1 ሙሴ ማፃኣፓ ዼግ ጌዔ ዑኡሲና ዔያቶም ናባቢንታሢ ዴራ ዋይዛኣና፦ «ሞዓኣቤ ዓሶንታ ዓሞኦኔ ዓሶንታ ፆኦሲ ዴሮና ዎላ ናኣናና ሲኢሪንቶፓ» ጋዓ ቤሲ ሄሌኔ። 2 ዬይ ሂዚ ጌይ ዓይሢንቴሢ ዒስራዔኤሌ ዴራ ቤርታ ጊብፄፓ ኬስኬ ዎዶና ጎይፃ ዓኣንቴ ሞዓኣቤንታ ዓሞኦኔ ዓሶንታ ሙዖና ዋኣፆና ዔያቶ ላኣጌሢሮኬ፤ ዬያ ሌሊቱዋንቴ ዒስራዔኤሌ ዴሮ ዔያቶም ጋዳንቃንዳጉዲ ባኣላኣሜ ጎዖሢም ዔያታ ሚኢሼ ዒንጌኔ፤ ፆኦሲ ጋዓንቴ ጋዳሞ ዓንጆ ባንሢ ሺርሼኔ። ላሚ. ዎማ 23፡3-5፤ ፓይ. ማፃ 22፡1-6። 3 ዬያ ናባቢንቴሢ ዒስራዔኤሌ ዴራ ዒማና ዋይዛዖ ሜሌ ዴሮ ማዔ ዓሶ ዔያቶ ባኣካፓ ዱማሲ ኬሴኔ።

4 ጌኤዦ ማኣሮኮ ሜሆ ጌሦ ማኣሮ ሱኡጋሢ ማዔ፥ ቄኤሳሢ፥ ዔሊያሺቤ ዖዶሲ ዎዴ ፆቢያ ጎዖሢና ዎላ ፔቴ ማዒ ናንጌኔ፤ 5 ዬያሮ ፆኦሲም ዒንጎ ሃኣኮ ዒንጊፃ፥ ዑንጃ፥ ጌኤዦ ማኣሮም ዱማዼ ሜሃ፥ ሃኣካ፥ ዎይኖ ዑዣ፥ ሪሚቶ ዛይታፓኣ ዔኪ ዔኪ ሌዊ ዓሶም፤ ሃሣ ጌኤዦ ማኣሮይዳ ዓይኑሞ ዓይናዻ ዓሶንታ ካፖ ካፓ ዓሶንታም ዒንጊንታ ታጳሢፓ ፔቴ ዒንጊፆንታ ቄኤሶም ዒንጊንታ ዒንጊፆንታ ቢያ ጌሢንታንዳጉዲ ማሊንቲ ማዢንቴ ዼኤፖ ቆልዖ ፆቢያ ፔ ማኣሪ ማሂ ናንጋንዳጉዲ ዔሊያሺቤ ዓይሤኔ። 6 ዬይ ቢያ ማዺንቴ ዎዶና ታኣኒ ዬሩሳላሜይዳ ባኣሴ፤ ዓርፄክሲሴ ባብሎኔይዳ ካኣታዼንቴ ሃይሢታሚ ላምዓሳ ሌዖና ታኣኒ ባብሎኔ ማዒ ዓኣዼኔ፤ ዬካፓ ዻካ ዎዴም ካኣቲ ታኣኒ ዖኦጪ፥ 7 ጊንሣ ታ ዬሩሳላሜ ማዒ ሙኬኔ፤ ዒኢካ ታ ሄላዖ ዔሊያሺቤ ፆቢያም ጌኤዦ ማኣሮኮ ዲሮ ጋራ ፔቴ ናንጎ ቆልዓ ዒንጌያ ማዔሢ ዋይዜኔ፤ 8 ዬያሮ ዻጋና ታ ዔቂ ፆቢያኮ ዓኣ ባኮ ቢያ ቆልዖ ጋራፓ ኬሲ ኬሲ ዢቤኔ፤ 9 ቆልዖ ጋሮንሢ ዎጎ ጎይፆ ዳምቦና ጌኤሽካንዳጉዲ፤ ሃሣ ጌኤዦ ማኣሮኮ ዱማዼ ሜሆንታ ሃኣኮ ዒንጊፆንታ ዑንጆንታ ዒኢካ ማሂ ጌሢንታንዳጉዲ ታኣኒ ዓይሤኔ።

10 ዬያጉዲ ሃሣ ጌኤዦ ማኣሮይዳ ፆኦሲ ቦንቾም ዓይኑሞ ማዾ ማዻ ዓሶንታ ሃንጎ ሌዊ ዓሳ ዬሩሳላሜ ሃሺ ኬስኪ ፔኤኮ ፔኤኮ ጎዣ ጌሌሢ ታ ዔሬኔ፤ ዬይ ያዺ ማዔሢ ዴራ ፆኦሲም ዓይናዻ ዓሶና ሌዊ ዓሶናም ዔያቶ ዎይሣንዳ ጊዳ ባኣዚ ዒንጉዋኣሢሮኬ። 11 ጌኤዦ ማኣራ ዬያ ሄላንዳኣና ቄል ጌይ ዛጊንቴሢሮ ቢታንታ ዓኣ ዓሶ ታኣኒ ጎሬኔ፤ ሌዊ ዓሶንታ ፆኦሲ ቦንቾም ዓይኑሞ ዓይናዻ ዓሶዋ ጌኤዦ ማኣሪ ጊንሣ ማሂ ዔኪ ሙኪሢና ማዾ ጊንሣ ታ ዓይሤኔ፤ 12 ዬካፓ ዒስራዔኤሌ ዓሳ ቢያ ጊንሣ ሃኣኮንታ ዎይኖ ዑዦንታ ሪሚታፓ ኮሾ ዛይቶዋ ኮይሳሢጉዲ ታጳፓ ፔቴ ኬሲ ኬሲ ጌኤዦ ማኣሮኮ ሜሆ ጌሦ ማኣሪ ዔኪ ሙኪሢ ዓርቄኔ። 13 ሜሆ ጌሦ ማኣሮይዳ ቄኤሳሢ፥ ሼሌሚያንታ ዎጎ ኮሺ ዔራ ሳዶቄንታ ሌዊ ዓሢ ፔዳያንታ ታኣኒ ሱኡጌ ማሂ ዶኦሬኔ፤ ማታኒያኮ ናኣዚ ናዖ ማዔ ዛኩሬ ናኣዚ ሃናኔ ዔያቶ ማኣዲ ማዻሢኬ፤ ዬንሢ ዓሳ ዔያቶና ዎላ ማዾ ማዻ ላጎም ኮይሳ ባኮ ጊሽኪሢና ጉሙርቂንታያኬ።

14 ታ ፆኦዛሢዮ፥ ኔኤኮ ጌኤዦ ማኣሮና ዒኢካ ማዺንታ ባኮ ፒዚሳኒ ጌይ ዬንሢ ቢያ ጉሙርቂንታያ ማዒ ታ ማዼሢ ማሊጋፓ ኮሺ ባኣዚ ታኣም ማዼ።

15 ዬንሢ ኬላ ዪሁዳይዳ ናንጋ ዴራ ሃውሾ ኬሎና፦ ዎይኖ ዓኣፖ ጩኡጳያ፤ ሃኣኮ፥ ዎይኔ ዑሺ፥ ሶዮና ዎላ ዓኣ ዎይና፥ ቤሌሴ ዓኣፓ፤ ዬያጉዲ ሜሌ ባኣዚ ቢያ ፔኤኮ ሃሮና ጫኣናያ ታ ዴንቄኔ፤ ዬያ ባኮ ቢያ ሃውሾ ኬሎና ዬሩሳላሜ ዔኪ ሙኪ ሻንቹዋጉዲ ላቲ ታ ዔያቶም ኬኤዜኔ። 16 ዬያ ሌሊቱዋንቴ ዬሩሳላሜይዳ ናንጋ ፂሮሴ ዓሳ ሞሎንታ ሜሌ ዱማ ዱማ ኮርሞ ባኣዚ ሃውሾ ኬሎና ካታሜሎ ጌልዚ ጌልዚ ዪሁዳ ዴሮም ሻንቻኔ፤ 17 ታኣኒ ዒማና ዪሁዳኮ ሱኡጎ፦ «ዒንሢ ማዻ ፑርቶ ባኮ ቢያ ዛጉዋቴ! ዒንሢ ሃውሾ ኬሎ ዒኢሲ ዒኢሲኬ፤ 18 ኑ ፆኦዛሢ ኑኡና ካታሜሎናይዳ ሃያ ባይሲንቶ ዔኪ ሙኬሢ ዒንሢኮ ቤርታኣ ዓዶንሢ ዬያ ፑርቱሞ ማዼሢሮቱዋዓዳ? ሃሢያ ዒንሢ ሃውሾ ኬሎ ቦንቹዋኣሢሮ ፆኦሲኮ ዻጎ ዒንሢ ዒስራዔኤሌይዳ ዔቂሳንዳኔ» ጌይ ጎሬኔ።

19 ዬካፓ ሃውሾ ኬላ ቦንቺንቶ ዓርቃኒ ዑኪ ሳዓ ሃባርታዛ ካታሜሎ ጌሎ ዲሮ ካራ ዎዺንታንዳጉዲና ሃውሾ ኬላ ቦንቺንቲ ጋፑዋንቴ ካሮ ዔያታ ቡሉዋጉዲ ታ ዔያቶ ዓይሤኔ፤ ሃሣ ሃውሾ ኬሎና ሃንጋ ካታሜሎ ባንሢ ዓይጎ ባኣዚያ ኬዲንቲ ጌሉዋጉዲ ዛጎም ጌይ ታኣኮ ዓይሎፓ ፔቴ ፔቴዞንሢ ካታሞ ጌሎ ዲሮ ካራ ካራ ታ ዔቂሴኔ። 20 ዱማ ዱማ ኮርሞ ባኮ ሻንቻኒ ሺኢሻ ኮርሞ ኮርማ ዓሳ ፔቴ ኬሊና ላምዖ ኬሊናጉዴያ ሃውሾ ኬላ ዚሮኬ ጋዓዖ ዓርቦ ዒባኖ ካታሜሎ ጌሎ ዲሮ ዙላ ዎርቄኔ፤ 21 ዬያቶ ታኣኒ፦ «ሚኢሪ ጌላኒ ማሊ ዒንሢኮ ዬካ ዎርቂፃ ዒንሢ ማኣዳያቱዋሴ፤ ዬኖ ማዾ ዒንሢ ሃሹዋኣያ ማዔቴ ዒንሢዳ ዎልቄና ፔቴ ባኣዚ ታ ማዻንዳኔ» ጌይ ላቲ ኬኤዜኔ፤ ዬማፓ ዓርቃዖ ዔያታ ሃውሾ ኬሎና ሙኪፆ ሃሼኔ። 22 ሌዊ ዓሳ ዎጎ ጎይፆና ፔና ጌኤሺ ሃውሾ ኬላ ፆኦሲም ዱማዼያና ካፒንቴያ ማዔሢ ዔርዛኒ ኬኤሎ ዲሮ ካሮ ኮሺ ዛጋንዳጉዲ ታ ዔያቶ ዓይሤኔ።

ፆኦሲዮ! ሃያሮ ቢያ ኔ ታኣም ማላንዳጉዲና ኔኤኮ ዼኤፖ ናሹሞና ኔ ታና ዓውሳንዳጉዲ ታ ኔና ሺኢቃኔ።

23 ዬኖ ዎዶና ሃሣ ዓይሁዴ ዴሮይዳፓ ሚርጌሢ፦ ዓሽዶዴ፥ ዓሞኦኔንታ ሞዓኣቤ ዓጮ ዉዱሮ ናኣቶይዳፓ ዔኬሢ ዖኦጪ ታ ዔሬኔ፤ ኬሲ. ማፃ 34፡11-16፤ ላሚ. ዎማ 7፡1-5። 24 ዬያቶ ሄካሢኮ ናኣታ ዓሽዶዴ ሙኡቺና ሜሌ ፔቴ ፔቴ ሙኡቺያኣ ጌስታኔ፤ ፔኤኮ ዓይሁዶ ሙኡጮና ዔያታ ጌስታኒ ዳንዳዒባኣሴ። 25 ዬያ ዓሶ ታ ጎሬኔ፤ ጊንሣ ሃሣ ጋዳንቂ፥ ጳርቂያ ጳርቂ ቶኦኮ ጋፓኖዋ ታ ዔያቶኮ ቱጌኔ፤ ዬካፓ ዔያቶ ማዔቴያ ዔያቶኮ ናኣታ ሜሌ ዓሶና ዎሊ ዔኩዋጉዲ ፆኦሲ ሱንፆና ታ ዔያቶ ጫኣቂሴኔ። 26 ታ ዔያቶም ኬኤዛዖ፦ «ዒስራዔኤሌ ካኣቲ ሴሎሞኔታዖ ጎሜ ማዻንዳጉዲ ማሄዞንሢ ዬያጉዴ ሜሌ ዓጮ ዉዱሮ ናኣቶቱዋዓዳ? ካኣቲ ሴሎሞኔ ሜሌ ዓጮ ካኣታፓ ቢያ ባሼ ዓሲኬ። ፆኦሲ ዒዛ ናሽኪ ፔኤኮ ዴሮ ዒስራዔኤሌይዳ ካኣታሤኔ፤ ዒዚ ጋዓንቴ ሜሌ ዓጮ ላኣሎ ዛሎና ጎሜ ማዺ፥ ዬያጉዴ ጎሜይዳ ሎኦሜኔ። 2ሳሙ. 12፡24-25፤ 1ካኣቶ. ማ 11፡1-8። 27 ዓካሪ ኑኡኒያ ዒንሢ ማዼ ጎይፆ ሜሌ ዓጮ ዉዱሮ ናኣቶ ዔኪ ፆኦሲ ዓይሢፆኮ ዑሣ ዓኣዺ ዻቢንታኒ ኑም ኮይሳያዳ?» ጌዔኔ።

28 ቄኤሶ ቢያኮ ዑፃሢ፥ ዔሊያሺቤ ናኣቶፓ ፔቴሢ ዮያዳዔኬ፤ ጋዓንቴ ዒዛ ናኣቶይዳፓ ፔቴ ቤትሆሮኔ ካታማ ናንጋሢ ሴንባላፄኮ ዉዱሮ ናይ ዔኬኔ፤ ዬያሮ ዬሩሳላሜ ሃሺሲ ዮያዳዔ ታ ኬሲ ዳኬኔ። ኔሄ. 4፡1።

29 ታ ፆኦዛሢዮ! ሃይ ዴራ ቄኤሶንታ ቄኤሶ ዳምቦንታ ኔኤኒ ቄኤሶና ሌዊ ዓሶና ዎላ ጫኣቄ ጫኣቁሞ ዎማይዲ ዒኢሴቴያ ዛጌ!

30 ዬካፓ ዴራ ቢያ ሜሌ ዓጮ ዴሮኮ ዒኢቴ ማዻፓ ፔና ጌኤሻንዳጉዲ ታ ማሄኔ፤ ቄኤሶንታ ሌዊ ዓሶንታ ፔቴ ፔቴሢ ፔ ማዻ ማዾ ዔሪ ማዻንዳጉዲ ዳምቤ ቢያ ታ ጊኢጊሼኔ። 31 ሚቺ ዒንጎ ዒንጊፆ ሚቾንዶ ሃንፂሎ ጌይንቴ ዎዶና ቢያ ሺኢሾንዶ ጎይሢያ ታኣኒ ጊኢጊሼኔ፤ ጊንሣ ሃሣ ዴራ ቡኩሳ ሃኣኮይዳፓ ቢያ ሃኣኮፓኣ ማዖም ዓኣፒ ዓኣፓ ባኮይዳፓኣ ቤርታ ካፄሢ ዎማይዲ ዔያታ ዒንጋንዳቴያ ታ ጊኢጊሼኔ።

ታ ፆኦዛሢዮ! ዬያ ቢያ ማሌ፤ ኔ ሚጪንቲፆና ኮሺ ባኣዚያ ታኣም ማዼ።