1 ዒስራዔኤሌ ዓሳ ዴንዴ ጎይሣ ዮርዳኖሴ ዎሮኮ ዓባ ኬስካ ባንፆይዳ፥ ዒያርኮኮ ሆታ ዓኣ፥ ሞዓኣቤ ቦኦሎይዳ ዱንኪ ዴዔኔ።

2 ዒማና ሞዓኣቤ ዓጮ ካኣቲ፥ ባኣላኣቄ፦ ዒስራዔኤሌ ዓሳ ዓሞራ ዓሶይዳ ማዼ ፑርቶ ባኮ ዛጌኔ፤ ባኣላኣቄኮ ዓዴ ፂፖሬ ጌይንታያኬ። 3 ዒስራዔኤሌ ዓሶኮ ሚርጉሞ ዋይዛዖ ዬያ ካኣታሢንታ ዴሮንታ ዒጊጪ ዎኦቶንዶ ጎይሢ ባይዜኔ። 4 ዬያሮ ሞዓኣቤ ዓሳ ሚዲያሜ ዓሶኮ ዓጮ ጪሞም፦ «ሃይ ዒንሢ ዛጋ ዴሮኮ ሚርጉማ፥ ጌማይ ሄንቃ ቤዞይዳ ዓኣ ማኣቶ ቢያ ጋፒሲ ሙዓሢጉዲ ኑ ኮይላ ዓኣ ባኮ ቢያ ፒፂ ባይዛንዳያኬ» ጌዔኔ። ዒማና ካኣቲ ባኣላኣቄ፦ 5 ዓማው ዓጮይዳ፥ ዔፕራፂሴ ዎሮ ኮይሎይዳ፥ ፔቶሬ ካታማ ናንጋ ቢዖሬ ናኣዚ ባኣላኣሜ ዔኤላንዳጉዲ ኪኢታ ዓሲ ዳኬኔ፤ ዔያታ፦ «ጊብፄ ዓጫፓ ሙኬ ዴሬ ዓጮ ቢያ ኩሚ ዴዔኔ፤ ዔያታ ኑ ዓጮ ኮይላኬ ዱንኪ ዴዔሢ፤ ፓይ. ማፃ 31፡8፤ 2ጴፂ. 2፡15-16፤ ዪሁ. 11። 6 ዬያ ዴሮኮ ፓይዳ ኑ ዓሶይዳፓ ሚርጌና ባሻያኬ፤ ዬያሮ ኑ ኮይላ ሙኪ ዔያቶ ታኣም ጋዳንቄ፤ ዬያይዲ ጎዖንቴ ዔያቶ ኑ ባሺ ኑ ዓጫፓ ኬሳንዳያናንዳኔ፤ ኔኤኒ ዓንጃሢ ዓንጂንቴያ፥ ኔኤኒ ጋዳንቄሢ ጋዳንቂንቴያ ማዓሢ ታ ዔራኔ» ጋዓ ኪኢታ ዔኪ ዓኣዼኔ።

7 ዬያሮ ሞዓኣቤ ዓሶና ሚዲያሜ ዓሶናኮ ጪማ ጋዳንቆሢሮ ጪጎ ሚኢሾ ዔኪ፥ ባኣላኣሜ ኮይላ ዓኣዺ ባኣላኣቄ ጌዔ ባኮ ኬኤዛዛ፦ 8 ባኣላኣሜ ዔያቶም፦ «ሃይካ ዎርቁዋቴ፤ ናንጊና ናንጋ ጎዳ ታኣም ጋዓ ባኮ ዚሮ ጉቴ ታ ዒንሢም ኬኤዛንዳኔ» ጌዔኔ፤ ዬያሮ ሞዓኣቤ ዓሶኮ ጪማ ባኣላኣሜ ማኣራ ዎርቄኔ።

9 ፆኦሲ ባኣላኣሜ ኮይላ ሙካዖ፦ «ሃይካ ኔ ኮራ ዓኣ ዓሳ ዓይጎ ዓሲዳይ?» ጌይ ዖኦጫዛ፥ 10 ዒዚ ሂዚ ጌይ ማሄኔ፦ «ሞዓኣቤ ካኣቲ ባኣላኣቄ ታ ኮይላ ዳኬ ዓሲኬ፤ 11 ዔያታ፦ ‹ጊብፄ ዓጫፓ ሙኬ ዴሬ ዓጮ ባይዚ ዴዔኔ፤ ኔኤኒ ሙኪ ዔያቶ ጋዳንቄያ ማዔቴ ጎዖንቴ ዔያቶ ታኣኒ ዖሊ ባሻንዳያናንዳኔ› » ጋዓ ኪኢታ ዔኪ ሙኬኔ።

12 ፆኦሲ ባኣላኣሜም፦ «ዬንሢ ዓሶና ዎላ ዓኣዺፖ፤ ታኣኒ ዔያቶ ዓንጄያ ማዔሢሮ ዒስራዔኤሌ ዴሮ ጋዳንቂፖ» ጌዔኔ።

13 ባኣላኣሜ ዚሮ ጉቴ ሳዓ ካራዛ ዔቃዖ ባኣላኣቄ ኮይላፓ ሙኬ ዓሶም፦ «ዓካሪ፥ ዒንሢ ዒንሢ ማኣሪ ማዒ ዓኣዹዋቴ፤ ታኣኒ ዒንሢና ዎላ ዴንዱዋጉዲ ናንጊና ናንጋ ጎዳ ታና ላኣጌኔ» ጌዔኔ። 14 ዬያሮ ሞዓኣቤ ዓጫፓ ሙኬ ቢታንታ ዓኣ ዓሳ ባኣላኣቄ ኮይላ ማዒ ዓኣዻዖ ባኣላኣሜ ዔያቶና ዎላ ሙኮ ዒፄሢ ኬኤዜኔ።

15 ዬካፓ ሃሣ ባኣላኣቄ፦ ቤርታኣ ዓሶፓ ባሼ ቦንቺንታያና ዺቢ ማዔ ጪሚ ባኣላኣሜ ኮይላ ዳኬኔ፤ 16 ዔያታ ባኣላኣሜ ኮይላ ዓኣዺ ባኣላኣቄ ጌዔ ባኮ፦ «ታ ኮይላ ሙኮ ኔና ላኣጋ ባኣዚ ባኣያ ናንጎም! 17 ኔ ማዼ ባኮኮ ሚርጌ ባኣዚ ታ ጪጋንዳኔ፤ ኔ ዖኦጬ ባኣዚ ቢያ ታ ማዻንዳኔ፤ ዬያሮ ሃዳራ ሙኪ ሃያ ዴሮ ታኣም ጋዳንቄ ጌዔኔ» ጌይ ኬኤዜኔ።

18 ባኣላኣሜ ጋዓንቴ ዬኖ ኪኢቶ ዓሶም፦ «ባኣላኣቄ ዒዛኮ ካኣቱሞ ማኣሮይዳ ዓኣ ቢሮንታ ዎርቆንታ ቢያ ታኣም ዒንጌቴያ፥ ሃሣ ዻካ ባኣዚና ማዖም ዼኤፒ ባኣዚ ዛላና ታ ፆኦዛሢ ዓይሢፆኮ ዑሣ ዓኣዻኒ ታ ዳንዳዑዋሴ፤ 19 ፆኦሲ ታኣም ኬኤዛ፥ ሜሌ ባኣዚ ዓኣቴ ዒዛይዳፓ ታ ዔራንዳጉዲ ሂንዳ ዒንሢያ ቤርታኣ ዓሶጉዲ ዒባኒ ሃይካ ዎርቁዋቴ» ጌዔኔ።

20 ዬኖ ዋንቴሎ ፆኦሲ ባኣላኣሜ ኮይላ ሙኪ፦ «ሃንሢ ዓሶንሢ ኔ ኮይላ ሙኬሢ ኔና ዔኪ ዓኣዻኒ ማዔቴ ዔያቶና ዎላ ዓኣዼ፤ ጋዓንቴ ታ ኔኤም ኬኤዛ ባኮማ ሌሊ ማዼ» ጌዔኔ። 21 ዬያሮ ዚሮ ጉቴሎ ባኣላኣሜ ዔቃዖ ፔኤኮ ሃሬሎ ኮኦሪ፥ ሞዓኣቤፓ ሙኬ ዼኤፖ ዓሶና ዎላ ዓኣዼኔ።

22 ባኣላኣሜ ዓኣዼሢሮ ፆኦሲ ዻጋዼኔ፤ ዒማና ባኣላኣሜ ፔኤኮ ላምዖ ካራሚ ዔኪ ሃሬሎዋ ቶጊ ዓኣዻንቴ ናንጊና ናንጋ ጎዳኮ ኪኢታንቻ ዒዛኮ ቤርታ ዔቂ ጎይፆ ባይዜኔ፤ 23 ኪኢታንቻሢ ጬንቻ ዓፓሮ ቱኪ ጎይፃ ዔቄሢ ሃሬላ ዴንቃዖ ጎይፆ ሃሺ ጎሺ ጋርሲ ጌሌኔ፤ ጋዓንቴ ባኣላኣሜ ሃሬሎ ጳርቂ ጎይፆ ጊንሣ ኬሴኔ፤ 24 ዬካፓ ሃሣ ላምዖ ዎይኔ ጎሺኮ ባኣኪና ኩንዒንቲ ዓኣዾ ጎይሢና ዒ ዴንዳንቴ ላምዖ ዛሎይዳ ኬልቂንቴ ሹቺ ዓኣ ቤሲዳ ኪኢታንቻሢ ሙኪ ቤርታ ዔቄኔ። 25 ዒማና ሃሣ ሃሬላ ኪኢታንቻሢ ዴንቃዖ፦ ዬያ ሹጮ ባንሢ ዶጪ፥ ባኣላኣሜኮ ቶኮ ሹጮና ዎላ ዓይሤሢሮ ባኣላኣሜ ሃሬሎ ጳርቂሢ ዓርቄኔ፤ 26 ሃሣ ጊንሣ ኪኢታንቻሢ ቤርታ ዴንዲ ሻውሎ ዛሎና ማዖም ሚዛቆ ዛሎና ዓኣዺንታኒ ዳንዳዑዋ፥ ኩንዔ ካራይዳ ዔቄኔ። 27 ዒዞ ጎይፆ ሃሣ ሃሬላ ኪኢታንቻሢ ዴንቃዖ፦ ሳዓ ላሃዛ፥ ባኣላኣሜ ሚርጌና ዻጋዺ ሃሬሎ ኮኦሎና ጳዺ ዓርቄኔ። 28 ዒማና ፆኦሲ ሃሬላ ጌስታንዳ ዔራቶ ዒንጋዛ ዒዛ ባኣላኣሜ ኮራ፦ «ታ ኔኤኮ ዓይጎ ዎዴይ? ሃይሢ ማይንቲ ኔ ታና ጳርቄሢ ዓይጎሮዳይ?» ጌዔኔ።

29 ባኣላኣሜ ዒዞ ኮይላ፦ «ሚርጌ ኔ ታኣና ዓማሌሢሮሾ! ዎንዴ ጬንቻ ዓፓሮ ታ ኮይላ ዓኣቴ ታ ኔና ዎዎዻንዳኔ!» ጌዔኔ። 30 ሃሬላ ጊንሣ ዒዛም፦ «ኔኤኒ ቢያ ዎዴ ታና ቶጊ ሃንታ፥ ታኣኒ፥ ኔ ሃሬሎቱዋዓዳ? ሂዳዖ፤ ሃያኮ ቤርታ ሃናኣሲጉዲ ታ ሂዲ ቤቂያ?» ጋዓዛ፥ ባኣላኣሜ፦ «ፔቴታዖ ኔ ሂዲ ቤቂባኣሴ» ጌዔኔ።

31 ዒማና ናንጊና ናንጋ ጎዳ ጬንቾ ዓርቂ ዔቂ ዓኣ ኪኢታንቻሢ ዴንቃንዳጉዲ ባኣላኣሜ ዻዋዛ፥ ዒዚ ባሊቶና ሳዓ ሎኦሚ ላሄኔ፤ 32 ኪኢታንቻሢ ዒዛም፦ «ሃሬሎ ኔ ሃይሢማይንቲ ኮኦሎና ጳርቄሢ ዓይጎሮዳይ? ታኣኒ ሙኪ ጎይፆ ኔኤኮ ባይዜሢ ባይሲንቶ ጎይፆ ኔ ዓኣዹዋጉዲ ላኣጋኒ ጌይኬ፤ 33 ኔኤኮ ሃሬላ ጋዓንቴ ታና ዴንቄሢሮ ሃይሢ ማይንቲ ታ ቤርታፓ ሺኢኬኔ፤ ሃሬላ ዎንዴ ዬያይዲባኣያታቴ ኔና ታ ዎዺ፥ ዒዞ ሃሼያናንዳንቴኬ» ጌዔኔ።

34 ባኣላኣሜ ማሃዖ፦ «ጎኔኬ፥ ጎሜ ታ ማዼኔ፤ ኔኤኒ ታና ላኣጋኒ ጎይፃ ዔቄሢ ታ ዔሪባኣሴ፤ ሃሢያ ታኣኮ ዒኢካ ዓኣዺፃ ዻቢንቲ ማሊ ኔኤም ጴዼቴ ታ ማኣሪ ማዒ ታ ዴንዳንዳኔ» ጌዔኔ።

35 ኪኢታንቻሢ ጋዓንቴ፦ «ሃንሢ ዓሶንሢና ዓኣዾ ኔኤሮ ዓኣዼ፤ ጋዓንቴ ታ ኔኤም ኬኤዛማ ሌሊ ኬኤዜ» ጌዔኔ፤ ባኣላኣቄ ዳኬ፥ ቢታንታ ዓኣ ዓሶና ዎላ ባኣላኣሜ ዬያይዲ ዓኣዼኔ።

36 ባኣላኣሜ ሙኬሢሮ ባኣላኣቄ ዋይዛዖ ሾቺ ዒዛ ዔካኒ ሞዓኣቤ ዓጮ ዛጳ፥ ዓርኖኦኔ ዎሮ ዓጫ ዓኣ፥ ዓኣሬ ካታሞ ዴንዴኔ። 37 ባኣላኣቄ ባኣላኣሜ ኮራ፦ «ቤርታ ኪኢቶ ዓሶ ታ ኔኤም ዳኬያና ኔ ዓይጋ ዓቴይ? ኔ ማዼ ባኮኮ ጊዳ ሚኢሼ ታ ጪጊንዱዋጉዲ ኔኤም ጌዒያ?» ጌይ ዖኦጫዛ፥ 38 ባኣላኣሜ ማሃዖ፦ «ሂዴያ ማዔቴያ ታ ማይ ሙኪባይ? ጋዓንቴ ታኣኮ ዓይጎ ዎልቄ ዓኣይ? ታ ጌስታኒ ዳንዳዓሢ ፆኦሲ ታኣም ኬኤዜማ ሌሊኬ» ጌዔኔ። 39 ዬካፓ ባኣላኣሜ ባኣላኣቄና ዎላ ሁፆቴ ጌይንታ ካታሞ ዓኣዼኔ። 40 ዒኢካ ባኣላኣቄ፦ ባይንታ ማራይንታ ፆኦሲም ሹኪሲ ዓሽኮይዳፓ ዻካ ዔኪ ዒዛና ዎላ ዓኣ ቢታንታ ዓኣ ዓሶና ባኣላኣሜናም ዒንጌኔ።

41 ዚሮ ጉቴሎ ባኣላኣቄ ባኣላኣሜ ዔኪ ዒስራዔኤሌ ዓሶኮ ሄካሢ ዛጋኒ ዳንዳዓ፥ ባሞትባዓኣሌ ጌይንታ ቤሲ ኬስኬኔ።