2
Yona Sabunganoa
1 Yona wa song gamonia, baing sabu mala rangua Toxoratamona, Urana inia, 2 harua ba:
“O Toxoratamona, mauxangang sabanga xap nga, baing ngawagi maung,
saing uhaxuya nanga.
Long matiama bo ba xap nga, baing ngawagi mana haulingua,
saing ulungu nga.
3 Uting nga mari tek lunia,
ngada mari tek lung sibunia.
Tega kau nga masup,
rubam sabangadi dahalunglung etua manga.
4 Baing ngaharua ba, ‘Usuka nga mala sangua maxama,
ning bagula ngabagu muli numam maringinoa.’
5 Tega hibua waxugutuana,
tega kau dalinga manga masup,
saing lamlam dahahauya toxogua.
6 Ngada mari laing bimbi namuya,
long matiama soxauti nga salaging yabania,
xaluxindi ribaiding bungingbunginalo.
Ne ung, O Toxoratamona Urana ngayua,
uiti nga sangua long matiama.
7 “Bungina ngaxunumia ba ngabo ngamati,
Toxoratamona ngahatumiaung,
saing sabungagua haing mala ranguaung,
maluxuʼm Numam maringinia.
8 “Adi disabu mana babu olangdi
diyamu kubolum atim dimoti manadi.
9 Ne nga ba, bagula ngahanania naung,
xaung olaiyadi diti yama.
Baru haruanganta ngahau bagula ngalibu.
Toxoratamona ing ganina xap muli.”
10 Bang Toxoratamona tabina songga saing xua Yona tek singia.