Masulo i ɗerewel i Pol nakə a watsay naha a
Timote
aye
Məfələkwe
Masulo i ɗerewel nakay Pol a watsay a Timote aye, maraha eye tə maduk i duk i bazlam neheye Pol a tsikay a Timote aye. Pol neŋgeye ma daŋgay (2.9), ndo hay haladzay ta mbəɗay dəba (1.15; 4.10-16). A sər ha mazlambar ma mətiye (4.6). A gwaɗay a Timote ndo məleke ha ma məsler, a wuɗa na andza wawa, ka dzameye gər ɗaɗa sa.
Ɗerewel nakay faya ma makweye ahaya a zləm məndze i Pol: Məsler ŋgay, məsənəke ŋgay, ɗəretsətseh ŋgay hay hərwi Labara Ŋgwalak eye. A vəlay gədaŋ a Timote ka məsəmay naha a ɗəretsətseh ma məsler i Kəriste (2.1-13). A gwaɗay mâ ɗa ha bazlam i Mbəlom ta tsəveɗ eye lele (2.14-15). Hərwi niye, Timote mâ ŋgəɗay a məkəɗe wuway, mâ mbəɗay dəba a ndo neheye faya ta giye wu neheye ŋgwalak eye bay aye, mâ pay bəzay na, a mede i Pol. Mâ hənay gər ada mâ ge na, wu nakə Pol ta ndo siye hay tə sənəkatay a ndo hay aye.
Wu neheye mawatsa eye na, ta dzəniye kway ka matətike wu deɗek eye (3.16).
1
Mətsike me i Pol
1 Maa watsa ɗerewel nakay na, neŋ Pol, neŋ ndo i maslaŋ i Yesu Kəriste andza nakə a say a Mbəlom aye. A slər ga ha hərwi ada nâ ɗa ha bazlam i sifa nakə Mbəlom a gwaɗ ma vəlateye a ndo neheye madzapa eye tə Yesu Kəriste aye.
2 Na watsaka naha a nəkar Timote. Nəkar na, na wuɗa kar haladzay andza wawa ga. Mbəlom Bəba kway tə Yesu Kəriste Bəy Maduweŋ kway tâ pa fakaya ŋgama, tâ gaka ŋgwalak ada tâ vəlaka zay.
Pol a may naha ɗərev a Timote
3 Neŋ faya na gay naha sɨsœ a Mbəlom hərwi yak. Neŋ faya na geye məsler tə ɗərev tsəɗaŋŋa eye andza i bəba təte ga neheye tə gaway məsler aye. Ahəl nakə na ɗuwulaway naha me a Mbəlom aye na, na ɗuwulaway naha me hərwi yak huya ta həvaɗ kwa ta həpat. 4 Həlay nakə ka tuwa aye na, kə mətseŋ gər bay.*Timote a tuwa ahəl nakə Pol a ye faya abəra a gər ha ma Efez aye. Zəba ma 1 Timote 1.3. A seŋ haladzay məŋgataka hərwi ada ɗərev ga mâ rah ta məŋgwese. 5 Na mətsa ha gər ta məpe mədzal gər yak nakə ka pa peteh ka Yesu Kəriste aye bay. Təday na, mama yak Lowis nakə a dzala ha ka Yesu Kəriste ada may yak Enise. Ayaw! Na sər ha ta deɗek ka dzala ha ka Yesu dərmak.
6 Hərwi niye, neŋ faya na gwaɗakeye sa: Kâ gay masəfaya a wu nakə Mbəlom a vəlaka gədaŋ məge aye bay. A vəlaka na, ahəl nakə na pa fakaya həlay aye. Vəlay ha ɗərev yak peteh ka məge.†Zəba ma 1 Timote 4.14; 5.22. 7 Kâ dzədzar bay hərwi Məsəfəre Tsəɗaŋŋa eye nakə Mbəlom a vəlakway aye na, ma təriye kway ha ndo i zluwer hay bay. Ɗuh ma vəlakweye gədaŋ məge məsler i Mbəlom ada tə mawuɗe siye i ndo hay ada tə məgay metsehe a bo kway.
8 Hərwi niye zluwer mâ gaka məɗe ha bazlam i Bəy Maduweŋ kway bay. Neŋ ma daŋgay na, hərwi ŋgay, ane tuk na, kâ ge horoy tə neŋ kame i ndo hay bay. Ɗuh təma məse ɗəretsətseh hərwi məɗe ha Labara Ŋgwalak eye andza neŋ dərmak. Ge andza niye ta gədaŋ nakə Mbəlom ma vəlakeye. 9 Mbəlom na, kə təma kway ha, a zalakway hərwi ada kâ tərakwa ndo ŋgay hay. A zalakway na, hərwi nakə ka gakwa məsler ŋgwalak eye bay, a təma kway ha hərwi a say məpe faya ŋgama. Andza məgweɗe na, kwa ahəl nakə məndzibəra andaya zuk bay aye ɓa kə ləva ha bo məvəle kway ŋgama tə həlay Yesu Kəriste. 10 Anəke na, ka bəz ha ŋgama nakə a vəlakway aye parakka hərwi Yesu Kəriste ndo mətəme ha ndo ki yaw. Neŋgeye na, kə zla na gədaŋ i mədahaŋ, a ɗa ha na, taɗə ka təmakwa Labara Ŋgwalak eye na, ka hutakweye sifa nakə ma ndəviye bay ka tor eye.
11 I ga na, Mbəlom a pa ga ndo i maslaŋ hərwi ada nâ ɗa ha Labara Ŋgwalak eye a ndo hay ada nâ tətikatay. 12 Hərwi niye nakə neŋ faya na siye ɗəretsətseh ma daŋgay aye. Ane tuk na, horoy a geŋ bay hərwi na sər Yesu Kəriste. Na dzala ha ka neŋgeye ada na sər ha ta deɗek ma sliye faya matsəpe Labara Ŋgwalak eye nakə a vəleŋ aye. Ma tsəpiye na hus a pat bagwar eye nakə ma deyeweye aye.
13 Tsikatay a siye i ndo hay bazlam deɗek eye nakə na tsikaka aye, kwa tsekweŋ kâ mbəɗay həlay bay. Ka tsikiye na, dzala ha ka Yesu Kəriste ada wuɗa ndo hay. Ge andza niye ta gədaŋ nakə a yaw mə Yesu Kəriste aye. 14 Kâ vəlay tsəveɗ a ndəray mâ mbəɗay həlay a labara ŋgwalak eye nakə Mbəlom a vəlaka aye bay, tsəpa na ta gədaŋ i Məsəfəre Tsəɗaŋŋa eye nakə mə ɗərev kway aye.
15 Nəkar ka sər ha ndo məpe mədzal gər hay ka Yesu neheye ka dala i Azi aye nəteye ta gər ga ha ŋgweɗek. Figelas ta Hermogenas nəteye mə walaŋ tay dərmak.‡Dala nakə Roma hay tə zalay Azi aye na, neŋgeye bəgom ka dala nakə tə zalay Turki aye. 16 Ane tuk na, Onezifor na, a maweŋ naha ɗərev, horoy kə gay kame i ndo hay hərwi nakə neŋ ma daŋgay aye bay. Bəy Maduweŋ kway mâ gay ŋgwalak a ndo i gay ŋgay hay. 17 Ahəl nakə a ndislew kanaŋ a wuzlah gay i Roma aye na, kə pəla təv nakə neŋ mə ɗəma aye puk puk lele hus a huta ga. 18 Bəy Maduweŋ kway Yesu mâ gay ŋgwalak pat nakə ma ta gateye sariya a ndo hay aye. Ka sər ha dərmak ahəl nakə neŋ ma Efez aye na, ka dzəna ga haladzay.