57
«ባይዚፖ» ጌይንታ ዓይኑሞና ዓይኑሞ ሱኡጋሢ ዓይሣ ጎይፆ ካላሊንቴ ዳውቴ ካላሊ (ዳውቴ ሳኣዖኦሌ ቤርታፓ ፑኒ ዴኖ ዔቶ ጌሌያና ዓይናዼያኬ።)
ፆኦሲ ማኣዳንዳጉዲ ሺኢቂንቴ ሺኢጲሢ
1 ፆኦሲዮ! ታኣም ሚጪንቴ፥ ታና ማኣሬ፤
ታ ሼምፓሢኮ ፑኖ ካያሢ ኔናኬ፤
ሜቶ ዲጳ ዓኣዻንዳያ ሄላንዳኣና
ኔኤኮ ጋኣዞ ዴሞ ታኣኒ ጌላንዳኔ።
2 ታኣም ማሌ ባኮ ማዺ ኩንሣ ፆኦዛሢ
ዒዛ ዼኤፓሢ ባንሢ ታኣኒ ዒላታኔ።
3 ፆኦሲ ፔ ሚጪንቲፆና ጉሙርቂንቲፆዋ
ጫሪንጫፓ ዳኪ ታና ዓውሳንዳኔ፤
ታና ሜታሳ ዓሶ ዒዚ ዻውሲሳንዳኔ።
4 ሼምፔላ ታኣኮ ዞቢና ማንጊንቴኔ፤
ሾኦሊ ታና ሙዓ ቦዖ ባኣካ ታ ኬዴኔ፤
ዓጫ ዔያቶኮ ዎርሢና ሂኢሺናጉዲ
ዒንዲርዛኣ ዔያቶሲ ዋርቂንቴ ጬንቻ ዓፓሮኬ።
5 ፆኦሲዮ!
ሌካ ጫሪንጮኮ ዑፃ ዼግ ዼጊ ጌዔ፤
ቦንቻ ኔኤሲ ሳዖ ቢያይዳ ኩሞንጎ።
6 ሞርካ ታኣኮ ታና ዓይሣኒ ፒሮ ታኣም ፒሬኔ፤
ታና ጉቤና ዎቢሳ ዎዛ ቲቂሢ ታና ሄሌኔ፤
ዔያታ ታኣኮ ጎይፆይዳ ዔቴ ቦኦኬኔ፤
ጋዓንቴ ዬያ ዔቶይዳ ፔኤሮ ዔያታ ሎኦሜኔ።
7 ፆኦዛሢዮ! ዒና ታኣኮ ዶዲኬ፤
ካላሊያ ካላሊ ታኣኒ ዓይናዻኔ።
8 ታኣኮ ሼምፔሌ ጴጬ!
ጎኦሎንታ ሃንጎ ዓይኑሞ ዓንጋሞንታ ዔቁዋቴ!
ታኣኒያ ሚኢሪ ዔቃንዳኔ።
9 ናንጊና ናንጋ ጎዳሢዮ! ዴሮ ባኣካ ታ ኔና ጋላታንዳኔ፤
ታ ዴሮ ባኣካኣ ታ ኔኤም ጋላታ ዓይኑሞ ዓይናዻንዳኔ።
10 ኔኤኮ ናንጊና ናንጋ ናሹማ ጫሪንጮ ሄላያኬ፤
ጉሙርቂንቲፃኣ ሻኣሮ ሄላኔ።
11 ፆኦሲዮ! ጫሪንጮኮ ዑፃ ዼግ ዼጊ ጌዔ፤
ቦንቻ ኔኤኮ ሳዖ ቢያይዳ ማዖንጎ። 1ሳሙ. 22፡1፤ 24፡3።