1 ዒስራዔኤሌ ዓሳ ፔኤኮ ፃጶና ፃጶና ፓቂንቲ ሙሴና ዓኣሮኔና ዔያቶ ዔኪ ዓኣዼም ጊብፄፓ ኬስካዖ ዴንዲ ዴንዲ ዴዔ ቤዞ ዔርዛ ሃይሳ ያዺኬ፦ 2 ዒማና ዔያታ ዱንኪ ዱንኪ ዴዔ ቤዞኮ ሱንፆ ናንጊና ናንጋ ጎዳ ዓይሤ ጎይፆ ሙሴ ፃኣፔኔ።

3 ዒስራዔኤሌ ዴራ ጊብፄ ዓጫፓ ኬስኬሢ ሌዖኮ ቤርታሳ ዓጊና ፄኤሬንቴ ታጶ ዶንጋሳ ኬሎና ጌይፃ ዑሣ ዓኣዺፆ ቦንቾ ኬሎኮ ጉቶኬ፤ ጊብፄ ዓሳ ቢያ ሆታ ዔያቶ ዛጋንቴ ናንጊና ናንጋ ጎዳ ዔያቶ ካፔም ራምሴ ካታማፓ ዔያታ ኬስኬኔ፤ 4 ጊብፄ ዓሳ ዒማና ናንጊና ናንጋ ጎዳ ዔያቶኮ ዎዼ፥ ቶይዶ ናኣቶ ዱኡካኔ፤ ናንጊና ናንጋ ጎዳ ዬያይዲ ዎጊ ጊብፄ ዓጫ ካኣሽኪንታ ፆኦዛ ፓሡዋያ ማዔሢ ዔርዜኔ።

5 ዒስራዔኤሌ ዓሳ ራምሴይዳፓ ዔቂ ዴንዲ ሱኮቴይዳ ዱንኪ ዴዔኔ፤ 6 ዬካፓ ዔቂ ዓሲ ናንጉዋ ዳውሎኮ ጋፒንፆይዳ ዓኣ ዔታሜ ጎዖ ቤዛ ዱንኪ ዴዔኔ፤ 7 ጊንሣ ሃሣ ባዓልፃፖኔኮ ዓባ ኬስካ ባንፃ ዓኣ ፒሃሂሮቴ ባንሢ ማዒ ሚግዶሌ ዓጮኮ ሆታ ዱንኪ ዴዔኔ፤ 8 ዬኖ ቤዛፓ ዔቂ ዞቄ ባዞና ፒንቃዖ ሹሬ ቦኦሎ ሙኬኔ፤ ዬኖይዳፓ ሃይሦ ኬሊ ሃንታዖ ማኣራ ጎዖ ቤዛ ዱንኪ ዴዔኔ፤ 9 ማኣራይዳፓ ዔቂ ታጶ ላምዖ ዋኣሢ ዓልቃ ቤሲና ላንካይታሚ ቴምሬ *ቴምሬ ዬና ሚፄላ ሜኤፄ ማላያታዖ ዓኣፓ ሙሙይንታ ሚሢኬ። ሚሢ ዓኣ፥ ዔሊሜ ዴንዲ ዒኢካ ዱንኪ ዴዔኔ።

10 ዬኖ ቤዛፓ ሃሣ ዔቂ ዞቄ ባዞ ኮይላ ዱንኪ ዴዔኔ፤ 11 ዞቄ ባዞ ኮይላፓ ዔቂ ዓሲ ናንጉዋ ሲና ዳውሎይዳ፤ 12 ሲና ቦኦላፓ ዔቃዖ ዳፒቃ ጎዖ ቤዛ፤ 13 ዳፒቃፓ ጊንሣ ዔቂ ዓሉሼይዳ፤ 14 ሃሣ ዓሉሼይዳፓ ዔቃዖ ዑሽኮ ዋኣሢባኣ፥ ሬፕዲሜይዳ ዱንኪ ዴዔኔ።

15-37 ሬፕዲሜይዳፓ ዔቂ ዴንዲ ሆኦሬ ዹኮ ሄላንዳኣና ዔያታ ዱንኪ ዴዔ ቤዛ ሃካፓ ሊካ ፓይዲንታ ቤዞኬ፦ ዓሲ ናንጉዋ ሲና ዳውላ፥ ቂብሮት ሃትዓዋ †ቂብሮት ሃትዓዋ ዬና ቤዛ «ዓፃዺሢ ዱኡፒ» ጌይንቴ ቤዞኬ። ፥ ሃፄሮቴ፥ ሪቲማ፥ ሪሞንፔሬዜ፥ ሊቢና፥ ሪሳ፥ ቄሄላታ፥ ሼፔሬ ዹኮ ኮይላ፥ ሃራዳ፥ ማቅህሎቴ፥ ታሃቴ፥ ታና ሚትቃ፥ ሃሾሞና፥ ሞሴሮቴ፥ ቤኔያዕቃ፥ ሆርሃጊድጋኣዴ፥ ዮፅባታ፥ ዓብሪና፥ ዔፂዮንጋብሬ፥ ፂኔ ቦኦሎይዳ፤ ጌይፃ፦ ቃዴሴይዳ፥ ዔዶኦሜ ዓጮኮ ዛጳ ዓኣ ሆኦሬ ዹኮ ኮይላ ዱንኪ ዴዔኔ።

38-39 ቄኤሳሢ ዓኣሮኔ ናንጊና ናንጋ ጎዳ ዓይሤም ሆኦሬ ዹኮ ኬስኪ፥ ዒስራዔኤሌ ዓሳ ጊብፄ ዓጫፓ ኬስኬንቴ ዖይዲታማሳ ሌዖኮ ዶንጋሳ ዓጊና ፄኤሮ ፄኤሬ ዓቦና ሌዓ ዒዛኮ ፄኤታና ላማታሚ ሃይሦ ማዔንቴ ዒኢካ ሃይቄኔ። ፓይ. ማፃ 20፡22-28፤ ላሚ. ዎማ 10፡6፤ 32፡50።

40 ዒማና ካኣናኔ ዓጫ፥ ዾኦሎ ዛሊና ዓኣ ዓራዴ ዓጮይዳ ናንጋ፥ ካኣናኔ ዓሲ ማዔያታዖ ዓራዴ ዓጮኮ ካኣቲስኬይ ዒስራዔኤሌ ዓሳ ሙኬሢ ዋይዜኔ። ፓይ. ማፃ 21፡1።

41-49 ሆኦሬ ዹኮ ኮይላፓ ዴንዲ ሞዓኣቤ ቦኦሎ ሄላንዳኣና ዒስራዔኤሌ ዓሳ ዱንኪ ዴዔ ቤዛ ሃካፓ ሊካ ፓይዲንታ ቤዞኬ፦ ፄልሞና፥ ፑኖኔ፥ ዖቦቴ፥ ሞዓኣቤ ዓጮ ዛጳ ዓኣ ዓባሪሜ፥ ዲቦንጋኣዴ፥ ዓልሞንዲብላታይሜ፥ ናባው ዹኮኮ ሆታ ዓኣ ዓብሪሜ ዹኮ ኮይላ፥ ዒያርኮኮ ሆታ ዓኣ ሞዓኣቤ ቦኦሎይዳ፤ ጌይፃ፦ ሻሮ ካሮ ጌይንታ ቤዞፓ ዴንዲ ሻሮ ዶኦጮ ጌይንታ ቤዞ ሄላንዳኣና ዱንኪ ዴዔኔ።

50 ዒያርኮኮ ሆታ፥ ዮርዳኖሴ ዎሮ ሱካ፥ ሞዓኣቤ ቦኦሎይዳ ዔያታ ዓኣንቴ ዒስራዔኤሌ ዴሮም ኬኤዛንዳጉዲ ናንጊና ናንጋ ጎዳ ሙሴም ዒንጌ ዳምባ ሃካፓ ሊካ ኬኤዚንታሢኬ፦ 51 «ዮርዳኖሴና ፒንቂ ካኣናኔ ዓጮ ዒንሢ ጌሌ ዎዶና፥ 52 ዬኖ ዓጮይዳ ናንጋ ዓሶ ቢያ ዒንሢ ቤርታፓ ዳውሲ ኬሱዋቴ፤ ዔያቶኮ ሹጮና ዓንጎናይዳፓ ኮሺንቴ ካኣሽኮ ፆኦዞ ሜንሢ ባይዙዋቴ፤ ጌሜሮይዳ ዔያቶኮ ማዢንቲ ማዢንቲ ዓኣ ዚጎ ቤዞዋ ሻሂ ባይዙዋቴ። 53 ታ ዒንሢም ዒዞ ዒንጌያታሢሮ ዓጬሎ ዔኪ ዒዞይዳ ናንጉዋቴ። 54 ሳዔሎዋ ዱማ ዱማ ፃጶና ቶኦኮና ቶኦኮና ማዒጋፓ ዒፃ ዓጊ ጊሽቲ ዔኩዋቴ፤ ዓሳ ዺቤ ቶኦኮም ዳልጊ ሳዓ፥ ዓሳ ዻካ ማዔ ቶኦኮም ዻካ ሳዓ ዒንጊንቶንጎ። ፔቴ ፔቴሢም ዒፃሢ ኬዴ ቤዛ ዔያቶሮ ማዓንዳኔ፤ ዔያታ ፔኤኮ ዓዶንሢ ሱንፆና ሱንፆና ፔ ሳዓ ማሂ ዔኮንጎ። ፓይ. ማፃ 26፡54-56። 55 ዓጬሎይዳ ናንጋ ዓሶ ቢያ ዒንሢ ዳኪ ባይዚባኣያታቴ ጋዓንቴ ዓኣፖይዳ ዒንሢኮ ቡኡራጉዲ፥ ጎኦቦይዳ ዒንሢኮ ጫርጋ ዓንጊሢጉዲ ማዒ ዒንሢ ሜታሳንዳኔ፤ ዒንሢ ዴዔ ዓጮይዳ ቢያ ኬሊ ዖልዚና ዔያታ ዒንሢ ሜታሳንዳኔ። 56 ዒንሢ ዔያቶ ዳኪ ባይዚባኣያታቴ ዔያቶ ባይዛኒ ማሌ ጎይፆ ዒንሢ ታ ባይዛንዳኔ» ጋዓያኬ።