ዔኤያ ናይ ጋዓንቴ ፔ ዒንዶ ዖዪሳያ ማዓኔ።

ፂሉሞ ጋዓንቴ ሼምፖ ሃይቢፓ ዓውሳኔ።

ፑርቶ ዓሶ ጋዓንቴ ዔያታ ማሊ ኮዓ ባኮ ዴንቂሱዋሴ።

ዶዲ ማዺሢ ጋዓንቴ ዖዖርጎቻኔ።

ማኣሎ ቡሮ ዎዶና ላሃ ዓሲ ጋዓንቴ ዻውሲንታኔ።

ፑርታ ዓሲ ጋዓንቴ ፔ ፑርቱሞ ኮሺ ጌኤሲና ካንቂ ዓኣቻኔ።

ፑርቶ ዓሶ ሱንፃ ጋዓንቴ ቤዞማና ዋሊንታኔ።

ማሉዋዖ ጌኤሲ ጌስታ ዔኤያ ዓሲ ጋዓንቴ ባይሲንታ ባንሢ ዓኣዻኔ።

ዎቦ ዓሶኮ ጋዓንቴ ዎቡሞ ናንጋ ፔጋዺ ጴዻኔ።

ፔጌና ጎሪ ኬኤዚሢ ጋዓንቴ ኮሹሞ ዴንቂሳኔ።

ፑርታ ዓሲ ጌኤሲ ጋዓንቴ ፑርቱሞ ካንቂ ዓኣቻያኬ።

ናሹሞ ጋዓንቴ ዻቢንቲ ቢያ ዛጌዖ ዓቶም ጌይሳኔ። ያይ. 5፡20፤ 1ጴፂ. 4፡8።

ዔኤያ ዓሲ ጋዓንቴ ሜቶ ዔካኒ ኮይሳያኬ።

ማንቆ ዓሲ ጋዓንቴ ማንቃታ ባይዛኔ።

ጋዓንቴ ፑርታ ዓሲኮ ጎማ ሜቶ ዒዛይዳ ዔኪ ዬዓኔ።

ፔ ዻቢንቶ ዔሩዋ ዓሲ ጋዓንቴ ሜቶይዳ ኬዳኔ።

ዾንኮ ጌስቲ ሺራ ዓሲ ዔኤያኬ።

ዬያሮ ማሊ ጶቂሣ ዓሲ ሚርጌ ጌስቱዋሴ።

ፑርታ ዓሲኮ ማሊሢ ጋዓንቴ ዔኤቢ ፓሡዋያኬ።

ዔኤዮ ዓሳ ጋዓንቴ ማሊ ጶቂሥሢ ፓጪሢና ሃይቃኔ።

ዓሲኮ ላቢ ማዺሢ ዬያይዳ ማዻ ባኣዚ ባኣሴ።

ዒናዼ ዓሲ ዎዛዻሢ ዔራቶ ዴንቂሢናኬ።

ፑርታ ዓሲ ጋዓንቴ ሚርጌና ዔያታ ዒጊጬ ባካ ዔያቶ ሄላኔ።

ኮዦ ዓሳ ጋዓንቴ ቢያ ዎዴ ዶዲ ናንጋኔ።

ቤልፃ ዓሲያ ዒዛ ማዺሻሢም ዒማዺኬ።

ፑርታ ዓሲ ጋዓንቴ ናንጎ ሌዓ ዓኣ ጎይሣ ዓኣንቴ ሃይቃኔ።

ፑርቶ ዓሶኮ ሃጊ ማዓ ዎዛ ጋዓንቴ ጉሪ ማዒ ዓታኔ።

ፑርቶ ማዻ ዓሶ ጋዓንቴ ዒ ባይዛኔ።

ፑርቶ ዓሳ ጋዓንቴ ሳዖይዳ ናንጉዋሴ።

ዎቦ ባኣዚ ጌስታ ዒንዲርሲ ጋዓንቴ ቲቂንታኔ።

ፑርታ ዓሲኮ ጌኤዛ ጋዓንቴ ዎቦኬ።