11
ላምዖ ማርካ
1 ዬካፓ ዖዶሱሞና ዳልጉሞና ሃሣ ዔጶና ዋርቆያ ዎኦሺ ማላ ሚሢ ታኣም ዒንጊንታዖ፦ «ዓኣዺ፥ ፆኦሲኮ ጌኤዦ ማኣሮና ፆኦሲም ዒንጊፆ ዒንጎ ቤዞና ዋርቄ፤ ሃሣ ዒኢካ ካኣሽካ ዓሶዋ ፓይዴ፤ ሂዚ. 40፡3፤ ዛካ. 2፡1-2። 2 ጌኤዦ ማኣሮኮ ዙላ ዓኣ ጶኦኮ ጋዓንቴ ዋርቂፖ፥ ሃሼ፤ ዬይ፦ ሜሌ ዴሮም ዒንጊንቴ ቤሲኬ፤ ዔያታ ፆኦሲም ዱማዼ ካታሜሎ ዖይዲታሚ ላምዖ ዓጊኒ ጉቤ ባሺ ዎይሣንዳኔ፤ ሉቃ. 21፡24። 3 ላምዖ ታኣኮ ማርኮንሢ ሲዬ ፓቲሌ ማይንቲ ፔቴ ሺያና ላምዖ ፄኤታና ላሂታሚ ኬሊ ታ ማሊሢ ኬኤዛንዳጉዲ ዎልቄ ታ ዔያቶም ዒንጋንዳኔ» ጌይንቴኔ።
4 ዬንሢ ማርኮንሢ ሳዖይዳ ጎዳ ቤርታ ዔቃ፥ ላምዖ ሪሚቶ ሚፆንሢና ላምዖ ፖዖ ጌሦ ሻርኖንሢናኬ፤ ዛካ. 4፡3፤11-14። 5 ዖኦኒያ ዔያቶ ማኣሳንሣኒ ማሌቶ ታሚ ዔያቶ ዻንጋፓ ኬስኪ ዬያቶ ሚቻንዳኔ፤ ዔያቶ ማኣሳንሣኒ ኮዓሢ ቢያ ሃይቃንዳ ጎይፃ ዬያይዲኬ። 6 ዔያታ ታ ማሊፆ ኬኤዛ ዎዶንሢዳ ዒርዚ ዋርቁዋጉዲ ጫሪንጮ ዲርቃኒ ዔያቶኮ ቢታንቶ ዓኣኔ፤ ዬያጉዲ ዋኣፆ ሱጉሢ ማሂ ላኣማኒ ኮዔ ዎዶና ቢያ ዓይጎ ባኣዚናኣ ማዖም ሳዖ ባይዛንዳ ባኣዚና ጳርቃኒ ቢታንቶ ዔያቶኮ ዓኣኔ። 1ካኣቶ. ማ 17፡1፤ ኬሲ. ማፃ 7፡17-19፤ 1ሳሙ. 4፡8።
7 ዔያታ ፔኤኮ ማርካቶ ጋፒሴሢኮ ጊንፃ ዼኤፖ፥ ዒጊቻ ዔታፓ ኬስካንዳ ቦዓሢ ዔያቶና ዖልቲ ባሻንዳኔ፤ ዎዺያ ዔያቶ ዎዻንዳኔ። ዳኣኔ. 7፡7፤21፤ ዮሃ. ፆፔዻ 13፡5-7፤ 17፡8። 8 ሌዛ ዔያቶኮ ኮኦኪንሢና ሶዶኦሜ፥ ሃሣ ጊብፄ ጌይንታ ዼኤፖ ካታሜሎኮ ዓሳ ቡካ ጶኦካ ኬኤሪንታንዳኔ፤ ዬና ካታሜላ ዔያቶኮ ጎዳሢ ሱፂንቴ ካታሜሎኬ። ዒሲ. 1፡9-10። 9 ዱማ ዱማ ዜርፃፓ፥ ቶኦካፓ ሃሣ ዱማ ዱማ ሙኡቺ ጌስታ ዓሶና ዴሮናይዳፓ ማዔ ዓሳ ሃይሦ ኬሊና ዛላና ማዓንዳኣና ሌዞ ዔያቶኮ ዒኢካ ዓኣንቴ ዛጋንዳኔ፤ ሌዛ ዔያቶኮ ዱኡኪንቱዋጉዲ ላኣጊንታያ ማዓንዳኔ፤ 10 ዬንሢ፥ ላምዖ፥ ፆኦሲ ማሊፆ ኬኤዛዞንሢ ሳዖይዳ ናንጋ ዓሶ ሜታሴሢሮ ሳዖይዳ ናንጋ ዓሳ ዔያታ ሃይቄሢሮ ዎዛዻንዳኔ፤ ዬያ ዎዛፓ ዔቄያና ዔያቶኮ ሃይቦ ኬሎ ቦንቾ ኬሊ ማሂ፥ ዎሊም ዒንጎ ባኣዚያ ዒንጋንዳኔ፤ 11 ሃይሦ ኬሊና ዛላና ማዔሢኮ ጊንፃ ጋዓንቴ ሼምፖ ዒንጋ፥ ፆኦሲኮ ዑኡዛ ፆኦሲዳፓ ሙኪ ሌዛ ዔያቶኮ ጌሌም፥ ዔያታ ዔቄሢሮ ዔያቶ ዛጌ ዓሳ ሚርጌና ዒጊጬኔ። ሂዚ. 37፡10። 12 ዬካፓ ላምዖ ፆኦሲ ማሊፆ ኬኤዛዞንሢ፦ «ሃንጋ ኬስኩዋቴ!» ጋዓ ዼኤፒ ዑኡሲ ጫሪንጫፓ ዋይዜኔ፤ ዬማና ዔያቶኮ ሞርካ ዔያቶ ዛጋ ጎይሣ ዓኣንቴ ሻኣሬና ሌካ ጫሪንጮ ዔያታ ዓኣዼኔ። 2ካኣቶ. ማ 2፡11። 13 ዒማና ሳዓ ሚርጌ ዓጊፄኔ፤ ካታሜሎኮዋ ታጶይዳፓ ፔቴማ ማዓ፥ ቤዛ ቢያ ዶዒ ጋፔኔ፤ ዬያይዲ ዓጊፂፆና ላንካይ ሺያ ዓሲ ሃይቄኔ፤ ሃይባፓ ዓቴዞንሢ ሚርጌና ዒጊጪ፥ ጫሪንጮ ፆኦዛሢ ጋላቲ፥ ቦንቼኔ። ዮሃ. ፆፔዻ 6፡12፤ 16፡18።
14 ላምዓሳ ሜታሢ ዎዳ ጋፔኔ፤ ሃይሾ ዓካሪ ሃይሣሳ ሜታሢ ዎዳ ዑኬና ዬዓንዳኔ።
ኪኢታንቻሢ ዋርቄ ላንካሳ ዛያሢ
15 ላንካሳ ኪኢታንቻሢ ዛያሢ ዋርቃዛ፥ ጫሪንጮይዳ፦
«ዓጮ ካኣቱማ
ኑ ጎዳሢ ማዔ ፆኦዛሢና ዒዛኮ ሜሲሄናም ማዔኔ፤
ዒዚያ ናንጊና ካኣታዻንዳኔ» ጋዓ ዼኤፒ፥ ዼኤፒ ዑኡሲ ዋይዚንቴኔ። ኬሲ. ማፃ 15፡18፤ ዳኣኔ. 2፡44፤ 7፡14፤27።
16 ፆኦሲ ቤርታ፥ ካኣቱሞ ዖይቶይዳ ዴዒ ዓኣ፥ ላማታሞ ዖይዶ ጋርቾንሢ ባሊቶና ሳዖ ባንሢ ሂርኪ ጌዒ ጉምዓቲ ፆኦሲም ዚጌኔ፤
17 ዔያታ ዚጋ ዎዶና፦
«ሃሢ ዓኣያ ሚናፓ ናንጋያ
ቢያ ባኣዚ ዳንዳዓ ጎዳ ማዔ ፆኦዛሢዮ!
ዼኤፖ ዎልቆ፥ ኔኤሮ ኔ ማሄሢሮ
ሃሣ ኔ ካኣታዼሢሮዋ ኔና ኑ ጋላታኔ።
18 ሜሌ ዴራ ሚርጌና ዻጋዼኔ፤
ሃሣ ኔ ዻጋኣ ሙኬኔ፤
ሃይቄ ዓሶይዳ ኔ ዎጋ ዎዳኣ ሄሌኔ።
ኔኤም ማዻ፥ ኔ ማሊፆ ኬኤዛዞንሢና
ኔኤም ዱማዼዞንሢና ሱንፆዋ ኔኤኮ ቦንቻዞንሢም
ዻኮና ዼኤፖ ማዔዞንሢናም
ዔያታ ማዼሢ ዛሎ ማሂ ኔ ዒንጋንዳ ዎዳ
ሃሣ ዓጮ ባይዜዞንሢያ ኔ ባይዛንዳ ዎዳ ሄሌኔ» ጌዔኔ። ዓይኑ. 2፡5፤ 110፡5፤ 115፡13።
19 ዬካፓ ጫሪንጫ ዓኣ፥ ፆኦሲኮ ጌኤዦ ማኣራ ቡሊንታዛ ጋሮይዳ ዒዛኮ ጫኣቁሞ ሳኣፂና ዓኣያ ማዒ ጴዼኔ፤ ዬማና ዜኤሊንሢ ዜኤሊንሤኔ፥ ዼኤፒ ዑኡሲ ዋይዚንቴኔ፥ ጉጉንሢያ ጉጉንሤኔ፥ ሳዓኣ ዓጊፄኔ፥ ዼኤፒ ሻቺያ ኬዴኔ። ዮሃ. ፆፔዻ 8፡5፤ 16፡18፤ 21።
11:1 ሂዚ. 40፡3፤ ዛካ. 2፡1-2።
11:2 ሉቃ. 21፡24።
11:4 ዛካ. 4፡3፤11-14።
11:6 1ካኣቶ. ማ 17፡1፤ ኬሲ. ማፃ 7፡17-19፤ 1ሳሙ. 4፡8።
11:7 ዳኣኔ. 7፡7፤21፤ ዮሃ. ፆፔዻ 13፡5-7፤ 17፡8።
11:8 ዒሲ. 1፡9-10።
11:11 ሂዚ. 37፡10።
11:12 2ካኣቶ. ማ 2፡11።
11:13 ዮሃ. ፆፔዻ 6፡12፤ 16፡18።
11:15 ኬሲ. ማፃ 15፡18፤ ዳኣኔ. 2፡44፤ 7፡14፤27።
11:18 ዓይኑ. 2፡5፤ 110፡5፤ 115፡13።
11:19 ዮሃ. ፆፔዻ 8፡5፤ 16፡18፤ 21።