ዓንጊ ኪሬና ባዛፓ ኔ ዓርቃኒ ዳንዳዓ?

ዒንዲርዞ ሱሲና ኔ ዒዛኮ ቱካንዳ? ዓይኑ. 74፡14፤ 104፡26፤ ዒሲ. 27፡1።

ባንጋሎዋ ዒዛኮ ዓንጊ ኪሬና ጫርጊ ዓርቃኒ ኔ ዳንዳዓ?

ኮሺ ዑኡሲና ዒ ኔና ሺኢቃዳ?

ኔኤና ዎላ ዒ ጌስቲ ጊኢጋንዳ?

ዉዱሮ ናኣቶ ኔኤኮ ዓማልሳንዳጉዲ ቃዛኒ ዳንዳዓ?

ዎላ ማንዲንታ?

ቲቂያ ዎሊና ዒዛ ዔያታ ጊሽታ?

ቶኦኮዋ ዒዛኮ ኔ ዓጬ ዓንጊና ጫርጊ ዑራኒ ዳንዳዓ?

ኔ ዒዛ ዓርቃኒ ማዺ ሺሬ ባኮ ፔቴታዖ ዋላዓኬ፤

ላሚ ዒዛ ኔ ዓርቃኒያ ኮዓዓኬ።»

ዒዛ ዛጌሢ ቢያ ዒጊቹሞና ጎጋይቃኔ።

ዓካሪ ታኣም ዋይዚ ዒፃኒ ጫርቃንዳይ ዖናዳይ?

ዓካሪ ታ ማሃንዳጉዲ ታኣም ታልዔሢ ዖናዳይ?»

ሚዛጳ ዑፆ ዛሎ ታ ኬኤዙዋዖ ሃሻዓኬ።

ሃሣ ባንጋሎዋ ዒዛኮ ሾኦላኒ ዖ ዳንዳዓይ?

ባንጋሎዋ ዒዛኮ ሾኦካኒ ዳንዳዓይ ዖናዳይ?

ኮሺ ዎሊ ዓርቄያ ማዔሢሮ ዓንጊጉዲ ዶዳያኬ።

ዔያቶኮ ባኣኪና ዢባሬታዎ ዓኣዻኒ ዳንዳዑዋኣሴ።

ዓይጎ ባኣዚያ ፔቴታዖ ዔያቶ ዱማሳኒ ዳንዳዑዋኣሴ።

ፖዒ ዜኤሊንሢ ጴዻኔ፤

ዓኣፓ ዒዛኮ ፆርቄ ዓቢጉዲ ፖዓኔ።

ታሚ ቄንሢያ ፂንቂ ጴዻኔ።

ሲኢዻፓ ዒዛኮ ጩቢ ኬስኪ ጴዻኔ።

ታሚ ሎስታ ዒዛኮ ዻንጋፓ ኬስካኔ።

ዓኣፖ ካራኣ ዒዛኮ ሚርጌና ዒጊቻያኬ።

ዑፃ ዒዛኮ ዓንጊጉዲ ዶዳኔ።

ዶዱማኣ ዎንሢ ሹቺጉዲኬ።

ዎልቆ ዓሳታዖ ዒጊጪ ጎጎጋይቃኔ።

ሂኢሺንታ ጫርጎ ባኣዚያ ዔኤቢ ዒዛ ዎኦቱዋሴ።

ሞኦኖ ዓንጎዋ ሙርዔ ሚሢጉዲ ጋኣጫኔ።

ዎራ ሹቺ ዒዛ ኮይላ ጎቦጉዲኬ።

ዓሳ ዒዛ ዎርፆና ዶርባኣና ዒ ቦሂ ሚሚኢጫኔ።

ሳዖ ማራሻጉዲ ጳላኔ።

ዖቲ ጋርካ ፔንታ ዛይቴጉዲያኣ ዒ ቡርቂሻኔ።

ባዞ ዋኣፆዋ ዒ ዱባሳኔ።

ዓጪዳ ዒዛ ማላ ማዢንቲ ፔቴታዖ ባኣሴ።

ዒዚ ካዮ ቦዖ ቢያኮ ዑፃ ካኣቲኬ።»