99
ፆኦሲ ዼኤፒ ካኣቲ ማዔሢ
1 ናንጊና ናንጋ ጎዳ ካኣታዼኔ፤
ዴራ ጎጋይቆንጎ፤
ዒዚ ኪሩቤኤሎ ዑፃ ዓኣ ካኣቱሞ ዖይታ ዴዔኔ፤
ሳዓኣ ዓጊፆንጎ። ኬሲ. ማፃ 25፡22።
2 ናንጊና ናንጋ ጎዳ ፂዮኔይዳ ዼኤፒኬ፤
ዴሮኮ ቢያ ዑሣ ዒ ዼግ ዼጊ ጌዔኔ።
3 ኔኤኮ ዔያታ ዼኤፑሞና ዒጊቻ ሱንፆና ሄርሾንጎ፤
ዒዚ ዱማዼያኬ።
4 ፒዜ ዎጌ ናሽካ ዎልቆ ካኣቲዮ!
ኔኤኒ ፒዜ ባኣዚ ማዺንታንዳጉዲ ማሄኔ፤
ፒዜ ዎጊሢና ፂሉሞና ያይቆኦቤ ዓሶም ዔኪ ሙኬኔ።
5 ናንጊና ናንጋ ጎዳ ማዔ ኑ ፆኦዛሢ ዼግ ዼጊዱዋቴ!
ቶካ ዒዛኮ ሄርቃ ሳዖይዳ ዚጉዋቴ!
ዒዚ ዱማዼያኬ።
6 ዒዛም ቄኤሶ ማዔዞንሢ ባኣካ ሙሴና ዓኣሮኔና ዓኣኔ፤
ሃሣ ዒዛ ሺኢቄዞንሢ ባኣካፓ ሳሙዔኤሌ ፔቴሢኬ፤
ዔያታ ናንጊና ናንጋ ጎዳ ዔኤላዛ
ዒዚ ዔያቶም ማሂ ዬሄኔ።
7 ቱርቱሮጉዲ ዔቄ ሻኣሮ ባኣኮይዳ ዒ ጌስቴኔ፤
ዔያታኣ ዒዚ ዔያቶም ዒንጌ ዳምቦና ዎጎና ካፔኔ። ኬሲ. ማፃ 33፡9።
8 ናንጊና ናንጋ ጎዳ ማዔ ኑ ፆኦዛሢዮ!
ኔኤኒያ ዔያቶም ዬሄኔ፤
ኔ ዔያቶኮ ዻቢንቶሮ ኮሜ ኮፃያ ማዔቴያ
ኔኤኒ ዔያቶም ዓቶንጎ ጋዓ ፆኦሲኬ።
9 ናንጊና ናንጋ ጎዳ ማዔ ኑ ፆኦዛሢ ዼግ ዼጊዱዋቴ!
ዒዛኮ ዱማዼ ዹካ ዒዛም ዚጉዋቴ፤
ናንጊና ናንጋ ጎዳ ማዔ ኑ ፆኦዛሢ ዱማዼያኬ።