5
Sipsip Tutubina Xaxa Xailonga
1 Ngabagu xailong lukingam tela wa mana lipua rung kabukabu xaitamoxiamia rimang rimamo. Buninga duwa hataing hataina, saing tagaina xaung tagangang*tagangang 7—Xailonga na bila ba xailonga diluki. Diluki masup baing digoxi waxu teladi wagigia. Digoxi masup baing dimatu axamang tela bila xai susuna mari mana buxuyanganoa. Bungina mamasa bing tagaina. Alali hatanga ba xailong moxona kimbo lipu ina mogu ba sanga ba ding ganiding daxaxa xailongga ba. 7. 2 Baing ngabagu Urana uleginam haringing tela wagi sabanga ba, “Gaxarea maring Urana maxania sanga mana taguti xailonga tagangandi saing xaxa xailonga?” 3 Ning lipu tela wa long xaiya kimbo titia kimbo hawa mana titia sanga ba xaxa xailonga te, kimbo bagu maluxu mana te. 4 Ngatang ngatang mua namua na lipu tela maring Urana maxania te sanga ba xaxa xailonga kimbo bagu maluxu mana. 5 Baing lipu haringinadi ba tela harua nanga ba, “Labu utanggu tai! Bagu, lipua duxu ba Layon Mana Bakbakka Yuda, Debit Bakbaginoa Muxumuxunoa, dali ba! Binabu ina sanga ba xaxa xailonga xaung tagangang 7.”
6 Baing ngabagu Sipsip Tutubing†Sipsip Tutubina—Haruanga li harua mana asaxa Yudadi dahanania mana Taunga Dalingam. Babu mana Urana Lipuxing Mogunganama, Yesu baing. tela bagunganoa bila mati lo, li haxek mana kabukabu xaitamoxiama, lia mana axamang walingam luwadi luwadi xaung lipu haringindi. Ina salaming 7, xaung maxang 7, maxadi ba babu mana Urana Aningonoa ing haringingang 7, ina soxi mala mana titi hataing longgalo. 7 Ila saing xap xailonga sangua lipua rung kabukabu xaitamoxiamia rimang rimamo. 8 Xap masup baing axamang walingam luwadi luwadi xaung lipu haringing 24 digung kiding tuxundi, saing dituru mari titia Sipsip Tutubina ba maxania. Ding taining tainina dituxu axamang olaiyam tela bila gita duxu ba hap xaung bori golidi dibaxagi mana xai susung saminamdi ditaudi, ding bila Urana lipuxing maringindi sabungadingdi. 9 Baing duwaya olai haun tela ba:
“Ung maringina Urana maxania sanga mana oxop xailonga
saing utaguti tagangandi,
namua na ung ba dunggung mati ba,
saing mana ung sibima ugim lipudi na Urana
dima mana bakbak longgalo xaung xuaxua longgalo xaung sangga mugixing longgalo xaung numanuma longgalo.
10 Ulibudi disok yongga tela xaung lipuadi dituxu Urana kiria oxatanoa,
saing bagula duwa etua mana axamandi titia.”
11 Baing ngabagu saing ngalungu Urana uleginam xumana waxudingtuandi, titingadinga dali xumang sibuna sanga ba lipu tela titidi te. Duwagigia kabukabu xaitamoxiam xaung axamang walingamdi xaung lipu haringindi. 12 Duwaya sabanga ba:
“Sipsip Tutubina, ina dung mati ba, maring Urana maxania
sanga mana axamang longgalo daharua ba, ing haringinganoa xaung xalingina xaung xabianga longgalo duwa rangua xaung ina lipu haringingam
xaung lipu sabanga xaung lipu ralanam xaung diti yanoa!”
13 Baing ngalungu axamang walingam longgalo duwa long xaiya, xaung titia, xaung hawa mana titia, xaung doti tek ubunia, xaung axamang walingam longgalo duwa maluxu manadi duwaya ba:
“Lipua rung kabukabu xaitamoxiamia xaung Sipsip Tutubina ba,
taiti tang yadingdi, tasina yaya nadi, taharua ba ralang sabanga xaung haringinga sabanga duwa ranguadi
bungingbunginalo!”
14 Axamang walingam luwadi luwadi daharua ba, “Maxung sibuna!” Baing lipu haringindi digung kiding tuxundi, dituru mari titia saing disabu mana dingtang.
*5:1 tagangang 7—Xailonga na bila ba xailonga diluki. Diluki masup baing digoxi waxu teladi wagigia. Digoxi masup baing dimatu axamang tela bila xai susuna mari mana buxuyanganoa. Bungina mamasa bing tagaina. Alali hatanga ba xailong moxona kimbo lipu ina mogu ba sanga ba ding ganiding daxaxa xailongga ba.
†5:6 Sipsip Tutubina—Haruanga li harua mana asaxa Yudadi dahanania mana Taunga Dalingam. Babu mana Urana Lipuxing Mogunganama, Yesu baing.