ሚናኣ ዎዶና ኔኤኒ ማዼ ባኮ ቢያ

ኑኡኒ ኑ ዋዮና ዋይዜኔ፤

ኔኤኒ ዔያቶም ማዼ ዲቃሣ ዓኮ ባኮ ኑም ኬኤዜኔ።

ኑ ዓዶንሢ ኑም ኬኤዜኔ፤

ዬይያ፦ ኑ ዓዶንሢ ቤዞ ጌልዛኒ

ዔያቶ ጊኢጊሺ ዴይሣኒ ቤርታ ዒኢካ ናንጋ ዓሶ ኔ ባይዜኔ።

ባሺ ዔያታ ዔኬሢያ ዔያቶ ዎልቄናቱዋሴ፤

ዔያቶና ዎላ ማዒ ኔኤኮ ዎልቆና ዶዱሞና

ዔያቶ ኔ ማኣዴሢሮኬ።

ጊንሣ ሃሣ ኔ ታኣኮ ፆኦዛሢኬ፤

ባሻንዳጉዲ ማዼሢ ኔናኬ።

ኑ ዑፃ ዔቃ ዓሶ ኔ ሱንፆና ኑ ዻውሲሳኔ።

ታኣኮ ጬንቾ ዓፓራኣ ታና ዓውሱዋሴ።

ኑና ዒፃ ዓሶ ቦርሲሳንዳሢያ ኔናኬ።

ሱንፆዋ ኑ ኔኤኮ ናንጊና ጋላታኔ።

ኔኤኒ ኬስኪፆዋ ሃሼኔ።

ኑ ሞርካኣ ኑኡኮ ዓኣ ባኮ ቢያ ቡሬኔ።

ሜሌ ዴሮ ዓጫ ኔ ኑና ዜርቄኔ።

ዬያ ኔ ሻንቺፆና ቃሲ ዴንቄ ባኣዚ ባኣሴ።

ኑ ኮሮይዳ ዓኣ ዓሶማኣ ኑ ሚኢቺ

ሃሣ ዓማሊ ባኣዚ ማዓንዳጉዲ ኔ ማዼኔ።

ቶኦቺሢና ቶኦኮዋ ፔኤኮ ዓጊሣንዳጉዲ ኔ ማዼኔ።

ቢያ ባኣዚና ታ ቦርሲንታያ ማዔኔ።

ሞርካ ታኣኮ ኮሞ ኮፃ ዎዶና

ሜሌ ዓሳ ቄኤዺ ታና ቶኦቻሢ ዋይዜሢሮኬ።

ኔና ኑ ዋሊባኣንቴ፥ ኔኤኮ ጫኣቁሞ ኑ ሃሺ ሻሂባኣንቴኬ።

ቶካኣ ኑኡኮ ኔ ጎይፃፓ ኬስኪባኣሴ።

ሻኔ ዹሚና ኔ ኑና ባይዜኔ።

ኩጮዋ ሜሌ ፆኦዞ ባንሢ ዔቂሴያ ኑ ማዔቴ፥

ዒዚ ዒናይዳ ዓኣ ባኣዚ ዔዔራያኬ።

ሹኪንታ ማራይጉዲያ ኑ ፓይዲንቴኔ። ሮሜ 8፡36።

ዔቄ! ናንጊና ኑና ኔ ኬኤሪ ሃሺፖ!

ኑኡኮ ሜታዺፆና ሄርቂንቲ ዎይፆዋ ዓይጋ ኔ ዋላይ?

ዒኢካ ኑ ሎኦሚ ላሄኔ።

ጊንሣ ማሂ ኑና ሻንቂ ዔኪ ዓውሴ!