5
Puka Ke Sipi Gauga Fou
1 Egae kai Deo ega aguagu afugai eague auga ima kaina kainai puka apie apie malele kepapua, ke ipaafiapina kapaꞌi maꞌoai imagea gua kepaafiapia laisa. 2 Ke agelo isapu akaikiꞌa auga aina akaikiꞌagai iina eifa oma auga lau laisa: “Kaisau puka kepaafiapia kapaꞌi ageafilaiꞌi, ke egaꞌina puka agepaagalaisa agekaina?” 3 Kai ufai, o aagoai, o aagoa papagai keague auꞌi aufalao agaꞌo egaꞌina puka fepaagalaisa, o alo feisa auga laaꞌi. 4 Ke kai agaꞌo egaꞌina puka fepaagalaisa, o alo feisa fekaina auga akekapulaisa puo, lau laapepe alogaina. 5 Ega aisama au akaikiꞌaꞌi auꞌi 24 ufai keague auꞌi agaꞌo lau epainiau einaka, “Foloapepe! Moisa. Laion Juda ikupugai, Davide okogai emai, au akaikiꞌa auga ega ou auꞌi maꞌoai epalutiniꞌi efua. Ega puo isa puka, ke puka ipaafiapina kapaꞌi imagea gua auꞌi agepaagalaiꞌi agekaina,” eoma.
6 Ke isa eaguagu afugai, pagama kapaꞌi maaꞌi maunina auꞌi pani, ke au akaikiꞌaꞌi ufai keague auꞌi fou keagu lofe auga, ipuainagai Sipi Gauga eapa laisa. Isa iisa auga keaupugua koa iꞌopoga. Ke isa paꞌo imagea gua, ke maaga isafa imagea gua. Ke maaga imagea gua auga Deo ega spiritu auꞌi imagea gua eulaiꞌi agofaꞌa fofouga kelao auꞌi. 7 Sipi Gauga egaꞌina emai Deo ega aguagu afugai eague auga, ima kainai puka egaꞌina eafiia. 8 Ke eafiia aisama, pagama kapaꞌi maaꞌi maunina auꞌi pani auꞌi, ke au akaikiꞌaꞌi ufai keague auꞌi 24 auꞌi fou Sipi Gauga agogai keomukipo. Ke au akaikiꞌaꞌi ufai keague auꞌi agaꞌo agaꞌo harp*Iꞌina kapa auga kita koa iꞌopoga maiꞌufe kepaꞌopuania. keafiiꞌi, ke liti goldai kekapaꞌi aloꞌiai mulamula foga felo kepogu auꞌi keafiiꞌi. Mulamula foga felo egaꞌina auga, Deo ega papiau eꞌi megamega. 9 Ke iifi mamaga keifinia keinaka:
“Oi auga, puka ipaafiapina kapaꞌi,
ke puka egaꞌina aloafia alopaagalaisa agekaina aumu.
Gome oi keaupuguiso,
ke ifamuai ago agaꞌo agaꞌo papiauꞌi,
ke ikupu agaꞌo agaꞌo,
ke mala iꞌoiꞌi iꞌoiꞌi maꞌoai aloꞌiai papiau loꞌafaiꞌi Deo eega lolaoainiꞌi.
10 Ke oi isa emu agofaꞌa papiauꞌi,
ke emu sakedote lopamiaꞌi,
iꞌa aꞌa Deo ega pinauga fekekapa looma.
Ke isa maꞌoai agofaꞌa fofouga akeꞌima.”
11 Egae kai lau maau elao, ke agelo ealogai alogaina agapaauniꞌi afaekaina auꞌi ainaꞌi lalogonia. Ke agelo egaꞌina auꞌi, Deo ega aguagu afugai eagu afugai pagama kapaꞌi, ke au akaikiꞌaꞌi ufai keague auꞌi fou keapa lofeꞌi. 12 Ke agelo egaꞌina auꞌi keagaga keinaka:
“Sipi Gauga keaupugua auga,
isapu, paꞌamuꞌamu, ikifa ke kapula feafia auga ekainia.
Ke papiau isa kepalopiania,
ke au akaikiꞌa kepamia, ke keifagaina auga ekainia!”
13 Egae kai lau pagama kapaꞌi maꞌoai, ufai, aagoai, aꞌisa papagai, aꞌuai, ke kapa maꞌoai egae kekae auꞌi iina keifa oma ainaꞌi lalogonia:
“Kapa maꞌoai Deo ega aguagu afugai eague auga ke Sipi Gauga auga fou,
fekeifagainiꞌi, fekepalopianiꞌi, au akaikiꞌaꞌi fekepamiaꞌi,
ke isapu inagome auꞌi fekepamiaꞌi aoniamo!”
14 Ega aisama pagama kapaꞌi maaꞌi maunina auꞌi pani auꞌi keifa keinaka, “Amen,” keoma. Ke au akaikiꞌaꞌi ufai keague auꞌi keomukipo isa keau afagainiꞌi.