3
ዒዮቤ ፔ ሾይንቴ ኬሎ ጋዳንቄሢ
ዒዮቤ
1 ዬካፓ ዒዮቤ ጌስቲፆ ዓርቃዖ ፔ ሾይንቴ ኬሎ ሂዚ ጌይ ጋዳንቄኔ፦
2-3 «ታ ዒንዶኮ ዑፃ ታ ዓቴ ዋንቴላ
ታ ሾይንቴ ኬሌላኣ ጋዳንቂንቴያ ማዖም!
4 ዬና ኬሌላ ዹሚ ባንሢ ላኣሚንቶም፤
ጫሪንጮ ፆኦዛሢ ዒዞም ማሎፓ፤
ፖዒ ፔቴታዖ ዒዞይዳ ጴዾፓ።
5 ቃኣዮና ሻኔ ዹሚና ዒዛ ካንቂቴያ ማዖም፤
ዒዞ ኬሌሎኮ ፖዓ ሻኣሬ ዹሚና ካንቂንቴያ ማዖም፤
6 ዬኖ ኬሌሎ ሻኔ ዹሚ ካንቆንጎ፤
ሌዖ ጋራ ዓኣ ኬሎና ዎላ ፓይዲንቶፓ፤
ዓጊኖ ባኣኮዋ ጌሊ ዒዛ ዓዺንቶፓ።
7 ዬኖ ኬላ ዓሲ ሾይንቱዋ ኬሊ ማዖንጎ፤
ዎዛ ዑኡሲያ ዒዞይዳ ዋይዚንቶፓ።
8 ሌዋታኔ*ሌዋታኔ ጌይፃ፦ ሚናኣ ዎዴና ዓኣኔ ጌይንታያ ጉርጉሮ ማላ ዼኤፒ ቦዖኬ። ጌይንታ ቦዖ ጴቻኒ ዳንዳዓዞንሢና
ኬሎ ጋዳንቃ ማርሾ ዓሳ ዬኖ ኬሎ ጋዳንቆንጎ።
9 ዬኖ ዋንቶኮ ካሪፆ ዦኦጋሢ ዹሞንጎ፤
ፖዒኮ ሃጊ ማዓንዳ ዎዛኣ ዒኢካ ጴዾፓ፤
ካሪሢ ዓቢያ ዒዞይዳ ፆርቆፓ። ዔር. 20፡14-18።
10 ዬና ዋንቴላ ታኣኒ ታ ዒንዶ ጎጳፓ ኬስኩዋጉዲ
ሃሣ ሜቶዋ ታ ዓኣፓፓ ዓኣቻኒ
ሾይፆ ካሮ ታ ጊዳ ዎዺባኣሢሮ ጋዳንቂንቴያ ማዖንጎ።»
11 «ዎንዴ ታ ዒንዶ ጎጳ ዓኣዖ
ሃሣ ዒንዶ ጎጳፓ ታ ኬኬስካዖ ሃይቄቴ ዓይጎ?
12 ታ ዒንዳ ፔ ጉባዛ ዓይጋ ታና ጎዴይ?
ዓይጋ ታና ዒዛ ፔ ዻንፆ ዻንሢሤይ?
13 ዒማና ታ ሄኤዶ ሃይቂ ላሄያታቶ
ሄኤዶ ታ ሃውሼያ ናንዳንቴኬ።
14 ሃሢ ሻሂንቲ ዓኣ ቤዞ ፔኤም ጌዒ ኮሼ
ዓጮ ካኣቶንታ ዔያቶኮ ዞራ ዓሶንታ ዎላ
ሄኤዶ ታ ላሂ ሃውሾ ዴንቄያ ናንዳንቴኬ።
15 ፔኤኮ ማኣሮ ዎርቄና ቢራና ኩንሤ ሱኡጎና ዎላ
ታ ሄኤዶ ላሄያ ናንዳንቴኬ፤
16 ሃጊ ዓጊኒ ሄሊባኣንቴ ሾይንቲ ዱኡቴያ
ፖዒያ ፔቴታዖ ዛጊባኣ ናይጉዲ ታ ማዔቴ ዓይጎ?
17 ፑርታ ዓሲ ዱኡኪንቲና ፔኤኮ ፑርቶ ማዾ ሃሻኔ፤
ማዾ ማዺ ላቤ ዓሳኣ ዱኡፖይዳ ሃውሻኔ።
18 ቱኡዞ ዓሳታዖ ዒኢካ ኮሹሞ ዴንቃኔ፤
ዔያቶ ማዺሻ ዓሶ ጎሪንታፓ ዔያታ ዻቃኔ።
19 ዻኮንታ ዼኤፖ ዼኤፖ ዓሶንታ ዒኢካ ፔቴይዳ ዓኣኔ፤
ሃሣ ካራማኣ ዒኢካ ዔያቶ ዎይሣ ዓሶ ዓይላታፓ ኬስካኔ።»
20 «ዋኣዪሢዳ ዓኣዞንሢም ፖዒ
ናንጋ ጫንቄ ዖዪሢና ኩሜ ዓሶም
ሼምፔ ዓይጋ ዒንጊንታይ?
21 ዺቢ ቆሎፓ ባሼ
ሃይቢ ኮዒ ዴንቁዋኣዞንሢም
ሼምፔ ዓይጋ ዒንጊንታይ? ዮሃ. ፆፔዻ 9፡6።
22 ዱኡኪንታ ዎዶና ዎዛዻዞንሢም
ሼምፓ ዓይጋ ዒንጊንታይ?
23 ጎይፃ ባይቄሢም
ፆኦሲ ካራ ዎዼ ዓሢም
ፖዒ ዓይጋ ዒንጊንታይ?
24 ሙዖ ሙዖንዶ ቤዞ ታ ዖዪሢና ሜታዻኔ፤
ዒላታ ታኣኮ ዓልቂ ጋፑዋ ዋኣሢጉዲኬ።
25 ታ ዒጊጬ ባካ ታ ኮይላ ሙኬኔ፤
ዓልቲ ታ ማሌ ባካ ታና ሄሌኔ።
26 ኮሹሞና ሃውሺሢና ታኣኮ ባኣሴ፤
ታ ሜቶኮዋ ጋፒንሢ ባኣሴ።»