3
ናንጊና ናንጋ ጎዳ ሜሌ ዴሮይዳ ዎጋንዳያ ማዒፆ
1 ናንጊና ናንጋ ጎዳ ሂዚ ጋዓኔ፦
«ዬኖ ዎዶና ዬሩሳላሜና ዪሁዳናፓ ዲዒንቴ ባኮንታ ዓሶንታ ታኣኒ ጊንሣ ማሃንዳኔ፤
2 ዒማና ሜሌ ዴሮ ቢያ ታኣኒ ቡኩሲ
ዒዮሳፒፄ ዶኦጮ ኬይሳንዳኔ፤
ታኣሮ ማዔ ዒስራዔኤሌ ዴሮ
ዔያቶ ባኣካ ዔያታ ዜርቂ ሳዖዋ ጊሽቲ ዔኬሢሮ
ዒዮሳፒፄ ዶኦጮይዳ ፑርታ ዎጌ ዔያቶይዳ ዎጋኒ ዒኢካ ሺኢሻንዳኔ።
3 ዲዒ ዔኬ ታኣኮ ዴሮ ጊሽታኒ ዒፃ ዔያታ ዓጌኔ፤
ዔያታ ዞኦዛ ኮኦማ ላኣሎና ላሃኒ ዓቲንቆ ናኣቶ፤
ዎይኖ ዑዦ ዑሽካኒያ ዉዱሮ ናኣቶ ዓይሌ ማሂ ሻንቼኔ።»
4 «ዒንሢ ፂሮሴንታ ሲዶናንታ ፒሊስፄኤሜ ዓጮ ዴራ! ዒንሢ ማዻ ባካ ዓይጎዳይ? ታና ኮማኒ ዒንሢ ማላ? ያዺ ማዔቴ ዒንሢ ማዼ ማዾ ኔጉዋዖ ታኣኒ ዒንሢዳ ሺርሻንዳኔ። ዒሲ. 14፡29-31፤ 23፡1-18፤ ዔር. 47፡1-7፤ ሂዚ. 25፡15—28፡26፤ ዓሞ. 1፡6-10፤ ሶፖ. 2፡4-7፤ ዛካ. 9፡1-7፤ ማቲ. 11፡21-22፤ ሉቃ. 10፡13-14። 5 ታኣኮ ቢሮ ዓንጎንታ ዎርቆንታ፤ ዬያጉዲ ሃሣ ጴዹዋያ ማዔ፥ ታኣኮ ቆሎ ቢያ ዒንሢ ዔኪ ዒንሢኮ ካኣሽኮ ሜሌ ፆኦዞ ማኣሪ ጌልዜኔ። 6 ዪሁዳና ዬሩሳላሜናይዳ ሾይንቴ ዓሶ ዔያቶኮ ዓጫፓ ሃኪሲ ዔኪ ዴንዲ ጊሪኬ ዓሶም ዒንሢ ሻንቼኔ። 7 ሃሢ ዓካሪ ታኣኒ ዔያታ ሻንቺንቴ ቤዛፓ ዔያቶ ዔቂሲ፥ ዬኖ ዓጫፓ ዔያታ ኬስካንዳጉዲ ማሃንዳኔ፤ ዔያቶይዳ ዒንሢ ማዼ ፑርቶ ባኮ ቢያ ዒንሢዳ ታኣኒ ሺርሺ ዔኪ ዬዓንዳኔ። 8 ዒንሢኮ ዓቲንቆንታ ዉዱሮ ናኣቶንታ ዪሁዳ ዴሮም ሻንቺንታንዳኔ፤ ዬካፓ ዪሁዳ ዓጮ ዓሳ ሃኬይዳ ዓኣ ሳኣባ ዓሶም ዔያቶ ሻንቻንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»
9 «ዬያ ሜሌ ዴሮም ቢያ ዒላቲ ኬኤዙዋቴ፤
ዖልዚማኣ ጊኢጊንቱዋቴ!
ዖሎና ዔርቴ ዓሶዋ ዔኤሊ ኬሱዋቴ፤
ዖሎ ዖላ ዓሳ ቢያ ቡኪንቲ ዖሎሮ ኬስኮንጎ።
10 ማራሾ ዒንሢኮ ዹይ ጬንቻ ዓራፖ፥ ባኣጮዋ ዹይ ዎርሢ ማሁዋቴ፤
ዎልቄ ባኣሢታቴያ ‹ታኣኒ ዶዲኬ!› ፔና ጎዖንጎ፤ ዒሲ. 2፡4፤ ሚኪ. 4፡3።
11 ዒንሢ ቢያ ዛሎና ዓኣ ሜሌ ዴራ ቢያ፤
ዑካዺ ኬስኩዋቴ!
ዶኦጮይዳ ቡኪንቱዋቴ።»
ናንጊና ናንጋ ጎዳሢዮ! ኔኤኮ ዖሎ ዓሶ ዳኬ።
12 «ሜሌ ዴራ ቢያ ዔቂ ዒዮሳፒፄ ዶኦጮ ዓኣዾንጎ፤
ታኣኒ፥ ናንጊና ናንጋ ጎዳ ቢያ ዛላ ዓኣ ሜሌ ዴሮይዳ
ፑርታ ዎጌ ዎጋኒ ዒኢካ ታኣኒ ዴዓንዳኔ።
13 ዔያቶኮ ፑርቱማ ዑሣ ዓኣዼ ዺቤኔ፤
ካፄ ሃኣኮ ባኣቺና ጮኦሪንታሢጉዲ ዔያቶ ጮኦሩዋቴ፤
ዎይና ሶዮና ዎላ ጩኡጶ ቤዞይዳ ኩሚ ሄርቂንታሢጉዲ ዔያቶ ሄርቁዋቴ።» ዮሃ. ፆፔዻ 14፡14-16፤ 19፤ 20፤ 19፡15።
14 ናንጊና ናንጋ ጎዳ ዎጎ ዎጎ ዶኦጮይዳ ዎጋ ኬላ ሄሌኔ፤
ዬያሮ ኮሺ ሚርጌ ዴሬ ዒኢካ ቡኪንቴኔ።
15 ዬኖ ኬሎና ዓቦንታ ዓጊኖንታ ዹማንዳኔ፤
ዦኦጋሢያ ፖዑዋያ ማዓንዳኔ።
16 ናንጊና ናንጋ ጎዳ ፂዮኔ ዹኮይዳ፤ ጊንሣ ሃሣ ዬሩሳላሜይዳ ዔቂ
ፔኤኮ ዒጊቻ ዑኡዞ ዋይዚሳንዳኔ፤
ጫሪንጮንታ ሳዖንታ ዓጊፃንዳኔ፤
ዒዚ ፔ ዴሮ ዒስራዔኤሌኮ
ካናዾ ዋርዲዮ ማዓንዳኔ። ዓሞ. 1፡2።
ፆኦሲ ፔ ዴሮ ዓንጄሢ
17 «ዒስራዔኤሌ ዓሲዮቴ! ዒማና ታኣኒ፥ ናንጊና ናንጋ ጎዳሢ
ዒንሢኮ ፆኦዛሢታሢ ዒንሢ ዔራንዳኔ፤
ታኣም ዱማዼ ፂዮኔ ዹኮይዳ ታኣኒ ናንጋንዳኔ፤
ዬሩሳላሜያ ታኣም ዱማዼ ካታማ ማዓንዳኔ፤
ሃካፓ ሴካ ሜሌ ዓጮ ፖኦሊሳ ዖሊ ዒዞ ዓርቃዓኬ።»
18 «ዬኖ ዎዶና ዹኮይዳ ቢያ ዎይኔ ባቃሊ ኩማንዳኔ፤
ጌሜሮ ዑፆይዳኣ ሚርጌ ማኣፃ ባይ ሄንቃንዳኔ፤
ዪሁዳ ዓጮ ዎራ ቢያ ዋኣሢ ዓኣያ ማዓንዳኔ፤
ናንጊና ናንጋ ጎዳኮ ጌኤዦ ማኣሮይዳፓ ዋኣሢ ዓልቃንዳኔ፤
ሺፂሜ ዶኦጮዋ ዬይ ዋኣፃ ዑሻንዳኔ።»
19 «ጊብፄና ዔዶኦሜ ዓጮ ዓሶና ዪሁዳ ዴሮ ዑፃ
ጌኔ ማዾ ማዼሢሮ፥ ፂሎ ዴሮዋ ዎዼሢሮ
‹ጊብፄ ዓሲ ናንጉዋ ዓጪ ማዓንዳኔ፤
ዔዶኦሜያ ዓሲ ናንጉዋ ዳውሌ ማዓንዳኔ።›
20-21 ዬያሮ ሃይማ ሄላንዳኣና ኮሞ ኮፁዋዖ ታኣኒ ሃሼ
ጌኤዦ ዓሶ ሱጉፆ ዛሎ ኮሞ ታኣኒ ኮፃንዳኔ፤
ጋዓንቴ ዬሩሳላሜንታ ዪሁዳንታ ታኣኮ ዴራ ናኣናና ናንጋ ቤሲ ማዓንዳኔ፤
ታኣኒ፥ ናንጊና ናንጋ ጎዳሢ ፂዮኔ ዹኮይዳ ናንጋንዳኔ።»