20
Ebraham Langua Abimelek
1 Bunging tela kimuya mana axadi ba Ebraham gabu bakbagindi xaung xalinging longga diyunga Mamre saing dila mana titia Negep liwe mana Kades xaung Sur. Bungina wa mua Gera 2 baing la ba Ebraham harua mana haininoa ba, “Hamungagua.” Binabu Abimelek xaitamoxi Gera dingia soxi lipuxing oxatamdi mala saing daxap ma na saing xap ba haininoa.✡Unggutinga (Stat) 12:13, 26:7
3 Ne yambong tela Urana owa masok rangua Abimelek mibingia saing harua na ba, “Ung ba xai mana umati namua na haingga oxop ba ina haing yaungam.”
4 Ne Abimelek kinu rangua teguyu binabu haxuya ba, “Toxoratamona, ngalibu kubolu dian tela te, bagula ung nga xaung lipuxigudi? 5 Ebraham baxanga nanga ba, ‘Haingga li hamungagua,’ xaung Sara baxanga nanga ba, ‘Lipua li moxongogua’? Ngalibu axamang tela doa mana te xauna rima sigixingana.”
6 Baing Urana harua na mibingia ba, “Wane, ngaxabiau ulibu kubolu dian tela mana te xaung ngasoxautiung labu ulibu kubolu dianoa maxagia. Namuana ung xoliana, ngayungaung ba ukinu rangua te. 7 Hatata ugoxoya haingga mala na ayuana. Mana ina lipuxigua suxunguxunguama xaung bagula sabu maung saing bagula uwa. Ning, bola ugoxoya mala na ayuana te, uxabia ba ung xauna lipuxim longga duwa yonggaximia bagula amati.
8 Buraraging tela, Abimelek mesa buraraging sibuna saing wagi mana oxata toxong taining taina yanamidingdi ma saing naxuya baraxinta sok mibingia nadi, sing longga dimaxuwa sibuna. 9 Baing Abimelek wagi Ebraham ma saing harua ba, “Baruta ulibu kubolua li mam? Ngalibu doa naung baru? Ne ulibu kubolu diang sibuna, ulibu haruanga sulingama xap nga xaung lipuxigudi yonggaxigia. Kubolua ulibu bila ba xai te.” 10 Baing Abimelek xusunga Ebraham ba, “Baruta ulibu bila li?”
11 Ebraham haxuya ba, “Ngalibu alali namua na ngahatum ba lipu tela mana longga li wa hawa mana Urana te xaung lipudi bagula dung nga saing daxap hainigua. 12 Xauna, maxunau hamungagua tam tibumam taininau ne baumam bing tela ne ngayau. 13 Baing bungina Urana bala nga mana ngayunga tibugua yabanoa, ngaharua na ba, ‘Alali ung sanga uhatanga murungama baru nanga: long longga tala, uharua manga ba, “Moxongogua.” ’ ”
14 Baing Abimelek sina sipsip xaung bulmakau xaung hainglipu oxata olanggamdi na Ebraham, saing goxoya haininoa Sara na. 15 Baing Abimelek harua ba, “Ubagu etua mana titi longga ngawa manadi. Uwa mana long baruamta ung murum mana.”
16 Harua na Sara ba, “Ulungu to ngasina 1000 sekel mana silba mukirindi na moxongoma ba hamaringia mauxangana sok maung binabu bakbagimdi daxabia ba ulibu kubolu dian tela te.”
17 Baing Ebraham sabu na Urana, saing Urana hamaringia Abimelek, haininoa xaung haing oxata olanggamdi binabu daxap gara muli, 18 mana Toxoratamona soxauti haing longga duwa ganangania ba gamoding namua mana Ebraham haininoa Sara.