2 Ioane
Ioane Ega Malele Gua Auga
1
Lau iifi eꞌa au akaikiꞌau agaꞌo malele iꞌina lapapua, oi iifi eꞌa, ke iifi eꞌa papiaumi* Grik malagai, ‘Oi papie ke gaumu fou’ Deo ekinanimi aumi eemiai laulaisa. Oi Deo ega iifa koꞌa auga opakoꞌania kainai, lau alou koꞌagai animi laani alogaina. Ke lau ifou mo laaꞌi kai, papiau Deo ega iifa koꞌa kelogo auꞌi maꞌoai aloꞌi koꞌagai animi keani alogaina. Gome lai alomaisai Deo ega iifa koꞌa auga ekaega, ke egaꞌina iifaga eemaisai ageka aoniamo.
Deo ega iifa koꞌa auga iꞌa apakoꞌania, ke isa iꞌa aniꞌa eani alogaina. Ega puo lau Deo Ama, ke Deo Gauga Iesu Kristo fou lamegamega peniꞌi, ega koa eꞌi gafegafe akaikiꞌa, eꞌi guani, ke eꞌi gagao fou iꞌa aꞌa aagu alogai fekepeniꞌa, faagu felo laoma.
Lau alou egama alogaina. Gome oi iifi eꞌa papiaumi isami aumi, Deo ega iifa koꞌa auga kainai oague auga laisa. Ke oi ega koa okapa auga, Deo Ama kapaꞌina eifania fakapa eoma auga iꞌopoga mo okapa. Kai pau oi iifi eꞌa papiaumi animi laani alogaina aumi Grik malagai, ‘papie animu laani alogaina aumu’ eemiai Deo ega iifa kapula mamaga alaulaisa kai, Kristiano amia mo mamagai Deo ega iifa kapula aafiia auga eemiai laulaisa. Ke Deo ega iifa kapula egaꞌina auga, iꞌa aloꞌa koꞌagai agaꞌo agaꞌo aniꞌa faani eoma. Ke aloꞌa koꞌagai Deo, papiau fou aniꞌi faani auga laoga maina iina koa: Deo kapaꞌina eifania fakapa eoma auga iꞌopoga mo fakapa. Ke oi Kristiano omia mo mamagai Deo oi epainimi alomi koꞌagai agaꞌo agaꞌo animi foani eoma auga, egaꞌina mo agugai foagu.
Lau egaꞌina laifania, gome pau agofaꞌai pamalele pifoge auꞌi maꞌo kepealai kepinauga. Ke egaꞌina papiauꞌi Iesu papiau aumauni imaaugai emai agofaꞌai auga akepakoꞌania. Papiau iina koa iꞌopoꞌi auꞌi pifoge ipaumaꞌi, ke Iesu ega ou auꞌi. Maami fogoa foꞌimaimi ega koa kapaꞌina afipuguga opaꞌaua auga folopagea kai, afa fofouga foafia. Kaisau Iesu Kristo epamalele koa aepamalele kai, laagai ifo ega pamalele eogeaua epamalele auga, Deo fou laaꞌi. Kai kaisau Iesu epamalele koa iꞌopoga mo epamalele auga, Deo Amaꞌa ke Gauga Iesu fou keagu. 10 Ke kaisau Iesu koa akepamalele auꞌi oi eemi akefai aisama, isa oi emi eꞌa fololaoainiꞌi, ke emi eꞌai isafa foloifa kokoꞌi. 11 Kai kaisau isa keifa kokoꞌi auꞌi, isa isafa egaꞌina papiauꞌi fou kaiꞌialao pamalele apalaꞌi kekapaꞌi.
12 Lau niniꞌani maꞌo kekae faifaniꞌi kai, anina alaani maleleai fapapua. Kai lau anina laani auga, kina agaꞌo faafai eemiai kuaꞌa maaꞌa faisa kai fou faniniꞌani, ega koa iꞌa maꞌoaisai mo aloꞌa fegama alogaina laoma.
13 Deo oi aami akimi iifi eꞌa papiauꞌi ekinaniꞌi inae lau fou aagu auꞌi Grik malagai, ‘afakuami gauga auꞌi’ eemiai kepamego.

*1:1: Grik malagai, ‘Oi papie ke gaumu fou’

1:5: Grik malagai, ‘papie animu laani alogaina aumu’

1:13: Grik malagai, ‘afakuami gauga auꞌi’