80
«ጫኣቁሞ ቡኒ» ጌይንታ ዓይኑሞና ሱኡጋሢ ዓይሣ ጎይፆ ዓይናዺንታ ዓሳኣፔ ዓይኑሞ
ዒስራዔኤሌ ካኣታ ጊንሣ ዶዳንዳጉዲ ሺኢቂንቴ ሺኢጲሢ
1 ዮሴፔ ማራይጉዲ ሄንቃ፥ ዒስራዔኤሌያ ሄንቃሦ ኑም ዋይዜ!
ኪሩቤኤሎይዳ ዓኣ ካኣቱሞ ዖይታ ዴዓሦ
ኔኤኮ ፖዖና ፔጋዺ ጴዼ። ኬሲ. ማፃ 25፡22።
2 ዔፕሬኤሜንታ ቢኢኒያሜንታ ሚናሴንታም
ኔና ፔጋሲ ዻዌ፤
ዎልቆ ኔኤሲ ዓጊሤ፤
ሙኪያ ኑና ዓውሴ።
3 ፆኦሲዮ! ኑና ማሄ፤
ኑ ዻቃንዳጉዲ ኔ ዓኣፖ ካሮ ኑኡም ፖዒሤ።
4 ቢያ ባኮ ዎይሣ ጎዳ ማዔ ዼኤፖ ፆኦዛሢዮ!
ኔ ዴሮኮ ሺኢጲፆ ዋይዞ ዒፂ
ጎሪንቶ ኔኤኮ ኔ ቤኤዛሢ ዎማ ሄላንዳኣናዳይ?
5 ዖዪሢ ዓዳ ሙኡዚጉዲ
ዓቢሢያ ዑሺጉዲ ሚርጌና ኔ ዔያቶ ዑሼኔ።
6 ኑ ዓሺኖም ኔ ኑና ዑራ ማዣ ዓሲ ማሄኔ፤
ኑኡኮ ሞርካኣ ኑና ሚኢጬኔ።
7 ቢያ ባኮ ዳንዳዓ ፆኦዛሢዮ! ኑና ማሄ፤
ኑ ዻቃንዳጉዲ ኔ ዓኣፖ ካሮ ኑም ፖዒሴ።
8 ጊብፄ ዓጫፓ ዎይኔ ዞንዜ ኔ ዔኪ ሙኬኔ፤
ሜሌ ዴሮ ዳውሲ ዔያቶ ቤዛ ዬያ ኔ ቱኬኔ።
9 ዬይ ዑጋንዳ ቤዞ ኔ ጲሺ ጊኢጊሼኔ፤
ዬያሮ ፃጲ ዳኪ ዓጬሎ ባልጊ ኩሜኔ።
10 ዹካ ዬያ ዒላዦና ሺቢንቴኔ፤
ዼኤፖ ዚቢቃኣ ዬያ ካኣፖ ዴማ ዔቄኔ።
11 ዬይ ካኣፓ ዴንዲ ባዞ ሄላንዳኣና
ቶሻኣ ዔፕራፂሴ ዎሮ ሄላንዳኣና ጋምፒንቴኔ።
12 ዓካሪ ዒኢና ሊካ ሌካ ጋዓሢ ዓኣፖ ዬያ ማንፃንዳጉዲ
ዲፆ ኔኤኒ ዓይጋ ሻሄይ?
13 ጉዱንፃ ካያፓ ኬስኪ ዬያ ፑርቲሳንዳኔ፤
ቆልማ ሄንቃ ቤዛ ዲርጋ ቆልማ ቢያ ሙዓንዳኔ።
14 ቢያ ባኮ ዎይሣ ጎዳሢዮ! ዓካሪ ኑ ባንሢ ማዔ፤
ጫሪንጫፓ ሊካ ኑ ባንሢ ዛጌ፤
ሃኖ ኔኤኒ ቱኬ ዎይኔሎ ዛጊ ካፔ።
15 ሃይ ኔኤኮ ሚዛቆ ኩጫ ቱኬ ባቃላ
ኔ ዛላ ማሂ ኔ ባቃልሴ ናዓሢኬ።
16 ዬይ ዎይናሢ ቲቂንቲ ታሚዳ ሚጬኔ፤
ኔ ዻጎ ጎሪንታ ኔ ዓሶ ባይዛንዳኔ።
17 ኔኤሮ ማሂ ኔኤኒ ዶዲሺ ዔቂሴ ዓሢ ዑፃ
ኔኤኮ ሚዛቆ ዛላ ዓኣ ኔ ናዓሢ ዑፃ
ኔ ኩጫ ማዖንጎ።
18 ሃይካፓ ሴካ ኔና ሃሺ ጊንሢም ኑ ማዓዓኬ፤
ናንጊና ባይቁዋያ ኑና ማሄ፤
ኑኡኒያ ኔና ካኣሽካንዳኔ።
19 ናንጊና ናንጋ ጎዳ ማዔ ዼኤፖ ፆኦዛሢዮ!
ኑና ጊንሣ ቤዞ ማሄ፤
ኑኡኒ ዻቃንዳጉዲ ኔ ዓኣፖ ካሮ ኑም ፖዒሴ።