ሚኪያሴ ማፃኣፖ
ዓይፆ ካሮ
ፆኦሲ ማሊፆ ኬኤዛ ሚኪያሴ ፆኦሲ ማሊፆ ኬኤዛ ዒሲያሴ ናንጌ ዎዶና ዓኣያ ማዓዛ ሾይንታ ዒዛኮ ዾኦሎ ዛሎ ዪሁዳ ካኣቲ ዓጮ ዴማ ዓኣ ፔቴ ዻካ ካታማስኬኖይዳኬ። ፆኦሲ ማሊፆ ኬኤዛ ዓሞፄ ኬዶ ዛሎ ካኣቶ ዓጮ ባይሲንታ ሄላንዳሢ ኬኤዜሢጉዲ ሚኪያሴያኣ ዪሁዳ ካኣቲ ዓጮ ባይሲንታ ሄላንዳሢ ፆኦሲ ማሊሢ ኬኤዜኔ፤ ዬይ ዒ ኬኤዜ ማሊፃ ዴራ ማዻ ሻኣካያ ማዔ ፒዜ ዎጎ ዎቢሲፆሮ ፆኦሲ ዴሮይዳ ሜቶ ዔኪ ዬዓንዳሢ ዛሎ ላቲ ኬኤዜኔ፤ ያዺ ማዔያታቴያ ሚኪያሴ ኬኤዜ ፆኦሲ ማሊፆይዳ ሴካ ቤርቲም ማዓንዳ ዎዛ ዓኣያ ማዔሢ ዔርዛ ሚርጌ ማላታ ዓኣያኬ።
ባሼና ኮሺ ዛጊንታኒ ኮይሳ ቤዛ ፆኦሲ ቢታንቶኮ ዴማ ዓኣ ዓጮም ቢያ ኮሺ ማዓንዳሢ (4፡1-4)፥ ዳውቴ ዜርፃፓ ዼኤፒ ካኣቲ ዔቃንዳሢና ዴሮም ኮሹሞ ዒንጋንዳሢ (5፡2-4)፥ ዬያጉዲ ሃሣ ዒስራዔኤሌይዳ ፆኦሲ ማሊፆ ኬኤዛዞንሢ ኬኤዜ ቃኣላ ቢያ ፔቴ ፓይዲዳ ኬኤዚንታ ሃይሴና ኩማያ ማዔሢ ዔርዛያኬ፤ ዬኖ ማሊፆ ዓርቄ ፓይዴላ ሂዚ ጋዓያኬ፦
«ዒዚ ኑጊዳፓ ኮዓሢ ኑኡኒ ፒዜ ማዔ ባኣዚ ማዻንዳጉዲ፥ ኮሺ ባኣዚ ማዺሢ ኔ ኮዓንዳጉዲ፥ ፆኦሲና ዎላ ጉቤ ዒናፓ ሼሌዔ ማዒሢና ሃንታንዳጉዲኬ።» (6፡8)
ማፃኣፔላ ዱማ ዱማ ዓርቄ ባኮ
ናንጊና ናንጋ ጎዳ ፔ ዴሮይዳ ሜቶ ዓጋንዳሢ (1፡1—2፡11)
ሃጊ ማዓንዳ ዎዛ (2፡12-13)
ፆኦሲ ፑርቶ ሱኡጎንታ ዒዛ ማሊፆ ኬኤዛኔ ጌይ ሉኡቃ ዓሶንታይዳ ፑርታ ባኣዚ ዓጋንዳሢ (3፡1-12)
ዒስራዔኤሌ ዓጮ ዓኮይዳ ዓኪ ጌኤሺ ማኣሪ (4፡1—5፡15)
ዒስራዔኤሌ ዓሶኮ ዻቢንታ ፔጋዼሢ (6፡1—7፡7)
ዴሮኮ ፆኦሲ ባንሢ ማዒፆ (7፡8-20)
1
1 ዪሁዳ ዓጮ ካኣታ፥ ዒዮዓታሜንታ ዓካኣዜንታ ሂዚቂያሴንታ ካኣታዼ ዎዶና ሞሬታ ካታሞ ዓሢ ፆኦሲ ማሊፆ ኬኤዛ ሚኪያሴም ሳማሪያና ዬሩሳላሜና ዛሎ ፆኦሲ ፔጋሲ ዻዌያና ዒ ኬኤዜ ቃኣላ ያዺ ጋዓያኬ፦ 1፡1 2ካኣቶ. ማ 15፡32—16፡20፤ 18፡1—20፡21፤ 2ፆኦሲ. ዓሃኬ 27፡1-7፤ 28፡1—32፡33።
ሳማሪያና ዬሩሳላሜናይዳ ዬኤኪንታንዳ ሜቶ ዬኤፒ
2 ዒንሢ ሃይ ሜሌ ዴራ ቢያ ዋይዙዋቴ!
ዒንሢ ሳዖይዳ ናንጋ ዓሳ ቢያ ሃያ ዒና ዔኪ ዋይዙዋቴ!
ናንጊና ናንጋ ጎዳ ፔኤኮ ዱማዼ ጌኤዦ ማኣራፓ
ዒንሢኮ ማዾ ዒፂ ዒንሢ ዑፃ ማርካዻንዳኔ።
3 ናንጊና ናንጋ ጎዳ ዒዛኮ ዱማዼ ናንጎ ማኣራፓ ሙካንዳኔ፤
ዒዚ ኬዲ ሳዖኮ ዼጌ ዼጌ ማዔ ቤዛ ሃንታንዳኔ።
4 ዬኖ ዎዶና ሾፒ ታሚ ዓልቂሳሢጉዲ
ዋኣሢያ ዼጌ ቤሲዳፓ ሊካ ዎታሢጉዲ
ዹካ ዒዛኮ ቶኮ ዴማ ዓልቃንዳኔ፤
ዛራኣ ሾኦኪንታንዳኔ።
5 ዬይ ቢያ ማዔሢ ያይቆኦቤ ዻቢንቶሮ፥ ዒስራዔኤሌ ማኣሮ ጎሞሮኬ፤ ዒስራዔኤሌ ዴሮ ዻቢሼሢ ዖናዳይ? ሳማሪያ ካታሞቱዋዓዳ? ዪሁዳ ዴራ ሜሌ ፆኦዞ ካኣሽኪ ጎሜ ማዻንዳጉዲ ማሄሢ ዖናዳይ? ዬሩሳላሜቱዋዓዳ? 6 ዬያሮ ናንጊና ናንጋ ጎዳ፦ «ሳማሪያ ታኣኒ ቦኦሊዳ ማኣሪ ዶዔያኮ ሹቺ ኩሊንቴያጉዲ ማሃንዳኔ፤ ዎይኔ ቱኪንታ ጎሺ ቤሲ ዒዛ ማዓንዳኔ፤ ዬያ ካታሞኮ ዶዔ ሹጮ ዶኦቺ ታኣኒ ኮላሲ ዓርሣንዳኔ፤ ዒዞኮ ዓይፆ ማሂ ማዦና ሹጮዋ ታኣኒ ዶይሳንዳኔ። 7 ዒዛ ካኣሽካ ሜሌ ፆኦዛ ቢያ ሜቃንዳኔ፤ ዒዞኮ ጌኤዦ ማኣሮም ዞኦዛ ኮኦማ ላኣላ ጪጊሴ ባካ ቢያ ታሚና ሚቺንታንዳኔ፤ ዒዛ ካኣሽካ ሜሌ ፆኦዞዋ ቢያ ታኣኒ ባይዛንዳኔ፤ ሳማሪያ ዬያ ዓርሲ ኮሾና ባኮ ቡኩሴሢ ዞኦዛ ኮኦሚፆ ዛሎ ጪጊሶያ ማሃኒኬ፤ ሃሢያ ዒዞኮ ሞርካ ዞኦዛ ኮኦሚ ዴንቆ ባኮ ዬያና ዴንቆያ ማሃንዳኔ።»
ዪሁዳይዳ ሄላንዳ ባይሲንታ
8 ዬካፓ ሚኪያሴ፦ «ዬያ ዛሎሮ ታኣኒ ‹ዎኦ! ዎኦ!› ጌይ ዬኤካንዳኔ፤ ታኣኒ ዖያያ ማዒፆ ዔርዛኒ ዑሢ ካሎ ማዒ ቶኪ ጉሪ ሃንታንዳኔ፤ ዓዳ ዉኡኮጉዲ ታኣኒ ዖኦላንዳኔ፤ ሃሣ ቱኡቴጉዲያ ዒላታንዳኔ። 9 ሳማሪያኮ ኪፃ ፓፃኒ ዳንዳዓያቱዋሴ፤ ዬይ ሜታ ዪሁዳ ሄሌኔ፤ ታኣኮ ዴራ ቡኪንታ ዬሩሳላሜ ጶኦኮዋ ኬስኪ ሄላያ ማዓንዳኔ» ጌዔኔ።
10 ጌቴ ጌይንታ ቤዛ ዓኣ ኑኡኮ ሞርኮም ኑና ሄሌ ሜቶ ኬኤዚፖቴ፤ ዒኢካ ፔቴታዖ ዬኤኪፖቴ፤ ቤትዖፔራይዳ ዓኣ ኑ ዒጊኖ ባኣካ ጋዓንቴ ሲላላ ቡምባሊ ቡምባሊ ዬኤኩዋቴ! 11 ዒንሢ ሻፒሬ ዴራ ዑሢ ካሎ፥ ዲዒንቴ ዓሲጉዲ ማዒ ቦርሲንቲ ዒኢና ዖኦኪ ዴንዱዋቴ፤ ፃዒናኣኔ ካታሞይዳ ናንጋ ዓሳ ካታማፓ ኬስካኒ ጫርቃዓኬ፤ ቤትዔፄኤሌ ፔኤሮ ዬኤፒ ቤሲ ማዔሢሮ ዒንሢም ፑኖ ካይዚ ዒዛ ማዓኒ ዳንዳዑዋሴ። 12 ማሮቴ ካታሞ ዴራ «ኮሺ ባኣዚ ኑኡም ሙካንዳኔ» ጌይ ሃጊ ማዓ ዎዛ ጌሣኔ። ናንጊና ናንጋ ጎዳ ጋዓንቴ ዬሩሳላሜይዳ ባይሲንታ ኬይሴኔ። 13 ዒንሢ፥ ላኪሼ ዓጮ ዓሳ ሳርጌሎ ዖይቶ ጎቻ ፓራሢ ጊኢጊሹዋቴ፤ ዒስራዔኤሌ ዓሶኮ ጎሜ ማዔ ዓሳ ዒንሢኬ፤ ዬሩሳላሜ ዻቢሼ ዓሳኣ ዒንሢኬ። 14 ዪሁዳ ዴሬዮቴ! ዒንሢ ዓካሪ ሞሬሼት ጋኣቴ ጌይንታ ካታሞም ዖሎ ሺሚሶ ዒንጎ ባኣዚ ዒንጋንዳኔ፤ ዓክዚቤ ዴራ ዒስራዔኤሌ ካኣቶ ጌሻንዳኔ።
15 ሜሪሳ ዴሬዮቴ! ዖሊ ዒንሢ ዓርቃንዳ ሞርኬ ዒንሢዳ ዔኪ ታኣኒ ዬዓንዳኔ፤ ዒስራዔኤሌ ዓሶኮ ቦንቺንታ ሱኡጋ ዓዱላሜይዳ ዓኣ ዴኖ ዔታ ዓኣሺንታንዳኔ። 16 ዒንሢ ዪሁዳ ዓጮ ዓሳ! ናኣታ ዒንሢኮ ዲዒንቲ ዔውታንዳሢሮ ሃያ፥ ዒንሢ ሾኤ ናኣቶ ዛሎ ዖዪፆ ዔርዛኒ ቶኦኮ ጉኡሊንቱዋቴ፤ ቶኦካ ዒንሢኮ ዓዳ ሃምፑሮ ቶኦኪጉዲ ቲልቤያ ማዖንጎ።