16
1 ዓሲ ማሊሢ ማሊ ቱካኔ፤
ጋዓንቴ ዬይ ማሊፃ ማዾይዳ ፔኤቃሢ
ናንጊና ናንጋ ጎዳ «ማዖንጎ» ጌይ ዓይሣዛ ሌሊኬ።
2 ዓሲ ማዻ ባካ ቢያ ዬያ ማዻ ዓሢም ፒዜ ማዔያ ማላኒ ዳንዳዓኔ፤
ጋዓንቴ ናንጊና ናንጋ ጎዳ ዬይ ማሊፃ ዎዚምታቴያ ዛጋኔ።
3 ኔ ማዻ ባኮ ቢያ ናንጊና ናንጋ ጎዳም ሃዳርሲ ዒንጌ፤
ኔ ማሊ ቱኬ ቱኡዛ ቢያ ኔኤም ጊኢጋንዳኔ።
4 ናንጊና ናንጋ ጎዳ ማዤ ባኮ ቢያ ጉሪ ማዢባኣሴ፤
ፑርቶ ዓሶታዖ ዒዚ ባይዛኒ ኬሊ ጌሤኔ።
5 ናንጊና ናንጋ ጎዳ ሄርሺንታ ዓሶ ቢያ ሻሻኣኪንታኔ፤
ሜቶይዳፓ ዔያቶ ዒ ቶሊሲንዱዋሴ።
6 ናሹሞና ጉሙርቂሢና ጎሜ ጌጌኤሻኔ፤
ፆኦሲ ዒጊጪሢና ዓሲ ፑርታ ባኣዚፓ ሃካኔ።
7 ዓሲ ፔ ሃንቲፆና ናንጊና ናንጋ ጎዳ ዎዛሳያ ማዔቴ
ዬይ ዒዛኮ ሞርኮናታዖ ዒዛ ኮሺ ናንጊሻኔ።
8 ፒዚ ዎጌ ዎቢሺ ዴንቆ ሚርጌ ቆሎይዳፓ
ጎኑሞና ጴዻ ዻካ ቆሎ ባሼኬ።
9 ዓሲ ማሊሢ ማሊ ቱካኔ፤
ጋዓንቴ ዬይ ማሊፃ ጋፒንሢ ሄላሢ ናንጊና ናንጋ ጎዳ ማኣዴምኬ።
10 ካኣታ ዎጋሢ ናንጊና ናንጋ ጎዳይዳፓ ዔኬ ቢታንቶናኬ፤
ዬያሮ ዒዚ ጌስቲ ቲቃ ባካ ቢያ ዎዴ ፒዜ ማዓኒ ኮይሳኔ።
11 ዔቦኮ ዴኤሡሞ ዔሮ ባኮንታ ማኮ ባኮንታ ፒዜ ማዓንዳጉዲ፤
ሻንቺንቶም ኬሶ ባካኣ ቢያ ፒዜና ሻንቺንታንዳጉዲ
ናንጊና ናንጋ ጎዳኮ ዓይሥሢኬ።
12 ካኣታ ዶዲ ዴዓሢ ፒዜ ዎጊሢናታሢሮ
ፑርታ ማዾ ሱኡጎ ዒዒሣያኬ።
13 ካኣታ ጎኑሞ ሃይሴና ዎዛዻኔ፤
ጎኑሞ ጌስታ ዓሲያ ዔያታ ቦቦንቻኔ።
14 ካኣቶ ዻጋ ሃይቢኮ ኪኢታ ዓሲኬ፤
ጪንጫ ዓሲ ጋዓንቴ ዒዛኮ ዻጎ ሺሚሻኔ።
15 ካኣቶኮ ዓኣፒ ካራ ፖዒሲፃ ዎዛዼያ ማዒፆ ዔርዛኔ፤
ዒዛና ናሽኪንታያ ማዒፃ ዓዳ ባርጊ ዒርዚጉዲ ዓኣዒሳያ ማዓኔ።
16 ዎርቄ ዴንቂሢዳፓ ዔራቶ ዴንቂሢ ባሼኬ፤
ቢራ ዴንቂሢዳፓኣ ዔራቶ ዴንቂሢ ኮሺኬ።
17 ኮሺ ዓሲ ፑርታባኣ ጎይሢና ዓኣዻኔ፤
ሃንቲፆ ፔኤኮ ኮሻሢ ሼምፓሢ ፔኤኮ ካፓኔ።
18 ዖቶርሞ ባይሲንታ ባንሢ ዔኪ ዓኣዻኔ፤
ሄርሺንቲያ ሎኦሞ ሄሊሳኔ።
19 ዖቶሮ ዓሲና ዎላ ቡሪ ዔኮና ባኣዚ ጊሽቲ ዔኪሢዳፓ
ሼሌዔ ዓሲ ማዒ ማንቂ ናንጊሢ ኮሺኬ።
20 ዒዛም ኬኤዚንታ ዞሮ ዋይዛሢ ዖርጎጫንዳኔ፤
ናንጊና ናንጋ ጎዳ ጉሙርቃሢያ ዓንጂንቴያኬ።
21 ማላ ማሊፆና ዒናዼ ዓሲ ማዒሢ ዔራ ዓሲ ማዒፆ ዔርዛኔ፤
ኮሺ ማዓ ዑኡሲና ጌስቲሢ ሜሌ ዓሶ ዔኤቢ ዔርዛኔ።
22 ዔራቶ ሚኢሼ ማሂ ዓርቄሢም ናንጊኮ ካራኬ፤
ዔኤዮ ዓሳ ጋዓንቴ ፔኤኮ ዔኤያቶና ሜቶ ዔካኔ።
23 ዔሮ ዓሲኮ ዒና ዒ ጌስታ ጌኤዞ ካፒ ጌስቲሳኔ፤
ዒዛ ዻንጋፓ ኬስካ ጌኤዛ ሚርጌ ባኣዚ ዔርዛያ ማዓኔ።
24 ኮሺ ጌኤሲ ዔኤሲ ፆሎሊጉዲ ዓኣፃኔ፤
ዑሢኮዋ ዻቂንታኬ።
25 ዓሲም ፒዜ ማሊ ጴዻ ጎይሢ ዓኣኔ፤
ጋፒንፃ ጋዓንቴ ሃይቢ ባንሢ ዔኪ ዓኣዻያኬ። ኮኦኪ. 14፡12።
26 ዓሲ ዶዲ ማዻንዳጉዴያ ማሃሢ ዒዚ ሙዓኒ ማላ ማሊፆኬ፤
ናይዚ ሃሣ ማዾም ዓሲ ዔቂሳኔ።
27 ሱላ ፑርታ ባኣዚ ማሊ ቱካኔ፤
ጌኤዛ ዒዛኮ ታሚጉዲ ሚቻኔ።
28 ጌኔ ዓሲ ዑራ ማዣኔ፤
ዾንኮ ዾንካ ዓሲ ዎላ ፔቴ ማዔ ላጎ ዎሊፓ ዱማሳኔ።
29 ዑራ ኮዓ ዓሲ ዓሲ ጌሺ
ባይሲንታ ባንሢ ዔኪ ዓኣዻኔ።
30 ዓሲዳ ዓኣፒ ዎዺ ሺራይ ጌኔ ማዾ ማዻኒ ማሊ ቱኬያኬ፤
ሃኣሚ ፔኤኮ ዻዓሢያ ፑርቱሞ ባንሢ ዓኣዻያኬ።
31 ቡኡቂ፦ ፆኦሲ ዓሲም ዒንጋ ዼኤፒ ቦንቾኬ፤
ዬይ ጴዻሢያ ዱማዺ ናንጎ ናንጊናኬ።
32 ዎልቃዻያ ማዒሢዳፓ ባሼ ጊቢ ዳንዳዓያ ማዒሢ ኮሺኬ፤
ሚርጌ ካታማ ዖሊ ባሺ ዓርቂሢዳፓ ፔና ዔሪ ቆሊሢ ባሼኬ።
33 ናንጊና ናንጋ ጎዳኮ ማሊፆ ዔራኒ ዓሳ ዒፃ ዓጋኔ፤
ጋዓንቴ «ማዖንጎ» ጌይ ጎናሳሢ ዒዛኬ።