ዔርሚያሴኮ ቃዮ ማፃኣፖ
ዓይፆ ካሮ
ዔርሚያሴኮ ቃዮ ማፃኣፓ፦ ኪሪስቶሴ ሾይንታንዳሢኮ ቤርታ ዶንጎ ፄኤታና ሳሊታሚ ላሆ ማዓ ሌዖይዳ ዬሩሳላሜ ካታማ ሻሂንቴሢሮ፤ ጊንሣ ሃሣ ዒኢካ ናንጋ ዴራኣ ዳውሲንቲ ዴንዴሢሮ ዖዪ ካላሎና ዶንጎ ካላሊ ዓርቄያኬ። ሃኖ ማፃኣፖይዳ ዓኣ ባካ ባሼ ዬኤፒ ዛላና ሲዬ ዛላ ኬኤዛያ ማዔቴያ ፆኦሲዳ ጉሙርቂሢ ጌሥሢ ዛላንታ ሃጋኣ ማዓንዳ ዎዛ ጌሢ ናንጊሢ ዛላኣ ኬኤዛ ቤሲ ዓኣኔ፤ ዬያቶ ካላሎ ኪሪስቶሴ ሾይንታዳሢኮ ቤርታ ዶንጎ ፄኤታና ሳሊታሚ ላሃሳ ሌዖና ዓጬሎይዳ ሄሌ ባይሲንቶ ማሊ ጶቂሣኒ ዓይሁዶ ዓሳ ሙኡዚ ሃሺሢና ዖዪሢ ካኣሺ ሌዓ ሌዓ ካኣሽካ ዎዶና ዬያቶ ካላሎ ናባባኔ።
ማፃኣፔላ ዱማ ዱማ ዓርቄ ባኮ
ቤርታሳ ቃዮ፦ ዬሩሳላሜ ሜታዼ ሜቶንታ ዖዪንቴ ዖዪፆ (1፡1-22)
ላማሳ ቃዮ፦ ፆኦሲ ዬሩሳላሜይዳ ዓጌ ዴኤፆ ሜቶ (2፡1-22)
ሃይሣሳ ቃዮ፦ ሃጊ ማዓንዳ ዎዛ ባኣዚ ዓኣያ ማዒፆ (3፡1-66)
ዖይዳሳ ቃዮ፦ ዬሩሳላሜኮ ባይሲንቶ (4፡1-22)
ዶንጋሳ ቃዮ፦ ማኣሪሢ ዴንቃኒ ሺኢቂንታ ሺኢጲሢ (5፡1-22)
1
ዬሩሳላሜ ካታሞኮ ሜቶንታ ዖዪፆንታ
1 ሃያኮ ቤርታ ዓሲ ኩሚ ዓኣ ካታሜላ
ሃሢ ዎዎይቴዖ ሃሺንቴ ቤሲ ማዒ ዓቴንቴሞ!
ዓጮ ባኣኮይዳ ዼኤፒ ማዒ ዓኣዛ
ዓኒ ሃይቄ ላኣሊጉዲ ማዔንቴሞ!
ዱማ ዱማ ፓቂንቴ ዓጮፓ ጌኤሾ ማዒ ዓኣዛ
ሃሢ ዓይሌ ማዒ ዴዔኔ።
2 ዒዛ ዹሞና ዒናፓ ዬኤካኔ፤
ዓቢፃ ዒዞኮ ጋጋጮና ሊካ ኬዳኔ፤
ዒዞ ሃያኮ ቤርታ ናሽካ ዓሶ ቢያሢዳፓ
ዒዞ ዶዲሻ ዓሲ ፔቴታዖ ባኣሴ፤
ዒዞኮ ላጎ ማዔ ዓሳ ቢያ ዒዞ ሃሼኔ፤
ሞርኬ ማዒያኣ ዒዞይዳ ዔቄኔ።
3 ዪሁዳ ዴራ ሚርጌ ዋኣዪንቲ ዓይላቶ ማዾዋ ማዼስካፓ
ዲዒንቲ ዔውቴኔ፤
ሃሢ ዔያታ ሜሌ ዴሮ ባኣካ ናንጋኣና
ፔቴታዖ ዔያቶኮ ሃውሾ ባኣሴ፤
ዔያታ ሚርጌና ካራ ባይዚ ዓኣንቴ
ዔያቶ ዳውሳ ዓሳ ሙኪ ሄሌኔ።
4 ዖኦኒያ ዒኢካ ቦንቺንታ ቦንቾ ቦንቻኒ ሙኪንዱዋኣሢሮ
ፂዮኔ ዹኮ ባንሢ ዴንዶ ጎይፃ ቦቦይታሳያ ዔዌ ማዓንዳኔ፤
ዬሩሳላሜ ጌሎ ካሮና ጌላ ዓሲንታ ኬስካ ዓሲያ ባኣሴ፤
ዒኢካ ዓኣ ቄኤሳ ሜታዺ ፔ ዒኖና ዚኢሊንታኔ፤
ዉዱሮ ናኣታኣ ዖዪ ሜታዻኔ፤
ፂዮኔ ካራ ባይዚ ሜታዺሢዳኬ።
5 ዒዛ ሚርጌ ጎሜ ማዼሢሮ
ናንጊና ናንጋ ጎዳ ዒዞ ሜቶይዳ ዓጌኔ፤
ዒዞኮ ናኣቶ ሞርካ ዲዒ ዔኪ ዴንዴኔ፤
ዒዞኮ ሞርካ ዒዞ ዎይሣያ ማዔሢሮ
ሞርኮም ዔኤቢ ጊኢጌኔ።
6 ዬሩሳላሜኮ ቦንቺንታ ቢያ ባይቂ ጋፔኔ፤
ዒዞ ዎይሣ ሱኡጋ ሄንቆ ቤሲ ባይዜ ሞይሌ ማዔኔ፤
ዔያቶ ኬማ ዓሳ ዳውሳዛ
ዎልቃ ዔያቶኮ ጋፒ ላባንዳያ ሄላንዳኣና ዔያታ ጳሽኪ ፑኔኔ።
7 ዬሩሳላሜ ዴራ ካራ ባይዚ ሜታዺ ዋኣዪንታ ዎዶና
ሃያኮ ቤርታ ዔያቶኮ ዓኣ ባኮ ማሊ ጶቂሣንዳኔ፤
ዔያታ ሞርኮ ኩጮ ጋሮ ጌላዛ
ዔያቶ ማኣዳ ዓሲ ባኣያ ማዓዛ
ሞርካ ዔያቶኮ ካታሞ ዶዒፆ ዛጋዖ ሚኢጬኔ።
8 ዬሩሳላሜ ዼኤፒ ጎሜ ማዼኔ፤
ዬያሮ ዒዛ ዒኢቴያ ማዔኔ፤
ዒዛ ዑፆ ካላዺ ዓኣንቴ ዔያታ ዛጌሢሮ
ቦንቻ ዓሳ ቢያ ቦሂ ዒዞ ቶኦቻኔ፤
ዓኣፖ ካሮዋ ዔያቶ ቤርታፓ ዚኢሊንቲ ዒዛ ሺርሼኔ።
9 ሻቱማ* 1፡9 ሻቱማ፦ ዬኖ ጌይንቴሢ ዬሩሳላሜኮ ጎሞ ዔርዛ ማላታ ማሂኬ። ዒዞኮ ማኣዓሢዳ ጴዼኔ፤
ሃጋ ዒዞ ዓይጌ ሄላንዳቴያ ዒዛ ማሊባኣሴ፤
ዒዞኮ ሎኦሚፃ ዓሲኮ ዑስካ ጌላያኬ፤
ዒዞ ዶዲሻ ዓሲያኣ ፔቴታዖ ባኣሴ፤
ሞርካ ዒዞ ባሼሢሮ
ዬያ ሜቶ ዒዞኮ ዛጋንዳጉዲ ናንጊና ናንጋ ጎዳ ዒዛ ሺኢቄኔ።
10 ዬሩሳላሜ ዴሮኮ ዼኤፒ ቦንቺንታያ ማዔ ቆሎ ሞርካ ጌሊ ቡሬኔ፤
ናንጊና ናንጋ ጎዳ ዴሮ ባኣኮ ጌሉዋጉዲ ላኣጊንቴ
ሜሌ ዓሳታዎ ዓቱዋዖ
ጌኤዦ ማኣሮ ጌላንቴ ዒዛ ዴንቄኔ።
11 ዴራ ዒዞኮ ሙዖንዶ ባኣዚ ባይዚ ዒላቲዳኬ፤
ዔያታ ሃይቁዋዖ ሼምፔና ናንጋኒ
ፔኤኮ ዓኣ ቆሎ ቢያ ሙኡዚና ዖኦካኔ፤
ዬሩሳላሜ ዴራ «ናንጊና ናንጋ ጎዳሢዮ! ኑም ማሌ!
ኑኡኮ ዻውሲንቶ ቢያ ዛጌ!» ጌይ ዒላታኔ።
12 ናንጊና ናንጋ ጎዳ ፔኤኮ ዼኤፖ ዻጎ ኑጊዳ ጮኦሽኬ ኬሎና
ኑና ሄሌ ሜቶጉዴያ
ሜታ ሄሌ ዓሲ ዓኣቶ
ሂንዳ ዒንሢ
ጎይፆና ሴካ ሃንጋ ሃንታ ዓሳ ዛጉዋቴ!
ዬይ ባካ ዒንሢም ሼሌዔ ባኣዚ ማላ?
13 «ሎኦፓ ታሚ ዒዚ ኬይሴኔ፤
ዬይ ታማ ሚቺ ሜጌፆ ጋሮ ኑኡኮ ዴንዴኔ፤
ቶኮም ኑኡኮ ቡኡዶ ፒሮ ፒሬኔ፤
ጊንሢም ኑና ጎቺ ማሄኔ፤
ዒኖ ኑኡኮ ባይዚ ፔቴ ኬሊ ጉቤ ዑፆ ኑኡኮ ዶጪሴኔ።»
14 «ዻቢንታ ታኣኮ ዎሊ ዑፃ ዳፂንቲ
ባቃኖይዳ ቃንባራጉዲ ጌሢንቴኔ፤
ዬይ ሚርጌ ዴኤፃያ ማዔሢሮ ዎልቄ ኑኡኮ ባይዜኔ፤
ኑኡኒ ቃዛኒ ዳንዳዑዋ ኑኡኮ ሞርኮም ዒዚ ኑና ዔኪ ዒንጌኔ።»
15 «ኑና ካፓ ፖኦሊሶ ናንጊና ናንጋ ጎዳ ዒፂ፥ ዔኪ ሺኢሼኔ፤
ኑኡኮ ዼጌሢኮ ዎልቆ ጋኣጫኒ ዖልዚ ዓሲ ኑጊዳ ዳኬኔ፤
ዖኦኒያ ጫርቂ ጌሊ ቤቂባኣ ካታሞይዳ ናንጋ ኑኡኮ ዴሮ
ዎይኖ ጩኡጶ ቤዛ ሄርቂንታ ዎይኔጉዲ ሄርቂ ዒዚ ዳኣፄኔ።»
16 «ሞርካ ኑና ባሼሢሮ ናኣቶም ኑኡኮ ካራ ባይቄኔ፤
ኑና ዶዲሻ ዓሲ ባይቄሢሮ
ዓቢሢ ላኣሊ ላኣሊ ኑኡኒ ዬኤካኔ።»
17 «ፂዮኔ ኩጮ ፔኤኮ ሌካ ዔቂሴኔ፤
ጋዓንቴ ዒዞ ማኣዳ ዓሲያኣ ባኣሴ፤
ዓሺኖ ማዔ ዓጮይዳ ዓኣ ዓሳ ቢያ ያይቆኦቤ ዜርፆኮ
ሞርኬ ማዓንዳጉዲ ናንጊና ናንጋ ጎዳ ዓይሤኔ፤
ዬሩሳላሜ ዔያቶ ባኣካ ዒኢቴ ባኣዚ ማዔኔ።»
18 «ዒዚ ዓይሤ ባኮ ዔያታ ዋይዞ ዒፄሢሮ
ዒ ማዼ ባኮና ናንጊና ናንጋ ጎዳ ዻቢንቲባኣሴ፤
ዒንሢ ዴራ ቢያ ዋይዙዋቴ፥ ሜቶዋ ታኣኮ ዛጉዋቴ፤
ዼጌ ማዔ ዓቲንቆንታ ዉዱራሢንታ ታኣኮ ዲዒንቲ ዔውቴኔ።»
19 «ታኣኮ ላጎ ታኣኒ ዔኤሌኔ፤
ዔያታ ጋዓንቴ ታና ዒፄኔ።
ቄኤሶንታ ሱኡጎንታ ቢያ ፔኤኮ ሼምፓሢ ዓውሳኒ
ሙዖ ኮይፆይዳ ዓኣዖ ዒኢካ ካታሞ ሳዛ ጎይፆይዳ ሃይቄኔ።»
20 «ናንጊና ናንጋ ጎዳሢዮ!
ታኣኒ ካራ ባይቂ ሜታዺ ዋኣዪሢዳ ዓኣሢ ኔ ዛጉዋዓዳ?
ታኣኒ ኔኤም ዋይዞ ዒፄሢሮ ጎጳ ታኣኮ ዋኣፄኔ፥ ዒናኣ ታኣኮ ዖዬኔ፤
ካታሞ ሳዛ ዓኣ ጎይፆይዳ ማዖም ኬኤፆይዳ ዴራ ታኣኮ ሃይቂ ኩዳኔ።»
21 «ታኣኒ ሜታዺ ዬኤካ ዬኤፖ ዓሳ ዋይዜኔ፤
ጋዓንቴ ታና ዶዲሻ ዓሲ ፔቴታዖ ባኣሴ፤
ታኣኒ ካራ ባይዚ ዋኣዪንታሢ ሞርካ ቢያ ዋይዜኔ፤
ኔ ማዼ ባኮ ዛሎና ዔያታ ዎዛዼኔ፤
ሃዳራ ኔኤኒ ጌዔ ኬሌላ ዬዖንጎ፤
ዔያቶይዳኣ ታና ሄሌ ባኮጉዴያ ሄሎንጎ።»
22 «ዔያቶኮ ፑርቶ ማዾ ቢያ ዛጌ፤
ታኣኮ ዻቢንቶ ቢያሢሮ ኔኤኒ ታጊዳ ሄሊሴ
ፑርቶ ባኮጉዴያ ዔያቶይዳኣ ሄሊሴ፤
ታኣኮ ሜቶ ዬኤፓ ዺቤኔ፥ ዒናኣ ታኣኮ ላቤኔ።»