2
Tamaxania Nam Tayunga Ulega
1 Bila balau, binabu tatuxu haringina haruanga maxunama talungu ba, nam tala tala bu tarabang. 2 Namua na ulega Urana uleginamdi dibaxanga waleu li haringina. Xauna, lipu longgalo didali hanaunaunga li xaung disu mana te, ding daxap salaga hasusu mana kuboludinga. 3 Bila balau, baing ina naga, nabu tayamu ulek sabangga li mana Urana xap lipudi muli, bing bagula tadali salaga baru? Ulekka li Toxoratamona habingia muga, saing adi dilungu ba dahatanga nakira ba maxuna. 4 Urana xauna hatanga ba maxuna bungina libu axamang haringing xangxana, xaung bungina sina yahangadi dima rangua Aningonoa ba, tuxu sinak manadi mana ing murunganoa.
Yesu Sok Bila Riandi
5 Walinga ma kimuya ba, walinga hauna hatata taharua mana ba, Urana mogu uleginamdi ba duwa etua mana te. 6 Ne mana Urana Xuanoa lipu tela harua na Urana ba,
“Lipudi ding baraxinta bu uhatumiadi?
Garadingdi ding baraxinta bu uwasa manadi?
7 Uta lipudi hawa mana ulegimgamdi bunging mongaitau.
Ne ulibu lipudi yadingdi duwa sabanga, uitidi bila xaitamoxidi,
8 saing uta axamang longgalo hawa manadi.”✡Olaidi (Buk Song) 8:4-6
Baing haruanga “axamang longgalo” namua bing axamang tela wa olang singia te. Ne hatata tabagu axamang longgalo duwa hawa manadi te. 9 Ning tabagu Yesu, lipua Urana ta hawa mana uleginamdi bunging gamoitau. Tabagu hatata xap yaya sabanga xaung Urana iti bila xaitamoxi, namua na xap salaga saing mati, bu mana Urana kubolung atin dimoti ba, Yesu xap lipu longgalo yabadinga matiania bu haulidi.
10 Urana tongtongia axamang longgalo xaung ding duwa mana ing murunganoa. Bo ba xap garang xumana mala bu duwa rangua ralania. Binabu maring ba libu lipua ila muga mana oxata baguba xap salaga, bu wa lipua sanga sibuna mana xaxa daxangua mana Urana xapdi muli. 11 Namua na lipua libudi dimaring xaung lipuadi disok maringina ba, ding duwa bakbak taininau. Namua naga Yesu memeyan te ba uxudi ba kixingindi. 12 Harua na Urana ba,
“Bagula ngatula yama na kixingigudi,
mana lipudi diguguniaʼm sabungua maxadingia ba,
bagula ngawaya olaidi diti yama.”✡Olaidi (Buk Song) 22:22
13 Baing harua muli ba,
“Bagula ngahatum haringina mana Urana.”✡Aisaya (Aisaia) 8:17
Baing harua muli ba,
“Bagu nga, nga ngagabu garadi Urana sinadi nanga.”✡Aisaya (Aisaia) 8:18
14 Tauna, garadi harua manadi ba bing lipudi. Sanggading xaung sibiding. Binabu Yesu xauna sok lipu bila ding baing, bu mana matianoa sanga ba hanggalangia xaungadi yanamidinga, lipua tuxu matia haringinganoa ba. 15 Lipudi dimaxuwa mana matiyua, saing maxuwanga ba tuxudi haringina salak yabania xaidabiding longgalo. Ning Yesu mati bu uniadi sangua salak yabana ba. 16 Maxung sibuna, oxatana ba hauli Urana uleginamdi te. Tegu. Hauli Ebraham bakbagindi. 17 Namua naga Yesu sok sibuna bila bakbagindi, bu sok lipu hananiangam mugamugangama usingadi, xaung bungingbunginalo tuxu Urana oxatanoa haringing sibuna. Bing sok sibuna bila bakbagindi xauna bu libu Urana atin daxaringa mana matianoa, xaung tongtongia daxangua mana Urana yunga lipudi kuboluding diandi. 18 Yesu ing sibuna xap salaga bungina tubaikdi daxap, binabu sanga ba hauli lipu gaxarea tubaiga xapdi.