
ናንጊና ናንጋ ዎዛኣ ዔያቶም ማዓንዳኔ።
8 ታኣኒ ናንጊና ናንጋ ጎዳ ፒዜ ዎጌ ናሽካኔ፤
ቡሪሢና ፑርታ ማዾ ታ ዒዒፃኔ፤
ዔያታ ማዼሢ ዛሎ ዔያቶም ኮይሳሢጉዴያ ዒንጋንዳኔ፤
ዔያቶና ዎላ ናንጊና ናንጋ ጫኣቁሞ ታ ጫኣቃንዳኔ።
9 ዔያቶኮ ዜርፃ ካኣቶና
ናኣታኣ ዔያቶኮ ዴሮ ባኣካ ዔርቴያ ማዓንዳኔ፤
ዛጋ ዓሳ ቢያ ናንጊና ናንጋ ጎዳ ዔያቶ ዓንጄያታሢ ዔራንዳኔ።
10 ታኣኒ ናንጊና ናንጋ ጎዳና ኮሺ ዎዛዻኔ፤
ሼምፓሢ ታኣኮ ፆኦዛሢና ዎዛዻኔ፤
ዑኡታሢ ፔና ኮሻኒ ዓፒላ ቶኦካ ማራሢጉዲ
ዑኡቴላ ፔኤኮ ሚዛጶ ፓልማሢና ፓልሚንታሢጉዲ
ዻቂንታ ዓፒላ ታና ዒ ማይሴኔ፤
ፂሉሞ ማኣዖዋ ዒ ታ ዑፃ ቃሲ ቃሲ ኩሌኔ። ዮሃ. ፆፔዻ 21፡2።
11 ሳዓ ዔኤቢ ባቃልሳሢጉዲ
ቱኮ ባኣዚ ቱኮ ጎዣ ዱማ ዱማ ሚፆ ዑጊሳሢጉዲ
ናንጊና ናንጋ ጎዳ ፂሉሞንታ ጋላታንታ
ዴሮፓ ቢያ ዓልቃንዳጉዲ ማሃንዳኔ።