ዓብዲዮ
ዓይፆ ካሮ
ሃና ማፃኣፔላ ፃኣፒንቲ ዓኣያ ማዒ ጴዼሢ ኪሪስቶሴ ሾይንታንዳሢኮ ቤርታ ዶንጎ ፄኤታና ሳሊታሚ ላሆ ማዓ ሌዖይዳ፥ ዬሩሳላሜ ካታማ ሻሂንቲ ዶዔሢኮ ጊንፃ ዔርቲባኣ ዎዴይዳኬ። ዬኖ ዎዶና ዾኦሎ ዛሎኮ ዓባ ኬስካ ባንፆይዳ ዓኣ ዪሁዳ ካታሞኮ ሚርጌ ዎዴ ሞርኬ ማዒ ናንጌ፥ ዔዶኦሜ ዓጮ ዓሳ ዬሩሳላሜ ሻሂንቴሢሮ ዎዛዺ፤ ሃሣ ባብሎኔ ዓጮ ዓሳ ዬሩሳላሜ ሙኪ ዖላኣና ካታሞ ዎላ ቡሬኔ። ዒማና ዔዶኦሜ ዓጮ ዓሳ ሜሌ ዒስራዔኤሌ ዓሶኮ ሞርኮ ማዔ ዓሶና ዎላ ሜቶይዳ ኬዳንዳሢና ዖሎናኣ ባሺንታንዳያ ማዒፃ ፆኦሲ ማሊሢ ማዔሢ ዓብዲዮ ኬኤዜኔ።
ማፃኣፔላ ዱማ ዱማ ዓርቄ ባኮ
ዔዶኦሜ ዓጮም ኬኤዚንቴ ባኮና ዔያቶ ሄላንዳ ሜቶ (1-7)
ዔዶኦሜ ዓጮ ዓሶኮ ሚጪንቱዋያ ማዒፆ (8-14)
ዒስራዔኤሌ ዓሳ ዖሎና ባሼሢ (15-21)
1
ዔዶኦሜ ዓጮ ዓሶ ሄላንዳ ሜቶ
1 ዓብዲዮም ፆኦሲ ፔጋሲ ዻዌ ባካ ያዺኬ። ናንጊና ናንጋ ጎዳ ማዔ ፆኦዛሢ ዔዶኦሜ ዓጮም ኬኤዛንዳጉዲ ዓብዲዮ ዳኬኔ፤ ኑኡኒ ዋይዜ ፆኦሲ ኪኢታ፦ «ሜሌ ዴራ ሙኪ ዔዶኦሜ ዓጮ ዖላንዳጉዲ ታኣኒ፥ ናንጊና ናንጋ ጎዳ ኪኢታ ዳኬኔ!» ጋዓያኬ።
2 ናንጊና ናንጋ ጎዳ ዔዶኦሜ ዓጮም ሂዚ ጋዓኔ፦
«ዓካሪ ታ ኔና ሜሌ ዴሮ ባኣካ ዎልቄ ባኣያ ማሃንዳኔ፤
ሚርጌና ኔኤኒ ቦሂንቴያ ማዓንዳኔ።
3 ኔኤኮ ዖቶርቃ ዒና ኔና ጌሼኔ፤
ኔኤኒ፦ ‹ዶዲ ላሌ ሹቺና ዙሎ ዲርቆና ካታማይዳ ታ ናንጋኔ፤
ታኣኒ ዎርቃ ማኣራ ዼጌ ዹካ ዑስካ ማዢንቴያኬ፤
ታኣኒ ዓኣ ቤዛፓ ዖ ታና ኬይሳኒ ዳንዳዓይ!› ጌይ ሄርሺንታኔ።
4 ጋዓንቴ ኔኤኒ ዓዳ ኮኦኬጉዲ ባራኔቴያ
ዴንዲ ኔኤኒ ዦኦጎ ባኣካ ናንጌቴያ
ዬካፓ ታ ኔና ኬይሳንዳኔ። ዬያ ጌዔሢ ታና፥ ናንጊና ናንጋ ጎዳኬ።»
5 «ዉሲ፤ ጊንሣ ሃሣ ቡራ ዓሲያ ዹሚና ሙኬቴ
ፔኤም ጊዳማጉዴያ ሌሊ ዔካኔ፤
ዎይኖ ዓኣፖ ቲቂ ቡኩሳ ዓሳታዖ ቃኣሉሚ ዓይሳኔ፤
ኔኤኮ ሞርካ ጋዓንቴ ኔና ጋፒሲ ባይዛንዳኔ።
6 ዒንሢ ዔኤሳዎ ዜርፃ፦ ማኣራ ዒንሢኮ ቡሪንቴኔ፤
ቆላኣ ዒንሢኮ ጉቤ ዔውቴኔ።
7 ኔኤና ዎላ ዖላኒ ጫኣቄ ላጋ ቢያ ኔና ጌሼኔ፤
ኔ ዓጫፓ ኬሲ ኔና ዔያታ ዳውሴኔ፤
ኔኤኮ ላጎ ማዔ ዓጫ ኔጊዳ ሞርኬ ማዒ ዔቄኔ፤
ኔኤና ዎላ ካሦ ሙዔ ዓሳ ኔኤም ፒሬኔ፤
ዬያ ቢያ ዔያታ ማዻሢ ጋዓንቴ ኔ ዔሪባኣሴ።»
8 «ዬኖ ዎዶና ዔዶኦሜ ዓጮይዳ ዔሮ ዓሶ፤
ዔኤሳዎ ዓጮ ዹኮይዳ ናንጋ ዓሶኮ ዔራቶ ታኣኒ ባይዛንዳኔ።
9 ዔዶኦሜ ዓጮይዳ ናንጋ ዓሳ ቢያ ዎዺንታንዳኔ፤
ቴሜና ዓጮይዳ ዖሎና ዔርቴ ዓሳ ዒጊቹሞና ጎጋይቃንዳኔ።»
10 «ኔ ጌርሲ ያይቆኦቤ ዜርፆ ሚጪንቱዋዖ ኔኤኒ ዎዼሢሮ
ኔኤኒ ዻውሲንታንዳኔ፤ ቤሲባኣያ ማዒ ኔ ባይቃንዳኔ።
11 ሞርካ ዔያቶኮ ካሮ ሜንሣኣና
ዔያቶኮ ዓኣ ቆሎ ቢያ ቡራኣና
ኔኤኒ ኮራ ዔቂ ዛጌኔ፤
ዬሩሳላሜ ዓጮ ጊሽቲ ዔኬ ዓሶፓ ኔ ዱማቱዋሴ።
12 ዪሁዳ ዓጮይዳ ናንጋ ኔ ጌርሲንሢዳ ሄሌ ሜታሢና
ኔኤኒ ዎዛዻንዳያ ኮይሱዋያታንቴኬ፤
ዔያታ ባይቃ ኬሎና ኔኤኒ ዒላሻንዳያና
ዔያታ ካራ ባይቂ ዋኣያ ኬሎና ዔያቶይዳ ዖቶርቂ ጌስቲፃ ኔኤም ኮይሱዋያታንቴኬ።
13 ዔያታ ሜታዻ ኬሎና ታ ዴሮኮ ካታሞ ጌሊ
ካራ ዔያቶኮ ባይቄም ዪሁዳ ዴራ ኩዳ ኬሎና ኔኤኒ ዎዛዻኒና
ዔያቶኮ ዓኣ ባኮ ቡራኒ ኔኤም ኮይሱዋያታንቴኬ።
14 ቶሊ ዓኣሺንታኒ ጳሽካ ዓሶ ዎዻኒ ጎይፃ ዎላ ካኣማ ካሮይዳ
ካቲ ዴዓንዳያ ኔና ኮይሱዋያታንቴኬ፤
ቶሊ ዓቴ ዓሶ ሃሣ ዔያታ ካሮ ባይቄያና ዓርቂ ዔኪ
ዔያቶኮ ሞርኮም ኔና ዒንጋንዳያ ኮይሱዋያታንቴኬ።» ዒሲ. 34፡5-17፤ 63፡1-6፤ ዔር. 49፡7-22፤ ሂዚ. 25፡12-14፤ 35፡1-15፤ ዓሞ. 1፡11-12፤ ሚል. 1፡2-5።
ፆኦሲ ሜሌ ዴሮይዳ ዓጋንዳ ሜቶ
15 «ታኣኒ፥ ናንጊና ናንጋ ጎዳ ሜሌ ዴሮ ቢያይዳ
ዎጋ ኬላ ሄሌኔ፤
ዔዶኦሜ! ኔ ማዼ ጎይፆማ ኔ ጊዳ ማዺንታንዳኔ፤
ኔ ማዻ ፑርቶ ማዻ ኔ ባንሢ ሺራንዳኔ።
16 ታኣኮ ዴራ ታኣም ዱማዼ ዹኮይዳ
ዒንጊንቴ ሜቶ ዔኬኔ፤
ዬያሮ ዔያቶ ዓጮ ኮይላ ዓኣ ሜሌ ዴራ ዬያፓ ባሼ ሜቶ ዔካንዳኔ፤
ዬካፓ ዔያቶኮ ቤሲ ባይቃንዳኔ።»
ዒስራዔኤሌ ዓሶኮ ዖሎና ባሺፆ
17 «ፂዮኔ ዹኮይዳ ዬያ ባይሲንታፓ ቶሊ ዓታንዳ ዓሲ ዓኣኔ፤
ፂዮኔ ዹካ ታኣም ዱማዼያ ማዓንዳኔ፤
ያይቆኦቤ ዴራ ቤርታ ዔያቶኮ ዔኮና ባኮ ጊንሣ ማሂ ዔካንዳኔ።
18 ያይቆኦቤ ናኣታ ዓዳ ታሚጉዲ፤
ዮሴፔ ናኣታኣ ታሚ ሎስቶጉዲ ማዓንዳኔ።
ዔኤሳዎ ናኣታ ጋዓንቴ ዲኢሪ ማዓንዳኔ፤
ታሚ ዲኢሪ ሙዓሢጉዲ ያይቆኦቤ ናኣቶንታ
ዮሴፔ ናኣቶንታ ዔኤሳዎ ናኣቶ ሙይ ባይዛንዳኔ።
ዬያ ጌዔሢ ታና፥ ናንጊና ናንጋ ጎዳኬ።»
19 «ዪሁዳ ዓጮኮ ዾኦሎ ባንፆና ዓኣ ዴራ
ዔዶኦሜ ዓጮ ፔ ዓጪ ማሂ ዔካንዳኔ፤
ዓባ ጌላ ባንፆ ዹኮ ዴማ ዓኣ ዳውላዻ ቤዞይዳ ናንጋ ዴራ
ፒሊስፄኤሜ ዓጮ ፔ ዓጪ ማሂ ዓርቂ
ዔፕሬኤሜንታ ሳማሪያ ዓጮናኮ ዴማ ዎርቃ ዓጮ ዔካንዳኔ፤
ቢኢኒያሜ ዓሳኣ ጌሌዓዴ ዓጮ ፔ ዓጪ ማሂ ዔካንዳኔ።
20 ዳውሲንቲ ዴንዲ ኬዶ ባንፃ ናንጋ፥ ዒስራዔኤሌ ዴራ
ሆኦላ ጌይንታ ዓጫፓ ማዒ ሙኪ ካኣናኔ ዓጮኮ
ዴንዲ ሲራጲታ ሄላንዳኣና ፔ ዓጪ ማሂ ዔካንዳኔ።
ዬሩሳላሜይዳፓ ዳውሲንቲ ዴንዲ ሴፓራዲሜ ዓጮይዳ ናንጋ
ዒስራዔኤሌ ዓሳ ዓጬሎኮ ዾኦሎ ባንፆና ዓኣ ካታሞ ዓርቃንዳኔ።
21 ቶሊ ዓቴ ዬሩሳላሜ ዓሳ
ፂዮኔ ዹካ ኬስኪ ዴይ ዔዶኦሜ ዓጮ ዎይሣንዳኔ፤
ካኣታዺ ዎይሣሢያ ናንጊና ናንጋ ጎዳ ማዓንዳኔ።»