2
1 Gome lau anina laani oi, Laodisia iifi eꞌa papiauꞌi, ke papiau maꞌo lau akeisau akelogoniau auꞌi isafa fou kaimialao faumiai launiaimoimo, ifou lapaafi puguisau auga fologo laoma. 2 Lau egaꞌina lakapa auga, lau anina laani isa mapaameꞌi, ke aloꞌi agaꞌomo femia, aloꞌi koꞌagai agaꞌo agaꞌo aniꞌi fekeani laoma. Ke isa ega koa fekekapa, Deo ega ogefake kapa akaikiꞌa Iesu Kristo auga fekelogo felo laoma. Ke ega koa fekekapa, ega koa aloꞌi kapulaga ipaumagai kapa maꞌoai okoꞌi fekelogo laoma. 3 Ke Iesu Kristo faagagai ikifa, ke logo kapaꞌi akaikiꞌaꞌi auꞌi maꞌoai kekafake kekae. 4 Lau egaꞌina oi maamiai laifania, ega koa kai agaꞌo aloani niniꞌaniꞌiai faefogeimi laoma. 5 Gome lau ifou imaau auga egae oi fou laaꞌi mo ganinagai, lau opouai auga oi fou egae aague. Ke oi kapa maꞌoai okoꞌiai mo okapaꞌi auga fouga lalogo, ke emi pakoꞌa Iesu Kristo eegai ooge kapulania auga isafa fouga lalogo kainai, alou egama alogaina.
Iesu Opakoꞌania Auga Agugai Foagu
6 Ega puo oi Iesu Kristo oafiia emi Lopia opamia koa iꞌopoga, oi isa ega aguai foagu faefuafua. 7 Ke au gagamuga aꞌisa alogai ekaaga euki koa iꞌopoga, oi isafa gagamumi Iesu faagagai fokaaga, faagagai fouki. Ke lai apamalelenimi koa iꞌopoga, emi pakoꞌai fokapula alogaina, ke aufa kina Deo tenkiu fopenia auga laoga maina alomi fepogu.
8 Ke foisa felo ega koa kai agaꞌo iꞌina agofaꞌa ikifaga auꞌi eꞌi pamaleleai, ke pifoge niniꞌaniꞌi kapa agaꞌo afakepagama auꞌi niniꞌaniꞌiai oi fakepaoaimi fakeafimi. Egaꞌina pamaleleꞌi ke niniꞌaniꞌi auꞌi papiau aumauni eꞌi kagakagai, ke agofaꞌai pamalele eꞌeleꞌi, papiau aumauni fekepalagainiꞌi iꞌina agofaꞌagai fekeagu fekaina auga mo pamaleleꞌi kai, Iesu Kristo fouga akepamalelenia.
9 Ke oi foisa felo laoma, gome Deo Ama ega akaikiꞌa, ke ega isapu ala koa auga Iesu Kristo imaaugai ekae. 10 Ke Iesu Kristo auga ufa, ke agofaꞌa maꞌoai eꞌi isapu, ke isapu keafia papiau keꞌimaꞌi lopiaꞌi maꞌoai isafa kaniaꞌiai auga. Ke oi auga Iesu Kristo fou omia kainai, isa ega akaikiꞌa ke ega isapu ala koa auga isafa epalogonimi alomi epogu efua. 11 Ke oi ologo koa iꞌopoga, kaisau maguaeꞌi faaga iifalaina emia auꞌi Deo ega papiau kemia. Ke oi Iesu opakoꞌania kainai, maguaemi iifalaina laoga maina faagamiai emia efua. Kai oi auga papiau imaꞌiai au agaꞌo maguaega faaga iifalaina emia auga koa iꞌopoga faagamiai aemia kai, oi Iesu opakoꞌania aisama, egaꞌina laoga maina koꞌa ipauma auga faagamiai ekapaisa. Ega koa ekapaisa, oi papiau aumauni laoga maina apala ega kagakaga kaiꞌiai fopea auga kagakagaꞌi eeꞌiai epapealaimi. 12 Ke oi baptismoai emi laomai apalaꞌi maꞌoai fou Iesu Kristo fou omae koa iꞌopoga. Kai Deo ega isapuai Iesu maeai epamaunimue auga opakoꞌania aisama, egaꞌina pakoꞌagai Deo oi isafa Iesu fou epamauni mueimi koa iꞌopoga, mauni mamaga oafiia.
13 Ke oi Iudea aumi laaꞌi kainai, maguaemi faaga iifalaina aemia, ke laomai apalaꞌi okapaiꞌi. Ke oi ega koa okapaiꞌi auga, oi Deo maagai omae efua koa iꞌopoga. Kai oi Iesu Kristo opakoꞌania aisama, Deo oi isafa Iesu fou kaimialao epamauni mueimi koa iꞌopoga. Ke Isa iꞌa aꞌa laomai apalaꞌi maꞌoai eꞌagegeainiꞌi. 14 Ke Deo ega koa ekapaisa, iꞌa aꞌa laomai apalaꞌi akapaiꞌi fouꞌi kepapuaꞌi, keifa apuiꞌa auꞌi laaꞌi epamiaꞌi, ke eafiiꞌi Iesu Kristo fou kolotiai eauꞌuꞌuiniꞌi, ega koa iꞌa aꞌa laomai apalaꞌi egaꞌina maꞌoai eaꞌiniꞌi. 15 Ke Deo Iesu Kristo maeai epamaunimue aisama, ufai ke agofaꞌai kai mo isapu keafia auꞌi, ke isapu keafia kepapinauga lopiaꞌi maꞌoai isafa eꞌi isapu eafaniꞌi. Ke Deo ega koa ekapaisa, kolotiai isa maꞌoai epalutiniꞌi auga laꞌafouai iꞌa maꞌoai epakinaiꞌa.
16 Iesu ega koa ekapaisa puo oi titi oania, o kapaꞌina oinu, o Deo fekeau afagaina miamiaga muninai fopea o afolopea, o gafa mamaga miamia*Iudea papiauꞌi eꞌi kagakaga kainai aufa kina gafa mamaga eogelai aisama, kemiamia kealogama. keoma auga kinagai miamia fokapa o afolokapa, o aufa iifiai Deo isau afagaina kina keoma auga kinagai Deo foau afagaina o foloau afagaina ganinagai, aufalao agaꞌo oi egaꞌina okapa auga laomai felo, o apala faeoma. 17 Egaꞌina kapaꞌi auga oi Deo maagai alo opai aumi afakepamiaimi kai, muni kapaꞌina koꞌaꞌi akemai auꞌi ogoꞌi. Kai kapa koꞌa ipauma auga oi Iesu mo muninai fopea.†Grik malagai auga, ‘Kai kapa koꞌa auga Iesu Kristo eegai.’ 18 Ke aufalao agaꞌo pifogeai ifo eꞌele koa epamia, ke agelo eau afagainiꞌi auga alogama epaꞌaua auga folologoaina oi faefogeimi, ega koa Deo oi emi laomai felo afa kapaꞌina foafia eoma auga foafia paisa. Papiau ega koa auga, kapaꞌina eisa auga fouga eifania epamaefania. Ke kapa felo agaꞌo aekapaisa mo ganinagai, papiau aumauni laoga maina apala auga isa eꞌima puo, niniꞌani koꞌa ekae kai ifo apuga laagai eogeaua eifania. 19 Ke isa ega koa ekapa puo, isa iifi eꞌa kaniagai auga Iesu Kristo faagagai laaꞌi. Ke papiau aumauni imaaugai gumi pitio unia fou eafiapiꞌi, imaauga fofouga keafiapia euki koa iꞌopoga, Iesu Kristo iifi eꞌa ega eafiapi oma, ke Deo iifi eꞌa egaꞌina papiau aumauni imaauga koa auga epaukia.
20 Ega puo oi Iesu Kristo fou iꞌina agofaꞌa laoꞌi maiꞌi eeꞌiai omae koa aisama, kapa puo oi iꞌina agofaꞌa apuga paisa koa iꞌopoga omia, ke iꞌina agofaꞌa iifaꞌi kaiꞌiai opea? 21 Oi iꞌina agofaꞌa iifaꞌi iina keifa omaꞌi auꞌi kaiꞌiai opea: ‘Egaꞌina kapa folokapa,’ keoma ke ‘Egaꞌina kapa foloani opogaina,’ keoma, ke ‘Egaꞌina kapa foloafi opogaina,’ keoma. 22 Kai egaꞌina iifaꞌi auꞌi maꞌoai agopapinauganiꞌi akelao laaꞌi akemia, gome egaꞌina auga papiau aumauni eꞌi pamalele, ke eꞌi iifa kapula. 23 Ke iifa gome egaꞌina iifaꞌi auꞌi, ikifa iifaꞌi koa iꞌopoꞌi, isa ifoꞌi au afagai ala fekekapa oma auga mo iifaꞌi, ke pifogeai ifoꞌi eꞌeleꞌi fekepamiaꞌi, ke ifoꞌi imaauꞌi fekepakiekie auga mo iifaꞌi. Kai egaꞌina iifaꞌi kaiꞌiai fekepea, fepalagainiꞌi papiau aumauni laoga maina apala kapaꞌina emaaga auga eegai fekaisapuꞌi auga afaekaina.