2
1 Baing ina naga, Urana sahi oxatua sabalunia xaung titia, xaung axamang longgalo duwa maluxu manadi.
2 Xaidap 7 ma, baing Urana bagu oxatandi tuxudi ba disup, baing yagua mana xaidapka 7 mana oxatang longgalo.✡Hibru 4:4,10; Xapdi Muli (Kisim Bek) 20:11 3 Binabu Urana sina guxama na xaidap 7 saing mogu naina, namua na xaidapka yagua mana oxatang longgalo tuxudi bungina tongtongia axamandi.
Urana Tongtongia Lup Xaung Haing
4 Naxuyanga li baxanga bungina sabaluna xaung titi disok, bungina Toxoratamona*Mana Hibru xuana dibung Urana yanoa bila li: YHWH. Ne hatata lipu tela xabia yaya ba waxungtuanoa te. Lipu teladi duxu yaya ba Yawe. Ne mugamugau ma, Hibrudi diti yaya ba sibuna, binabu dibili lipudi ba duxu. Dibung xailongia, ne suxungudingdi duxu yaya tela namuxinoa Toxoratamona. Kimuya, Yesu lipuxindi dinaxu mana ba disu mana kubolua ba, duxugia Urana yanoa bila ba. Binabu hatata tabung haruanga Toxoratamonabuninga sabangia bu tahatanga ba haruangua taxugia ba Urana yanoa mana Hibru xuana. Urana tongtongia titia xaung sabaluna.
5 Muga bing xai xaung xalaxala angingam dahaing teguyu, namua na Toxoratamona Urana sina kuya mari titia teguyu saing lipu tela wa teguyu bu hai xaung xuma titia. 6 Ning uxua haing sangua titia bu titi ubung longgalo langiding. 7 Baing Toxoratamona Urana taga lipua mana titi gagabinoa saing yubua yang walingama maluxu yungxang ginanginia, saing sok lipu walingam.✡1 Korin 15:45
8 Baing Toxoratamona Urana xuma umanga tela sanga karagia, maluxu mana titi tela yanoa Iden. La ba ta lipua taga ba maluxu. 9 Baing Toxoratamona Urana libu xai xangxana disok titia, bagungadingdi daxai sibuna xaung angingodingdi daxai mana xangingua. Maluxu mana umanga baguba xai luwa dili: xaiya sina walinga✡Hatanga Masok 2:7, 22:2,14 xaung xaiya sina xabianga mana xai xaung diana.
10 Lang tela sina langa na umangua ba luki masok mana titia Iden. La ba hata gatung luwa luwa. 11 Gatung mugamugangama yanoa Pison. Hokhogia maluxu titia Habila, titia gol wa mana ba. 12 Baing gol ba xai sibuna. Delium xaung oniks†Lipu xabiangamdi daxabia xai mana delium te. Teladi dahatum ba xai susunam tela samingang xai. Baing oniks siang giminak sabanggam tela, mugixing xangxana bila moxa babuna. duwa la ba xauna. 13 Gatung tela yanoa Gihon. Hokhogia maluxu titia Kus. 14 Gatung tela yanoa Taigris, luki maluxu Asiria rubinia sanga karagia. Baing gatung kimuama yanoa Yupretis.
15 Toxoratamona Urana xap lipua saing ta maluxu umangia Iden bu waxata xaung wasa mana. 16 Baing Toxoratamona Urana tabina lipua ba, “Ung sanga ba oxong xai aningong longgalo maluxu umangia li, 17 ne labu oxong xai aningondi mana xaiya sina xabianga mana xai xaung dianau tai. Namua na bungina oxong, maxung sibuna bagula umati.”
18 Baing Toxoratamona Urana harua ba, “Lipua wa olang bing xai te. Bagula ngatongtongia haulinganoa ba baba.” 19 Muga Toxoratamona Urana xap titia saing taga asaxa abunging longgalo xaung mang sabalunam longgalo masup. Tauna, xapdi ma rangua lipua bu lungu yaya baruamtadi bagula uxudi. Baing baru yanta lipua uxu taining tainina bing ding yadingdi naga. 20 Lipua sina yayadi na moru longgalo, mang sabalunam longgalo xaung asaxa abunging longgalo. Ne Adam haulingang tela te ba baba.
21 Binabu Toxoratamona Urana hamati lipua ba kinu hadali. Kinu mua, baing xap uleng hataing tela saing usiti yabanoa muli xaung sangga. 22 Baing Toxoratamona Urana tongtongia haing tela mana uleng hataina xap mana luba, saing xap ma rangua lipua.
23 Baing lipua harua ba, “Ina naga!
Tuandi disok mana tuagudi,
xaung sangganoa sok mana sanggagua.
Bagula ngauxu ba, ‘haing’,
namua na Urana xap masok mana luba.”‡Mana Hibru xuana, haruanga ‘lup’ bibinganoa bila haruanga ‘haing’.
24 Mana namua naga lup tela yunga baungtibundi saing taga rangua haininoa, baing tang disok lipu taininau.✡Matyu 19:5; Mak 10:7-8; 1 Korin 6:16; Epasas 5:31
25 Baing lipua haininoa tang duwa mulang, ne tang memeyading te.
✡2:2 Hibru 4:4,10; Xapdi Muli (Kisim Bek) 20:11
*2:4 Mana Hibru xuana dibung Urana yanoa bila li: YHWH. Ne hatata lipu tela xabia yaya ba waxungtuanoa te. Lipu teladi duxu yaya ba Yawe. Ne mugamugau ma, Hibrudi diti yaya ba sibuna, binabu dibili lipudi ba duxu. Dibung xailongia, ne suxungudingdi duxu yaya tela namuxinoa Toxoratamona. Kimuya, Yesu lipuxindi dinaxu mana ba disu mana kubolua ba, duxugia Urana yanoa bila ba. Binabu hatata tabung haruanga Toxoratamonabuninga sabangia bu tahatanga ba haruangua taxugia ba Urana yanoa mana Hibru xuana. Urana tongtongia titia xaung sabaluna.
✡2:9 Hatanga Masok 2:7, 22:2,14
†2:12 Lipu xabiangamdi daxabia xai mana delium te. Teladi dahatum ba xai susunam tela samingang xai. Baing oniks siang giminak sabanggam tela, mugixing xangxana bila moxa babuna.
‡2:23 Mana Hibru xuana, haruanga ‘lup’ bibinganoa bila haruanga ‘haing’.
✡2:24 Matyu 19:5; Mak 10:7-8; 1 Korin 6:16; Epasas 5:31