1 Uⱡ itim nimbʉ pora nilinga kʉn, wote na ndi, kundʉr mel, anggelo tʉmbʉkak kat ndi, ya mʉi kʉmp monmʉn ei nga mʉi punt tʉmbʉkak tetʉm ila, elpa elpa anggilik molk. Mʉi ei nga kona kʉpkʉ tʉmbʉkak kʉⱡ imp morum. Uⱡ etʉng ei ndi, mʉi na, num kuta na, nde mel mbʉ kʉpkʉ ropa kʉn, rowa ni nʉnangga nʉk etʉng. 2 Ni kʉn, na ndi, kundʉr mel, al ant oⱡa orum orunga anggelo ti urum ei ndi, Got kont morum ei nga tip timal ti, etpa mepa omba kʉn, anggelo tʉmbʉkak kat, Got ndi, ronduⱡ ngumba kʉn, num kuta na, mʉi na mbʉ etʉk, kit mundeing nitim kʉⱡ, ronduⱡ wi rurum. 3 Wote, anggelo ei ndi, nimba mel, “Enim ndi, tʉkrʉk num kuta na, mʉi na, nde na mel mbʉ, etʉk kit mundi nʉmʉndʉi! Unt Got nga kongun wamp mbʉ nga mʉi ombil ila, tʉn ndi, Got nga tip timal ei, mon ropʉn pora ndamina kʉn, wote enim ndi, mʉi kona mel mbʉ, etʉk kit mundeing,” nitim. 4 Wote, Got nga tip timal ei, wamp namba iti ndi, tʉtʉng uⱡ ei, na kundʉk nʉtʉng ila pit. Isrel wamp rʉⱡaip elpa elpa mormun ei nga wamp 144,000, Got nga tip timal ei tʉtʉng.

5 Ei kʉn, Jura wamp rʉⱡaip ila 12,000 Got nga tip timal tilingina, Rupen nga rʉⱡaip ila 12,000 tilingina, Gat nga rʉⱡaip ila wamp 12,000 tʉtʉng.

6 Wote, Asa nga rʉⱡaip ila wamp 12,000 Got nga tip timal ei tilingina, Naptali nga rʉⱡaip ila wamp 12,000 tilingina, Manasa nga rʉⱡaip ila wamp 12,000 tʉtʉng.

7 Omba Simiyon nga rʉⱡaip ila wamp 12,000 tilingina, Lipai nga rʉⱡaip ila wamp 12,000 tilingina, Isikar nga rʉⱡaip ila wamp 12,000 tʉtʉng.

8 Wote, Sepulun nga rʉⱡaip ila wamp 12,000 tilingina, Josep nga rʉⱡaip ila wamp 12,000 tilingina, Benjamin nga rʉⱡaip ila wamp 12,000 tʉtʉng. Wamp rʉⱡaip mbʉ pora, Got nga tip timal ei, tʉk pora ndurʉng.

9 Wote na ndi, kundʉr mel, wamp rʉⱡaip mam ti, mʉk rok morung ei, wamp ti ndi, kʉmp ring mel kapⱡa mon. Wamp mormin mbʉ, rʉⱡaip na, mʉi kona na, kʉng na, ik na mbʉ elpa elpa mbʉ, Got nga rʉpʉndi pol ila kʉn, Sipsip Waⱡ raⱡ nga kuimp keta ila anggilik kʉn, muⱡ rʉⱡ kurʉmʉⱡa mat pakʉk, ki mbila yaⱡa ongum mat, ambulk morung. 10 Ni kʉn, ronduⱡ wi rok nʉk mel, “Tʉn nga Got rʉpʉndi pol ila moⱡnga kʉn, wamp etpa ti uⱡ ei, Sipsip Waⱡ ei kʉn, kandʉp tʉtmʉn,” nʉtʉng. 11 Wote, anggelo nimbʉ ndi pora, rʉpʉndi pol ila na, rʉp wu mbʉ na, mel kont mul tʉmbʉkak na mbʉ, morung kona ni anggilik paⱡa etʉk, tʉkrʉk ngurung. Wote, anggelo nimbʉ ndi, rʉpʉndi pol ila nondpa mura rok mondʉk, mʉi kandʉk, Got nga mbi paka rondrʉng. 12 Mbi paka rondʉk, nʉk mel, “Ei kupa! Tʉn nga Got ei kʉn minal ambuⱡpʉn paⱡpʉn, elim nga mbi ou ei nga nʉndpʉn itamin. Got ei, pilpa kungʉndi kai mbʉ nga pora puⱡi ei nga, tʉn ndi, Got kʉn angge nimbun, elim nga mbi paka rondpʉn itamin. Got ei, ama ronduⱡ purum ei ndi, uⱡ ronduⱡ mam mbʉ, elim kʉn mint rʉk rʉk tetʉm. Ei kupa mint!” nʉtʉng. 13 Wote, rʉp wu ti ndi, na waldpa, nimba mel, “Wamp mat, muⱡ kurʉmʉⱡa ruⱡ pakʉnmʉn mbʉ, naka wamp mbʉ nda, wote kona nant ila molk orung wamp mbʉ nda?” nitim. 14 Ni kʉn, na ndi, punt rop nʉmp mel, “Nim na nga rʉp wu ei! Nim ninim pʉtʉn ei ka!” nit. Wote, rʉp wu ni ndi, yant ndupa, nimba mel, “Wamp kan mbʉ, el rui wamp mbʉ nga ki mbila, mindil mbun mam mbʉ tʉk kʉn, Sipsip Waⱡ ei nga mema ei ndi, muⱡ mbʉ ⱡumʉiya roⱡnga, kurʉmʉⱡa itim. 15 Uⱡ i etʉng ei ndi, akup Got nga rʉpʉndi pol ei nga, kuimp keta ila anggilik kʉn, rumbuldi rʉnggilmʉ raⱡ, Got nga manga wingti ila molk, Got nga mbi paka ronduⱡmina kʉn, Got elim rʉpʉndi pol ila moⱡpa, wamp mbʉ rʉp etpa morum. 16 Got ndi, wamp mbʉ rʉp etʉm uⱡ ei ndi, wamp mbʉ kump kun kuⱡi nʉⱡing, nu waka ti mon, kona ant ronduⱡ nui nanʉmba, kʉng orunga mindil etpa, muⱡ etpa, iti natʉmba mon ku. 17 Uⱡ ei, nambuⱡ emel, Sipsip Waⱡ ei, rʉpʉndi pol ruk ting ila nga moⱡpa kʉn, wamp mbʉ rʉp etʉm. Wamp mbʉ, nu waka kuⱡʉng ei kʉn, Sipsip Waⱡ ei ndi, mepa pangga kʉn, wamp kont mul nu kut ila nu nuing. Got ndi, wamp nga ka net mana om mbʉ, kil ngundʉmba,” nitim.