16
Hagar Ismael Tang
1 Tauna, Ebram haininoa Sarai hayau na te. Ne Sarai haining oxata olanggam tela, Isip tela yanoa Hagar. 2 Binabu Sarai harua na Ebram ba, “Ulungu nga to. Toxoratamona bili nga ba ngahayau. Ula ukinu rangua hainigu oxata olanggama. Bola bagula hayau gara nanga.”
Baing Ebram lungu Sarai haruanganoa. 3 Binabu Ebram haininoa Sarai xap haining oxata olanggama Hagar, haing Isipkama, saing sina na ayuanoa Ebram bila haininoa. Mana xaidapka baguba Ebram wa mana titia Kenan niani 10. 4 Kinu rangua Hagar, saing gamona.
Bungina Hagar bagu xabia ba gamona, ungguti hauxana mana haining haringinoa Sarai. 5 Baing Sarai harua na Ebram ba, “Namua mauxangana li xap nga bing ung baing! Nga ngata hainigu oxata olanggama ranguaung ba uhatabu. Baing ina naga, hatata xabia ba gamona, binabu hauxana manga. Ngawagi mana Toxoratamona ba suxuya gaxarea libu doa—ung kimbo nga!”
6 Baing Ebram harua ba, “Ulungu nga to. Hainim oxata olanggama wa hawa maung. Binabu ulibu baraxing baraxinta uhatum ba xai mana.” Saking Sarai libu doa mana Hagar laing sauya mala.
7 Toxoratamona uleginama sok mana Hagar haxek mana lang maxamaxang tela wa long xoliania, mana daxanga ila longga Sur. 8 Baing harua ba, “Hagar, Sarai haining oxata olanggama, uma bi ma, saing ula bi?”
Haxuya ba, “Ngasauya hainigu haringinoa Sarai saing ngaluki ma.”
9 Toxoratamona uleginama harua na ba, “Ugoxoya mala muli rangua hainim haringinoa saing usu mana haruanganoa.” 10 Baing Toxoratamona uleginama harua muli ba, “Bagula ngalibu bakbagimdi disok xumang sibuna, sanga mana lipudi dititidi te.”
11 Baing Toxoratamona uleginama harua muli na ba,
“Ulungu to, gamom
saing bagula uhayau gara lup tela.
Bing uxu yanoa ba Ismael,*Ismael namuxinoa Urana lungu.
namua na Toxoratamona lungu tingangim mauxanganama.
12 Bagula wa bila donki abungina,
bagula xukxugia lipu longgalo,
saing lipu longgalo bagula duxukxugia,
saing bagula wa sibing longgalo bixuadinga.”
13 Hagar sina yaya baguli na Toxoratamona harua na ba: “Ung Urana ubagu nga.” Namua na harua ba, “Ngabagu Urana bagu nga ba.” 14 Namua naga duxu lang maxamaxana ba Ber-Lahai-Roi.†Ber-Lahai-Roi namuxinoa lang maxamaxana mana Lipu Walingama bagu nga. Wauyu la ba, liwe mana longgadi Kades xaung Beret.
15 Binabu Hagar hayau garang luba na Ebram, saing Ebram uxu yanoa ba Ismael.✡Galesia 4:22 16 Ebram nianidi 86 bungina Hagar hayau Ismael na.